1 ହେ ଟଣିଟ୍‌ କୁଡ଼ି, ଅକଏଚି ଚିଉଲାଅ କାଏ ହାମ୍ବାଲ୍‌ରୋୱାକାନ୍‌ନିଃ, ହନ୍‌ ଜାନାମ୍‌ ହବାଅଃ ଇମ୍‌ତାରେୟାଃ ଦୁକୁ ଚିଉଲାଅ କାମ୍‌ ନାମାକାଦା,

ଆମ୍ ପୁରାଃଗି କାଉରି କେଦ୍‌ତେ ରାସ୍‌କାତାନ୍‌ଲଃ ଦୁରାଙ୍ଗ୍‌ୟେଁମେ।

ଚିୟାଃଚି ପ୍ରାଭୁ କାଜିତାନାଏ,

ଆଣ୍‌ଦିୟାକାନ୍‌ କୁଡ଼ିରାଃ ହନ୍‌ ଏତେ ରାଣ୍ଡି କୁଡ଼ିରାଃ ହନ୍‌କ ପୁରାଃଗି ହବାଅଃଆକ।

2 ଆମାଃ କୁମ୍ବାରାଃ ତାଇନ୍ ଠାୟାଦ୍ ଓଡ଼ୋଃ ପାର୍‌ଦା ଲିଜାଃକେ ଆୟାର୍‌ତେ ପାସ୍‌ରାଅ ଇଦିମେ,

ଅକଆଃ ଲାଗାତିୟାଁ ଏନା କିରିଙ୍ଗ୍‌ ନାଗେନ୍ତେ ଆଲମ୍‌ ବରଏୟା,

ଓଡ଼ୋଃ ଆମାଃ କୁମ୍ବାରେୟାଃ ବାହେର୍‌ ଜିଲିଙ୍ଗ୍‌ୟେଁମେ ଓଡ଼ୋଃ ଖିଲାକ କେଟେଦ୍ କେଦ୍‌ତେ ତଲେମେ।

3 ଚିୟାଃଚି ଆମ୍‌ ଲେଙ୍ଗାସାଃ ଓଡ଼ୋଃ ଜମ୍‌ସାଃ ପୁରାଃଗି ପାସ୍‌ରାଅ ଇଦିୟାମ୍‌।

ଆମାଃ କିଲିକ ଏଟାଃ ଦିଶୁମ୍‌କେ ଆକ୍‌ତେୟାର୍‌ କେଦ୍‌ତେ ରାଇଜ୍ ରିକାୟାକ

ଓଡ଼ୋଃ ଇନ୍‌କୁଆଃ ହଡ଼ କା ତାଇନଃ ନାଗାର୍‌କରେ ତାଇନାଃକ।

4 ଆଲମ୍‌ ବରଏୟା, ଆମ୍‌ କାମ୍‌ ଗିହୁଗଃଆ।

ଚାଏ ଆମାଃ ଗସ ମେଦ୍‌ମୁହାଁଡ଼୍‌ କା ହବାଅଃଆ,

ଚିଆଃଚି ଆମ୍‌କେ କା ଗିହୁଃ ରିକାଅଃଆ।

ଆମ୍‌ ଆମାଃ ଡିଣ୍ଡା ଦିପିଲିରାଃ ଗିହୁଃ କାଜି ରିଡ଼ିଙ୍ଗ୍‌ତାଃମେ

ଓଡ଼ୋଃ ଆମ୍‌ ଆମାଃ ଟଣିଟ୍‌ ଦିପିଲିରାଃ ନିନ୍ଦା କାଜିକ କାମ୍‌ ପାହାମେୟା।

5 ଚିୟାଃଚି ଆମାଃ ବାବାଇନିଃ ଆମାଃ କଡ଼ା ତାନିଃ,

ଇନିୟାଃ ନୁତୁମ୍‌ ପୁରାଃ ପେଡ଼େୟାନ୍‌ ପ୍ରାଭୁ ତାନାଃ

ଓଡ଼ୋଃ ଇସ୍ରାଏଲ୍‌ରାଃ ପାବିତାର୍‌ ପାର୍‌ମେଶ୍ୱାର୍‌ ଆମାଃ ବାଞ୍ଚାଅନିଃ ତାନିଃ।

ଇନିଃ ସବେନ୍ ଅତେଦିଶୁମ୍‌ରେନ୍ ପାର୍‌ମେଶ୍ୱାର୍‌ ମେନ୍ତେ ନୁତୁମଃଆ।

