1 ଆ ଗଟନାତେ ପେର୍କେ ଦର୍ଶନ ତଡ଼୍‍ ସଦାପ୍ରବୁନ୍‍ ବାକ୍ୟ ଅବ୍ରାମ୍‌ତେ ଗାରେ ହେୱୁତେ, ହେୟ୍‍ ହୋ ଅବ୍ରାମ୍‍, ୱେର୍‌ ମା, ମାମେ ନି ବିପତ୍‌ ତାଗାଙ୍କ୍‌ ରକ୍ଷା ମାଡ଼ିତମ୍‌ ନୁ ବେଡ଼୍‍ୟାଦ୍‍ ପୁରସ୍କାର୍‍ ଇଦ୍‌ତମ୍‍।

2 ଆସୁଟ୍‍ ଅବ୍ରାମ୍‌ ଉତ୍ତର୍‍ ଇତ୍‍ତଣ୍ଡ୍‍, ହୋ ପ୍ରବୁ ସଦାପ୍ରବୁ ନିମେ ନାକିଙ୍କ୍‍ ବାତ୍‍ ଇଦ୍‍ତି ? ନାନ୍‍ ତ ପିଲା ଇଲକଟ ବାଦ୍‌କ ମିନ୍ଦେନ୍‍, ମେଣ୍ଡେ ଦମ୍ମେଶକିୟ ଇଲୀୟେଜର୍‍ ନା ଲୋତ୍‍ତେ ସାଉକାରିନି ଆଦ୍‌ତଣ୍ଡ୍‌ । 3 ମେଣ୍ଡେ ଅବ୍ରାମ୍‌ କେତ୍‍ତଣ୍ଡ୍‍, ଉଡ଼ାଟ୍‍, ନିମେ ନାକିଙ୍କ୍‍ ପିଲା ଇୱିନ୍‍, ଆଦିଙ୍କ୍‌ ନା ଲୋତ୍‌ ତେ ଦାସ ବେନ୍‍ ନାରୁଣ୍ଡ୍‍ ନା ଉତ୍ତରାଦିକାରି ଆଦ୍‌ତଣ୍ଡ୍‌ ।

4 ଆସୁଟ୍‍ ଅନ୍‍ ପର ସଦାପ୍ରବୁନ୍‍ ଇ ବାକ୍ୟ ହେଉତେ, ଉଡ଼ା, ଆ ନାରୁଣ୍ଡ୍‍ ନି ଉତ୍ତରାଦିକାରି ଆୟ୍‍ୟଣ୍ଡ୍‍; ମାତର୍‌ ବେନ ନି ନେତୁର୍‍ତେ ଜନ୍ମ ଆଦ୍‌ତଣ୍ଡ୍‌, ଅଣ୍ଡେ ନି ଉତ୍ତରାଦିକାରୀ ଆଦ୍‌ତଣ୍ଡ୍‌ । 5 ଅନନ୍ତର ସଦାପ୍ରଭୁ ଅଂକିଙ୍କ୍‍ ବାୟ୍‍ଦେ ତାସ୍‍ କେତ୍‍ତଣ୍ଡ୍‍, ନିମେ ମାବ୍‍ତା ଉଡ଼ି ବେସୁଙ୍କ୍‍ ଉକାକିଙ୍କ୍‍ ଲେକ୍‍ପାର୍‍ଦ୍‍ତି, ଆଲାଇତ୍କେ ଲେକି କେଲ୍‍ମ୍‍। ଅଣ୍ଡ୍ ମେଣ୍ଡେ କେତ୍‍ତଣ୍ଡ୍‍, ଇ ପ୍ରକାର୍‍ ନିଆଦ୍‍ ପିଲୁଡ଼୍‍ ଆଦ୍‌ତେ ।

6 ଆସୁଟ୍‍ ଅବ୍ରାମ ସଦାପ୍ରବୁନାଗେ ବିଶ୍ୱାସ ମାଡ଼୍‍ତାଙ୍କ୍‍ ସଦାପ୍ରବୁ ଅବ୍ରାମ୍‌ତିଙ୍କ୍‌ ଦାର୍ମିକ ଇଞ୍ଜ ଲେକ୍‍ତଣ୍ଡ୍‍।

