1 Bosate Wɔ Nsiguso Siwarã sia me iso,

alasɔ Bosate ɔsɔla me nnɔĩ

sɔ loɖi itɔ̃me bielea loɣere mawɛrɛba.

Ɔsese me sɔ losa mma situ lobiɛ

sɔ lopɛ imomo lotã mafɔrɔĩ sɔ maɔtã ma isɛguso

sɔ loɣere mayorɛdze*61.1 Hebri siɖe sɔ: Si lobusi manɔbiɛdze anɔmi sɔ maɔɖi ma i iyorɛ ame.

2 Sɔ lopɛ imomo sɔ Bosate kayiribielea ikɔ ɔɔɣo,

fiɛ bo Ɣaa to ɔ̃ati ma matsirise kuso.

Sɔ lopia mma ɔɖuɖu nto mamararã so kɔrɔ̃ i kayiri.

3 Sɔ lobie ara lotã mma nto mamararã so i Zion -

si lotɔmedza ma aɣɔ̃la ikɛrɛra ikoto

i ndɔ̃ kanya,

loasɔla ma nnɔĩ mɛ loatã mana isoɣɔ,

i imararãso kanya,

loatã iyiɖea arapia wa loaɖe ile

i siwarã dzɛ mpia i isoma ame kanya.

Iyɔ maakpere ma sɔ ara bɔlɔlɔa ibara siɖum,

Bosate adziri wa ɔpia

si ɔsu ɔpia so kuwarɛ.

4 Mato maaledza makuere akpakpi itara

fiɛ maaledza ngɔi mɛ manina masɛ kokooko;

mato maaledza simagɛ̃siare dzɛ mawɔra iɖaɛ

fiɛ maaledza ara wa manina siɣekparɛ gbodzoo isɛra.

5 Nɖebi mama maturi to maanyɔ mi mabɔi akuri iso matã mi.

Mafɔ to maakpɛ̃ siwĩ fiɛ maanyɔ mi wainnkpɛkɔ̃ iso matã mi.

6 Mato maakpere mi sɔ Bosate masɔrɛdze,

fiɛ maarɔ mi sɔ bo Ɣaa masumudze.

Mito miaɖe nɖebi karana gbodzoo ara,

fiɛ miaɖe ndamu i ma karana iso.

7 I mafɔ kunuarɛ kanya ne

wũ maturi to maana kusɛkusɛ gbodzoo.

I asopa kanya ne

wũ maturi to maana isoɣɔ i mafɔ kaɖekɔ̃ ame.

Ne ɔso mato maana kusɛkusɛ gbodzoo lɛ kaɖekɔ̃ i ma karɔ̃ iso,

fiɛ isoɣɔ nɛ nna katuĩ loaɖe ma ɔkpɛ.

8 "Alasɔ Mme, Bosate nsɛ loɖɔɛ itɔ̃me nɛ loya.

Lotsiri adzokayu gu aranyanyariã ibara.

Loatã wũ maturi kuso i wũ ɔnukuareiɖe ame

fiɛ loakãgu ma ndamu mɛ loase ɔwi daaro.

9 Mato maatsue ma ɔkparɛ i nɖebi ndɛ̃,

fiɛ ma mabi to maafɔ iyere i maturi mama ndɛ̃.

Maturi ɔɖuɖu ma loanya ma aatsue maɖiite

sɔ maɖe kaɖe ga i Bosate ɔfere kusɛkusɛ."

10 Loto lona isoɣɔ i Bosate iso gbaã;

wũ ɔkala sɛ ɔlɛlɛ i wũ Ɣaa iso.

Alasɔ ɔsu iɖi ɔpia me lɛ arapia awe

fiɛ ɔpia me ara bɔlɔlɔa ibara awu tagbaraa,

lɛ kumɛgɔ i ɔrɛrɛ̃ wɔ nto ɔkɔ ɔrɔ̃go sɛ ɔkɛrɛ ɔ̃ iti lɛ sɔrɛdze awe

gu lɛ kumɛgɔ i ɔrɔ̃go wɔ nto makɔ sɛ ɔkɛrɛ so ku ɔ̃ akɛrɛra awe.

11 Alasɔ kumɛgɔ i karɔ̃ sɛ katã ara ɔre

fiɛ kawĩ sɛ katã ɔraɖui wɔ mapɛ ɔre fiɛ ɔmɔ ne,

kumɛɔ i Bosate Wɔ Nsiguso aabara iɖi gu ile

sɔ are si nɖebi ɔɖuɖu aanya male wũ.