1 "Ɔturi awune ɔbi, ɖikanya tã Israel abe si aɣɛ sɔ, 'O Israel abe, minɔ Bosate itɔ̃me. 2 Bosate Wɔ Nsiguso sɔ: Tsirise ɔɣɛ i mi iso sɔ, "Ɛɣɛɛ̃! Kokowi abemi ɔɔkpese bo are." ' 3 Ne ɔso ɖikanya si aɣɛ sɔ, ' Bosate Wɔ Nsiguso sɔ: Ala mi matsirise ɔta mabo i mi iso i kasɛ biara, ne mikpese nɖebi tsɔra mire gu maturi akaɖe nyanyariã gu iyerenina ne. 4 Ne ɔso Israel abe minɔ Bosate Wɔ Nsiguso itɔ̃me lo: Bosate Wɔ Nsiguso to ɔɣere abe gu abemi, siwore gu kugbolomi, akpakpi gu simagɛ̃ dzɛ matere manyua fiɛ maɔmɔɛ̃ ara fiɛ nɖebi mɛ loki milɔ sɛ̃ to sibara sɛ̃ aɣiãra ne - 5 nnɛgbe i Bosate Wɔ Nsiguso to ɔɣɛ ne: Wũ sirerɛ sikpã to sitsue i nɖebi tsɔra gu Edom ɔɖuɖu iso, alasɔ ku isoɣɔ gu ituridaawarɛ i ma situ ame ne, masu wũ karɔ̃ lɛ ma kare si maamɔɛ̃ ara i kã sikuakaɖekɔ̃.' 6 Ne ɔso ɖikanya ise i Israel karɔ̃ iso si aɣere abe gu abemi, siwore gu kugbolomi sɔ, ' Bosate Wɔ Nsiguso sɔ: Nto loɖeika ku wũ sirerɛ sikpã alasɔ ɔɔweinyɛ i nɖebi aɣiãra ame. 7 Ne ɔso Bosate Wɔ Nsiguso sɔ: Lotara wũ kɔrɔ̃ i kato nto lokã sɔ nɖebi mɛ loki milɔ-ɔ ana, to miaki i aɣiãra wa ame aki.

8 " 'O Israel abe, ɣɛɛ mi ne, mito miaɖi akpai fiɛ miaɣɔ̃ abi mitã wũ maturi Israel. Ala mato maaba kaa i ɔwi kurukutu ame ɔso. 9 Losu ira i mi iso fiɛ nto loanyɔ mi nnya fiɛ mato maakpɛ̃ karɔ̃ mapia ɔraɖui iso, 10 fiɛ nto loatã maturi ɔɣe masia i mi iso, ta Israel iyo ɔɖuɖu kɔraa. Maturi to maasɛ i simagɛ̃ ame fiɛ maaledza akpakpi itsue. 11 Nto loatã maturi gu mabɔi ɔsi fiɛ mala iɣe fiɛ maasi gbodzoo. Nto loasɛra maturi i mi ame lɛ ise saa fiɛ loatã ana isaruɛ abua iɖo saa. Iyɔ mito miatsue sɔ Mme nɖe Bosate. 12 Nto loatã maturi, wũ kaɖe Israel, ɔsɛ i mi iso. Ma ire miaɖe fiɛ miaɖe ma kaɖekɔ̃ fiɛ aisibasɛ̃ ma mabi itã kuiyikuiyi ana.

13 " ' Bosate Wɔ Nsiguso sɔ: Ala maturi sɛ maɣere mi sɔ, "Misɛ miwe maturi fiɛ misɛ mitã sɔ kaɖe iisɛ kana mabi ne," 14 ne ɔso miisibawe maturi ɣee miisibatã mi kaɖe ɔɖe silɛma, Bosate Wɔ Nsiguso loɣɛ. 15 Loisibatã sɔ aanɔ nɖebi aɣiãra gu sitia fiɛ aisibanɔ maturi aɣiãra ɣee maisibatã fɔ kaɖe ɔrɔ̃, Bosate Wɔ Nsiguso loɣɛ.' "

16 Bosate itɔ̃me ɔba me ana sɔ, 17 "Ɔturi awune ɔbi, ɔwi wɔ i Israel maturi ɔsɛ i ma mɔmɔ karɔ̃ iso ne, mapukutura kã ala ma nsɛgbai gu arabarara ɔso. Ma nsɛgbai ɔse lɛ kumɛgɔ i ɔrɔ̃go iisɛ ɔsekele i wũ anɔ si ɔya i kayoma i kuwa ame. 18 Ne ɔso loɖi wũ sikpã teterea losia i ma iso alasɔ maɔfere ima i karɔ̃ iso fiɛ alasɔ maɔpukutura kã ku ma arapɔa. 19 Losamera ma lopia i nɖebi ndɛ̃ ne masame mawe i nrɔ̃ ame ne. Loɣɛgu ma itɔ̃me i ma nsɛgbai gu arabarara kanya. 20 Ne ku kakɔi biara ga makɛlɛ i nɖebi ndɛ̃ ne, mapukutura wũ iyere sekelea, ala maɔɣɛ i ma iso sɔ, "Mmagbe nɖe Bosate maturi ɣɛɛ ne ɔrui ilɛ sɔ maɔrui i ɔ̃ karɔ̃ iso.

