Ichedendik 6

Nkwurọ s’ayokinọng

1 K’ogbe kw’uwa ayokinọng nkk’atọma osisaabh m’iyagbin, panọngva mabir ammaana. 2 Iva p’Ibinọkpaabyi maze bẹ́, panọngva p’ayokinọng ajibh-ojibh. Ofona nya o, matéka okpenamkpen kw’ọdaakẹ bẹ maba. 3 Nya o, Ọvaar Ibinọkpaabyi oben bẹ́, "Egwugwuma chaam ọdọk oyokinọng mèkpo eninga ẹmaana ttattampe; okurọ bẹ́, oyokinọng ode ọkpakpa. Kẹ akpen mòruk ọkpaan icho arọbh achadanẹ."

4 Ny’ogbe nwo, wa aNephilim aning m’iyagbin. Nya ch’ogbe nwo kk’obir ọkpana, iva p’Ibinọkpaabyi mad-ayima panọngva p’ayokinọng ábẹ̀, mabhon iva. Bẹ bọ iwa made akem-akpa p’ẹtama, mabir ade ajinọng p’ayinẹ eche.

5 Ọvaar Ibinọkpaabyi oze ose kw’itama s’oyokinọng ikk’ilora m’iyagbin, ọmaana bẹ́, achibhẹ p’ettem chẹ made itama k’ogbe kpenamkpen. 6 Ifor ipyibh Ọvaar Ibinọkpaabyi, obir ọmmẹ-ẹ z’ettem bẹ́, kk’oyokinọng ọsa osok m’iyagbin. 7 Ofona nya o, Ọvaar Ibinọkpaabyi oben bẹ́, "Kaam m’ndimẹ ayokinọng maphyir p’ikk’nsa m’iyagbin. M’ndimẹ ayokinọng ọmaana nten, ọmaana ekpo maphyir py’ezeng m’izek, ọttara ọnọhn f’iwokọ, okurọ bẹ́, ọmma-m z’ettem bẹ́, wa kaam kk’bẹ nsa."

8 Okenaka, wa Noa ofu Ọvaar Ibinọkpaabyi k’ichen.

Odik kw’ọmaan Noa

9 Ma wọ ode odik kw’ọmaan Noa.

Wa Noa ode ọnọng kw’otor-otor, epinẹ koyen mach’anọng p’arukọ ny’ogbe kwẹ, obir ọgbaka ifor ọmaana Ibinọkpaabyi.