7 ସଦାପ୍ରବୁ ଅଂକିଙ୍କ୍‍ କେତ୍‍ତଣ୍ଡ୍‍, ବେନ ନି ଅଦିକାର୍‍ ମାଇଦିଙ୍କ୍‍ ଇ ଦେଶ୍‍ ଇଦାନ୍‍ ମାଇଦିଙ୍କ୍‍ କଲଦିୟଡ଼୍‍ ଊର୍‌ ତାଗାଙ୍କ୍‍ ତାତ୍‌ତଡ଼୍‌, ଆ ସଦାପ୍ରବୁ ମାମେ।

8 ଆସୁଟ୍‍ ଅବ୍ରାମ୍‌ କେତ୍‍ତଣ୍ଡ୍‍, ହେ ପ୍ରବୁ, ସଦାପ୍ରବୁ, ନାନ୍‍ ଯେ ଇ ଦେଶ୍‍ତେ ଅଦିକାରି ଆଦ୍‌ତାନ୍‌, ଆଦ୍‌ ବେଦ୍‍ପୁଟୁଙ୍କ୍‍ ପୁନ୍ଦ୍‍ତାନ୍‍ ?

9 ଅଣ୍ଡ୍‍ କେତ୍‍ତଣ୍ଡ୍‍, ନିମେ ମୁଣ୍ଡ୍‍ ୱାଡ଼୍‌ସେତେ ଅଣ୍ଡ୍‍ ଅଣ୍ଡୟ୍‍ ଗଡ଼୍‌ ନୁ ମୁଣ୍ଡ୍ ୱାଡ଼୍‌ସେତେ ମେକ୍‌ ନୁ ମୁଣ୍ଡ୍ ୱାଡ଼୍‌ସେତେ ଅଣ୍ଡୟ୍‍ ମେଣ୍ଢା ନୁ ଅଣ୍ଡୟ ବଡ଼େ ନୁ ଅଣ୍ଡୟ୍‍ ପାର୍‍ୱା ପିଲା ମା ଗାରେ ତାଡ଼ାଟ୍‍। 10 ଆସୁଟ୍‍ ଅଣ୍ଡ୍‍ ଆ ସାରେ ତାନ୍‍ ଗାରେ ତାସ୍‍ ରେଣ୍ଡ୍‍ ଦୁଙ୍କ୍‍କା ମାଡ଼ି ଦୁଙ୍କ୍‍କାନ୍‍ ଗାରେ ବାଗାତାୱ୍‍ ଦୁଙ୍କାକିଙ୍କ୍‍ ନେହ୍‍ତଣ୍ଡ୍‍; ମାତ୍ରମ୍‍ ପିଟେକିଙ୍କ୍‍ ରେଣ୍ଡ୍‍ ଦୁଙ୍କ୍‍କା ମାଡ଼ଣ୍ଡ୍‍। 11 ତାନ୍‌ପେର୍କେ ଡାମର୍‌ ପିଟେକି ଆ ଡଲ୍‍ତେ ମଡ଼୍‍ଦେ ପର କୁଦ୍‍ତ୍କେ, ଅବ୍ରାମ୍‌ ଆୱିଙ୍କ୍‍ ତେୟ୍‍ସିତ୍‍ତଣ୍ଡ୍‍।

