1 ତାନ୍‍ପେର୍କେ ଅନ୍‍ଦିନେ ହେଦିତ୍‍ ୱେଲେ ଅବ୍ରାହାମ୍‌ ମମ୍ରିତେ ଅଲୋନ ମାଡ଼େତ୍‍ ମଦଲ୍‍ ନିଜର ଗୁଡ଼୍‌ସେତ୍‌ ଆର୍‍ଦାଗ୍‍ କୁଦିମାତ୍‍ତଣ୍ଡ୍‌; ଆ ସମୟ୍‍ତେ ସଦାପ୍ରବୁ ଆ ପଡ଼୍‍ୟ୍‍ତାଗ୍‍ ଅଂକିଙ୍କ୍‍ ତନ୍ଦ୍‌ତଣ୍ଡ୍‍। 2 ଆସୁଟ୍‍ ଅଣ୍ଡ୍‍ ମାଡ଼୍‍କି ଉଡ଼୍‍ତଣ୍ଡ୍‍, ମୁୱୁଡ଼୍‍ ନାରୁଡ଼୍‍ ତାନ୍‍ ମୁନ୍ନେ ନିସ୍‌ମିନ୍ଦେଡ଼୍‌; ମେଣ୍ଡେ ଉଡ଼ୱାନାକେ କାଇଲାଙ୍କ୍‌ ଗୁଡ଼ୁସେତ୍‌ ଆର୍‍ତାଗାଙ୍କ୍‍ ସିଟ୍‍ପାଟ୍‍ ଆଞ୍ଜ୍‌ ବୁମ୍‍ତାଗ୍‍ ପାଟି ମଡ଼୍‍କି କେତ୍‍ତଣ୍ଡ୍‍, 3 ହୋ ପ୍ରବୁ, ଅନୁରଦ୍‍ ମାଡ଼ୁତାନ୍‍, ଯଦି ମିଡ଼୍‌ ନା ପର ସନ୍ତୁଷ୍ଟ ମିନ୍ଦେଡ଼ି, ଆଲାଇତ୍କେ ଇ ଦାସନ୍‍ ପଡ଼୍‍ୟ୍‌ତାଗାଙ୍କ୍‍ ଆନ୍‍ୱିଡ଼୍‍। 4 ଅନୁରଦ୍‍ ମାଡ଼ୁତାନ୍‍, ସୁଦୁର୍‍ ଏର୍‍ ତାସିଦୁତାନ୍‍, ମିଡ଼୍‍ ଡେକା ନର୍ସ୍ ଇ ମାଡ଼େତ୍‍ ମଦଲ୍‍ ରମାଟ୍‍। 5 ବୁକେନ୍‍ ଦଡ଼୍‍ ତାସିଦ୍‍ତାନ୍‍, ଆଦ୍‌ ତିଞ୍ଜ୍‍ମେଣ୍ଡେ ଜିଉନ୍‍ ଗେଲ୍‍ସ୍ପାଟ୍‌, ତାନ୍‍ ପେର୍କେ ଆଦ୍‌ତିଡ଼୍‌; ଇତ୍କେ ଆଦିନ୍‌ ମାଇଦିଙ୍କ ନିଜର୍‍ ଦାସନ୍‌ ଗାରେଙ୍କ୍‍ ଆତ୍‍ତଡ଼୍‍। ଆସୁଟ୍‍ ଅଡ଼୍‍ କେତ୍‍ତଡ଼୍‍, ବାତ୍‍ କେତୁତି, ଆଦ୍‌ ମାଡ଼ା।

