1 Bezaleli abaza isandugu mu giti c’ikasiya ifise ingero z’igice c’ukuboko zibiri n’igice* z’uburebure, ingero y’igice c’ukuboko imwe n’igice* y’ubwaguke n’ingero y’igice c’ukuboko imwe n’igice y’igihagararo. 2 Ayomekako inzahabu itavanze imbere n’inyuma, ayikikuza n’urubiga rw’inzahabu itavanze. 3 Ayicurira n’ibigombo bine mu nzahabu abimadika ku mfuruka zine z’iyo sandugu bibiri ku ruhande rumwe, ibindi bibiri ku rundi ruhande. 4 Abaza n’imyamba mu giti c’ikasiya, ayomekako inzahabu. 5 Iyo myamba ibiri ayicisha muri vya bigombo bine kugira ngo ibe iyo kurerura iyo sandugu.

6 Acura n’umupfundikizo mu nzahabu itavanze wo guhongerako ufise ingero z’igice c’ukuboko zibiri n’igice* z’uburebure, n’ingero y’igice c’ukuboko imwe n’igice* y’ubwaguke. 7 Yongera acura abakerubi babiri mu nzahabu ihondaguwe n’inyundo, abatera ku mpera za wa mupfundikizo. 8 Umukerubi umwe amushira ku mutwe umwe, uwundi amushira ku wundi, abafatanya na wa mupfundikizo vyose bigirwa nk’ikintu kimwe. 9 Abo bakerubi bari bashanje amababa yabo araba hejuru, bayapfutse wa mupfundikizo. Bararabana, bunamye baraba ku mupfundikizo w’isandugu.

10 Bongera babaza imeza mu giti c’ikasiya, ifise uburebure bw’ingero z’igice c’ukuboko zibiri*, ubwaguke bw’ingero y’igice c’ukuboko imwe*, n’igihagararo c’ingero y’igice c’ukuboko imwe n’igice*. 11 Na yo nyene bayomekako inzahabu itavanze, bayikikuza n’urubiga rw’inzahabu. 12 Bongera bayikikuza imbiga z’inzahabu zingana n’ikiganza c’umuntu* mu bwaguke. 13 Bacura n’ibigombo bine mu nzahabu, babitera ku mfuruka zine, aho amaguru yayo yari atereye. 14 Ivyo bigombo vyari bitewe hafi y’imbiga kugira ngo vyinjizwemwo imyamba yo kurerura iyo meza. 15 Imyamba yo kuyirerura yari ibajwe mu giti c’ikasiya, kandi yari yometseko inzahabu. 16 Bongera bacura mu nzahabu itavanze ibindi bikoresho vyose bikenewe ku meza: amasahani, udukombe, utubesani, n’udukarabo, ivyo gusukisha amashikanwa y’umuvinyu n’amavuta ku gicaniro.

17 Bacura n’igiterekwako amatara mu nzahabu itavanze kandi bahondaguje inyundo. Cose hamwe n’ibikigize vyari bifatanijwe bigize ikintu kimwe: umutumba, intebe yaco, n’ibikombe vy’amatara bimeze nk’amashurwe apfunditse n’ayasambuye. 18 Cari gifise amashami atandatu afashe ku mutumba waco; atatu ku ruhande rumwe, n’ayandi atatu ku rundi. 19 Ishami ryose ryari ririko ibikombe bitatu bimeze nk’amashurwe y’igiti citwa shakedi, apfunditse n’ayasambuye. Kw’ishami rikurikira vyari uko, kandi ni ko vyari biri no kuri ayo mashami atandatu yose ari ku giterekwako amatara. 20 Kandi ku mutumba w’ico giterekwako amatara hariko ibikombe bine bimeze nk’amashurwe y’igiti citwa shakedi, apfunditse n’ayasambuye. 21 Musi y’amashami abiri ya mbere bahashira ishurwe ripfunditse riva ku mutumba waco, irya kabiri barishira musi y’ayandi abiri akurikira, irya gatatu musi y’amashami ya gatatu, gutyo gutyo gushika kuri atandantu yose hamwe. 22 Amapfundo y’amashurwe hamwe n’amashami vyari bifatanijwe, bigizwe ikintu kimwe n’umutumba w’igiterekwako amatara, vyose bicuzwe mu nzahabu itavanze.

23 Bakora n’amatara indwi yaco, imikasi yo gutunganya urutambi, utwo gushiramwo umunyota, kandi vyose bicurwa mu nzahabu itavanze. 24 Vyose hamwe vyakozwe mw’italanto* y’inzahabu itavanze.

25 Bakora n’igicaniro co guturirirako ibimota neza, bakibaza mu giti c’ikasiya. Cari gifise ingero y’igice c’ukuboko imwe* ku mpande zose, n’ingero z’igice c’ukuboko zibiri* z’igihagararo, kandi amahembe yaco yari akozwe mu giti kimwe n’ico gicaniro bigize ikintu kimwe. 26 Bacomekako inzahabu itavanze hejuru, imbere muri co, ku mpande no ku mahembe, bongera bagikikuza n’urubiga rw’inzahabu. 27 Bacura ibigombo bibiri mu nzahabu babitera kuri ico gicaniro musi ya rwa rubiga, ku mpande zibiri zirabana, kugira ngo zizosobekwemwo imyamba yo kukirerura. 28 Iyo myamba bayibaza mu giti c’ikasiya, bayomekako inzahabu.

29 Bongera batunganya n’amavuta yejejwe yo kurobanura hamwe n’ibimota neza bitamirana, bikorwa n’abahinga babimenyereye.