1 Me Nyamenle, me Nyamenle, duzu ati a wɔkpo me a? Duzu ati a mesu mefɛlɛ wɔ a ɛmbua me bie, na mebiza wɔ moalɛ a ɛmmaa me a? 2 Alehyenlɛ muala mesu mefɛlɛ wɔ, O me Nyamenle, noko akee ɛmbua me; aledwolɛ kpokpoti mebodo wɔ, noko akee ɔ muala le gyɛne. 3 Wɔmɔ noko a le Nwuanzanwuanza kotokokye ne a. Wɔmɔ yɛɛ Yizilayɛ amuala bɔ wɔ duma kpalɛ a. 4 Yɛ mgbanyima liele wɔ lile; bɛvale bɛ rɛle bɛwulale wɔ nu, na ɛlielɛ bɛ. 5 Bɛzunle bɛvɛlɛle wɔ, na ɛyele bɛ ɛvile munzule nu; bɛliele wɔ bɛlile, na wɔanye bɛ rɛle wɔando bɛ sa nu.

6 Kɛkala mɔ menle sonla bieko; ngoane biala ɛnle me nu. Menli kyi me kɔkɔkɔkɔ, na eza bɛkpɔ me. 7 Menli nwu me a bɛsi me amgbu; bɛtu bɛ nloa bɛgua me nwo zo; na bɛkpusukpusu bɛ ti bɛse kɛ, 8 "Ɔvale ɔ rɛle ɔwulale Nana Nyamenle nu amaa yeanyia ngoane. Saa Awulae wɔ ye afoa ɛdeɛ a, ɛnee bɛmaa ɔlie ye ɛ."

9 Wɔmɔ yɛɛ ɛbɔle me a; yɛɛ wɔmɔ a wɔnlea me nwo zo wɔvi me ngakula nu too wɔrakpula ɛnɛ a. 10 Sumunli kɛ bɛwole me la, metɛkoatile wɔ ɛlɛ; yɛɛ dahuu noko ɛle me Nyamenle. 11 Mmamaa yɛ mu nwiɔ yɛ avinli tete; ɔluakɛ munzule lua adenle nu; yɛɛ menlɛ boavolɛ biala boka ɛ nwo.

12 Kpɔvolɛma ɛbɔ me nwo mgbɔlɛka ɛyia; nlankɛ nyinli ɛbɔ me nwo mgbɔlɛka ɛyia. Bɛle kɛ Beeshyan nlankɛ anwo ɛzulolɛ ne mɔ la. 13 Bɛbukebuke bɛ nloa wanaanwo bɛdoa me; bɛyɛ kɛ awenade mɔɔ ɛhɔne ɛlɛku ye na ɔlɛkulu la. 14 Me anwosesebɛ muala ɛminli; yeminli kɛ nzule mɔɔ bɛwola bɛgua ye aze la. Me akpɔkɛ nu ɛtuto; me ahonle ɛde penyi kɛ wate la. 15 Me kominza ɛyɛ resee kɛ ɛsɛlɛ zo; me tafinlima ɛzɔ ɛbeta. Wɔmaa medɔ agye wɔ ewule sa nu. 16 Ahodiawu ɛbɔ me nwo mgbɔlɛka ɛyia; bɛyɛ kɛ ahwea kpolane bɛdoa me. Bɛtudu me nwo nane woli woli zɛhae ala. 17 Me mbowule muala ɛza ɛgua zo. Me kpɔvolɛma nea me dedee bɛ gyakɛ kpulokpula. 18 Bɛkye me ndanlɛ bɛfa, na bɛtwe me tɛladeɛ nwo adunyi.

19 O Nana Nyamenle, mmagyakyi me ɛkɔ moamoa! O me anwosesebɛmaavolɛ, bɛla baho die me ndɛndɛ! 20 Die me fi nrɛlande ewule sa nu; die me ɛkɛla ne ngoane fi ahodiawu ɛhye mɔ asa anu. 21 Die me fi awenade ɛhye mɔ anloa anu; me anwosesebɛ ɛwie wɔ ahodiawu ɛhye mɔ anyunlu. 22 Mebaye wɔ ayɛlɛ meahile maanle maanle; mebayeyɛ wɔ meahile bɛ wɔ bɛ ayialeka ne mɔ. 23 "Bɛye Nana Nyamenle ayɛlɛ, O bɛmɛ mɔɔ bɛsulo ye la! Bɛmɛ Gyekɔbo abo zo amra, bɛwula ye anyunlunyia! Bɛzonle ye, bɛmɛ Yizilayɛma! 24 Ɔluakɛ ɔmbu ɔ nye ɔngua ehyiavolɛma anwo zo; yɛɛ ɔmkpo menli mɔɔ wɔ nyanenwunlɛ nu la. Emomu nuhua biala mɔɔ kɛzu kɛvɛlɛ ye la, ɔtie ye."

25 Mebahanvo wɔ wɔ ayiaku kpole ne anyunlu, wɔ mɔɔ wɔyɛ la ti. Wɔ wɔ sonlevolɛma ne anyunlu, yɛɛ mebava wɔ ɛwɔkɛdeɛ ne meamaa wɔ a. 26 Ehyiavolɛma bali amaa bɛ ko ayi; bɛdabɛ mɔɔ bɛwolo Nana Nyamenle la baye ye ayɛlɛ; bɛbanyia ngoane mɔɔ ɔnlɛ awieleɛ! 27 Maanle maanle muala banwu Nana Nyamenle. Bɛvi aleɛabo ɛleka biala bɛbara Awulae ɛkɛ; aleɛabo abusua eku eku kpokpoti bazonle ye.

28 Nana Nyamenle le belemgbunli, na ɔsie maanle maanle kpokpoti. 29 Mgbanyizonleyɛvoma amuala bahoto ye; aleɛabo amra kpokpoti babɔ bɛ ti aze amaa ye. 30 Kenlebie-amra bazonle ye; menli bali Awulae anwo daselɛ ahile kenlebie-amra. 31 Bɛdabɛ mɔɔ bɛtɛnyianle bɛtɛwole bɛ bɔbɔ la bade kɛ: "Awulae liele ye menli amgba."