6 ଆସୁଟ୍‍ ଅବ୍ରାହାମ୍‌ ସିଟ୍‍ପାଟ୍‍ ଗୁଡ଼ୁସେତ୍‌ ଲତ୍‍ତାଗାଙ୍କ୍‍ ସାରାନ୍‍ ଗାରେ ଆଞ୍ଜ୍‌ କେତ୍‍ତଣ୍ଡ୍‍, ମୁଣ୍ଡ୍‍ ଚଲା ସାୟେତ୍‍ ମଇଦା ଅସ୍‍ ଛାନାମାଡ଼ି ସିଟ୍‍ପାଟ୍‍ ରୁଟି ତିଆର୍‍ ମାଡ଼ା। 7 ଅନନ୍ତର ଅବ୍ରାହାମ୍‌ କେତୁଲ୍‌ତେ ଗଡ୍‌କଟାତାଗ୍‍ ସିଟ୍‍ପାଟ୍‍ ଆଞ୍ଜ୍‌ ସାୟେତ୍‍ ଲେକେତ୍‍ ଗଡ୍‍ପିଲା ତାସ୍‍ ଦାସଙ୍କ୍‍ ଇତ୍‍ତାଙ୍କ୍‍, ଆଦ୍‌ ଆଦିଙ୍କ୍‌ ସିଟ୍‍ପାଟ୍‍ ଆଟେତ୍‌ । 8 ଆସୁଟ୍‍ ଅବ୍ରାହାମ୍‌ ଦହି, ପାଲ୍‌ ନୁ ଆଟ୍‌ତେ ଗଡ୍‌ ଆଉଙ୍ଗ୍‌ ତାସ୍‍ ଅଡ଼୍‍ଗାରେ ତାତ୍‍ତଣ୍ଡ୍, ମେଣ୍ଡେ ଅଡ଼୍‍ ତିନ୍ଦାନ୍‍ ସମୟ୍‍ତେ ମାଡ଼େତ୍‍ ମଦଲ୍‍ ଅଡ଼୍‍ ଗାରେ ନିତ୍‍ତଣ୍ଡ୍‍।

9 ତାନ୍‍ ପେର୍କେ ଅଡ଼୍‍ ଅଂକିଙ୍କ୍‍ ପାଚାରା ମାଡ଼୍‍ତଡ଼୍‍, ନି ମୁତେ ସାରା ବେକେ ? ଅଣ୍ଡ୍ କେତ୍‍ତଣ୍ଡ୍‍, ଉଡ଼ା ଆଦ୍‌ଆଦ୍‌ ଗୁଡ଼୍‌ସେତାଗ୍‍ ମିନ୍ଦା।

10 ଆସୁଟ୍‍ ଅଡ଼୍‌ ଲପେଙ୍କ୍‌ ଅର୍‌ତୁଣ୍ଡ୍‌ କେତ୍‍ତଣ୍ଡ୍‍, ଇ ରୁତୁ ମେଣ୍ଡନ୍‍ଦାମ୍‍ ୱାଦାନ୍‍ ସମୟ୍‍ତେ ମାମେ ବେଲାଇତ୍କେବା ମାଲ୍‌ସ୍‌ ୱାଦ୍‍ତମ୍‍; ଉଡ଼ା, ଆ ସମୟ୍‍ତେ ନି ମୁତେ ସାରାନ୍‍ କାଇତାଗ୍‍ ଅଣ୍ଡୟ୍‍ ମାର୍‌ ମାନ୍ତ୍‍ତଣ୍ଡ୍‍। ଇ ଗଟ୍‍ ସାରାଲ୍‍ ଗୁଡ଼୍‌ସେତ୍‌ ଆର୍‍ଦାଗ୍‍ ତାମ୍‍ ପେର୍କେ ମାଞ୍ଜ୍‍ କେଞ୍ଜ୍‍ତେ। 11 ଆ ସମୟ୍‍ତେ ଅବ୍ରାହାମ୍‌ ନୁ ସାରାଲ୍‍ ମୁୟ୍‍ସ୍‍ ନୁ ଗାଟି ବୟସ୍‍ ଆସ୍‍ମାତ୍‍ତଡ଼୍‍, ମେଣ୍ଡେ ସାରାନାଦ୍‌ ପିଲା ଜନମ୍‌ ମାଡ଼ାନାଦ୍‌ ବନ୍ଦ୍‌ ଆସ୍‌ମାତେ। 12 ଆଦିନ୍‌ ମାଇଦିଙ୍କ୍‍ ସାରାଲ୍‍ କାୱ୍‍ସ୍‍ ମନେ ମନେ କେତ୍‍ତେ ? ନା ଇ ଡକ୍‍ରି ବୟସ୍‌ତେ ବାତ୍‍ ଇଲେକାମ୍‍ ସାର୍‍ଦେ ଆଦ୍‌ତେ ? ଆଗେକ୍‌ବା ନା ମୁଦ୍‌ପାଲ୍‌ ଆନ୍ତେ ପେଦ୍‌ୱାଲ୍‌।

