1 यहोवा ज़ोते, "तैन पुहालन* पुड़ अफ़सोस ज़ैना मेरी चरागारी भैड्डां-छ़ेल्‍ली तितर-बितर केरतन ते नाश केरतन।" 2 एल्हेरेलेइ इस्राएली केरो परमेशर यहोवा अपने लोकां केरे पुहालन सेइं ज़ोते, "तुसेईं मेरी भैड्डां-छ़ेल्‍ली केरू ध्यान न रख्खू, बल्के तैना तितर-बितर की ते ज़बरदस्ती केढी, एल्हेरेलेइ यहोवा ज़ोते कि अवं तुसन तुश्शे बुरां कम्मां केरि सज़ाह देइलो।✝ 3 तैखन मेरी भैड्डां-छ़ेल्‍ली ज़ैना बेच़ोरी आन, तैन अवं तैन सेभी मुल्खन मरां ज़ैन मां तैना ज़बरदस्ती भेज़ोरिन, एप्पु तैन वापस ऐनां तैन्न तैन केरे बाड़े मां अकोट्ठी केरेलो, ते तैना फिरी बधेली। 4 अवं तैन केरे भैड्डां केरे लेई एरे पुहाल च़ुनेले ज़ैना तैन च़ारेले; ते तैखन तैना न त फिरी डरेली, न घबरैली ते न तैन मरां कोई हेरोई गाली, यहोवा एन ज़ोते।"

5 यहोवा एन भी ज़ोते, "हेर एरे दिहाड़े एइतन ज़ैखन अवं दाऊदेरे कुले मरां अक धर्मी मुन्करो* उगेइलो, ते तै राज़ो बेनतां अक्ली सेइं राज़ केरेलो, ते अपने मुल्खे मां न्याय ते धार्मिकता सेइं राज़ केरेलो। 6 तैसेरे राज़ केरनेरे वक्ते मां यहूदी लोक बच़ोरे राले, ते इस्राएली लोक निडर बस्सोरे राले ते यहोवा तैसेरू नवं ‘यहोवा इश्शी धार्मिकता’ रखेलो।✝

7 "एल्हेरेलेइ हेर, यहोवा एन ज़ोते कि एरे दिहाड़े एज्जेले ज़ैन मां लोक फिरी न ज़ोले, ‘यहोवा ज़ैनी असां इस्राएली लोक मिस्र मुल्खे मरां आज़ाद केरतां आने, तैसेरी कसम,’ 8 पन तैना एन ज़ोले, ‘यहोवा ज़ै इस्राएलेरे घराने उत्तर मुल्खेरां ते तैन सेभी मुल्खन मरां भी ज़ैठां तैनी असां ज़बरदस्ती कढे, छुटेइतां आने, तैसेरी कसम।’ तैखन तैना अपने ही मुल्खे मां बस्सोरे राले।"

9 झूठे नेबी केरे बारे मां मेरो दिल अन्तरे अन्तर ट्लुटी गाते, मेरी सब हेड्डी थेरकतिन; यहोवा ज़ैना पवित्र वचन ज़ोवरेन, तैना शुन्तां, अवं एरे मैन्हु केरो ज़ेरो भोवरोईं ज़ैना दाछ़रे रस्से नशे मां चूर भेवरेन, 10 किजोकि ऐह मुल्ख व्यभिचार केरनेबालन सेइं भेरि जेवरोए; एस पुड़ एरी लानत पेवरीए कि ऐह मातम केरि राहोरोए; जंगलेरी चरागां भी शुक्‍की जेई। लोक बड़ी दौड़ त दौड़तन, पन बुरैइारे पासे; ते बहादरी त केरतन, पन अन्याये सेइं। 11 "किजोकि नबी ते याजक भी पापी आन; अपने भवने मां भी मीं तैन केरि बुराई मैल्होरीए, यहोवा एन ज़ोते। 12 एल्हेरेलेइ तैन केरि बत आंधरी ते घिश्कने बाली भोल्ही ज़ैस मां तैना ढ्लैक देइतां बिछ़ोड़े गाले; किजोकि, यहोवा एन ज़ोते कि अवं तैन केरे सज़ारे वक्त तैन पुड़ मुसीबत छ़डेलो! 13 सामरिया प्रदेशेरे नेबन मां मीं ऐह बेवकूफी लाहोरी थी कि तैना बाल देबतेरे नंव्वे सेइं नबूवत केरते ते मेरे इस्राएली लोकन टपलाते थिये। 14 पन यरूशलेम नगरेरे नेबन मां मीं एरां कम्मां हेरां, ज़ैन सेइं शिलकंटे खड़े भोतन, यानी व्यभिचार ते पखण्ड; तैना कुकर्म केरनेबालन एरी हिम्मत देतन कि तैना अपनि-अपनि बुरैई करां पसतान भी न; तैना सब मेरी नज़री मां सदोम ते गमोरा* नगरां केरे लोकां केरे ज़ेरे भेवरेन।" 15 एल्हेरेलेइ सेना केरो यहोवा यरूशलेम नगरेरे नेबी केरे बारे मां एन ज़ोते: "हेर, अवं तैन्न ट्लिठी चीज़ां खुवेइलो ते बिष पियालो; किजोकि तैन केरे वजाई सेइं पूरे मुल्खे मां पाप फैलोरोए।"

