1 ତାନ୍‌ପେର୍କେ ପୁରା ରେଣ୍ଡ୍‌ ବର୍ଷତ୍‌ ପେର୍କେ ଫାରୋ ଇଦ୍‌ ସାପ୍ନା ଉଡ଼୍‌ତଣ୍ଡ୍‌; ଉଡ଼ା, ଅଣ୍ଡ୍‌ ନୀଲ ବେଡ଼େତ୍‌ ଗାରେ ନିସ୍‌ ମିନ୍ଦେଣ୍ଡ୍‌। 2 ମେଣ୍ଡେ ଉଡ଼ାଟ୍‌, ନୀଲ ବେଡ଼େମ୍‌ତେ ଲପେଙ୍କ୍‌ ସାତ୍‌ଟାନ୍‌ ମେନ୍ଦୁଲ୍‌ ମାନ୍ଦାନ୍‌ ସୁନ୍ଦର୍‌ ଗଡ଼କ୍‌ ତେଦି ଗାଡ୍‌ତେ ଲୋପେ ମେୟାନଙ୍କ୍‌ ପସ୍ପ୍‌ତା। 3 ଆୱିନ୍‌ ଗାରେ ଉଡ଼ାଟ୍‌, ୱେର୍‌ ସାତ୍‌ଟାନ୍‌ ବପୁ ମାନ୍ଦାନାୱ୍‌ ନୁ ୱାତ୍‌ଲେ ଗଡ୍‌କ୍‌ ନୀଲ ବେଡ଼େମ୍‌କଞ୍ଚ୍‌ ତେଦି ବେଡ଼େତ୍‌ ଅଡିନାଗ୍‌ ଆ ଗଡ୍‌କିନ୍‌ ଗାରେ ନିତ୍‌ତା। 4 ଆସୁଟ୍‌ ଆ ବପୁ ମାନ୍ଦାନାୱ୍‌ ନୁ ୱାତ୍‌ଲେ ଗଡ୍‌କ୍‌ ଆ ସାତ୍‌ଟାନ୍‌ ମେନ୍ଦୁଲ୍‌ ମାନ୍ଦାନ୍‌ ସୁନ୍ଦର୍‌ ଗଡ୍‌କିଙ୍କ୍‌ ତିଞ୍ଜିତ୍‌ତା । ଇଦ୍‌ ପୁଟୁଙ୍କ୍‌ ସମୟ୍‌ତେ ଫାରୋନ୍‌ ଉସ୍‌କାଡ଼୍‌ ୱିର୍‌ୟିତେ। 5 ତାନ୍‌ ପେର୍କେ ଅଣ୍ଡ୍‌ ଉଞ୍ଜି ମେଣ୍ଡନ୍‌ ଦାମ୍‌ ସାପ୍ନେ ଉଡ଼୍‌ତଣ୍ଡ୍‌; ଅଣ୍ଡୟ କମ୍‌ ତାଗେ ସାତ୍‌ଟାନ୍‌ ପରିପୁଷ୍ଟ ନୁ ସାୟେତ୍‌ ପିଲ୍‌କା ପେୟ୍‌ତା। 6 ଆୱିନ୍‌ ଆଗାକଞ୍ଚ୍‌ ମୁନେତ୍‌ ଗାଲ୍‌ଦେ ୱାସ୍‌ତେ ମେଣ୍ଡେ ସାତ୍‌ଟାନ୍‌ ଦୁଡ଼ା ପିଲ୍‌କା ପେୟ୍‌ତା। 7 ମେଣ୍ଡେ ଆ ସାତ୍‌ଟାନ୍‌ ଇସୁଲାଦ୍‌ ପିଲ୍‌କା ଇ ସାତ୍‌ଟାନ୍‌ ପରିପୁଷ୍ଟ ନୁ ପୁରା ପିଲ୍‌କାକିଙ୍କ୍‌ ଗ୍ରାସ ମାଡ଼୍‌ତା। ଇଦ୍‌ପୁଟୁଙ୍କ୍‌ ସମୟ୍‌ତେ ଫାରୋନ୍‌ ଉସ୍‌କାଡ଼୍‌ ୱିର୍‌ୟିତେ, ସାପ୍ନା ଆନ୍ତେ ତେର୍‌ତେ। 8 ମେଣ୍ଡେ ନାର୍କୁକ୍‌ ଅନ୍‌ ମନ୍‌ ଉଦ୍‌ବିଗ୍ନ ଆତ୍‌ତେ, ଆସୁଟ୍‌ ଅଣ୍ଡ୍‌ ନାରୁଡ଼୍‌କ୍‌ ରୟ୍‌ସ୍‌ ମିସର୍‌ଦେଶ୍‌ତେ ମନ୍ତ୍ରୀନଡ଼୍‌ ନୁ ପଣ୍ଡିତ୍‌ ସାର୍‌ତଡ଼୍‌କିଙ୍କ୍‌ କାର୍ଙ୍ଗତଣ୍ଡ୍‌; ମାତ୍ର ଫାରୋ ଅଡ଼୍‌ପାକେ ନିଜେତ୍‌ ସାପ୍ନେତେ ଗଟି କେତ୍‌ତାଙ୍କ୍‌, ଅଡ଼ାଗାଙ୍କ୍‌ ବେନ ଫାରଙ୍କ୍‌ ଆଦିନ୍‌ ଅର୍ଥ କେତେ ପାର୍‌ୱଡ଼୍‌ ଆତ୍‌ତଡ଼୍‌।

