Edwɛndolɛ 141

Nzɛlɛlɛ mɔɔ bɛsɛlɛ amaa bɛahwe bɛ nwo bɛavi ɛtane nu la

1 O Nana Nyamenle, wɔmɔ yɛɛ mebodo mesɛlɛ wɔ a; boa me ndɛndɛ zo! Yɛ ɛnzolɛ maa me wɔ mekɛ mɔɔ menwɔzu menwɔvɛlɛ wɔ la. 2 Maa me nzɛlɛlɛ ɛdwu ɛ nyulu kɛ ɛyɛlɛ mɔɔ bɛlɛkpu la; die me sa mɔɔ mekpogya ye zo anwuma la kɛ nɔsolɛ azubɔlɛ.

3 O Nana Nyamenle, bɔ me nloa mɔɔ mendendɛ a; tu sinzavolɛ maa ɔrazinza me nloa babonle ne. 4 Twe me fi ɛtaneyɛlɛ nwo; mmamaa menyia ɛhulolɛ bie kɛ me nee amumuyɛvoma kɛdu wɔ bɛ ninyɛmunliyɛlɛ nu. Mmamaa me nee bɛ kyɛ bɛ anwonyia mɔɔ bɛanvɛ na bɛanyia ye la. 5 Sonlakpalɛ bɔbɔ badendɛ me nyunlu wɔ me kpalɛyɛlɛ ti, noko akee menrɛmaa me nye ɛnrɛzɔ ninyɛndaneyɛvoma bɛ ayɛlɛyelɛ biala; ɔluakɛ alehyenlɛ biala mesɛlɛ metia bɛ amumuyɛ nyɛleɛ ne mɔ. 6 Saa bɛye bɛ arelemgbunli ne mɔ bɛwula Funli Kuma asa anu a, yɛɛ akee bɛkɛnwu kɛ Awulae edwɛkɛ ne mɔ le nɔhalɛ a. 7 Kɛ ɛyɛne mɔɔ bɛkpakyekpakye nuhua nzokɛnzoka la, zɔhane ala a bɛbubu bɛ mbowule ne mɔ bɛkpondekponde wɔ nla ne mɔ azo a.

8 Noko akee mekɔ zo mefa me rɛle mewula wɔ nu, O Nana Nyamenle me Nyamenle. Wɔ nu yɛɛ mekpondɛ feabelɛ a; mmamaa bɛku me bɛto me lɔ kpatalakpa. 9 Bɔ me nwo bane fi ngane mɔɔ bɛzuozua me la anu; ye me fi ɛtanevolɛma bɛ akpame mɔɔ bɛva ye wɔ me nwo la anu. 10 Maa amumuyɛvoma bɛdabɛ bɛ asawu mɔɔ bɛgua la ɛhye bɛ wɔ mekɛ mɔɔ mame mede me ɛleka bie, me nwo kɔlɔɔnwo la.