Jeremias 9

1 भलू भोथू, कि मेरी क्रोड़ी पैनी सेइं भेरतां भोथी, ते मेरी एछ़्छ़ी ऐंखरू केरो नाग भोथी, कि अवं रात दिहैड़ी अपने मारे जेवरे लोकां केरे लेई लेरां देतो राथो। 2 भलू भोथू कि मीं सुनसान ठैरी मां मुसाफरां केरो ठिकानो मैलेथो कि अवं अपने लोकन शैरतां तैड़ी च़लो गाथो! किजोकि तैना सब व्यभिचारी*9:2 व्यभिचारी मतलब परमेशरेरे लेई वफादार न थिये आन, तैना धोखे बाज़ां केरो समाज आन। 3 तैना अपनि-अपनि ज़िभ धनुषेरे ज़ेरि झूठ ज़ोनेरे लेई तियार केरतन, ते मुल्खे मां ताकतबर त भोइ जे, पन सच़्च़ैई लेई न; तैना बुरैई पुड़ बुरैई बद्धाते च़लतन, ते तैना मीं ज़ानन भी न, यहोवा एन ज़ोते।

4 अपने-अपने पड़ोसी करां खबरदार राथ, अपने भियाले पुड़ भी भरोसो न रखा; किजोकि हर भियाल धोखे बाज़े, ते हर कोई अपने पड़ोसी केरि चोगली लाहेले। 5 तैना एक्‍की होरि ठगेले ते सच़ न ज़ोले; तैनेईं झूठ ज़ोनू शिखोरूए; ते बुरैई मां मेहनत केरतन। 6 तू धोखेरे मझ़ाटे रहतस; धोखेरे वजाई सेइं तैना मेरू ज्ञान न चान, यहोवा एन ज़ोते।

7 एल्हेरेलेइ सेना केरो यहोवा एन ज़ोते, "अवं अपने लोकां केरि अज़मैइश तेन्च़रे केरेलो ज़ेन्च़रे कोई धाती अग्गी सेइं परखते, किजोकि मेरे लोकेईं बुराई की, अवं तैन केरे लेई होरू कुन केरि सकताईं? 8 तैन केरि ज़िभ मारनेबाले तीरां केरि ज़ेरिए, तैना हमेशा झूठ ज़ोतन; तै ज़बाना सेइं त एक्‍की होरि सेइं मेल मिलापेरी गल्‍लां ज़ोतन, पन मने मां एक्‍की होरि मारनेरे लेई लगोरे रहतन। 9 यहोवा एन ज़ोते, कुन अवं एरी गल्‍लां केरि सज़ाह न देईं? कुन अवं एरे कौमी करां अपनो बदलो न नेही?

10 "अवं पहाड़ां केरे लेई लेरां देलो ते मातमेरू गीत ज़ोइलो, ते जंगलेरे चरागां केरे लेई मातमेरू गीत ज़ोइलो, किजोकि तैना एरां तबाह भेवरेन कि तैन मांमेइं कोई न च़ले, ते तैन मां जानबरां केरि आवाज़ भी न शुनोए; जानबर ते च़ुड़ोलू सब नेश्शी जेआं। 11 अवं यरूशलेम नगरे उज़ैड़तां गिद्दां केरि ठार बनेइलो; ते यहूदारे नगरन एन्च़रे बेरान केरेलो कि तैन मां कोई न बसेलो।"✝9:11 यशा. 25:2.