9 ଆସୁଟ୍‌ ବେଡ଼ିୟେ ତିନ୍ଦାନ୍‌ ଉନ୍ଦାନ୍‌ ଗିନେ କାଞ୍ଜାନଣ୍ଡ୍‌ ଫାରୋନ୍‌ ମୁନେ ନିବେଦନ ମାଡ଼୍‌ତଣ୍ଡ୍‌, ନେଣ୍ଡେ ନାନ୍‌ ନିଜର୍‌ତେ ଅପରାଦ୍‌ ଏର୍କ୍‌ ମାଡ଼ୁତାନ୍‌। 10 ଫାରୋ ତାନ୍‌ ଦାସ ନା' ପର ନୁ ବେଡ଼ିୟଣ୍ଡ୍‌ ସୂପକାର୍‌ତେ ପର କପାମ୍‌ ଆସ୍‌ ମାନାଙ୍କ୍‌ ଗେଲ୍‌ସ୍ପାନ୍‌ ସୈନ୍ୟାଦିପତି ଟାଣ୍ଡ୍‌ତାଗେ ବନ୍ଦ୍‌ମାଡ଼ି ନେଃସ୍‌ ମାତ୍‌ତଣ୍ଡ୍‌।

11 ଆସୁଟ୍‌ ମାମ୍‌ମେ ଇର୍‌ୱୁମ୍‌ ଅଣ୍ଡୟ ନାର୍କା ସାପ୍ନା ଉଡ଼୍‌ତମ୍‌; ମେଣ୍ଡେ, ଇର୍‌ୱୁଡ଼୍‌ ସାପ୍ନେତେ ରେଣ୍ଡ୍‌ ପ୍ରକାର୍‌ ଅର୍ଥ ମାତ୍‌ତେ। 12 ଆଗେ ମା ତଡ଼୍‌ ରକ୍ଷକ ସୈନ୍ୟାଦିପତିତେ ଦାସ ଅର୍ତୁଣ୍ଡ୍‌ ଏବ୍ରିୟ ଲେୟଣ୍ଡ୍‌ ମାତ୍‌ତଣ୍ଡ୍‌; ମାମ୍‌ମେ ଅଂକିଙ୍କ୍‌ ସାପ୍ନେତେ ଗଟ୍‌ କେତ୍‌ତାଙ୍କ୍‌, ଅଣ୍ଡ୍‌ ମାକିଙ୍କ୍‌ ଆଦିନ୍‌ ଅର୍ଥ କେତ୍‌ତଣ୍ଡ୍‌, ଇର୍‌ୱୁଡ଼ାଦ୍‌ ଯାକ ସାପ୍ନେ ଅନୁସାରେ ଅର୍ଥ କେସିତ୍‌ତଣ୍ଡ୍‌। 13 ଆସୁଟ୍‌ ଅଣ୍ଡ୍‌ ମା ଇର୍‌ୱୁଡ଼୍‌କିଙ୍କ୍‌ ବେଦ୍‌ପୁଟୁଙ୍କ୍‌ ଅର୍ଥ କେସ୍‌ମାତ୍‌ତଣ୍ଡ୍‌, ଆଦେପୁଟୁଙ୍କ୍‌ ଗଟେମ୍‌ ଆତ୍‌ତେ; ନାନ୍‌ ମୁନେତ୍‌ ପଦତାଗେ ନିଯୁକ୍ତ ଆତ୍‌ତାନ୍‌ ନୁ ଅଣ୍ଡ୍‌ ଫାଶି ପାହେମ୍‌ ଆତ୍‌ତଣ୍ଡ୍‌।

