1 यहोवा मीं सेइं इन ज़ोवं: 2 "इस्राएलेरो परमेशर यहोवा तीं सेइं एन ज़ोते, ज़ैना गल्‍लां मीं तीं सेइं ज़ोवरिन, तैना सब किताबी मां लिख। 3 किजोकि यहोवा एन ज़ोते, एरे दिहाड़े एजने बालेन कि अवं अपने इस्राएली ते यहूदी लोकन गुलैमी मरां वापस आनेलो; ते ज़ै मुल्ख मीं तैन केरे दादे-पड़दादन दित्तोरोए थियो, तैस मां तैन्न फिरी आनेलो, ते तैना फिरी तैसेरे मालिक भोल्हे, यहोवा एन ज़ोते।"

4 ज़ैना वचन यहोवा इस्राएली यहूदी लोकां केरे बारे मां ज़ोवरे थिये, तैना इना आन, 5 यहोवा एन ज़ोते: थरकानेबालो शब्द शुनोने लगोरोए, शैन्तरो नईं, बल्के डरेरो आहे। 6 ई सवाल पुछ़ा ते इस गल्‍ली पुड़ विचार केरा, कुन मड़द भी बच्‍चे ज़ेई सकते? फिरी कुन वजा आहे कि सब मड़द दोज़ींती केरे ज़ेरे अपनि-अपनि कमर अपने हथेइं सेइं देबतां लेइहोते? किजो सेभी केरू तुत्तर ट्लकोरूए? 7 हाय, हाय, तै दिहाड़ी केत्री भारी भोल्ही! तैसेरी ज़ेरि होरि कोई दिहाड़ी नईं; तै याकूबेरे मुसीबतरो वक्त भोल्हो; पन तै तैस करां भी छुटाव गालो। 8 सेना केरो यहोवा एन ज़ोते, कि तैस दिहाड़े अवं तैसेरो रखोरो जुओ तुश्शे मेट्टू पुड़ां ट्लोड़ेलो, ते तुश्शे रेस्सी केरे टुक्ड़े-टुक्ड़े केरेलो; ते परदेशी फिरी तैन करां अपनि सेवा न करेई सकेले। 9 पन तैना अपने परमेशर यहोवा ते अपने राज़ेरी सेवा केरेले, ज़ैस अवं तैन पुड़ दाऊदेरे खानदाने मरां राज़ केरनेरे लेई ठहरेइलो।✝

10 "एल्हेरेलेइ हे मेरे दास याकूब, तेरे लेई यहोवा एन ज़ोते, डर न, हे इस्राएल, परेशान न भो; किजोकि अवं तीं दूर मुल्खे मरां ते तेरे खानदाने गुलैमरे मुल्खे मरां छुटेइतां आनेलो। तैखन याकूब वापस गेइतां, चैन ते सुखे सेइं रालो, ते कोई तैस डरेई न बटेलो। 11 किजोकि यहोवा एन ज़ोते, तुश्शो छुटकारो केरने लेई अवं तुसन सेइं साथी आईं; एल्हेरेलेइ अवं तैन सेभी कौमन खतम केरेलो, ज़ैन मां मीं तैना तितर-बितर कियोरेन, पन तुश्शो नाश न केरेलो। तुसन सज़ाह अवं विचार केरतां देइलो, ते तुसन कोन्ची किसमे सेइं बेकसूर न ठहरेइलो।"

12 यहोवा एन ज़ोते: "तेरे दुखेरी कोई दूवाई नईं, ते तेरो ज़खम डुग्घो ते दुख देनेबालोए। 13 तेरो मुकदमो लड़नेरे लेई कोई नईं, तेरो ज़खम बन्धनेरे लेई न पट्टी, न मलहमे। 14 तेरे सब दोस्त तीं बिसरी जे; तैना तुश्शी खबर न नेन; किजोकि तेरे बड़े अधर्म ते भारी पापां केरे वजाई सेइं, मीं दुश्मन बेनतां तीं पुड़ हमलो कियो; मीं सेखती सेइं तीं सज़ाह दित्ती। 15 तू अपने ज़खमां केरे वजाई सेइं किजो चिन्डां मारतिस? तेरी तकलीफरी कोई दूवाई नईं। तेरे बड़े अधर्म ते भारी पापां केरि वजाई सेइं मीं तीं सेइं एरहो सलूख कियोरोए। 16 पन ज़ेत्रे तीं हुनी खातन, तैना एप्पु खाए गाले, ते तेरे दुश्मन सब गुलैमी मां गाले; ते तेरे लुटने बाले एप्पु लुटोले ते ज़ेत्रे तेरी दौलत थसोड़तन, तैन केरि दौलत अवं थुसोड़ेलो। 17 अवं तेरो आलाज़ केरतां तेरे ज़खमन ठीक केरेलो, यहोवा एन ज़ोते; किजोकि तेरू नवं कढोरी पेवरूए: तै त सिय्योने, तैसेरी फिक्र कौन केरते?"

18 यहोवा ज़ोते: "अवं याकूबेरे तेम्बु गुलैमी मरां वापस केरताईं ते तैसेरे घरन पुड़ दया केरेलो; ते नगर अपने ही उज़ड़ोरे ठैरी पुड़ फिरी बेस्सी गालू, ते राज़ेरो मेहल पेइलेरो ज़ेरो बेनि गालो। 19 तैखन तैन लोकन मरां धन ज़ोने, ते आनन्द केरनेरी आवाज़ शुनोली। 20 अवं तैन केरि औलाद तेरही बधेइलो ज़ेरि पेइली थी, ते तैना थोड़े न भोल्हे। तैन केरे बच्‍चे पुराने ज़मानेरे ज़ेरे भोल्हे, ते तैन केरि मण्डली मेरे सामने कायम राली; ते ज़ेत्रे तैन पुड़ अंधेर केरतन तैन अवं सज़ाह देइलो। 21 तैन केरो हाकिम तैन्ने मरां भोल्हो, ते ज़ै तैन पुड़ राज़ केरेलो, तै तैन्ने मरां पैदा भोल्हो; अवं तैस एप्पु कां कुजालो, ते तै मीं कां एज्जेलो, किजोकि कौने ज़ै अपने आपे सेइं मीं कां एज्जी सकते? यहोवा एन ज़ोते। 22 तैस मौके तुस मेरे लोक ठहरेले, ते अवं तुश्शो परमेशर ठहरेलो।"

23 हेरा, यहोवा क्रोधेरी आँधी च़लोरीए! तै बड़ी आँधीए; दुष्टां केरे क्रोड़ी पुड़ तै ज़ोरे सेइं लग्गेली। 24 ज़ांतगर यहोवा अपनु कम पूरू न केरे ते अपनि योजना पूरी न केरे, तैखन तगर तैसेरी भड़कोरी सरक ठंडी न भोल्ही। आखरी दिहाड़न मां तुस एस गल्‍ली सेमझ़ी सकेले।