21 Loɔsu ira i wũ iyere sekelea iso, nnɛ i Israel iyo ɔpukutura i nɖebi mɛ ndɛ̃ maɔkɛlɛ.

22 "Ne ɔso ɣere Israel kaɖe sɔ, 'Bosate Wɔ Nsiguso sɔ: Iiɖe mi Israel kaɖe lo, ɔso nto loabara ara wagbe, ɣɛɛ ala Mme Bosate iyere sekelea iti, nnɛ miɔpukutura i ngbegɔ miɔkɛlɛ i nɖebi ame. 23 Nto loaɖi wũ iyere siare isekele lote. Iyere nɛ miɔpukutura i nɖebi ndɛ̃, iyere nɛ miɔpukutura i ma ndɛ̃. Si loɖi so lote sɔ losekele iki i mi iso i nɖebi anɔmi ame ne, iyɔ nɖebi to miatsue sɔ Mme nɖe Bosate, Bosate Wɔ Nsiguso loɣɛ.

24 " 'Ala nto loaɖi mi lobɔrɛgu i nɖebi ame. Nto loasa mi kanya lobɔrɛgu i nrɔ̃ ɔɖuɖu ame, lokpesera mi lobɔ i mi mɔmɔ karɔ̃ iso. 25 Nto loawɛwɛ̃ ndu mɛ lokpa lofere i mi iso fiɛ miakpa. Loto loasekelera mi lobɔrɛgu i mi ara wa loikpa ame gu i mi arapɔa ɔɖuɖu ame. 26 Nto loatã mi ɔtu ɣɛtɛ ne loapia siwarã ɣɛtɛ i mi ame. Nto loamɔɛ̃ ɔtu wɔ mba ɔle lɛ ita loɖi i mi ame fiɛ loatã mi ɔtu wɔ loɣɔ lɛ sina. 27 Ne nto loasu wũ Siwarã lopia i mi ame fiɛ loakã mi misiai wũ asɛ̃ra fiɛ loatã miɣara so mimɔɛ̃ wũ mmara mila kukaakɔ. 28 Mito miasɛ i karɔ̃ ga lotã mi mawa iso. Mito miaɖe wũ maturi fiɛ loaɖe mi Ɣaa. 29 Nto loaɖi mi lobɔrɛgu i mi idaasekele ɔɖuɖu ame. Nto loatã ɔraɖui ɔlɛ fiɛ ɔto ɔ̃asi fiɛ loibabɔ kukãsiare i mi iso. 30 Nto loatã adziri ɔɣɔ̃ abi asi gu ɔraɖui i nkpɛkɔ̃ ame ana, si miisibaɖe kunuarɛ i nɖebi ndɛ̃ ala kukãsiare iti. 31 Iyɔ mito mianyigi mi aranyanyariã siri gu mi ɔtile arabarara ne mianyɔ so pupurii i mi akpi gu anyanya kubarara iti. 32 Nto lobie sɔ miatsue sɔ loito lobara nnɛgbe i mi iti, Bosate Wɔ Nsiguso loɣɛ. Kunuarɛ sikukpɛ̃ mi si misopa ala mi nsɛgbai iti Israel kaɖe lo!

33 " 'Bosate Wɔ Nsiguso sɔ: Iyi nɛ loasekelera mi lobɔrɛgu i mi akpi ɔɖuɖu ame ne, Mme Bosate nto loabara sɔ maturi si masɛ i mi simagɛ̃ ame fiɛ maaledza akpakpi itsue. 34 Karɔ̃ ga lokpese ikpakpi ne, mato maakpɛ̃ kã iɖo sɔ kafere kere, i mma ɔɖuɖu nto maki kã ame mafe anɔmi ame. 35 Mato maaɣɛ sɔ, "Karɔ̃ ga manina ɔɔkpese lɛ Eden kawĩ. Simagɛ̃siare dzɛ loɖe akpakpi fiɛ mawɔra sɛ̃ kuwɛ̃ na i kame, ɔɔyigu maturi fiɛ kiniɔ ne maɔtsue abere mapia sɛ̃." 36 Iyɔ nɖebi mɛ lokuti miki milɔ mi ma lokuti to maatsue sɔ Mme Bosate loɔtara nnɛ mawɔra fiɛ loɔɣedza nnɛ loɖe ikpakpi. Mme Bosate loɔɖeika fiɛ nto loabara ne.'

37 "Bosate Wɔ Nsiguso sɔ: Loto loatã Israel kaɖe ɔkarɛ me ira ana fiɛ loabara nnɛgbe lotã ma: Nto loatã ma maturi ɔɣe masia lɛ masɛrɛ awe, 38 mato maasi lɛ masɛrɛ ma masɛ masu mabɔ lɛ asɔrɛ i Yerusalem ku ayiɖea wa masɛ iso. Ngbɔ ame i simagɛ̃siare dzɛ manina to siayigu maturi kposu ne. Iyɔ mato maatsue sɔ Mme nɖe Bosate."