14 ଆସୁଟ୍‌ ଫାରୋ ଯୋଷେପ୍‌ତିଙ୍କ୍‌ କାର୍ଙ୍ଗାଙ୍କ୍‌ ରହଃତାଙ୍କ୍‌, ନାରୁଡ଼୍‌ ତାତ୍‌ତାଗାଙ୍କ୍‌ ଅଂକିଙ୍କ୍‌ ସିଟ୍‌ପାଟ୍‌ ତାତ୍‌ତଡ଼୍‌; ଅଣ୍ଡ୍‌ ମିସକ୍‌ଡୁୟି ନୁ ଲେକେତ୍‌ ଚକା କେର୍ସ୍‌ ଫାରୋନ୍‌ ମୁନେ ୱାତ୍‌ତଣ୍ଡ୍‌। 15 ଆସୁଟ୍‌ ଫାରୋ ଯୋଷେପ୍‌ତିଙ୍କ୍‌ କେତ୍‌ତଣ୍ଡ୍‌, ନାନ୍‌ ଅଣ୍ଡୟ୍‌ ସାପ୍ନା ଉଡ଼ିମିନ୍ଦେନ୍‌; ମାତ୍ର ନାନେ ନି ବିଷୟ୍‌ତେ କେଞ୍ଜିମିନ୍ଦେନ୍‌, ଯେ ନିମେ ସାପ୍ନା କେଞ୍ଜ୍‌କେ ତାନ୍‌ ଅର୍ତ କେତ୍‌ ପାର୍ଦତିନ୍‌।

16 ଆସୁଟ୍‌ ଯୋଷେପ୍‌ କେତ୍‌ତଣ୍ଡ୍‌, ଆଦ୍‌ ନା ଇଚ୍ଛାତେ ପାର୍‌ୱନ୍‌ , ମାତ୍ର ପରମେଶ୍ୱର୍‌ ଫାରୋଙ୍କ୍‌ ସାୟେତ୍‌ ଉତ୍ତର୍‌ ଇଦ୍‌ତଣ୍ଡ୍‌।

17 ଆସୁଟ୍‌ ଫାରୋ ଯୋଷେପ୍‌ତିଙ୍କ୍‌ କେତ୍‌ତଣ୍ଡ୍‌, ନା ସାପ୍ନାତାଗେ ଉଡ଼ା, ମାମେ ନୀଲ ବେଡ଼େମ୍‌ତେ ଅଡ଼ିନ୍‌ ଗାରେ ନିସ୍‌ ମାତ୍‌ତାମ୍‌। 18 ଆସୁଟ୍‌ ନୀଲ ବେଡ଼େମ୍‌ତେ ଲୋପେଙ୍କ୍‌ ସାତ୍‌ଟାନ୍‌ ଦାମ୍‌ଦାମା ମେନ୍ଦୁଲ୍‌ ମାନ୍ଦାନ୍‌ ସୁନ୍ଦର୍‌ ଗଡ଼କ୍‌ ତେଦି ଗାଡ୍‌ତେ ଲପେ ମେୟାନଙ୍କ୍‌ ପସ୍ପ୍‌ତା। 19 ତାନ୍‌ପେର୍‌କେ ଆୱିନ୍‌ ଗାରେ ମେଣ୍ଡେ ସାତ୍‌ଟାନ୍‌ ଦୁର୍ବଳ ମେନ୍ଦୁଲ୍‌ ଇଲ୍‌ୱେ ନୁ ୱାତ୍‌ଲେ ଗଡ୍‌କ୍‌ ତେଦି ୱାତ୍‌ତା; ନାନ୍‌ ଆୱିନ୍‌ ଲେକାମ୍‌ତେ ମେନ୍ଦୁଲ୍‌ ଇଲ୍‌ୱେ ଗଡ୍‌କ୍‌ ଇ ସାରେ ମିସର୍‌ ମିଶର୍‌ତାଗେ ବେସୁଙ୍କ୍‌ ବା ଉଡ଼ନ୍‌। 20 ମେଣ୍ଡେ ଆ ୱାତ୍‌ଲେ ଗଡ଼୍‌କ୍‌ ମୁନେତ୍‌ ମେନ୍ଦୁଲ୍‌ ମାନ୍ଦାନ୍‌ ସାତ୍‌ଟାନ୍‌ ଗଡ୍‌କିଙ୍କ୍‌ ତିଞ୍ଜିତ୍‌ତା। 21 ମାତ୍ର ତିତ୍‌ତେ ପେର୍କେ ଆୱିନ୍‌ ଡଙ୍କା ତିତ୍‌ତେ ଲେକାମ୍‌ ବା ତନ୍ଦ; ଆୱ୍‌ ମୁନେତ୍‌ ଲେକାମ୍‌ ୱାତ୍‌ଲେ ଇନା ମାତ୍‌ତା। ଇଦ୍‌ ପୁଟୁଙ୍କ୍‌ ସମୟ୍‌ତେ ନାୟାଦ୍‌ ସାପ୍ନା ୱିର୍‌ୟିତେ । 22 ଆସୁଟ୍‌ ନାନ୍‌ ସାପ୍ନାତାଗ୍‌ ଉଡ଼୍‌ତାନ୍‌ ଯେ ଉଡ଼ାଟ୍‌ ଅଣ୍ଡୟ୍‌ କମ୍‌ତାଗ୍‌ ସାତ୍‌ଟାନ୍‌ ପୁରା ନୁ ସାୟେତାୱ୍‌ ପିଲ୍‌କା ପେୟ୍‌ତା । 