1 जेबे आऊँ तीई सालो रे चौथे मीन्ने ओर पाँजुए दिनो रा था, परमेशरे मांते गल्ल कित्ती। आऊँ यहेजकेल कबार नदिया रे कनारे पाँदे तिना लोका बीचा ते जिना खे यहूदी कैदिया रे रूपो दे तेथा ते लईगे दे थे। तेबे स्वर्ग खुली गा ओर माखे परमेशरो रे दर्शण ऊए।*1:1 यहे. 3:23 2 यहूदा प्रदेशो रे यहोयाकीन राजे री गुलामिया रे पाँजुए सालो रे चौथे मीन्ने रे पाँजुए दिने, बेबीलोनिया रे देशो दे कबार नदिया रे कनारे पाँदे, 3 यहोवे बेबीलोनो दे दर्शणो रे जरीये बूजीए रे पाऊ यहेजकेल पुरोईतो खे सन्देश दित्तेया ओर यहोवे री सामर्थ तेस पाँदे तेथी प्रकट ऊई।

4 जेबे आऊँ दर्शण देखणे लगेया, तेबे मैं देखेया कि उत्तर दिशा ते बड़ा पऊण-चूखाना ओर आगी रिया लूपिया साथे बड़ा तूफान आऊणे लगी रा ओर तूफानो रे चऊँ कनारे प्रयासा ओर आगी रे बीचो-बीच चमकेया दा पीतल़ी जेड़ा कुछ दिशणे लगी रा। 5 तेबे तूफानो बीचा ते चऊँ जानवरा जेड़े कुछ निकल़े ओर तिना री शक्ल माणूंआ जेड़ी थी। 6 पर तिना बीचा ते हर एकी रे चार-चार मूँ ओर चार-चार पंख थे। 7 तिना रे पैर सीदे थे ओर तिना रे पैरा री थाली बाच्छूआ रे खुरो जेड़े थे ओर सेयो चमकाये रे पीतल़ी जेड़े चमको थे। 8 तिना प्राणिया रे चऊँ कनारले पंखा निठे माणूंआ जेड़े आथ थे ओर तिना चऊँ रे मूँ ओर पंख एड़े थे: 9 तिना रे पंख एकी-दूजे साथे आपू-बीचे मिले दे थे, सेयो आपणे-आपणे सामणे सीदे ई चलो थे, मुड़ो नि थे। 10 हर एकी रे चार मूँ थे सामणे ते तिना री शक्ल माणूंआ जेड़ी थी ओर तिना चऊँ रे दाँणे कनारले मूँ शेरो जेड़े थे, खूँजे कनारले मूँ बल़दो जेड़े थे ओर चऊँ रे पिछले मूँ उकाब पंछिया जेड़े थे।*1:10 प्रका. 4:7 11 तिना री शक्ल एड़ी थी ओर तिना रे मूँ ओर पंख पाँदलिया तरफा खे लग-लग थे, हर एकी जानवरो रे दो-दो पंख थे, जो एकी-दूजे रे पंखो साथे मिले रे थे ओर दूई-दूई पंखे की तिना रा शरीर टखेया रा था। 12 सेयो सीदे आपणे-आपणे सामणे ई चलो थे, जेती प्राणिया रे पीतरे आत्मा जाणा चाओ थी, सेयो तेथी जाओ थे ओर चलदे बखते मुड़ो नि थे। 13 तिना चऊँ प्राणिया री शक्ल फेऊआ जेड़ी ओर बल़ी रिया मशाला जेड़ी दिशो थी ओर से आग प्राणिया बीचे ओरे-पोरे चलदे-फिरदे ऊए बऊत प्रयासा देयो थी ओर तेसा आगी ते बिजल़ी निकल़ो थी।*1:13 प्रका. 4:5, प्रका. 11:1 14 सेओ प्राणी बिजल़िया जेड़े छोड़ आगे पीछे दौड़ोए। 15 जेबे आऊँ तिना चऊँ प्राणिया खे देखणे ई लगी रा था, तेबे मैं देखेया कि जमीना दे तिना गे चऊँ मुंए री गिणतिया रे मुताबिक, एक-एक टईर था। 