13 ଆସୁଟ୍‍ ସଦାପ୍ରବୁ ଅବ୍ରାହାମ୍‌ତିଙ୍କ୍‍ କେତ୍‍ତଣ୍ଡ୍‍, ନିକ୍‍ ମୁୟିତ୍‌ତେ ବୟସ୍ତେ ବାତ୍‍ ନିଜାମ୍‍ ପିଲ୍‍ ଜନ୍ମ ଆଦ୍‌ତେ, ଇଲା ଆଲ୍‍ସି ସାରାଲ୍‍ ବାତେଙ୍କ୍‍ କାୱ୍‍ତେ ? 14 ସଦାପ୍ରବୁନାଗ୍‌ ବାତେ ଅସମ୍ବବ୍‌ ପାଡ଼ିୟି ଆନ୍ତେ ଆଦ୍‌ତେ ? ଇ କାଲାମ୍‌ ମେଣ୍ଡେନ୍‍ଦାମ୍‍ ୱାତ୍‌ତ୍କେ, ତିଆର୍‌ ଆଦାନ୍‌ ସମୟ୍‍ତେ ମାମେ ମାଲ୍‍ସ୍‍ ୱାଦ୍‍ତମ୍‍, ଆ ସମୟ୍‍ତେ ସାରାନ୍‍ କାଇଦାଗ୍‍ ମାର୍ର୍ ମାନ୍ତ୍‍ତଣ୍ଡ୍‍।

15 ଆସୁଟ୍‍ ସାରାଲ୍‍ ୱେର୍‌ଦେ ବୁଚାମାଡ଼ି କେତ୍‍ତେ, ନାନେ କାୱନ୍‍; ବାତେଙ୍କ୍‍ଇତ୍କେ ଆଦ୍‌ ୱେର୍‍ତେ। ମାତର୍‌ ଅଣ୍ଡ୍‍ କେତ୍‍ତଣ୍ଡ୍ ନିମେ ନିଜାମ୍‍ କାୱ୍‍ତିନ୍‍।

