Jeremias 31

अपने लोकन सेइं परमेशरेरो रिश्तो

1 यहोवा एन ज़ोते, "तैन दिहाड़न मां अवं सारे इस्राएली कुलां केरो परमेशर भोइलो ते तैना मेरे लोक भोल्हे।" 2 यहोवा इन भी ज़ोते: "ज़ैना लोक तलवारी*31:2 तलवारी मतलब तलवारी सेइं मारे गाने करां बेंच़तां। करां बेंच़तां निस्से, तैन पुड़ सुनसान ठैरी मां अनुग्रह भोव; अवं इस्राएले आराम देनेरे लेई तियार भोव।"

3 "यहोवा बड़े पेइले दर्शन देइतां तैन सेइं ज़ोवं। अवं तुसन सेइं हमेशा प्यार केरतो एवरोईं; एल्हेरेलेइ मीं तुसन पुड़ अपनि दया बनेइतां रख्खोरीए। 4 हे इस्राएली कुवारी कुइये! अवं तीं फिरी बनेइलो; तैड़ी तू फिरी हार श्रृंगार केरतां डफली बज़ाने लग्गेली, ते आनन्द केरनेबालन मां नच़ती निसेली। 5 तू सामरियारे पहाड़न पुड़ दाछ़री बागां फिरी लाएली; ते ज़ैना तैन्न लाएले, तैना तैन केरे फल भी खेइ बटेले। 6 किजोकि एरी दिहाड़ी एज्जेली, ज़ैस मां एप्रैमेरे पहाड़ी प्रदेशेरे पहरदार पुकारेले: ‘उठा, असां अपने परमेशर यहोवा कां सिय्योन जो च़लम।’"

अपने मुल्खे मां इस्राएली लोकां केरि वापसी

7 किजोकि यहोवा इन ज़ोते: "याकूबेरे वजाई सेइं आनन्द ते जयजयकार केरा: कौमन मां ज़ै महाने तैसेरे लेई उच्‍ची आवाज़ी सेइं तारीफ़ केरा, ते ज़ोथ, ‘हे यहोवा, गुलैमी मां राहोरे अपने इस्राएली लोकन भी आज़ाद केर।’ 8 हेरा, मीं अपने लोकन उत्तर मुल्खे मरां वापस आनेलो, ते धेरतरे कूने-कूने करां अकोट्ठे केरेलो, ते तैना मां काने, टोन्टे, दोज़ींती, ते गल्हे बिशोरी कौन्शां भी एज्जेली; अक बड़ी मेण्डली इड़ी वापस एज्जेली। 9 तैना लेरां देते एज्जेले ते बिनती केरते अवं तैन इड़ी पुज़ालो, अवं तैन दरियारे बन्ने-बन्ने ते एरी खुल्‍ली बत्तां आनेलो ज़ैस सेइं तैना ठोकर न खेइ बटन; किजोकि अवं इस्राएलेरो बाजी आईं, ते एप्रैम मेरू बड्डू मट्ठूए।*31:9 1 कुरि. 6:18.

10 "हे कौमां-कौमां केरे लोकव, यहोवारू वचन शुना, ते दूर-दूरेरे रानेबालन मां भी एसेरो प्रचार केरा; ते ज़ोथ, ‘ज़ैनी इस्राएली लोक तितर-बितर कियोरे थिये, तैए तैन अकोट्ठे भी केरेलो, ते तैन केरि एरी रक्षा केरेलो ज़ेरि पुहाल अपने गब्बां केरि केरते।’ 11 किजोकि यहोवा याकूब छुटाव, ते तै दुश्मनेरे कब्ज़े मरां ज़ै तैस करां जादे ताकतबरे, तैस छुटकारो दित्तोरोए। 12 एल्हेरेलेइ तैना सिय्योन पहाड़ेरे च़ोटी पुड़ एइतां जयजयकार केरेले, ते अन्न, नंव्वो दाछ़रो रस, ज़ैतूनेरो तेल, गब्बां ते गोरू केरे बच्‍चे ते रोड़ी-रोड़ी चीज़ां यहोवा तैन देलो; ते तैन केरे प्राण सेगोरी बागा केरो ज़ेरो भोल्हो, ते तैना फिरी कधी उदास न भोल्हे। 13 तैस मौके तैन केरि कुवैरी कुइयां नच़ती खुशी भोल्ही, ते जुवान ते बुढे साथी खुशी केरेले। किजोकि अवं तैन केरो मातम दूर केरतां तैन खुश केरेलो, अवं तैन शान्ति देइलो, ते दुखेरे बदले खुशी देइलो। 14 अवं याजक रोड़े करां रोड़ी खानेरी चीज़ां देइलो, ते मेरे लोक मेरे रोड़े करां रोड़े चीज़न सेइं रज़्ज़ेले," यहोवा एन ज़ोते।

