1 Ɔwi wɔmɔ ame ne,

Bosate to ɔkpadzɛ̃ Levyatan kutsue,

Levyatan, aɣɛ wa nto abore gɔgɔlɔgɔgɔlɔ

Levyatan, aɣɛ wa nsɛ apɔ ɔka i ɔpo ame,

ɔto ɔ̃aɖoe aɣɛ siare

ku ɔ̃ ɔle ipɛmi siare nɛ mba ifɔ̃.

2 Ɔwi wɔmɔ ame ne,

"Ka kuka i wain kakpɛkɔ̃ ga loɣɔ̃ kukaakɔ iso:

3 Mme, Bosate nsɛ lodzuɛ̃ kã

lofere kã ndu ɔwi biara.

Lodzuɛ̃ kã kasɛ̃ i kakɔme

sɔ kuwɛ̃ iibabara kã ikpi.

4 Sikpã iito me.

Si akora gu miyu kere nto makpɛ̃gu me!

Tee loasɛ lotu wã i kakpã ame

lotsuedza wã ɔɖuɖu.

5 Ɣee tã maba maatarĩgu me;

tã mabaragu me isobuɛ,

aĩ, tã mabaragu me isobuɛ."

6 I ayi wa nto aba ame ne, Yakob aare siɖu,

Israel aaɣa ɔfere aɣɔ̃la

ɔtã kayiiso ɔyigu ɔ̃ adziribi.

7 Bosate ne ɔpɛ ɔpɛ Israel

lɛ ɔpɛ mma lopɛ Israel?

Ɔ̃ɔɖoe wũ

lɛ ɔɖoe mma loɖoe wũ?

8 Ɔkpɛ̃gu-ɔ gbɔgbɔɔgbɔ ɔkpadzɛ̃-ɔ ɔkɛlɛgu sisande ame -

ɔsa-ɔ i sikpã teterea ame

lɛ iyi nɛ i kuɣɛ̃kabɔrɛkɔ̃ ɔwiri to ɔkpɛ̃.

9 Ɣɛɛ nnɛ pɛ loatã Yakob akpi kuso

fiɛ maafore ɔ̃ akpi ɔɖuɖu maɖi wũ iso nɖe sɔ:

Ɔbara ɔ̃ ata isɔrɛkasege

lɛ kufe gɔ maakɔtɛ ɖɛkpɛrɛɛ,

si ɔɖi kuɣɔrɔ̃go Asera ɔdziri gu kuɣɛ̃ kuɣɔ atiĩ pelepele.

10 Ɔmagɛ̃siare wɔ matsue ibere maki malɔ ɔɔkpese ikpakpi,

kasɛkɔ̃ ga matere maɣɛ, kakpese lɛ fafuĩ ame;

ngbegɔ i anantsuĩbi aawe sikua,

mmɔ maarɛ;

mawe ayata ɔɖuɖu i akpa iso.

11 Si kɔ̃ akpa ɔɔkore ne, asɛ afɛfɛ̃

fiɛ marɔ̃go sɛ marɛrɛ mapia ala ɔtɔ.

Alasɔ maturi magbe iisɛ manɔ ara karɔ̃;

ne ɔso ma Baradze iisɛ ɔnyɔ ma nnya,

fiɛ ma ara iisɛ aɖo ma Pɔdze kayiri.

12 I ɔwi wɔmɔ ame ne, Bosate aarɛrɛ Israel mabi ɔwɛ̃ ɔwɛ̃ lɛ kumɛgɔ masɛ marɛrɛ ɔraɖui maɖi i simɔɣo ame ita i Frat ɔwore kanya isɛ iabo Egipte ɔwore kanya. 13 Ɔwi wɔmɔ ame ne, kadadã siare aakparĩ. Mma nto mawɔ i Asiria karɔ̃ iso gu mma mamɔɛ̃ makɛlɛgu sisande ame i Egipte karɔ̃ iso to maaba maasɔrɛ Bosate i kube sekelea iso i Yerusalem.