23 ତାନ୍‌ ପେର୍କେ ପଡ଼ଦ୍ ପେୟିତାନ୍‌ ପାକେତ୍‌ ଗାଲ୍‌ଦେ ୱାସ୍‌ତେ, ସୁଦୁର୍‌ ନୁ ପୁନାୱ୍‌ ସାତ୍‌ଟାନ୍‌ ପିଲ୍‌କା ପେଇତା। 24 ମେଣ୍ଡେ ଆ ଦୁଡ଼ା ପିଲ୍‌କା, ଆ ସାୟେତ୍‌ ସାତ୍‌ଟାନ୍‌ ପିଲ୍‌କାକିଙ୍କ୍‌ ଗ୍ରାସ ମାଡ଼୍‌ତା। ଇ ସାପ୍ନେ ନାନ୍‌ ମନ୍ତ୍ରୀନଡ଼୍‌କିଙ୍କ୍‌ କେତ୍‌ତାନ୍‌, ମାତ୍ର ବେନ ବା ଇଦିନ୍‌ ଅର୍ଥ ନାକିଂଙ୍କ୍‌ କେତ୍‌ ପାର୍‌ୱଡ଼୍‌।

25 ତାନ୍‌ପେର୍କେ ଯୋଷେପ୍‌ ଫାରୋଙ୍କ୍‌ କେତ୍‌ତଣ୍ଡ୍‌, ଫାରୋନ୍‌ ସାପ୍ନେ ଅର୍ଥ ଅଣ୍ଡୟ; ପରମେଶ୍ୱର ବାତେ ମାଡ଼ାନଙ୍କ୍‌ ଇଚ୍ଛା ମାଡ଼ୁତଣ୍ଡ୍‌, ଆଦ୍‌ ଫାରୋନ୍‌ ପର କେତ୍‌ତଣ୍ଡ। 26 ଆ ସାତ୍‌ଟାନ୍‌ ସାୟେତ୍‌ ଗଡ୍‌କ୍‌ ମେଣ୍ଡେ, ଆ ସାତ୍‌ଟାନ୍‌ ସାୟେତ୍‌ ପିଲ୍‌କା ସାତ୍‌ ବର୍ଷତ୍‌ ଲେକାମ୍‌, ଆୱୁ ରେଣ୍ଡେ ସାପ୍ନାନ୍‌ ଅର୍ଥ ଅଣ୍ଡୟ୍‌ ରକମ୍‌। 27 ତାନ୍‌ପେର୍କେ ତିତ୍‌ତେ ଆ ସାତ୍‌ଟାନ୍‌ ୱାତ୍‌ଲେ ଗଡ୍‌କ୍‌ ନୁ ମେଣ୍ଡେ ପଡ଼ଦ୍ ପେୟିତାନ୍‌ ଗାଲ୍‌ଦେ ୱାସ୍‌ତାୱ୍‌ ସାତ୍‌ଟାନ୍‌ ପିଲ୍‌କା ମରୁଡ଼ି ସାତ୍‌ବର୍ଷତେ ଲେକାମ୍‌। 28 ନାନ୍‌ ଫାରୋଙ୍କ୍‌ କେସ୍‌ ମିନ୍ଦେନ୍‌ ପରମେଶ୍ୱର ବାତେ ମାଡ଼ାନଙ୍କ୍‌ ଇଚ୍ଛା ମାଡ଼୍‌ତଣ୍ଡ୍‌, ଆଦ୍‌ ଫାରୋଙ୍କ୍‌ ତୟ୍‌ସ୍‌ମିନ୍ଦେଣ୍ଡ୍‌। 29 ଉଡ଼ା, ଇ ସାରେ ମିସର୍‌ ଦେଶ୍‌ତାଗ୍‌ ସାତ୍‌ ବର୍ଷ ନାର୍ଗେ ପାଣ୍ଡାନାଦ୍‌ ୱାସମିନ୍ଦେ। 30 ତାନ୍‌ପେର୍କେ ସାତ୍‌ ବର୍ଷ ଦୁର୍ବିକ୍ଷ ଆଦ୍‌ତେ; ପାଣ୍ଡେନାଦ୍‌ଆତ୍‌ତେ ସାରେ ମିସର୍‌ ଦେଶ୍‌ତାଗାଙ୍କ୍‌ କାଇଲିତେ; ମରୁଡ଼ି ଦେଶ୍‌ତିଙ୍କ୍‌ ଦଂସ ମାଡ଼ିତ୍‌। 