1 ସଦାପ୍ରବୁ ପରମେଶ୍ୱର ତିଆର୍‍ ମାଡ଼୍‍ତେ ମେୟାନାୱୁ ଜିୱାକ୍‌କିନ୍‍ ଲୋପେଙ୍କ୍‍ ତାଡ଼ାମ୍‍ତିଙ୍କ୍‌ ମୁନେନ୍‌ ଡେକା ମାତ୍‍ତା। ଆଦ୍‍ ଅଣ୍ଡ୍‌ଦିନେ ନାଟାଡ଼୍‍ତିଙ୍କ୍‍ ପଚ୍ରାର୍‌ମାଡ଼୍‌ତେ, ହୋ, ଇଦ୍‍ ବାତେ ନିଜାମ୍‍, ବଗିଚାତେ ବେନଆଇ ମାଡ଼େତ୍‍ କାୟା ତିନ୍ଦାନଙ୍କ୍‍ ପରମେଶ୍ୱର ମିକିଙ୍କ୍‍ ମନା ମାଡ଼ିମିନ୍ଦେଣ୍ଡ୍‍ ? 2 ନାଟାଡ଼୍‍ ତାଡ଼ାତିଙ୍କ୍‍ କେତ୍‍ତେ, ମାମ୍‌ମେ ବଗିଚାତେ ସାରେ ମାଡ଼ାକିନ୍‍ କାୟାତିନ୍ଦ୍‍ ପାର୍‍ଦ୍‍ତମ୍‍; 3 ଇତ୍କେ ବଗିଚାତେ ନାଡ଼୍‍ମ୍‍ ମାନ୍ଦାନ୍‍ ମାଡ଼େତ୍‍ କାୟାନ୍‍ ବିଷୟ୍‍ତେ ପରମେଶ୍ୱର୍ କେତ୍‍ତଣ୍ଡ୍‍, ମିଡ଼୍‍ ଆୱ୍‍ ତିନ୍‍ମାଟ୍‍ କି ଇଟ୍‍ମାଟ୍‍, ଆଲା ମାଡ଼୍‍କେ ଡଲିତିଡ଼୍‍।

4 ତାଡ଼ାମ୍‍ ନାଟାଡ଼୍‍ତିଙ୍କ୍‍ କେତ୍‍ତେ, ମିଡ଼୍‍ ବେଲାଇତ୍କେବା ଡଲ୍‍ୱିଡ଼୍‍; 5 ଇତ୍କେ ପରମେଶ୍ୱର ପୁତ୍‍ତଣ୍ଡ୍‍, ମିଡ଼୍‍ ବେନ୍‍ଦିନ୍‍ ଆଦ୍‌ ତିନ୍ଦ୍‍ତିଡ଼୍‍, ଆ ଦିନ୍‍ ମିୟାୱ୍‍ କଣ୍ଡା ତେର୍‍ସ୍‍ ଆଦ୍‌ତା, ତାନ୍‍ପେର୍କେ ମିଡ଼୍‍ ପରମେଶ୍ୱରତେ ଲେକାମ୍‍ ସାୟେତାଦ୍‍ ନୁ ପିନ୍ଦ୍‍ୱାଦ୍‍ ବୁଦ୍‍ ପୁନ୍ଦ୍‍ତିଡ଼୍‍।

6 ଆସୁଟ୍‍ ନାଟାଡ଼୍‍ ଆ ମାଡ଼୍‍ତିଙ୍କ୍‍ ସାୟେତ୍‍ କାଦି ଇଞ୍ଜ ନୁ କଣ୍ଡେତ୍‌ ଲବ୍‌ତିଙ୍କ୍‌ ନୁ ବୁଦ୍‌ ଇଦାନ୍‍ ମାଇଦିଙ୍କ୍‍ ଏଞ୍ଚାନାଦ୍‍ ଉଡ଼ି ମାଡ଼େକଞ୍ଚ କାୟା କୟ୍‍ସ୍‍ ତିତ୍‌ତେ, ମେଣ୍ଡେ ନିଜର୍‍ ତଡ଼୍‍ ମାନ୍ଦାନ୍‍ ମୁଦ୍‍ପାଙ୍କ୍‍ ଇତ୍‍ତାଙ୍କ୍‍, ଅଣ୍ଡ୍‍ ଆନ୍ତେ ତିତ୍‍ତଣ୍ଡ୍‍। 7 ଆସୁଟ୍‍ ଅଡ଼୍‍ ତିଞ୍ଜ ୱାନେକେ କଣ୍ଡା ତେର୍‌ସ୍‌ ଆତ୍‌ତାଙ୍କ୍‌, ଅଡ଼୍‍ ନିଜେ ଡୁଣ୍ଡଡୁଣ୍ଡ ମାନ୍ଦାନାଦ୍‍ ପୁଞ୍ଜ୍‍ ତୟ୍‍ ମାଡ଼େତ୍‌ ଆକି କିଚି ଗାଗ୍‍ରା ତିଆର୍‍ ମାଡ଼୍‍ତଡ଼୍‍।