12 ମେଣ୍ଡେ ପଡ଼୍‍ଦ୍‍ ମୁଡ଼୍‍ନ୍ଦାନ୍‍ ସମୟ୍‍ତେ ଅବ୍ରାମ୍‌ ଉସ୍କାଡ଼୍‌ତେ ଆସ୍‍ ଗାଟି ଇକାଡ଼୍‍ତାଗ୍‌ ୱେର୍‌ଦ୍‌ତଣ୍ଡ୍‍। 13 ଆସୁଟ୍‍ ଅଣ୍ଡ୍ ଅବ୍ରାମ୍‌ତିଙ୍କ୍‍ କେତ୍‍ତଣ୍ଡ୍‍, ନି ପିଲାକି ଚାରିଶହ ବର୍ଷ ୱେର୍‍ ଦେଶ୍‍ତାଗ୍‍ ପ୍ରବାସି ଆସ୍‌ ଦାସ ପାଡ଼ିୟ୍‌ ମାଡ଼ି ତିପାଲ୍‌ ମାଡ଼ିତଣ୍ଡ୍‍; ଇଦ୍‍ ନିଜାମ୍‍ ପୁନ୍ଦ୍‍ତିନ୍‍; 14 ମାତ୍ର ଅଡ଼୍‍ ବେନ୍‍ ଦେଶ୍‍ତେ ନାରୁଡ଼ାଦ୍‍ ଚାକର୍‍ ପାଡ଼ିୟ୍‌ ମାଡ଼ିତଡ଼୍‍, ମାମେ ଅଡ଼ାଦ୍‍ ବିଚାର୍‍ ମାଡ଼ିତମ୍‍; ତାନ୍‍ ପେର୍କେ ଅଡ଼୍‍ ନାର୍ଗେ ଦନ୍‍ ପୟ୍‍ସ୍‍ ଆ ଦେଶ୍‍ତାଗାଙ୍କ୍‍ ପେୟ୍‍ତିତଡ଼୍‍। 15 ମାତ୍ରମ୍‍ ମିଡ଼୍‌ ସାୟେତ୍‌ତେ ନିଜର୍‍ତେ ଆନିଦାଦିଡ଼୍‍ ଗାରେ ଆଦ୍‌ତିଡ଼୍‌; ନୁ ସାୟେ ମୁୟ୍‍ତନ୍‍ ସମୟ୍‍ତେ ସମାଦି ଆଦ୍‌ତିଡ଼୍‌ । 16 ମେଣ୍ଡେ ମି ପିଲୁଡ଼୍‍ତେ ନାଲୁ ପିଲୁଡ଼୍‍ ଇ ଦେଶ୍‍ତାଗ୍‍ ମାଲ୍‍ସ୍‍ ୱାଦ୍‍ତଡ଼୍‍; ବାତେଙ୍କ୍‍ଇତ୍କେ ଇମୋରିୟ ନାରୁଡ଼ାଦ୍‍ ପାପାମ୍‍ ଇ ଯାକ ପୁରା ଆୟ କେ।

17 ମେଣ୍ଡେ ବେନ ପଡ଼୍‍ଦ୍‍ ମୁଡ଼୍‌ନ୍ଦ୍‌ତେ ନୁ ଇକାଡ଼୍‍ ଆତ୍‌ତେ, ଉଡ଼ାଟ୍‍, ହୁମେ ଅଜାଲ୍‌ ନୁ ନିଡ଼୍‌ତାନ୍‌ କିସ୍‌ ଅଟାତ୍‌ ତନ୍ତେ ନୁ ଆଦ୍‌ ଆୱୁ ପଶୁକିନ୍‌ ରେଣ୍ଡ୍‍ ଦୁଡ଼ାନ୍‌ ନାଡ଼୍‍ମେ ଇସ୍‍ ଆତ୍‌ତେ । 18 ମେଣ୍ଡେ ଆ ଦିନ୍‍ ସଦାପ୍ରବୁ ଅବ୍ରାମ୍‌ତଡ଼୍‍ ନିୟମ୍‌ ମାଡ଼ି କେତ୍‍ତଣ୍ଡ୍‍, ମାମ୍‌ମେ ଇ ମିସେରିୟ ଇଲ୍‌କେତାଗାଙ୍କ୍‍ ଫରାତ୍‍ ପେଦେର୍‍ତେ ବେଡ଼୍‍ୟାଦ୍‍ ଇଲ୍‌କେ ହେଉନା ମିସର ଦେଶ୍‍ ନି ପିଲୁଡ଼୍‍ତିଙ୍କ୍‍ ଇତ୍‍ତମ୍‍, 19 ଇଦିନ୍‌ତଡ଼୍‌ କେନିୟ ନୁ କଲଦିୟ ନୁ କଦ୍‌ମୋନୀ 20 ହିତ୍ତୀୟ, ପରିଷୀୟ, ରପାୟିୟନଡ଼୍‌, 21 ଇମୋରିୟନଡ଼୍‌ ନୁ କିଣାନୀୟ, ଗିର୍ଗାଶୀୟ ନୁ ଯିବୂଷୀୟନଡ଼୍‌ ଦେଶ୍‍ମିକା ଇଦ୍‌ତମ୍‍।