Gênesis 50

1 Josẹph otto ọkpẹkẹ oforbukọ kw’otte, obhom ẹmọng, obira ọbaak-ẹ. 2 Pira oben achiranganọng p’mabira ade atọhmnọng pẹ bẹ́, màdo oforbukọ kw’otte, ọfha oning ọlọbh. 3 Wa mayẹ-ẹ k’iwu arọbh afa, k’ose kw’ẹmmaana chabẹ ede. Anọng p’Ijip maninga k’ofor-pyibha k’iwu arọbh attaan okwuma ijobh.

4 K’ogbe kw’nkk’Jekọb abhoma ma iwu ittonga, Josẹph oben asonọng p’Phero bẹ́, "Ó̱de ndaakẹ bọnga idik, màkkaan-m tek ọvaar Phero bẹ́, 5 ‘Wa atte kwaam osi-m, nchekẹ bẹ́, kaam m’nnọhng-ẹ z’epekwubh ch’iwa ikk’otuma osok z’izek s’Kenaan. Ototo, tte-m ọbọhk nd-nnọhng-ẹ za. M’mkpa nnam ọkpa.’ "

6 Phero ọpọhn-ẹ bẹ́, "Zọhng nọhnga atte k’ose kw’uwa ọsọ-ọ achekẹ."

7 Minna kw’Josẹph ofon bẹ́, ọd-ọnọhnga otte. Adukwa p’Phero maphyir, ọmaana asonọng p’ọsọhm kwẹ, ọttara adidennọng p’Ijip maphyir mayak-ẹ nnam, 8 maa ozeng k’ẹsọhmmọr chẹ maphyir, ọmaana ivotte pẹ, ọttara anọng p’abin z’ẹsọhmmọr ch’otte. Iva pabẹ, ọmaana etirakpo pyabẹ byẹ-byẹ iwa nerikẹ ny’Goshẹn. 9 Wa asoja p’ayaarẹ k’ijaar s’nnyanya id-itọr, ọmaana p’ayaarẹ nnyanya, mabir akwubh Josẹph obo nwo. Wa ede eyokinọngkaan ch’ẹsaabhẹ mawuriji.

10 Ch’mapyirẹ z’ibyi s’mad-aninga agwuma barli z’Atad kw’ọnyọm Jọrdan, machinẹ k’ẹrọng matamatama. Ny’ibyi njo jọ s’iwa Josẹph otim iwu ichenọmfa obhom otte. 11 K’ogbe kw’anọng p’Kenaan p’arukọ nya maze ose kw’ab’Josẹph mabhomọ obo kw’Israẹl ny’ibyi s’mad-agwuma abarli ny’Atad, maben bẹ́, "Anọng p’Ijip asokọ eninga ch’ọmọng-bhoma e!" Kẹ wọ osi pira wa makpe ibyi njo s’nyọm Jọrdan bẹ́, Abẹl-Mizirayim.

12 Minna kw’uwa iva p’Jekọb masi k’ose kw’otte ikk’bẹ ọtọhna. 13 Matinẹ oforbukọ kw’otte atima achina z’Kenaan, mad-anọhnga z’ọtakpa-sọhm z’izek s’Makpẹla, kw’ọnyọm Mamrẹ. Ọtakpa-sọhm nwo wọ kw’uwa Abraham odebh ọmaana izek njo z’mbọhk s’Ẹpharọn kw’ofon Hẹt, mach’ifuranọng-byi. 14 Josẹph ọnọhng otte nya o, ọkpa nnam z’Ijip ọmaana ivotte, ọttara anọng mboza maphyir p’makwubh-ẹ obo nwo.

Josẹph osi nttem s’ivotte ininga ẹwọr

15 Ch’ivotte p’Josẹph makwu aze bẹ́, otte kk’ọpa, maben ayok bẹ́, "Mm’osi yen, óde Josẹph otim oyen ididọkọ z’ettem ọmaana mina k’adiktama mbo p’uwa mọsẹ-ẹ, ochibhẹ bẹ́, m’osi mina itama?" 16 Ofona nya, matọhm ẹkkaabha anang Josẹph bẹ́, "Ntọhna s’iwa atte ọnang-ẹ pira ope ide bẹ́, 17 motek-ọ bẹ́, ‘Abina anang ivotte pọ k’mpinẹ s’nkk’asa amaan-ọ.’ Mokwukọ-okwukọ bẹ́, abina anang mina k’mpinẹ samina, mina p’mode atọhmnọng p’Ibinọkpaabyi kw’atte kwọ okpobh." Josẹph ọbhaang ẹkkaabha ndo nya o, obhom ẹmọng.

18 Nya o, ivotte mbo pẹ makwu atto akwubh-ẹ ny’izek, maben-ẹ bẹ́, "Mina nnode abira pọ."

19 Josẹph oben bẹ bẹ́, "Oning bọnga ojor. Bọnga machibhẹ bẹ́, kaam wọ nde Ibinọkpaabyi o? 20 Bọnga makamẹ epyibha amaan-m, okenaka, Ibinọkpaabyi ọbhakẹ osok k’ejibha, ọfha nkkaana akpen p’anọng saabhada. 21 Tte oning bọnga ojor. Kaam m’nkkerẹ bọnga ọmaana iva pabọnga." Minna kw’ofokọ bẹ nttem, ọgbaak odik k’ẹdaak ọkkọkka ọnang bẹ.

Obo kw’Josẹph

22 Nya o, Josẹph ochina ororo oruk ny’Ijip ọmaana nchimma s’otte. Oning akpen k’icho arọbh achen okwuma ijobh. 23 Obir okebha obhon f’iva p’iva p’ojinọngnwa kwẹ Ephraim ọdọk. Obir oruk oze ch’iva p’Makir kw’ode nnwa kw’Manasẹ obhonọ, m’ammaan ny’ikẹ k’echimma.

24 Otum k’ogbe wanẹ, Josẹph oben ivotte bẹ́, "Kaam min’nkkikken mpe e. Ibinọkpaabyi m’okkerẹ bọnga, otima bọnga obina m’izek nja, ochina z’izek s’iwa ikk’ocheka ọnang Abraham, ọmaana Isaak, ọttara Jekọb." 25 Josẹph osi ivotte machekẹ, oben bẹ bẹ́, "Ibinọkpaabyi m’okkikkaana bọnga, otima bọnga eden. Màkpokọ akọbhọ paam tima bina m’izek nja."

26 Nya o, Josẹph okwu ope ch’inode icho arọbh achen okwuma ijobh k’atam. Mado oforbukọ kwẹ, mayika k’ifura-kwukwu ny’Ijip.