1 तीजी ते बाद, परमेशरे जोरे की माखे बोलेया, ताकि बऊत जे लोक सुणी सको, "तिना लोका खे एती ल्याओ जिना यरूशलेम शईरो रे लोका खे सजा देणी! पईरेदारा खे बोलो कि सेयो आपणे अथियार साथे लई की आओ।" 2 तेबे मैं मन्दरो रे पाँदले दरवाजे ते छे मर्द सड़का दे आऊँदे देखे ये दरवाजा उत्तरो रिया तरफा खे ए। हर एक आदमी आपणे-आपणे आथो दे तलवार लई की आए ओर तिना बीचे रेशमो रे टाल्ले पईने रे, लको दे लिखणे वाल़ा दवाईत बाने दे एक ओर मर्द था, ओर सेयो सब मन्दरो ते पीतरे जाई की पीतल़ी री बेदिया गे खड़े ऊईगे। 3 तेबे इस्राएलो रे परमेशरो रा तेज करूबा पाँदा ते, जिना पाँदे से रया करो था, मन्दरो री देऊल़ी पाँदे उठी की आई गा था ओर यहोवे से लिखणे वाल़ा माणूं जिने रेशमो रे टाल्ले पईनी राखे थे ओर लको दे दवाईत बानी राखेया था, बोलेया। 4 तेबे यहोवे तेसखे बोलेया, "एस यरूशलेम शईरो रे पीतरे ओरे-पोरे जाई की जितणे माणूं तिना सबी घृणित कामो रिया बजा ते जो तिदे करे जाओए, शोक करदे ओर दु:खो साथे चींगोए, तिना रे माथे दे नशाण लगाई दे।" 5 जेबे आऊँ सुणने लगी रा था, परमेशरे बाकी छे आदमिया खे बोलेया, "शईरो दे सफेद एपोद पईने दे माणूंए रा पीछा करो ओर लोका खे कांदे जाओ। केसी पाँदे बी दया नि करनी। 6 स्याणे, जवान, कुआँरी, बाल-बच्चे, सबी खे काई की नाश करो, पर जेस केसी माणूंए रे माथे दे से नशाण ओ, तेसरे नेड़े नि जाणा ओर मेरे पवित्र मन्दरो ते ई शुरू करो।" इजी री खातर तिने मन्दरो रे सामणे मूर्तिया री पूजा करने वाल़ेया बुजुर्गा खे काणा शुरू कित्तेया।

7 तेबे परमेशरे तिना खे बोलेया, "मन्दरो खे अशुद्ध करो ओर आँगणो खे लाशा साथे परी देयो। चलो, बारे निकल़ो।" तेबे सेयो गये ओर तिने यरूशलेम शईरो दे लोक काये। 8 जेबे सेयो लोक काणे लगी रे थे ओर आऊँ कल्ला रयी गा, तेबे आऊँ मुंए रे पारे थाले पड़ीगा ओर मैं चींगी की बोलेया, "हाय परमेशर यहोवा! क्या तां आपणा रोष यरूशलेमो पाँदे पड़काई की इस्राएलो रे सारे बचे रे लोक बी नाश करी देणे?" 9 तेबे परमेशरे माखे ज्वाब दित्तेया, "इस्राएल ओर यहूदा रे पाप बऊत जादा ए, एते देशो दे हर जगा लोका री अत्या करी जाओई ओर ये शईर अन्याय करने वाल़ेया लोका साथे परी गा रा ए। सेओ लोक एकी दूजे ते बोलोए कि यहोवे ये देश छाडीता रा ओर से कुछ नि देखदा कि आसे क्या करने लगी रे। 10 इजी री खातर तिना पाँदे दया नि ऊणी, ना मां तिना लोका रिया तँईं करूणा करनी, बल्कि एबे मां तिना खे तिना रे कित्ते रे बुरे कामा री सजा देणी।" 11 तेबे मैं क्या देखेया कि जिने लिखणे वाल़े माणूंए रेशमो रे टाल्ले पईनी राखे थे ओर लको दे दवाईत बानी राखेया था, तिने ये बोली की समाचार दित्तेया, "जेड़ी तैं आज्ञा दित्ती, मैं तेड़ा ई करी राखेया।"*9:11 प्रका. 1:13