1 Ibi ni vyo uzobakorera mu kubeza kugira ngo bankorere igikorwa c’ubuherezi: uzofate ishuri ikiri nto n’impfizi z’intama zibiri zitagira agasembwa. 2 Hanyuma uze ukore imikate itarimwo umwambiro mw’ifu y’ingano inoze neza, ucumbe n’utundi dukate ducumbanywe n’amavuta ya elayo, n’utundi dufyase ducumbanywe n’amavuta ya elayo. 3 Ubishire mu giseke, ubizanane na ya shuri na za mpfizi zibiri z’intama. 4 Uheze uzane Aroni n’abahungu biwe ku rwinjiriro rw’Ihema ry’Ibonaniro ubogeshe amazi. 5 Hanyuma wakire za mpuzu, wambike Aroni uwo mwambaro usharijwe n’amabara, ya kanzu yambaranwa na efodi, hamwe na efodi ubwayo na ka gafuko ko mu gikiriza. Hanyuma urenzeko ca gitambara gisharije ca efodi yambaza mu rukenyerero. 6 Umwambike na ca gitambara mu mutwe, ugifatisheko na ka gasharizo. 7 Uce ufata amavuta yo kurobanura uyamusuke ku mutwe. 8 Wongere uzane abahungu biwe ubambike ya myambaro yabo isharijwe n’amabara. 9 Ukenyeze imikanda Aroni n’abahungu biwe, ubambike na twa dukofero. Igikorwa c’ubuherezi kizoba kibaye icabo ibihe vyose biciye muri iryo robanurwa ry’intahava. Uko abe ari ko uzorobanura Aroni n’abahungu biwe.

10 Uzozane ya shuri imbere y’ihema ry’ibonaniro, Aroni n’abahungu biwe bayirambikeko ibiganza ku mutwe. 11 Uzoce uyikererera imbere y’Uhoraho ku muryango w’ihema ry’ibonaniro, 12 hanyuma ufate igice c’amaraso yayo uyasige ku mahembe y’igicaniro ukoresheje urutoke rwawe, ayasigaye uyasuke impande y’igicaniro. 13 Uzofate ibinure vyose bipfutse ivyo mu nda, igice gipfutse igitigu, amafyigo yompi n’ibinure biri kuri yo, ubituririre ku gicaniro. 14 Ariko inyama, urusato n’amayezi vyayo uzobituririre inyuma y’aho mucumbitse. Ni ikimazi gitangiwe ivyaha.

15 Uzoce ufata za mpfizi zibiri z’intama, Aroni n’abahungu biwe barambike ibiganza vyabo ku mutwe w’imwe muri zo. 16 Maze uyikerere, ufate amaraso yayo uyamijagire ku gicaniro impande zose. 17 Iyo mpfizi y’intama uheze uyihimburemwo ibihimba, izo mu nda hamwe n’amaguru uvyoze, ubishire hamwe n’ibindi bihimba, 18 hanyuma iyo ntama yose uyituririre ku gicaniro. Ni ikimazi co guturirwa n’umuriro gishikaniwe Uhoraho, umubabwe umota neza, ishikanwa rishikaniwe Uhoraho rituriwe n’umuriro.

19 Ufate ya yindi mpfizi, Aroni n’abahungu biwe bayirambikeko ibiganza vyabo ku mutwe. 20 Hanyuma, uzoce uyikerera, ufate igice c’amaraso uyasige ku matwi y’i buryo ya Aroni n’abahungu biwe, ku ntoke z’inkumu z’i buryo no ku mano makuru y’i buryo; ayasigaye uyamije ku mpande zose z’igicaniro. 21 Hanyuma wakire ku maraso yo ku gicaniro no ku mavuta yo kurobanura, uyamijagire kuri Aroni, ku vyambarwa vyiwe, no ku vyambarwa vy’abahungu biwe. Nuko we n’abahungu biwe bazoba bejejwe, kandi n’ivyambarwa vyabo bizoba vyejejwe.