16 ତାନ୍‌ପେର୍କେ ଆ ନାରୁଡ଼୍‍ ଆଗାଙ୍କ୍ ତେଦି ସଦୋମ୍‍ତେ ପାକା ଆତ୍‌ତାଙ୍କ୍‌ ଅବ୍ରାହାମ୍‌ ଆର୍‍ ତଃତାଙ୍କ୍‍ ଅଡ଼୍‍ ତଡ଼୍‍ ଆତ୍‌ତଣ୍ଡ୍‌ । 17 ତାନ୍‍ ପେର୍କେ ସଦାପ୍ରବୁ କେତ୍‍ତଣ୍ଡ୍‍, ମାମେ ବାତ୍‍ ମାଡ଼ାନଙ୍କ୍‍ ଇଚ୍ଛା ମାଡ଼ୁତମ୍‍, ଆଦ୍‌ କି ଅବ୍ରାହାମ୍‌ତାଗାଙ୍କ୍‍ ମିଞ୍ଜ୍‍ପିତମ୍‍ ? 18 ଅବ୍ରାହାମ୍‌ତାଗାଙ୍କ୍‍ ଅଣ୍ଡୟ୍‍ ବେଡ଼ିୟ୍‌ ନୁ ଶକ୍ତିତେ ଗୋଷ୍ଠି ପେଇତିତ୍‌ ନୁ ପୃତିବୀତେ ସାରେ ଗୋଷ୍ଠି ଅନ୍‍ ଆଗାଙ୍କ୍‍ ଆଶିର୍ବାଦ୍‌ ପାହେମ୍‍ ଆଦ୍‍ତଡ଼୍‌। 19 ବାତେଙ୍କ୍‍ଇତ୍କେ ତାନାଦ୍‍ ମୁନେତ୍‌ ପିଲାକି ନୁ ପରିବାର୍‍ ସାରେ ବେଦ୍‍ପୁଟୁଙ୍କ୍‍ ନ୍ୟାୟ ନୁ ଦର୍ମାବେବାର୍‌ ମାଡ଼ାନ୍‍ ମାଇଦିଙ୍କ୍‍ ସଦାପ୍ରବୁନ୍‍ ଆର୍‌ଦେ ତାକିତଡ଼୍‍, ଆଦିନ୍‌ ମାଇଦିଙ୍କ୍‍ ଅଡ଼୍‍କିଙ୍କ୍‍ ଅଣ୍ଡ୍‍ ବେଦ୍‍ପୁଟୁଙ୍କ୍‍ ଆଦେଶ୍‌ ଇଦ୍‍ତଣ୍ଡ୍‍, ଆ ସେଙ୍ଗେତିଙ୍କ୍‍ ମାମେ ଅଂକିଙ୍କ୍‍ ସାୟ୍‌ ମାଡ଼ିମିନ୍ଦେନ୍‍; ଆସୁଟ୍‍ ସଦାପ୍ରବୁ ଅବ୍ରାହାମ୍‌ ବିଷୟ୍‍ତେ ନାନ୍‌ କେସ୍‍ମାନ୍ଦାନ୍‍ ବାକ୍ୟ ପୂରା ମାଡ଼ିତଡ଼୍।

20 ସଦାପ୍ରବୁ ଅବ୍ରାହମ୍‌ତିଙ୍କ୍‌ କେତ୍‍ତଣ୍ଡ୍‍, ସଦୋମ ନୁ ହମୋରା ବିରୁଦ୍‍ତେ ବେଡ଼ିୟ୍‌ ଲେଙ୍ଗ୍‍ ତେଦିମିନ୍ଦେ, ଅଡ଼ାଦ୍‍ ପାପ୍‌ ନାର୍ଗେ ଆସ୍‍ମିନ୍ଦେ; 21 ଆଦିଙ୍କ୍‌ ମାମେ ମଦଲ୍‍ ଉଡ଼ାନଙ୍କ୍‍ ଆଞ୍ଜ୍‌ ମା ଗାରେ ୱାତ୍‍ତେ କେୟାନ୍‍ ଲେଙ୍ଗ୍‍ତେ ଅନୁସାରେ ଅଡ଼୍‍ ଇୱୁ ସାରେତ୍‍ କାମ୍‍ ମାଡ଼ିମିନ୍ଦେଡ଼୍‍ କି ଇଲେ, ଆଦ୍‌ ପୁନ୍ଦିକା।

