1 Bɛli fɛlɛko wɔ Nana Nyamenle nu, O tenlenema; bɛva anyelielɛ bɛdeɛdea nu bɛmaa ye wɔ mɔɔ yeyɛ yemaa bɛ la anwo. Bɛhanvo ye, bɛmɛ mɔɔ bɛsonle ye a. 2 Bɛva getae bɛye Nana Nyamenle ayɛlɛ; bɛva bɛ-sa-nu sanwunle mɔɔ zolɛ nyɛma bulu la bɛdo edwɛne bɛye ye ayɛlɛ. 3 Bɛdo edwɛne fofolɛ bɛmaa ye; bɛva anyelielɛ kpole bɛbɔ ye amodinli.

4 Ɔluakɛ Nana Nyamenle anloa edwɛkɛ le nɔhalɛ; yɛɛ ɔ sa anloa gyima noko di munli. 5 Nana Nyamenle kulo nyɛleɛ tenlene nee ndɛnebualɛ; ye ɛhulolɛ kpundii ne ɛyi azɛlɛ ye tɛkɛɛ. 6 Ɔlua Awulae anloa edwɛkɛ zo, yɛɛ bɛbɔle anwuma anwuma, nee mɔɔ wɔ nu la amuala a. 7 Ɔdaye a ɔbɔle nyevimgbole, na ɔpɛle mbula ɔziele bɛ nu a.

8 Bɛzulo Nana Nyamenle, bɛmɛ aleɛabo amra! Bɛbɔ bɛ ti aze bɛzonle ye, bɛmɛ ewiade amra! 9 Ɔluakɛ ɔlua ɔ nloa edwɛkɛ zo a bɛyɛle debie biala a; ye tumi nu a debie biala vi rale a. 10 Nana Nyamenle maa maanle maanlema akpamevalɛ yɛ gyɛne; ɔmmaa bɛngola bɛnva bɛ adwenle nzuzulɛ ɛtane ne bɛnli gyima. 11 Nana Nyamenle ngyehyɛlɛ ne mɔ wɔ ɛkɛ ne dahuu; ye adwenle nzuzulɛ ɛngakyi ɛlɛ.

12 Nyilalɛ ɛha maanle ne mɔɔ Nana Nyamenle le ye Awulae la; nyilalɛ ɛha menli ne mɔɔ yeva bɛ yeyɛ ye deɛ la! 13 Nana Nyamenle nwu awie biala vi ye anwuma anwuma lɔ. 14 Ɔde ye belemgbunli ebia ne azo, na ɔnwu awie biala mɔɔ wɔ azɛlɛ ye azo la. 15 Yemɔ a bɔle awie ko biala, na ɔze nuhua ko biala ye nyɛleɛ a.

16 Belemgbunli azogya ekpunli ekpunli mɔɔ ɔlɛ bɛ la, ɛngile ye konimlilɛ wɔ konle nu. Katakyie ɛnlua anwosesebɛ kpole mɔɔ ɔlɛ ye la azo ɛnlie ɔ nwo. 17 Adu nee ndumunli le mgbane wɔ konimlilɛ nu; ngoanelielɛ biala ɛnle bɛ nu.

18 Nana Nyamenle anye wɔ bɛdabɛ mɔɔ bɛdie ye bɛdi la anwo zo; ɔnea bɛdabɛ mɔɔ bɛva bɛ rɛle bɛwula ye anwunvɔnezelɛ nu la boɛ. 19 Ɔdie bɛ ɔfi ewule nu; ɔmmaa bɛnhwele bɛ ngoane wɔ ɛhɔne mekɛ nu. 20 Yɛfa yɛ rɛle yɛwula Nana Nyamenle nu; yemɔ yɛɛ ɔle yɛ sinzavolɛ nee yɛ boavolɛ a. 21 Yɛdi fɛlɛko wɔ Awulae nu; ɔluakɛ yeva yɛ rɛle nee yɛ ahonle yewula ye duma nwuanzanwuanza ne anu. 22 Maa wɔ anwunvɔnezelɛ ne ɛrɛla yɛ nwo zo, O Nana Nyamenle; kɛmɔ yɛ diedi ne mɔɔ wɔ wɔ nu la de la.