22 Iyo mpfizi uzoyikuremwo ibinure, ivyo ku murizo, ibinure bipfutse ivyo mu nda, igice gipfutse igitigu, amafyigo yompi n’ibinure biri kuri yo, n’itako ry’i buryo. (Iyo ni yo ntama y’irobanurwa.) 23 Muri ca giseke c’imikate itarimwo umwambiro iri imbere y’Uhoraho, uzofate umukate wiburungushuye umwe, udukate ducumbanywe n’amavuta ya elayo, n’akandi kamwe gatogato; 24 uzobishire mu biganza vya Aroni n’ivy’abahungu biwe, babishikanire Uhoraho mu kubizunguza nk’uko bigenda mu migenzo yo gushikanira Uhoraho. 25 Maze ubikure mu minwe yabo ubituririre ku gicaniro hamwe n’ibimazi vyo guturirwa n’umuriro, kugira ngo bibe ibimota neza, bihimbara Uhoraho, ishikanwa rishikaniwe Uhoraho rituriwe n’umuriro. 26 Kandi ufate igikiriza c’iyo mpfizi y’intama yo kurobanura Aroni, ugiterure ukizunguze imbere y’Uhoraho kiri mu biganza vyawe nk’ishikanwa rizungujwe. Ico kizoba ari co mugabane wawe.

27 Ushire ku ruhande ibice vy’iyo mpfizi yo kurobanura Aroni n’abahungu biwe ari vyo vy’ibi: ca gikiriza na rya tako vyadugirizwa Uhoraho, hamwe n’ishikanwa ryejejwe. 28 Uwu uzokwame ari wo mugabane wa Aroni n’abahungu biwe. Ivyo bizova ku mashikanwa y’Abisirayeli, ayo bazoshikanira Uhoraho nk’amashikanwa y’ishimwe.

29 Ivyambarwa vyejejwe vya Aroni bizokwame bihabwa abana n’abuzukuru uko bazogenda bamusubirira kugira ngo bazirobanurirwemwo. 30 Uwuzomusubirira nk’umuherezi akaza mw’ihema ry’ibonaniro gukora igikorwa c’ubuherezi Ahera, azomare imisi indwi azambara.

31 Uzofate ya mpfizi yo kurobanura, inyama zayo uzitekere mu kibanza catoranijwe. 32 Aroni n’abahungu biwe bazozirire imbere y’ihema ry’ibonaniro, bazikoze imikate iri muri ca giseke. 33 Bazorye ivyo vyatanzwe ngo bibabere ikimazi c’ivyaha co kurobanurwa n’ukwezwa kwabo. Ariko ntihazogire uwundi abiryako kuko ari ivyejejwe. 34 Inyama z’iyo mpfizi n’imikate nivyarara bigashika mu gitondo, bizoturirwe. Ntibizoribwe kuko ari ivyera.

35 Ivyo bibe ari vyo uzogirira Aroni n’abahungu biwe mu kubarobanura nk’uko nabigutegetse. Igikorwa co kubarobanura kizomare imisi indwi. 36 Imisi yose uzoshikane ikimazi c’ishuri gitangiwe ivyaha. Uze weze igicaniro mu kugitangira ikimazi, ukirobanuze amavuta, uceze. 37 Uzomare imisi indwi utangira ikimazi ico gicaniro, wongera uceza. Maze igicaniro kizoba icera cane, kandi ikizogikorako cose kizoba kibaye icera.

38 Ng’ibi ivyo uzokwama ushikana ku gicaniro imisi yose: imyagazi y’intama ibiri imaze umwaka. 39 Muze mushikane umwe mu gitondo, uwundi ku mugoroba. 40 Umwagazi wa mbere uzowutangane n’ic’icumi c’ingero efa* y’ifu inoze neza hamwe n’ica kane c’ingero hini* y’amavuta meza yakanywe muri elayo, wongereko igice c’ilitiro ry’umuvinyu nk’ishikanwa ry’ibinyobwa. 41 Umwagazi wa kabiri uzowushikane ku mugoroba, hamwe n’ishikanwa ry’ifu, amavuta, n’umuvinyu bingana n’ivyo mu gitondo. Bizoba ari ishikanwa rimota neza rihimbaye, ikimazi gishikaniwe Uhoraho giturirwa n’umuriro.

42 Ivyo bimazi biturirwa n’umuriro bizokwame bitangwa imisi yose uko urunganwe ruzogenda rukurikirana. Bazobishikane imbere y’Uhoraho mu rwinjiriro rw’ihema ry’ibonaniro. Nanje nzoza mbonane namwe, mvugane namwe. 43 Ni ho kandi nzobonanira n’Abisirayeli, kandi ico kibanza kize cezwe ku bw’icubahiro canje.

44 Nzokweza ihema ry’ibonaniro n’igicaniro, nongere neze Aroni n’abahungu biwe kugira ngo bambere abaherezi. 45 Nanje nzoba hagati mu Bisirayeli, mbe Imana yabo. 46 Ni ho bazomenya ko ndi Uhoraho Imana yabo, nabakuye muri Egiputa kugira ngo mbane na bo. Ndi Uhoraho Imana yabo.