6 ଚିୟାଃଚି ଆମାଃ ପାର୍‌ମେଶ୍ୱାର୍‌ କାଜିତାନାଏ,

ଆମ୍‌ କଡ଼ା ବାଗିୟାକାନ୍‌ ଓଡ଼ୋଃ ଗସ ମେଦ୍‌ମୁହାଁଡ଼୍‌ କୁଡ଼ି ଲେକା ତାଇକେନାମ୍‌

ଓଡ଼ୋଃ ଡିଣ୍ଡା କୁଡ଼ି ଆଣ୍‌ଦି ତାୟମ୍‌ତେ ସାଙ୍ଗିନାକାନ୍‌ ଲେକା ତାଇକେନାମ୍‌।

ମେନ୍‌ଦ ପ୍ରାଭୁ ଆମ୍‌କେ ଆଡଃମିସା କେଡ଼ା କାଦ୍‌ମେୟାଁ।

7 ଆଇଙ୍ଗ୍‌ ଘାଡ଼ିକାଦ୍‌ ନାଗେନ୍ତେ ଆମ୍‌କେ ବାଗିୟାକାଦ୍‌ମେ ତାଇକେନାଇଙ୍ଗ୍‌,

ମେନ୍‌ଦ ପୁରାଃ ଦାୟାତେ ଆମ୍‌କେ ରୁହାଡ଼୍‌ ଆଉମେୟାଁଇଙ୍ଗ୍‌।

8 ଆଇଙ୍ଗ୍‌ ପୁରାଃଗି ଖିସ୍‌କେଦ୍‌ତେ ଘାଡ଼ିକାଦ୍‌ ନାଙ୍ଗ୍‌ ଆମାଃତାଃଏତେ ସାଙ୍ଗିନ୍‌କାନ୍‌ ତାଇକେନାଇଙ୍ଗ୍‌।

ମେନ୍‌ଦ ଜାନାଅ ଦାୟାତେ ଆଇଙ୍ଗ୍‌ ଆମ୍‌କେ ଦୁଲାଡ଼୍‌ ରିକାମେୟାଇଙ୍ଗ୍‌, ନେଆଁ ଆମାଃ ବାଞ୍ଚାଅନିଃ ପ୍ରାଭୁ କାଜିତାନାଏ।

9 ଆଇଁୟାଃ ନାଗେନ୍ତେ ନେଆଁ ନୁହୁଁରାଃ ଦିପିଲି ଲେକା ତାନାଃ,

ଆଇଙ୍ଗ୍‌ ନୁହୁଁରାଃ ଦିପିଲିରେ ହବାକାନ୍‌ ଟୁଡାଦାଆଃ ଲେକା ଚିଉଲାହ ଅତେଦିଶୁମ୍‌କେ କାଇଙ୍ଗ୍‌ ଟୁଡାଏୟା ମେନ୍ତେ କିରିୟାକାଦ୍‌ ତାଇକେନ୍‌ ଲେକାଗି ନାହାଁଃ କିରିୟାକେଦ୍‌ତେ କାଜିତାନାଇଙ୍ଗ୍‌ ଯେ,

ଆଇଙ୍ଗ୍‌ ଆମାଃ ଚେତାନ୍‌ରେ କାଇଙ୍ଗ୍‌ ଖିସ୍‌ଅଃଆ, ଚାଏ ଆମ୍‌କେ କାଇଙ୍ଗ୍ ଏଗେର୍‌ମେୟାଁ।

10 ଅକ ପ୍ରାଭୁ ଆମ୍‌କେ ଦାୟା କାଦ୍‌ମେୟାଁ, ଇନିଃ କାଜିତାନାଏ,

ସବେନ୍ ବୁରୁକ ଏକ୍‌ଲାଅଃ ରେୟଗି ଚାଏ ବୁରୁବେଡ଼ା ସାଙ୍ଗିନଃ ରେୟଗି

ଆମାଃଲଃ ଆଇଁୟାଃ କା ଟୁଣ୍ଡୁଃ ଦୁଲାଡ଼୍‌ କା ସାଙ୍ଗିନଃଆ ଚି

ଆଇଁୟାଃ ଜୀଉସୁକୁରାଃ ରାଜିନାମା କା ଟଟାଗଃଆ।

11 ହେ ଦୁକୁତାନ୍‌ ନାଗାର୍‌, ଆନ୍ଧିହୟତେ ଛିତିବିତିୟାକାନ୍‌ ଓଡ଼ୋଃ ଜୀଉରାଡ଼େଃ କା ନାମାକାଦ୍‌ନିଃ,