12 ज़ै अक्लमन्द मड़द भोए तै एसेरो मतलब समझ़े, ते ज़ैनी यहोवा करां इसेरी वजा ज़ोते शुनोरी भोए। मुल्खेरो नाश किजो भोव? किजो तै सुनसान ठारारो ज़ेरो एरहो फुकोरोए कि तैस मांमेइं कोई न च़ले? 13 ते यहोवा ज़ोवं, "किजोकि इन एल्हेरेलेइ भोल्हु कि तैनेईं ज़ै कानून मीं तैन्न दित्तोरो थियो तैनेईं मन्नो शारो; ते न तैसेरे मुताबिक च़लोरेन, 14 बल्के तैना अपने ज़िद्दी पुड़ बाल देबतेरे मूरती केरि पूज़ा केरते राए, ज़ेन्च़रे तैन केरे दादे-पड़दादेईं तैन्न शिखालू। 15 एल्हेरेलेइ सेना केरो यहोवा, इस्राएलेरो परमेशर एन ज़ोते, शुन, अवं अपने इन लोकन ट्लिठी चीज़ खुवालो ते बिष पियालो।✝9:15 भज. 69:21;यिर्म. 23:15. 16 अवं तैन लोकन एरे कौमन मां तितर-बितर केरेलो ज़ैन्न न त तैना ते न तैन केरे दादे-पड़दादे ज़ानते थिये; ते ज़ांतगर तैन केरो खातमों न भोए तांतगर मेरे तरफां तलवार तैन पत्ती पेवरी राली।"

यरूशलेम नगरेरे लेई मातम

17 सेना केरो यहोवा एन ज़ोते, "इस गल्‍ली पुड़ ध्यान देथ कि कुन भोइ राहोरू आहे, ते मातम केरनेबैली कौन्शन कुजाथ; अक्लमन्द कौन्शन कुजाथ; 18 तैना जल्दी केरतां इश्शे लेई मातमेरू गीत ज़ोन कि इश्शी एछ़्छ़न मरां ऐंखरू च़लन ते इश्शां पुंठन सेइं पानी च़ले। 19 सिय्योने मरां मातमेरू इन गीत शुनोते, ‘असां केन्च़रे नाश भोइ जे! असां किजो शरमिन्दा भोए, किजोकि असन अपनो मुल्ख छ़डनो पेव ते दुश्मनेईं इश्शां घरां बिछ़ोड़ां।’"

20 एल्हेरेलेइ हे कौन्शव, यहोवारू एन वचन शुना, ते तैसेरो ऐह हुक्म मन्ना; तुस अपनि-अपनि कुइयन दुखेरू गीत, ते अपनि-अपनि पड़ोसी कौन्शन मातमेरू गीत शिखाला। 21 किजोकि मौत इश्शी दैरन मांमेइं इश्शे मेहलन मां एवरीए, कि इश्शी सड़कन मां बच्‍चे ते चौकन मां जुवानन मिटेई दे। 22 तुस ज़ोथ, "यहोवा एन ज़ोते, ‘मैन्हु केरि लाशां एरी पेवरी राहेली ज़ेन्च़रे उडारे मां खाद, ते फेक्‍की कटनेबाले केरे पत्पती पेवरी रैतिन, ते तैन केरो कोई सलहने बालो न भोल्हो।’"

परमेशरे मां घमण्ड

23 यहोवा एन ज़ोते, "अक्लमन्द अपनि अक्ली पुड़ घमण्ड न केरे, न बहादर अपनि बहादरी पुड़, न दौलतमन्द अपने दौलती पुड़ घमण्ड केरे; 24 पन ज़ै घमण्ड केरे तै अपने इस्से गल्‍ली पुड़ घमण्ड केरे, कि तै मीं ज़ानते ते समझ़ते, कि अवं तैए यहोवा आईं, ज़ै धेरती पुड़ दया, न्याय ते धार्मिकतारां कम्मां केरते; किजोकि अवं एन्ने गल्‍लेईं सेइं खुश राताईं।✝9:24 1 कुरि. 1:31;2 कुरि. 10:17.

25 "हेरा, यहोवा एन ज़ोते कि एरे दिहाड़े एजने बालेन कि ज़ैन केरो खतनो भोवरो भोए, तैन्न तैन केरि ज़ेरि सज़ाह देलो ज़ैन केरो खतनो नईं भोवरो,✝9:25 रोम. 2:25. 26 मतलब मिस्री, यहूदी, एदोमी, अम्मोनी, मोआबी, ते तैन रेगिस्तानेरे रानेबालां केरे ज़ेरे ज़ैना अपनि दाड़ी कटतन; किजोकि इना सेभी कौमां केरो खतनो नईं भोवरो, ते इस्राएली केरो सारो घरानो भी मने मां बगैर खतने*9:26 मने मां बगैर खतने मतलब तैन केरो मन नईं बेदलोरो। प्रेरित. 7:51।"