6 Aba lariñagun Heremíasi:
7 —Adimurehati Aburemei nun, lariñaga: "Liábinba biduhe Anaméli, le liráü biyaurite Salumu ariñaga bun lun bagañeihani lufulasun le Anatótubei, ladüga buguya lan yarafaguatimabei biduhegua luma". 9,10 aba nagañeihani fulasu ligía lúmagiñe niduhe Anaméli. Aba nederegerun disedü murusun pülata lun, ebegi le uágubei wadüga daradu, aba nadügüni daradu bürüwañu, tánpüwañu lau haseinin ha gefenbaña luagu. 13,14 Aba nariñagun lun Baruku hagibugiñe:
«Lariñahare Aburemei Suntigabafu le Lubungiute Ísüraeli: Barüboun bián kopia lani daradu to, to daruguboun tuma to daraguboun, ruboun lidoun aban weru lauti múa lun tadurarun saragu dan. 15 Ladüga lariñahare Aburemei Suntigabafu, le Lubungiute Ísüraeli: Lidan múa le, tagañeihóuayaba muna, ichari tuma beibei-agei».
25 Ani lau sun lira, Nabureme, ariñagatibu nun lun nagañeihani fulasu ligía hagibugiñe gefentiña, lau sun lábürühaba lan uburugu háhaburugun Kalüdéana».
42 Ábaya lariñagun Aburemei:
—Ítara kei nóunahani lanarime wuribani le hawagun gürigia ha, nóunahabei giñe sun buiti le uágubei nariñaga houn. 43 Ani lidan ageiraü le, le uágubei bariñaga luagu lerederuba lan málouga, úouga gürigia ni animaalugu ñein, ani luagu lábürühaba lan labun habafu Kalüdéana, lagañeinhóuayaba fulasu ñein. 44 Lagañeinhóuba, ábame ladügǘn daradu bürüwañu, tánpüwa ani seini hameime gefentiña. Lasusereduba le lumúanrugu Benhamín, geyegua lau Herusalén luma burí luburuguterugu Hudá, dandu lidan fulasu burí le dabíararugubei kei lidan burí aüdü le lídanbei fulasu mawübüriti, luma lidan burí luburugute Négebü, ladüga nadügüba lun lasansiragun habunurun. Au, le Aburemei ariñagubalin.