22 ତାନ୍‍ ପେର୍କେ ଆ ନାରୁଡ଼୍‍ ଆଗାକଞ୍ଚ୍‌ ମାଲ୍‍ସ୍‍ ସଦୋମ୍‍ତେ ପାକା ଆତ୍‌ତଡ଼୍‌; ମାତର୍‌ ଅବ୍ରାହାମ୍‌ ଆ ଯାକ ସଦାପ୍ରବୁନ୍‍ ମୁନ୍‍ନେ ନିସ୍‍ ମାତ୍‍ତଣ୍ଡ୍‍। 23 ତାନ୍‌ପେର୍କେ ଅବ୍ରାହାମ୍‌ ସଦାପ୍ରବୁନ୍‌ ଗାରେ ଆଞ୍ଜ୍‌ କେତ୍‍ତଣ୍ଡ୍‍, ନିକ୍‌ ଦୁଷ୍ଟଡ଼୍‍ ତ ଦାର୍ମିକ୍‌ନଡ଼୍‌ ଯୁଦ୍ଦ୍‌ ମାଡ଼ିତଡ଼୍‍ ? 24 ଆଦ୍‍ପାର୍‍ତେ, ନଗର୍‍ତେ ଲୋପେ ପଚାଶ ଜାନ୍‍ ଦାର୍ମିକିଡ଼୍‍ ମାନ୍ତ୍‍ତଡ଼୍‍; ଆଦିନ୍‌ ଲୋପେ ପଚାଶ ଜାନ୍‍ ଦାର୍ମିକ୍‌ନଡ଼୍‍ ସେଙ୍ଗେ କି ଆ ପଡ଼ିୟ୍‌ତିଙ୍କ୍‍ ଗେଲ୍‍ସ୍ପକଟ୍ ନଷ୍ଟ ମାଡ଼ିତି ? 25 ଦୁଷ୍ଟଡ଼୍‍ ତ ଦାର୍ମିକିଡ଼୍‍ ବିନାଶ୍ ମାଡ଼ାନାଦ୍‍ କାମ୍‍ ନିୟାଗାଙ୍କ୍‍ ଦୁରାମ୍‍ ମାନ୍ନି ନୁ ଦାର୍ମିକ୍‌ନଡ଼୍‍ ଦୁଷ୍ଟଡ଼୍‍ ସମାନ୍‍ ମାଡ଼ାନାଦ୍‍ ଦୁରାମ୍‍ ମାନ୍ନି। ସାରେ ପୃଥିବୀତେ ବିଚାର୍‍କର୍ତ୍ତାଲଡ଼୍‍ ବାତେ ନ୍ୟାୟ ବିଚାର୍‍ ମାଡ଼ଡ଼୍‍ ?

26 ତାନ୍‍ପେର୍କେ ସଦାପ୍ରବୁ କେତ୍‍ତଣ୍ଡ୍, ମାମେ ବେସୁଙ୍କ୍‍ ସଦୋମ୍‍ ନଗର୍‍ତାଦ୍‍ ପଚାଶ୍‍ ନାରୁଡ଼୍‍ ଦାର୍ମିକ୍‌ ଉଡ଼ିତମ୍‍, ଆଲାଇତ୍କେ ଅଡ଼୍‍ ସେଙ୍ଗେ ସାରେ ପଡ଼ିୟ୍‌ତିଙ୍କ୍‍ ଗେଲ୍‍ସ୍ପିତମ୍‍।

27 ଆସୁଟ୍‍ ଅବ୍ରାହାମ୍‌ ଆଦିନ୍‌ ଉତ୍ତର୍‌ ମାଡ଼୍‍ତଣ୍ଡ୍, ଉଡ଼ା, ନାନ୍ ଦୁମ୍‍ ନୁ ନିର୍‌ ଆତ୍କେ ବା ପ୍ରବୁନ୍‍ ମୁନେ ଗଟି କେତ୍‍ତାଙ୍କ୍‍ ତିଆର୍‌ ଆସ୍‍ ମିନ୍ଦେନ୍‍। 28 ଆଦ୍‍ପାର୍‍ଦ୍‍ତେ, ପଚାଶ୍‍ ଜାନ୍‍ ଦାର୍ମିକ୍‌ନଡ଼୍‍ ଲୋପେଙ୍କ୍‍ ଏଇୱୁଡ଼୍‍ କମ୍‍ ମାନ୍ତ୍‍ତଡ଼୍‍; ଆ ଏୟ୍‍ୱୁଡ଼୍‍ କମ୍‍ଆତ୍‍ ସେଙ୍ଗେ କି ନିମେ ସାରେ ନଗର୍‍ତିଙ୍କ୍‍ ନଷ୍ଟ ମାଡ଼ିତି ? ସଦାପ୍ରବୁ କେତ୍‍ତଣ୍ଡ୍‍, ମାମେ ଚାଳିଶ୍‍ ଏଇଙ୍ଗ୍‍ ଜାନ୍‍ ପାହେମ୍‍ ଆତ୍କେ ବା ନଷ୍ଟ ମାଡ଼ମ୍‍।

