1 O bɛrɛla bɛmaa yɛdo edwɛne yɛmaa Awulae; bɛmaa yɛva fɛlɛkolilɛ yɛdo edwɛne yɛmaa Nana Nyamenle, mɔɔ le yɛ Ngoanedievolɛ la!

2 Bɛmaa yɛva moyɛlɛ yɛrɛla ɔ nyunlu; bɛmaa yɛva fɛlɛkolilɛ yɛyɛ alɛra na yɛdo ayɛlɛyelɛ edwɛne yɛmaa ye! 3 Ɔluakɛ Awulae le Nyamenle Bedevinli, na ɔle Belemgbunli kpole, ɔbo awozonle kpokpoti anwo zo. 4 Yemɔ a sie aleɛabo kpokpoti, ɔbɔ ye tokule nu kɔkpula awoka ne mɔ azo a. 5 Nyevile ne le ye deɛ, ɔluakɛ ɔdaye a ɔbɔle ye a; yɛɛ ɔ sa noko a ɔvale ɔyɛle azɛlɛ resee ye a. 6 Bɛrɛla bɛmaa yɛbɔ yɛ ti aze na yɛzonle ye; bɛmaa yɛhoto Nana Nyamenle, mɔɔ le yɛ Bɔvolɛ la anyunlu! 7 Ɔluakɛ yemɔ a le yɛ Nyamenle a; na yɛmɛ mɔ, yɛle ye adidileka ne nee ɔ sa nu mboane. O kɛkala angome a, anrɛɛ ɛnɛ demua ye yɛyɛ ɛnzolɛ yɛdie ye! 8 Mmamaa bɛkpunli bɛ ahonle ne mɔ, kɛmɔ bɛ ze mɔ yɛle ye wɔ Mɛleba, anzɛɛ kɛmɔ bɛyɛle ye mekɛ ne anu wɔ Masa, wɔ fienemgbole ne azo la. 9 Ɛkɛ ne a bɛ ze mɔ gyegyele me na bɛzɔle me bɛnleanle a, wɔ mekɛ bɔbɔ mɔɔ ɛnee bɛnwu mɔɔ menyɛle memaanle bɛ la. 10 Wɔ ɛvolɛ abulanla anu, mengyile bɛ, na menganle kɛ, "Menli ɛhye mɔ ɛnli nɔhalɛ wɔ bɛ ahonle nu! Bɛkpo kɛ bɛkɛli me mɛla ne mɔ azo." 11 Zɔhane ati melua me ɛyavalɛ nu menganle ndane kɛ: "Bɛnrɛhɔ me anzondwolɛ azɛlɛ ne azo kenlebie maanle nu ɛlɛ, ɛleka ne mɔɔ anrɛɛ menwɔmaa bɛ ɛnwomenlelielɛ la."