मातम खुशी मां बेदलोनो

15 यहोवा इन भी ज़ोते: "शुन, रामाह नगरे मां मातम ते बड़े लेरां केरि आवाज़ शुन्ने मां एइचे। राहेल अपने बच्‍चां केरे लेई लेरां देने लगोरीए; ते अपने बच्‍चां केरे वजाई च़ुप न भोए, किजोकि तैसेरे बच्‍चे मेरि जेवरेन।"*31:15 मत. 2:18.

16 यहोवा इन ज़ोते: "लेरां देनी बन्द केर ते अपना ऐंखरू पूंछ़; किजोकि तेरे मेहनतरो फल मैल्हने बालोए, ते तैना दुश्मना केरे मुल्खे मरां वापस एज्जेले।✝31:16 प्रका. 21:4;होश. 1:11. 17 आखरी मां तेरी उमीद पूरी भोल्ही, यहोवा एन ज़ोते, तेरे खानदानेरे लोक अपने मुल्खे मां वापस एज्जेले। 18 सच़्च़े मीं एप्रैम इना गल्‍लां ज़ोइतां मातम केरते शुनो, ‘तीं मीं सज़ाह दित्ती, ते मेरी सज़ाह एरे बछ़ड़ेरी ज़ेरि भोइ ज़ैन सुधारोरू न भोए; पन हुनी तू मीं मोड़, तैखन अवं मुड़ेलो, किजोकि तू मेरो परमेशर आस। 19 टेपलोनेरां बाद मीं पसताव; ते शिखालनेरां बाद मीं छाती पिट्टी; पुराने पापन याद केरतां अवं शरमिन्दा भोव ते मेरू तुत्तर कालू भोवं।’ 20 कुन एप्रैम मेरू ट्लारू मट्ठू नईं? कुन अवं तैस सेइं प्यार न केरि? ज़ैखन भी अवं तैसेरे खलाफ गल्‍लां केरताईं, तैखन मीं तैसेरी याद एइचे। एल्हेरेलेइ मेरो मन तैसेरे वजाई भेरोई गाते; ते अवं ज़रूर तैस पुड़ दया केरेलो, यहोवा एन ज़ोते।

पसतानू ते दुबारां आबाद भोनू

21 "हे इस्राएली कुमारी*31:21 इस्राएली कुमारी मतलब इस्राएली लोक।, ज़ैस सड़कां तू जेवरी थी, तैस्से मां खम्भे ते झण्डे खड़े केर; ते अपने इन नगरन मांजो वापस एजने पुड़ मन ला। 22 हे भटकने बाली कुइये, तू कैखन तगर इरां उरां फिरती राली? यहोवारी अक नव्वीं सृष्टि धेरती पुड़ बांदी भोल्ही, मतलब कौन्श मड़देरी रक्षा केरेली।"

23 इस्राएलेरो परमेशर सेना केरो यहोवा इन ज़ोते, "ज़ैखन अवं यहूदी कैदन तैन केरे मुल्खेरे नगरन मां वापस आनेलो, तैखन तैन मां ई आशिर्वाद फिरी दित्तो गालो, ‘हे धर्मे सेइं भेरतां ठार, हे पवित्र पहाड़ यहोवा तीं बरकत दे!’ 24 यहूदा ते तैसेरे सेभी नगरां केरे लोक ते ज़मीनदार ते पुहाल भी तैस मां अकोट्ठे बस्सेले। 25 किजोकि मीं थकोरे लोकां केरे प्राण रज़ाने, ते उदास लोकां केरे प्राण भेरि छ़डे।"✝31:25 मत. 11:28;लूक. 6:21.