29 ଅବ୍ରାହାମ୍‌ ଅଂକିଙ୍କ୍‍ ମେଣ୍ଡନ୍‍ଦାମ୍‍ କେତ୍‍ତଣ୍ଡ୍‍, ଆଦ୍‍ପାର୍‍ଦେ, ଆଗେ ଚାଲିଶ୍‍ ଜାନ୍‍ ଦର୍‍କିତଡ଼୍‍। ଅଣ୍ଡ୍‍ କେତ୍‍ତଣ୍ଡ୍‍, ଆ ଚାଳିଶ୍‍ ଜାନ୍‍ଦେ ସେଙ୍ଗେ ନଷ୍ଟ ମାଡ଼ମ୍‍। 30 ମେଣ୍ଡନ୍‍ ଦାମ୍‍ ଅବ୍ରାହାମ୍‌ କେତ୍‍ତଣ୍ଡ୍, ପ୍ରବୁ କପାମ୍‍ ଆୟକଟ ମାତ୍‍ତ୍କେ ମେଣ୍ଡେ ଅଣ୍ଡ୍‍ଗଟ୍‍ କେତିତାନ୍‍; ଆଦ୍‍ପାର୍‍ତେ, ଆଗେ ତିରିଶ୍‍ ଜାନ୍‍ ଦର୍‍କେ। ସଦାପ୍ରବୁ କେତ୍‍ତଣ୍ଡ୍‍, ତିରିଶ୍‍ ଜାନ୍‍ ଦର୍‍କେ, ଦଂସ ମାଡ଼ମ୍‍।

31 ଅବ୍ରାହାମ୍‌ କେତ୍‍ତଣ୍ଡ୍‍, ଉଡ଼ା, ପ୍ରବୁନ୍‍ ମୁନେ ନାନେ ମେଣ୍ଡନ୍‍ଦାମ୍‍ ଗଟ୍‍ କେତ୍‍ତାଙ୍କ୍‍ ଚେଷ୍ଟା ମାଡ଼ିମିନ୍ଦେନ୍‍; ଆଦ୍‍ପାର୍‍ଦ୍‍ତେ, ଆଗେ କୋଡ଼ିଏ ଜାନ୍‍ ଦର୍‍କିତଡ଼୍‍। ସଦାପ୍ରବୁ କେତ୍‍ତଣ୍ଡ୍‍, ଆ କୋଡ଼ିଏ ଜାନ୍‍ତେ ସେଙ୍ଗେ ମାମେ ନଷ୍ଟ ମାଡ଼ମ୍‍।

32 ଅବ୍ରାହାମ୍‌ କେତ୍‍ତଣ୍ଡ୍‍; ପ୍ରବୁ କପାମ୍‍ ଆୟକଟ ମାତ୍କେ ମେଣ୍ଡେ ଅଣ୍ଡୟ୍‍ ଦାମ୍‍ ମାତ୍ରମ୍‌ କେତିତାନ୍‍; ଆଦ୍‍ପାର୍‍ଦ୍‍ତେ, ଆଗେ ଦଶ୍‍ଜାନ୍‍ ଦର୍‍କିତଡ଼୍‍। ସଦାପ୍ରବୁ କେତ୍‍ତଣ୍ଡ୍‍, ଆ ଦଶ୍‍ ଜାନ୍‍ତେ ସେଙ୍ଗେ ମାମେ ଆଲା ନଷ୍ଟ ମାଡ଼ମ୍‍। 33 ଆସୁଟ୍‍ ସଦାପ୍ରବୁ ଅବ୍ରାହାମ୍‌ ତଡ଼୍‍ ଇ ପ୍ରକାର୍‍ ତିର୍‍ୟାତିର୍‍ୟି ଆସ୍‍ ଆତ୍‌ତଣ୍ଡ୍‌, ମେଣ୍ଡେ ଅବ୍ରହାମ୍‍ ନିଜର୍‍ ପଡ଼୍‍ୟ୍‍ତାଗ୍‍ ମାଲ୍‍ସ୍‍ ଆତ୍‌ତଣ୍ଡ୍‌ ।