31 ମେଣ୍ଡେ ପେର୍କେତ୍‌ ମରୁଡ଼ି ସେଙ୍ଗେ ଦେଶ୍‌ତାଗେ ପାଣ୍ଡାନାଦ୍‌ ପୁନ୍ଦାନଙ୍କ୍‌ ଆୟ; ବାତେଙ୍କ୍ଇତ୍କେ ଆଦ୍‌ ଗାଟି ବଜ୍‌ ଆଦ୍‌ତେ। 32 ଫାରୋ ମେଣ୍ଡନ୍‌ ଦାମ୍‌ ସାପ୍ନା ଉଡ଼ାନାଦ୍‌ ଅର୍ଥ ଇଦ୍‌ ଯେ, ପରମେଶ୍ୱର୍‌ତେ ତଡ଼୍‌ ଆଦ୍‌ ନିଜାମ୍‌ ଆସ୍ ମିନ୍ଦେ, ମେଣ୍ଡେ ପରମେଶ୍ୱର୍‌ ଆଦିଙ୍କ୍‌ ସିଟ୍‌ପାଟ୍‌ ମାଡ଼ିତଣ୍ଡ୍‌।

33 ଆଦିନ୍‌ ମାଇଦିଙ୍କ୍‌ ଇଞ୍ଜେ ଫାରୋ ୱେରଙ୍କ୍‌ ବୁଦ୍ଦିମାନ୍‌ ଜ୍ଞାନୀ ମାନେଇ ଉଡ଼ି ମିସର୍‌ ଦେଶ୍‌ତେ ପର ହେଞ୍ଚିଣ୍ଡ୍‌। 34 ଫାରୋ ଇଲା ମାଡ଼ିଣ୍ଡ୍‌ ଦେଶ୍‌ତାଗେ ଅଦକ୍ଷଗଣ ହେଞ୍ଚିମିକା ସାତ୍‌ ବର୍ଷ ପାଣ୍ଡାନ୍‌ ସମୟ୍‌ତେ ମିସର୍‌ ଦେଶ୍‌ତାଗାଙ୍କ୍‌ ଶସ୍ୟତେ ଏଇଙ୍ଗ୍‌ ବାଗ୍‌ତାଗାଙ୍କ୍‌ ଅଣ୍ଡୟ୍‌ବାଗ୍‌ ନେମୁଟ୍‌ । 35 ତାନ୍‌ ପେର୍କେ ଅଡ଼୍‌ ଆସୁଟ୍‌ ୱାଦାନ୍‌ ସାୟେତେ ୱାଡ଼୍‌ସେତେ ସାରେ କାଦି ସଂଗ୍ରହ ମାଡ଼ିଡ଼୍‌, ମେଣ୍ଡେ ସାରେ ନଗର୍‌କିନାଗ୍‌ କାଦ୍ୟତ୍‌ ସେଙ୍ଗେ ଫାରୋନ୍‌ କାଇଦେ ଅଦିନ୍‌ତେ ଶସ୍ୟ ଗୁଡ଼୍‌ପି ରକ୍ଷା ମାଡ଼ିଡ଼୍‌। 36 ଇଦ୍‌ ପୁଟୁଙ୍କ୍‌ ମିସର୍‌ ଦେଶ୍‌ତାଗେ ମୁନେତ୍‌ ୱାଦାନ୍‌ ମରୁଡିତେ ସାତ ୱାଡ଼୍‌ସେତେ ମାଇଦିଙ୍କ୍‌ ଦେଶ୍‌ ମାୟି ଆଦ୍‌ତେ କାଦି ଗୁଡ଼୍‌ପି ମାତ୍‌ତଡ଼୍‌, ଦୁର୍ବିକ୍ଷ ତଡ଼୍‌ ଦେଶ୍‌ ଦଂସ ଆୟ।

37 ଆସୁଟ୍‌ ଫାରୋଙ୍କ୍‌ ନୁ ତାନ୍‌ ଦାସଡ଼୍‌ ଦୃଷ୍ଟିତେ ଇ ଗଟ୍‌ ସାୟେ ଆତ୍‌ତେ। 38 ଆସୁଟ୍‌ ଫାରୋ ତାନ୍‌ ଦାସଡ଼୍‌କ୍‌ କେତ୍‌ତଣ୍ଡ୍‌, ମାନାଡ଼୍‌ ବାତେ ଇନ୍‌ ଆସତ୍‌ ନାରୁଙ୍କ୍‌ ମେଣ୍ଡେ ଦର୍‌ସ୍କ୍‌ ପାର୍ଦ୍‌ତାଡ଼୍‌ ? ଇ ନାଗେ ପରମେଶ୍ୱର୍‌ ତେ ଆତ୍ମା ମିନ୍ଦେ। 