16 सेना केरो यहोवा तुसन सेइं एन ज़ोवरूए: "एन नबी केरि गल्‍लन पुड़ ज़ैना तुसन सेइं नबूवत केरतन ध्यान न देथ, किजोकि इना तुसन फुज़ूल गल्‍लां शिखालतन; इना दर्शनेरो दावो केरतां यहोवारी ज़ोवरी गल्‍लां नईं, बल्के अपने मनेरी गल्‍लां ज़ोतन। 17 ज़ैना लोक मेरो इन्कार केरतन तैन सेइं इना नबी हमेशा ज़ोते रहतन यहोवा ज़ोते, ‘तुश्शू भलू भोल्हु;’ ते ज़ेत्रे लोक एपनी ज़िद्दी पुड़ च़लतन, तैन सेइं इना ज़ोतन, ‘तुसन पुड़ कोई मुसीबत न पेली।’"

18 पन भला कौन यहोवारी सभाई मां खड़ो भोइतां तैसेरू वचन शुन्नी ते सेमझ़ी सको? या केनि ध्यान देइतां मेरू वचन शुनू?✝ 19 हेरा, यहोवारे क्रोधेरी बड़ी आँधी ते तूफान च़लने लगोरोए; ते तैसेरो झोंको दुष्टां केरे दोग्गे पुड़ ज़ोरे सेइं पेलो। 20 ज़ांतगर यहोवा अपनु कम ते एपनी योजना पूरी न केरे, तैखन तगर तैसेरी सरक ठंडी न भोल्ही। आखरी दिहाड़न मां तुस एस गल्‍ली रोड़ेच़ारे सेमझ़ी सकेले।

21 "इना नबी मेरे भेज़ने बगैर दौड़तां गातन ते मेरे किछ ज़ोनेरे बगैर नबूवत केरतन। 22 अगर एना मेरी शिक्षाई मां मज़बूत राथे, त मेरे लोकन मेरू वचन शुनाथे; ते तैना अपनि बुरी चाल ते कम्मां शारेथे।