ଆୟୁମେମ୍‌, ଆଇଙ୍ଗ୍‌ ଆମ୍‌କେ ରାକାମ୍ ରାକାମ୍ ସୁଗାଡ଼ାନ୍‌ ରାଙ୍ଗ୍‌ତେ ଆମାଃ ଦିରି ଦୁବେୟାଇଙ୍ଗ୍‌,

ନୀଳକାନ୍ତ ମଣିତେ ଆମାଃ ନିହିଁଗାଡା ବାଇୟାଇଙ୍ଗ୍‌।

12 ପଦ୍ମରାଗ ମଣିତେ ଆମାଃ ରାଜ୍‌ମାହାଲ୍‌ରାଃ ଚୁଟିକେ ବାଇୟାଇଙ୍ଗ୍‌।

ସୁର୍ଯ୍ୟକାନ୍ତ ମଣିତେ ଆମାଃ ଦୁହାର୍‌କ

ଓଡ଼ୋଃ ଗନଙ୍ଗ୍‌ଆଁନ୍‌ ଦିରିତେ ଆମାଃ ପାଚ୍‌ରି ବାଇୟାଇଙ୍ଗ୍‌।

13 ଆମାଃ ହନ୍‌କ ପ୍ରାଭୁଆଃ ହରାତେ ଏସ୍‌କାର୍‌ ସବେନ୍‌କ ଇତୁନାଃକ

ଓଡ଼ୋଃ ଆମାଃ ହନ୍‌କ ପୁରାଃ ଜୀଉସୁକୁ ନାମେୟାଁକ।

14 ଧାର୍‌ମାନ୍ ହରାତେ ଆମ୍ କେଟେଜଃଆମ୍‌।

ଆମାଃତାଃଏତେ ସିଗିଦ୍ ପୁରାଃ ସାଙ୍ଗିନ୍‌ରେ ତାଇନାଃ, ଚିୟାଃଚି ଆମାଃତାଃରେ ବର କା ତାଇନାଃ।

ବରୱାନ୍‌ କାଜିକ ଆମାଃତାଃଏତେ ସାଙ୍ଗିନ୍‌ରେ ତାଇନାଃ, ଏନା ଆମାଃ ହେପାଦ୍‌ତେ କା ହିଜୁଃଆ।

15 ଜେତାଏ ଆମାଃଲଃ ଲାଡ଼ାଇୟାଏ ରେଦ, ଏନା ଆଇଁୟାଃ ସାଃଏତେ କା ହବାଅଃଆ।

ଜେତାଏ ଆମାଃଲଃ ଲାଡ଼ାଇ ରେଦ ଇନିଃ ଆମାଃ ହରାତେଗି ଜିୟନଃଆ।

16 ଆଇଙ୍ଗ୍‌ ବାଡାଏକେ ବାଇ କାଜାଇଙ୍ଗ୍‌, ଇନିଃ କୁଇଲାରେ ସେଙ୍ଗେଲ୍ ଜୁଲାଃଏ

ଓଡ଼ୋଃ ଅକ କାମି ନାଙ୍ଗ୍‌ ଲାଗାତିଙ୍ଗ୍‌ ଲେକାନ୍ ହାଁତେୟାର୍‌ ବାଇୟାଃଏ।

ଜିୟନ୍‌ ରିକା ନାଗେନ୍ତେ ଆଇଙ୍ଗ୍‌ଗି ଜିୟନ୍‌ନିଃକେ ବାଇ କାଜାଇଙ୍ଗ୍‌।

17 ଆମାଃ ବିରୁଧ୍‌ରେ ବାଇୟାକାନ୍ ଜେତାନ୍ ହାଁତେୟାର୍‌ କାମିରେ କା ହିଜୁଃଆ।

ଆମାଃ ବିରୁଧ୍‌ରେ କାଜିତାନ୍‌ ସବେନ୍‌ ଆଲାଙ୍ଗ୍‌କେ ଆମ୍ ଚିଟାଏୟାମ୍‌।

ନେଆଁଗି ପ୍ରାଭୁଆଃ ଦାସିକଆଃ ଆକ୍‌ତେୟାର୍‌ ତାନାଃ,

ଓଡ଼ୋଃ ନେଆଁଗି ଇନ୍‌କୁଆଃ ନାଙ୍ଗ୍‌ ଆଇଁୟାଃ ଏମାକାନ୍‌ ଧାର୍‌ମାନ୍‌ ତାନାଃ।

ନେଆଁ ପ୍ରାଭୁ କାଜିତାନାଏ।