39 ଆସୁଟ୍‌ ଫାରୋ ଯୋଷେପ୍‌ତିଙ୍କ୍‌ କେତ୍‌ତଣ୍ଡ୍‌, ପରମେଶ୍ୱର୍‌ ନିକିଂଙ୍କ୍‌ ଇ ସାରେ କେଞ୍ଜ୍‌ସ୍ପିମିନ୍ଦେଣ୍ଡ୍‌, ଆଦିଙ୍କ୍‌ ନି ଲେକାମ୍‌ ବୁଜେମ୍‌ ଆଦାନଣ୍ଡ୍‌ ନୁ ଜ୍ଞାନୀ ବେନ ଇଲେଣ୍ଡ୍‌; 40 ନିମେ ମା ଦେଶ୍‌ତେ ମୁକ୍ୟାଲ୍‌ ଆୟିମ୍‌; ମା ସାରେ ପ୍ରଜା ନି ବାକ୍ୟ ମାନେମ୍‌ ଆଦ୍‍ତଡ଼୍‌, କେବଳ ସିଂହାସନ୍‌ତାଗେ ମାମେ ନିୟାଗାକଞ୍ଚ୍‌ ବେଡ଼୍‌ୟନ୍‌ ମାନ୍ତ୍‌ତାନ୍‌। 41 ଫାରୋ ଯୋଷେପ୍‌ତିଙ୍କ୍‌ ମେଣ୍ଡେ କେତ୍‌ତଣ୍ଡ୍‌, ଉଡ଼ା, ନାନ୍‌ ନିକିଂଙ୍କ୍‌ ମିସର୍‌ ଦେଶ୍‌ତେ ପର ଶାସନ୍‌ ମାଡ଼ାନଙ୍କ୍‌ ହେଞ୍ଚ୍‌ତମ୍‌। 42 ତାନ୍‌ପେର୍କେ ଫାରୋ ତାନ୍‌ କାୟ୍‌ଦେକଞ୍ଚ୍‌ ନିଜର୍‌ ଚିହ୍ନେ ଅଙ୍ଗୁକାଲ୍‌ ପେସ୍‌ପି ଯୋଷେପ୍‌ତେ କାୟ୍‌ଦେ ଇସ୍‌ ଅଂକିଙ୍କ୍‌ ପାଣ୍ଡ୍ରିଚକା କେର୍‌ସ୍ପିସ୍‌ ଅନ୍‌ ଗୁଡ଼ୁଙ୍ଗ୍‌ତାଗ୍‌ ସୁନାତାଦ୍‌ ନେଡ଼େମ୍‌ ଇତ୍‌ତଣ୍ଡ୍‌। 43 ମେଣ୍ଡେ, ଅଂକିଙ୍କ୍‌ ତାନ୍‌ ଦ୍ୱିତୀୟ ରଥତାଗେ ଆରୋହଣ, ମେଣ୍ଡେ ନାରୁଡ଼୍‌ ଅନ୍‌ ମୁନେ ମୁନେ ଅବ୍ରେକ୍‌ ଅବ୍ରକ୍‌ତେ ଅର୍ଥ ମର୍‌ମିଣ୍ଡା ଉଃମୁଟ୍‌ ମର୍‌ମିଣ୍ଡା ଉଃମୁଟ୍‌ ଇଞ୍ଜେ ଘୋଷଣା ମାଡ଼୍‌ତଣ୍ଡ୍‌। ଇଦ୍‌ ଲେକାତେ ଅଣ୍ଡ୍‌ ତାଂକିଙ୍କ୍‌ ସାରେ ମିସର୍‌ ଦେଶ୍‌ତେ ପର ହେଞ୍ଚ୍‌ତଡ଼୍‌। 44 ଆସୁଙ୍କ୍‌ ଫାରୋ ଯୋଷେପ୍‌ତିଙ୍କ୍‌ କେତ୍‌ତଣ୍ଡ୍‌, ନାନ୍‌ ଫାରୋନ୍‌, ବାତେଙ୍କ୍‌ଇତ୍କେ ନି ଆଦେଶ୍‌ ବିନା ସାରେ ମିସର୍‌ ଦେଶ୍‌ତାଗେ ବେନ୍‌ ବା ନାରୁଣ୍ଡ୍‌ ଡେକା କି କାଇତେତ୍‌ ପାର୍‌ୱଣ୍ଡ୍‌। 