23 "यहोवा एन ज़ोते, कुन अवं एरहो परमेशर आईं, ज़ै दूर नईं, नेड़े ही रहताईं?✝ 24 फिरी यहोवा एन ज़ोते, कुन कोई एरी छ़ेपोरी ठारन मां छ़ेप्पी सकते, कि अवं तैस न लेही बेटि? कुन सुर्ग ते धरती दूईये मीं सेइं भरपूर नईं? 25 मीं एन नेबी केरि गल्‍लां भी शुनोरिन ज़ैना मेरे नंव्वे सेइं एन ज़ोइतां झूठी नबूवत केरतन, ‘मीं सुपनु हेरू, सुपनु!’ 26 ज़ैना नबी झूठी नबूवत केरतन ते अपने मनेरे धोखे सेइं नबी आन, ऐह गल केइस तगर तैन केरे मने मां बस्सोरी राली? 27 ज़ेन्च़रां मेरे लोकां केरे दादे-पड़दादे मेरू नवं बिसरतां बाल देबतेरी पूज़ा केरते थिये, तेन्च़रे हुनी इना नबी तैन्न अपना-अपना सुपना ज़ोईं-ज़ोइतां मेरू नवं बिसरनु चातन। 28 अगर कोन्ची नेबे सुपनु हेरोरू भोए, त तै तैस ज़ोए, पन ज़ैनी कोन्चे मेरू वचन शुनोरू भोए त तै मेरू वचन सच़्च़ैई सेइं शुनाए। यहोवारी एन ज़ोते, कोड़ि भूंस ते कोड़ि गेहुं? 29 यहोवा एन ज़ोते कि कुन मेरू वचन अग्गरू ज़ेरू नईं? फिरी कुन तै एरहो हथोड़ो नईं ज़ै घोड़ भी ट्लोड़ते? 30 यहोवा एन ज़ोते, हेरा, ज़ैना नबी मेरू वचन होरन करां च़ोरी-च़ोरी ज़ोतन, अवं तैन केरे खलाफ आईं। 31 फिरी यहोवा एन भी ज़ोते कि ज़ै नबी ‘तै एन ज़ोते,’ अपने ऐशी सेइं झूठी गल्‍लां ज़ोतन, अवं तैन केरे भी खलाफ आईं। 32 यहोवा एन भी ज़ोते कि ज़ै मेरे भेज़ने बगैर या बगैर मेरे हुक्मे सुपनु हेरनेरो झूठो दावो केरतां नबूवत केरते, ते तैसेरो ज़िक्र केरतां मेरे लोकन झूठे घमण्डे मां एइतां टपलातन, तैन केरे भी अवं खलाफ आईं; ते तैन सेइं मेरे लोकां केरो कोई फैइदो न भोल्हो।"

33 "अगर आम लोकन मरां कोई मैन्हु या कोई नबी या याजक तुसन पुछ़े, ‘यहोवा कुन प्रभावशाली वचन ज़ोवरूए?’ त तैस सेइं ज़ोनू, ‘कुन प्रभावशाली वचन? यहोवा एन ज़ोते, अवं तुसन शारेलो।’ 34 ते ज़ै नबी या याजक या आम मैन्हु ‘यहोवारू ज़ोवरू भारी वचन’ एरू ज़ोतो राए, अवं तैस तैसेरे घराने समेत सज़ाह देइलो। 35 तुस लोक एक्‍की होरि सेइं ते अपने-अपने भियाले सेइं एन पुछ़ा, ‘यहोवा कुन जुवाब दित्तो?’ या ‘यहोवा कुन ज़ोवरूए?’ 36 ‘यहोवारू ज़ोवरू भारी वचन,’ एन्च़रे सेइं तुस एजने बाले वक्ते मां न ज़ोइयथ नईं त तुश्शे एरे ज़ोनेरे वजाई सेइं तुसन सज़ाह मैल्हेली; किजोकि इश्शो परमेशर सेना केरो यहोवा ज़ै ज़ींतो परमेशरे, तुसेईं लोकेईं तैसेरे वचन बिगाड़े। 37 हे यिर्मयाह, तू नेबी एन पुछ़, ‘यहोवा तीं कुन जुवाब दित्तोरोए?’ 38 या ‘यहोवा कुन ज़ोवरूए?’ अगर तुस, ‘यहोवारू ज़ोवरू प्रभावशाली वचन?’ एस्से तरीके ज़ोले, त यहोवारू एन वचन शुना, मीं त तुसन कां सन्देश भेज़ोरोए, एजने बाले वक्ते मां एरू नईं ज़ोनू कि यहोवारू प्रभावशाली वचन।" पन तुस एन ज़ोते रहतथ, "यहोवारू प्रभावशाली वचन।" 39 एल्हेरेलेइ हेरा, अवं तुसन बिलकुल बिसरी गालो ते तुस ते इस नगरे ज़ैन मीं तुश्शे दादे-पड़दादन, ते तुसन दित्तू, शैरतां अपने सामनेरां दूर केरेलो। 40 ते अवं एरू केरेलो कि तुश्शी बदनामी ते निन्दा हमेशा बनोरी राली; ते कधे बिसरी न गाली।