1 फिरी यहोवा मीं सेइं ज़ोवं, "अगर मूसा ते शमूएल नबी भी मेरे सामने बिनती केरते खड़े भोते, फिरी भी मेरो मन एन लोकां केरे पासे न फिरेथो। एन मेरे सामनेरां कढा कि तैना च़ले गान! 2 ते अगर तैना तीं पुछ़न, ‘असां कोरहां च़ले गाम?’ त ज़ोइयां, ‘यहोवा एन ज़ोते, ज़ैना मरने बालेन, तैना मरने जो च़ले गान, ज़ैना तलवारी सेइं मरने बालेन, तैना तलवारी सेइं मरने जो गान; ज़ैना काले सेइं मरने बालेन, तैना काले सेइं मरने जो गान, तैना ज़ैना कैदी बन्नेबाले आन, तैना गुलामी मां च़ले गान।’✝15:2 प्रका. 13:10. 3 अवं तैन केरे खलाफ च़ेवर किसमेरी तुबाही ठहरेइलो: मारनेरे लेई तलवार, छ़िन्दनेरे लेई कुतरां, झ़ीरतां छ़डनेरे लेई अम्बरेरां च़ुड़ोलू, ते छ़िंदतां खानेरे लेई जंगली जानबर, यहोवा एन ज़ोते।✝15:3 प्रका. 6:8. 4 एन हिजकिय्याहेरे मट्ठे, यहूदारे राज़े मनश्शेरे तैन बुरे कम्मां केरे वजाई सेइं भोल्हु ज़ैना तैनी यरूशलेम नगरे मां कियां, ते अवं तैन एरहो केरेलो कि तैना दुनियारे मुल्खन-मुल्खन मां दरबदर फिरेले।"

5 यहोवा ज़ोते, "हे यरूशलेम, तीं पुड़ कौन तरस खालो, ते कौन तेरे लेई मातम केरेलो? कौन तेरो सुख पुछ़नेरे लेई तेरे पासे मुड़ेलो? 6 यहोवा एन ज़ोते कि तू मीं शैरतां दूर भोवरिस, एल्हेरेलेइ अवं तेरे खलाफ हथ खड़ो केरतां तेरो नाश केरेलो; किजोकि अवं तरस खाते-खाते थेकी जेवरोईं। 7 मीं तैना मुल्खेरे नगरां केरे फाटकन मां छज्जे सेइं छ़टोरेन; तैनेईं बुरी बत न शारी, एल्हेरेलेइ अवं अपने लोकन बेऔलाद किये, ते नाश भी कियोरेन। 8 तैन केरि विधवा मेरे हेरने मां समुन्दरेरे रेतरे सिक्‍कां केरि ज़ेरि बेड़ी भोवरिन; तैन केरे जुवाना केरे अम्मा केरे खलाफ दुपहरेईं मीं लुटेरे ठहरावरेन; मीं तैना अचानक दुखे मां छ़डोरेन ते तैना घबरावरेन। 9 सत मट्ठां केरि अम्मा ज़ैना मेरि जेआं तै भी बेहाल भोइ जेई ते प्राण भी छ़ेडी दित्ते; तैसेरो दिहाड़ो दुपहरेईं डुब्बी जेव; तैसेरी उमीद ट्लूटी जेई ते तैसेरू तुत्तर कालू भोइ जेवं। ते ज़ैना रेई जेवरेन तैन्न अवं दुश्मना केरि तलवारी सेइं मारेइतां छ़डेलो," यहोवारी एन ज़ोते।

10 हे मेरी अम्मा, मीं पुड़ अफ़सोस, कि तीं अवं एरहो मैन्हु पैदा कियो ज़ै दुनियाई सेइं लड़ाई ते बेंस केरनेबालो ठहरोरोए! न त मीं सूतेरे लेई रुपेइये दित्ते, ते न कोन्ची करां ओधार आनोरेन, फिरी भी लोक ताने मारतन। 11 यहोवा ज़ोवं, "सच़्च़े अवं तेरी भलैइयरे लेई तीं मज़बूत केरेलो; मुसीबत ते दुखेरे मौके अवं दुश्मने करां भी तीं कां बिनती करेइलो। 12 कुन कोई पितल या लोंहे, यानी उत्तरेरे पासेरे लोंहे ट्लोड़ी सकते? 13 तेरे सब पापां केरे वजाई सेइं ज़ैना सारे मुल्खे भेवरेन अवं तेरी धन-दौलत ते खज़ाने मुफते मां लुटने देइलो। 14 अवं एरू केरेलो कि तै तेरे दुश्मना केरे हथ्थे एरे मुल्खे मां च़लो गालो ज़ैस तू न ज़ानतस, किजोकि मेरे सरकरी अग भेड़की जेवरीए, ते तै तुसन फुकेली।"

15 हे यहोवा, तू त ज़ानतस; मीं याद केर ते मीं याद केरतां मेरे सताने बालन करां मेरो बदलो ने। तू सबरी सेइं क्रोध केरने बालोस, एल्हेरेलेइ मीं इस दुनियाई मरां न उठा; तेरे खातर मेरी बदनामी भोवरीए। 16 ज़ैखन तेरू वचन मीं कां पुज़्ज़ू, तैखन मीं तैन ज़ेन्च़रां खाव, ते तेरे वचन मेरे मनेरे लेई खुशी ते आनन्देरी वजा भोए; किजोकि, हे सेना केरे परमेशर यहोवा, मींजो तेरू ज़ोवं गाते। 17 तेरो सायो मीं पुड़ भोव; अवं हासी मज़ाक बनाने बालां केरे मझ़ाटे बिशतां खुश न भोव; तेरे हथ्थेरे दबावे सेइं अवं अकैल्‍लो बिश्शो, किजोकि तीं अवं क्रोधे सेइं भरोरो थियो। 18 मेरी तकलीफ किजो लगातार बनोरी रहतीए? मेरी ज़खमेरी कोई दूवाई नईं? कुन तू सच़्च़े मेरे लेई धोखो देनेबालो दरिया ते शुकने बाले पैनेरो ज़ेरो भोल्हो?

19 एन शुन्तां यहोवा इन ज़ोवं, "अगर तू मन फिरास, त अवं फिरी तीं अपने सामने खड़ो केरेलो। अगर तू कीमती गल्‍लां ज़ोस ते निकम्मी गल्‍लां न ज़ोस, त तू मेरी तरफां ज़ोने बालो भोल्हो। तैना लोक तेरे पासे फिरेले, पन तू तैन केरे पासे न फिरां। 20 अवं तीं तैन लोकां केरे सामने पितलरे दिवारारो ज़ेरो मज़बूत बनेइलो; तैना तीं सेइं लड़ेले, पन तीं पुड़ ज़ींती न सकेले, किजोकि अवं तीं बच़ानेरे लेई ते तीं छुटकारो देनेरे लेई तीं सेइं साथी आईं, यहोवा एन ज़ोते। अवं दुष्ट लोकन करां बच़ेइलो, 21 ते ज़ालम लोकन करां छुटेइलो।"