45 ମେଣ୍ଡେ ଫାରୋ ଯୋଷେପ୍‌ତେ ପେଦେର୍‌ ସାଫନତ୍‌ ପାନେହ ୱାଟ୍‌ତଣ୍ଡ୍‌; ମେଣ୍ଡେ ଓନ୍‌ ନଗର୍‌ତେ ନିବାସି ପୋଟିଫେର୍‌ ପେଦେର୍‌ତେ ଯାଜକ୍‌ତେ ଆସନତ୍‌ ପେଦେର୍‌ତେ ପିକ୍‌ତଡ଼୍‌ ଅନାଦ୍‌ ପେଣ୍ଡୁଲ୍‌ ମାଡ଼ିତ୍‌ତଣ୍ଡ୍‌। ଆସୁଟ୍‌ ଯୋଷେପ୍‌ ସାରେ ମିସର୍‌ ଦେଶ୍‌ତାଗେ ଉଡାନଙ୍କ୍‌ ପସ୍ପ୍‌ତଣ୍ଡ୍‌। 46 ଯୋଷେପ୍‌ ତିରିଷ୍‌ ବର୍ଷ ବୟସ୍‌ ସମୟ୍‌ତେ ମିସ୍ରିୟ ରାଜା ଫାରୋନ୍‌ ମୁନେ ନିସ୍‌ ମାତ୍‌ତଣ୍ଡ୍‌; ତାନ୍‌ପେର୍କେ ଯୋଷେପ୍‌ ଫାରୋନ୍‌ ଗାରେକଞ୍ଚ୍‌ ଆଞ୍ଜ୍‌ ମିସର୍‌ ଦେଶ୍‌ତେ ସାରେପାକେ ଇକେଆକେ ଉଡଡ଼୍‌ ଲେକେତ୍‌ ଉଡ୍‌ତଣ୍ଡ୍‌। 47 ତାନ୍‌ପେର୍କେ ଆ ପାଣ୍ଡାନ୍‌ ସାତ୍‌ ବର୍ଷ ବୁମ୍‌ତାଗେ ନାର୍ଗେ ନାର୍ଗେ ଶସ୍ୟ ପାଣ୍ଡ୍‌ତା। 48 ଯୋଷେପ୍‌ ଆ ସାତ୍‌ ୱାଡ଼୍‌ସେତେ ମିସର୍‌ ଦେଶ୍‌ତାଗେ ଉତ୍ପନ୍ନ ଆତ୍‌ତେ ସାରେ ଶସ୍ୟ ଗୁଡ଼୍‌ପି ସାରେ ନଗର୍‌କିନାଗେ ଗୁଡ଼୍‌ପ୍‌ତଣ୍ଡ୍‌; ମେଣ୍ଡେ ବେନ୍‌ ବେନ୍‌ ନଗର୍‌ତେ ସାରେ ପାକାତ୍‌ ବୁମ୍‌ତାଗ୍‌ ବେସର୍‌ ଶସ୍ୟ ଉତ୍ପନ୍ନ ଆତ୍‌ତା, ଆୱ୍‌ସାରେ ଆ ଆ ନଗର୍‌ତାଗେ ଗୁଡ଼୍‌ପ୍‌ତଣ୍ଡ୍‌। 49 ଇଦ୍‌ ଲେକାମ୍‌ ଯୋଷେପ୍‌ ସମୁଦ୍ରତେ ଉସ୍କ ଇନା ଇସର୍ ନାର୍ଗେ କାଦି ଗୁଡ଼୍‌ପ୍‌ତଣ୍ଡ୍‌ ଯେ, ଆୱିଙ୍କ୍‌ ମେଣ୍ଡେ କଲ୍‌ସଡ଼୍‌; ବାତେଙ୍କ୍‌ଇତ୍କେ ଆୱ୍‌ କଲ୍‌ସ ପାର୍‌ୱଲେକେ ମାତ୍‌ତା।

50 ମେଣ୍ଡେ ମରୁଡ଼ି ବର୍ଷତ୍‌ ମୁନେ ଯୋଷେପ୍‌ତେ ରେଣ୍ଡ୍‌ ମାର୍‌କ୍‌ ଜନ୍ମ ଆସ୍‌ ମାତ୍‌ତଡ଼୍‌, ଓନ୍‌ ନଗର୍‌ ନିବାସିଡ଼୍‌ ପୋଟିଫେର୍‌ ଯାଜକ୍‌ତେ ଆସନତ୍‌ ପେଦେର୍‌ତେ ପିକିର୍‌ ଅଡ଼୍‌କିଂଙ୍କ୍‌ ଜନ୍ମମାଡ଼ି ମାତ୍‌ତେ। 51 ଆସୁଟ୍‌ ଯୋଷେପ୍‌ ବେଡ଼୍‌ୟନ୍‌ ପେଦେର୍‌ ମନଃଶି ୱାଟ୍‌ତଣ୍ଡ୍‌ ଇଦିନ୍‌ ଅର୍ଥ ମାର୍ଙ୍ଗାନାଦ୍‌ ୱାଟ୍‌ତଣ୍ଡ୍‌, ବାତେଙ୍କ୍‌ଇତ୍କେ ଅଣ୍ଡ୍‌ କେତ୍‌ତଣ୍ଡ୍‌, ପରମେଶ୍ୱର୍‌ ନା ସାରେ ତିପାଲ୍‌ ନୁ ନିଜର୍‌ ବାବାନ୍‌ ଲୋତ୍‌ତେ ମାର୍ଙ୍ଗାନାଦ୍‌ ଜନ୍ମ ମାଡ଼ି ମିନ୍ଦେଣ୍ଡ୍‌। 