26 इन शुन्नेरे बाद अवं बींझ़ो, ते मीं हेरू, ते मेरी निड्ल मीं मिट्ठी लगी।

27 "हेरा, यहोवा एन ज़ोते, कि एरे दिहाड़े एजने बालेन ज़ैन मां अवं इस्राएल ते यहूदारे घरानेरे बाल-बच्‍चन ते जानबरन दूईयने बड़े बधेइलो। 28 ज़ैस किसमे सेइं मीं हुनी सोच विचार केरतां तैना ढ्लूड़े ते बिछ़ोड़े, कट्टे ते सत्यानाश ही केरतो थियो, तैस्से तरीके सेइं अवं हुनी सोच-विचार केरतां लेइलो ते बधेइलो, यहोवा एन ज़ोते। 29 तैन दिहाड़न मां तैना फिरी न ज़ोले: ‘बाजेईं त खट्टी दाछ़ खाई पन तैन केरे खानदानेरे दंत खट्टे भोइ जे।’ 30 किजोकि ज़ै कोई खट्टी दाछ़ खाए तैस्सेरे दंत खट्टे भोइ गाले, ते हर अक मैन्हु अपने ही पापेरे वजाई सेइं मारो गाले।

नंव्वो करार

31 "फिरी यहोवा एन भी ज़ोते, शुन, एरे दिहाड़े एजने बाले आन ज़ैखन अवं इस्राएल ते यहूदारे घरान्न सेइं नंव्वो करार केरेलो।✝31:31 मत. 26:28;लूक. 22:20;1 कुरि. 11:25;2 कुरि. 3:6;इब्रा. 8:8-9. 32 तै तैस करारेरो ज़ेरो न भोल्हो ज़ै मीं तैन केरे दादे-पड़दादन सेइं तैस वक्त कियोरो थियो, ज़ैखन मीं तैन केरे हथ ट्लेइतां तैना मिस्र मुल्खे मरां केढतां आनोरे थिये, किजोकि अगर अवं तैन केरे लेई मुन्शेरो ज़ेरो थियो, फिरी भी तैनेईं मेरो तै करार ट्लोड़ो। 33 पन ज़ै करार अवं तैन दिहाड़ां केरे बाद इस्राएलेरे घराने सेइं केरेलो, तै ई आहे: अवं अपनो कानून तैन केरे मने मां छ़डेलो, ते तैस तैन केरे दिले पुड़ लिखेलो; ते अवं तैन केरो परमेशर भोइलो, ते तैना मेरे लोक भोल्हे, यहोवा एन ज़ोते।✝31:33 2 कुरि. 3:3;इब्रा. 8:10-11;रोम. 11:26-27. 34 ते तैखन तैन फिरी एक्‍की होरि सेइं एन न ज़ोनू पेलू कि यहोवा पिशाना, किजोकि, यहोवा एन ज़ोते कि निकड़े करां लेइतां बड़े तगर, सब मेरू ज्ञान रखेले; किजोकि अवं तैन केरे पाप माफ़ केरेलो, ते तैन केरे पाप फिरी याद न केरेलो।"✝31:34 1 थिस. 4:9;प्रेरित. 10:43;इब्रा. 10:17.

35 ज़ैनी दीसां लौ देनेरे लेई दिहाड़ो ते राती लौ देनेरे लेई चाँदनी ते तारां केरे लेई नियम रखोरेन, ज़ै समुन्दरे उछ़ड़ाते ते तैसेरी छ़ेलहन गरज़ाते, ते ज़ेसेरे नवं सेना केरो यहोवाए, तैए यहोवा एन ज़ोते: 36 "अगर इना नियम मेरे सामनेरां टेली गान तैखन एन भोइ सकते कि इस्राएलेरू खानदान मेरी नज़री मां हमेशारे लेई अक कौम ठहरनेरी उमीद मिटी सकेली।"

37 यहोवा एन भी ज़ोते, "अगर बह अम्बर नापू गाए ते बुना धेरतरी मुनीयाद घेड़तां पतो लाव गाए, तैखन ही अवं इस्राएलेरे सारे खानदाने तैन केरे सब पापां केरि वजाई सेइं तैन करां हथ खड़ो केरेलो।"

38 "हेर, यहोवा एन ज़ोते, एरां दिहाड़े एज्जी राहोरेन ज़ैन मां एन नगर हननेलेरे गुम्मटे करां लेइतां कूनेरे फाटके तगर यहोवारे लेई बनाव गालू। 39 नापनेरी रस्सी फिरी अग्रोवं च़ेलतां सिद्धी गारेब पहैड़ी तगर, ते तैट्ठां घुमतां गोआ तगर पुज़ेली। 40 लाशां ते मांज़नरी सब वादी ते किद्रोनेरे नाले तगर ज़ेत्रां उडारन, घोड़न केरे पूर्वी फाटकेरे कूने तगर ज़ेत्री ज़मीने, तै सब यहोवारे लेई पवित्र ठहरेली। हमेशा तगर तैन नगर फिरी कधी न त बिछ़ोड़ू गालू ते न डोलू गालू।"