16 चारो टईर एक जेड़े दिशो थे। सेयो चमकीले रत्नो जेड़े चमको थे। टईर ईंयाँ बणी रे थे; हर एकी टईरो बीचे एक ओर टईर बणी रा था जो तेते बीछीए ऊई की जाओ था। 17 चलदे बखते सेयो टईर आपणे चऊँ कनारे चली सको थे ओर जेबे चलो थे, तेबे मुड़ो नि थे। 18 तिना चऊँ टईरा रे केरे बऊत बड़े ओर डराऊणे थे ओर तिना टईरा रे केरेया रे चऊँ कनारे आखी ई आखी परिया रिया थिया।*1:18 प्रका. 4:6 19 चक्र सदा प्राणिया साथे चलो थे जेबे प्राणी ऊबे अवा दे जाओ थे तो तेबे चक्र बी तिना साथे ऊबे चखी जाओ थे। 20 जेती आत्मा जाणा चाओ थी, तेथी सेयो जाओ थे ओर टईर प्राणिया साथे उठो थे, कऊँकि तिना री आत्मा टईरा दे थी। 21 जेबे सेयो जिऊँदे प्राणी चलो थे, तेबे यो बी चलो थे ओर जेबे-जेबे सेओ खड़े ओ थे, तेबे सेयो बी खड़े ऊई जाओ थे ओर जेबे सेयो जमीना पाँदा ते उठो थे, तेबे टईर बी तिना साथे उठो थे, कऊँकि प्राणिया री आत्मा टईरा दे थी।

22 प्राणिया रे सिरो पाँदे सर्गो जेड़ा एक गुम्मट था जो डराणे वाल़ा बर्फा जेड़ा खतरनाक तरीके साथे चमको था ओर से तिना रे सिरो पाँदे फैलेया रा था।*1:22 यहे. 10:1 23 गुम्मटो ते थाले तिना रे पंख एकी-दूजे रिया तरफा खे सीदे फैले दे थे ओर हर एकी प्राणिए रे दो-दो पंख थे जिना साथे तिना रा शरीर टखी रा था। 24 जेबे कदी सेयो प्राणी चलो थे। तेबे तिना रे पंखा री फड़फड़ाह्टा री छेड़ माखे बऊत सारे पाणी या शक्तिमान परमेशरो री आवाजा जेड़ी या सेना रे आल्ले जेड़ी सुणो थी ओर जेबे सेयो खड़े ओ थे, तेबे आपणे पंख लटकाई देयो थे।*1:24 यहे. 10:5 25 जेबे सेयो आपणे पंख थाले करी की जमीना पाँदे खड़े ओ थे, तो तिना रे सिरो पाँदे बणे दे गुम्मटो ते एक आवाज आई, 26 गुम्मटो पाँदे एक बऊत बड़ा सिंहासनो जेड़ा कुछ था जो एक बऊत बड़े किमती पात्थरो ते बणी रा था। सिंहासनो पाँदे एक माणूं बैठेया रा था जो एक माणूंए जेड़ा दिशो था।*1:26 प्रका. 1:13 27 मैं से तेसरे लको ते लई की पाँदली तरफा खे माखे मानो चमकाया रा पीतल़ी जेड़ा कुछ दिशेया ओर तेसरे पीतरे ओर चऊँ कनारे आग जी दिशो थी, मैं से तेसरे लको ते लई की थालो तक देखेया। से माखे कुछ आग जी दिशो थी ओर तेसरे चऊँ कनारे प्रयासा था। 28 ये बादल़ा बीचे इन्द्र धनुषो रे रंगा साथे चमकणे लगी रा था जेबे बर्खा ओई। ये चमकदार प्रयासा प्रभुए री महिमा खे बताओ थी, जेबे मैं ये देखेया, तो आऊँ जानूआ रे पारे थाले जमीना पाँदे बैठीगा ओर मेरा मूँ जमीना रिया तरफा खे थाले था।*1:28 यहे. 3:23