52 ମେଣ୍ଡେ ଦ୍ୱିତୀୟ ମାରିନ୍‌ ପେଦେର୍‌ ଇଫ୍ରୟିମ୍‌ତେ ଅର୍ଥ କାୟା ଆଦାନାଦ୍‌ ୱାଟ୍‌ତଣ୍ଡ୍‌, ବାତେଙ୍କ୍‌ଇତ୍କେ, ଅଣ୍ଡ୍‌ କେତ୍‌ତଣ୍ଡ୍‌, ନା ଦୁଃକଆଦାନ୍‌ ଦେଶ୍‌ତେ ପରମେଶ୍ୱର୍‌ ନାକିଙ୍କ୍‌ କାୟେ ଇସ୍‌ ମିନ୍ଦେଣ୍ଡ୍‌।

53 ତାନ୍‌ପେର୍କେ ମିସର୍‌ ଦେଶ୍‌ତାଗ୍‌ ଗଟେମ୍ ଆତ୍‌ତେ ପାଣ୍ଟ୍‌ତେ ସାତ୍‌ ବର୍ଷ ଶେଷ ଆତ୍‌ତେ। 54 ମେଣ୍ଡେ ଯୋଷେପ୍‌ତେ ବାକ୍ୟ ଅନୁସାରେ ଦୁର୍ବିକ୍ଷତେ ସାତ୍‌ ୱାଡ଼୍‌ସେତେ ଆରାମ୍‌ ଆତ୍‌ତେ; ଆସୁଟ୍‌ ୱେର୍‌ ସାରେ ଦେଶ୍‌ତାଗେ ମରୁଡ଼ି ପଡ଼େମ୍ ଆତ୍‌ତେ, ମାତ୍ର ସାରେ ମିସର୍‌ ଦେଶ୍‌ତାଗେ କାଦି ମାତ୍‌ତେ। 55 ମେଣ୍ଡେ, ସାରେ ମିସର୍‌ ଦେଶ୍‌ତାଗେ ଦୁର୍ବିକ୍ଷ ଆତ୍‌ତାଙ୍କ୍‌ ପ୍ରଜାଲଡ଼୍‌ କାଦିତ୍‌ ମାଇଦିଙ୍କ୍‌ ଫାରୋନ୍ ଗାରେ କାର୍ଙ୍ଗି ତାତ୍‌ତଡ଼୍‌; ଆସୁଟ୍‌ ଫାରୋ ସାରେ ମିସ୍ରିୟ ନାରୁଡ଼୍‌କିଙ୍କ୍‌ କେତ୍‌ତଣ୍ଡ୍‌, ମିଡ଼୍‌ ଯୋଷେପ୍‌ତେ ଗାରେ ଆନୁଟ୍‌; ଅଣ୍ଡ୍‌ ବାତେ କେତିତଣ୍ଡ୍‌, ଆଦ୍‌ ମାଡ଼ାଟ୍‌। 56 ଆସୁଟ୍‌ ସାରେ ଦେଶ୍‌ତାଗେ ମରୁଡ଼ି ଆତ୍‌ତାଙ୍କ୍‌, ଯୋଷେପ୍‌ ସାରେ ପଡ଼୍‌ୟେତ୍‌ ମୁଟା ଲେୟିସ୍ ମିସ୍ରିୟଡ଼୍‌କ୍ ଶସ୍ୟ ୱାମାନଙ୍କ୍‌ ପସ୍ପ୍‌ତଡ଼୍‌; କାରଣ ମିସର୍‌ ଦେଶ୍‌ତାଗେ ମରୁଡି ନାର୍ଗେ ଆତ୍‌ତେ। 57 ମେଣ୍ଡେ ସାରେ ଦେଶ୍‌ତେ ନାରୁଡ଼୍‌ ମିସର୍ ଦେଶ୍‌ତାଗ୍‌ ଶସ୍ୟ ଆସାନ୍‌ ମାଇଦିଙ୍କ୍‌ ଯୋଷେପ୍‌ତେ ଗାରେ ୱାତ୍‌ତଡ଼୍। ବାତେଙ୍କ୍‌ଇତ୍କେ ସାରେ ଦେଶ୍‌ତାଗେ ମରୁଡ଼ି ନାର୍ଗେ ମାତ୍‌ତେ।