8 ଆସୁଟ୍‍ ମୁଲ୍‍ପୁଟ୍ ଆଦାନ୍‌ ସମୟ୍‍ତେ ବଗିଚାତେ ଲୋପେ ଉଡମାନ୍ଦାନ୍‍ ସଦାପ୍ରବୁ ପରମେଶ୍ୱରତେ ଲେଙ୍ଗ୍‍ କେଞ୍ଜି ଆଦମ୍‌ ନୁ ତାନ୍‍ ମୁତ୍‍ତେ ସଦାପ୍ରବୁ ପରମେଶ୍ୱରତେ ମୁନେକଞ୍ଚ ବଗିଚାତେ ମାଡ଼ାକିନ୍‍ ଲୋପେ ମିଞ୍ଚ୍‍ତଡ଼୍‍। 9 ଆସୁଟ୍‍ ସଦାପ୍ରବୁ ପରମେଶ୍ୱର ଆଦମ୍‌ତିଙ୍କ୍‌ କାର୍ଙ୍ଗି କେତ୍‍ତଣ୍ଡ୍‍, ମିଡ଼୍‍ ବେଗ୍‍ ମିନ୍ଦେଡ଼ି ?

10 ଅଣ୍ଡ୍‍ ଉତ୍ତର୍‍ ଇତ୍‍ତଣ୍ଡ୍‍, ନାନ୍‍ ବଗିଚାତେ ଲୋପେ ନିୟାଦ୍‍ ଲେଙ୍ଗ୍‍ କେଞ୍ଜି ନାନ୍‍ ଡୁଣ୍ଡଡୁଣ୍ଡ ମାନ୍ଦାନ୍‍ ସେଙ୍ଗେତିଙ୍କ୍‍ ୱେର୍‌ସ୍‌ମେଣ୍ଡେ ମିଞ୍ଚ୍‍ତାନ୍‍।

11 ଅଣ୍ଡ୍‍ କେତ୍‍ତଣ୍ଡ୍‍, ମିଡ଼୍‍ ଡୁଣ୍ଡଡୁଣ୍ଡ ମିନ୍ଦେଡ଼ି, ଇଦ୍‍ ବେନ ମିକିଙ୍କ୍‍ ପୁଞ୍ଜ୍‌ସ୍ପ୍‌ତଣ୍ଡ୍‍ ? ମାମ୍‌ମେ ବେନ୍ ମାଡ଼େତ୍‍ କାୟା ତିନ୍ଦାନଙ୍କ୍‍ ମନା ମାଡ଼ି ମାତ୍‍ତମ୍‍, ଆଦ୍‌ କି ମିଡ଼୍‍ ତିତ୍‍ତିଡ଼୍‍ ?

12 ଆଦମ୍‌ କେତ୍‍ତଣ୍ଡ୍‍, ନିମେ ବେନ୍‍ ମୁତେଙ୍କ୍‍ ନାତଡ଼୍‌ ଆଦାଙ୍କ୍‌ ଇସ୍‍ମିନ୍ଦେନି, ଆଦ୍‌ ନାକିଙ୍କ୍‍ ଆ ମାଡ଼େତ୍‍ କାୟା ଇତ୍‍ତେ, ଆଦିଙ୍କ୍‌ ନାନ୍‍ ତିତ୍‍ତାନ୍‍।

13 ଆସୁଟ୍‍ ସଦାପ୍ରବୁ ପରମେଶ୍ୱର ନାଟାଡ଼୍‍ତିଙ୍କ୍‍ କେତ୍‍ତଣ୍ଡ୍‍, ଇଲା ବାତେଙ୍କ୍‍ ମାଡ଼୍‍ତିନ୍‍ ? ନାଟାଡ଼୍‍ କେତ୍‍ତେ, ତାଡ଼ାମ୍‍ ନାକିଙ୍କ୍‍ ବୁଲ୍‍କା ମାଡ଼୍‍ତେ, ଆଦିଙ୍କ୍‌ ନାନ୍‍ ତିତ୍‍ତାନ୍‍।

14 ଆସୁଟ୍‍ ସଦାପ୍ରବୁ ପରମେଶ୍ୱର ତାଡ଼ାତିଙ୍କ୍‍ କେତ୍‍ତଣ୍ଡ୍‍, ଇ ପାଡ଼ିୟ୍‍ ମାଡ଼୍‌ତେ ସେଙ୍ଗେ ନିମେ ସାରେ ନାର୍‍ଦେ ନୁ ମେଟେତ୍‍ ଜିୱାକ୍‌କିନାଗାଙ୍କ୍‍ ଆନ୍ତେ ଗାଟି ଅବିଶାପ୍‍ ଆତ୍‌ତିନ୍‌, ନିମେ ନିଜର୍ ଡଙ୍କେତେ ଉଡିତିନ୍‍ ନୁ ସାରେଦିନା ମାଣ୍ଡୁଲ୍‍ ତିନ୍ଦ୍‍ତି। 15 ମେଣ୍ଡେ ମାମ୍‌ମେ ନିୟାଦ୍‍ ନୁ ନାଟାଡ଼୍‌ତେ ଲୋପେଙ୍କ୍‍, ମେଣ୍ଡେ ମିୟାଦ୍‍ ପିଲୁଡ଼୍‌ ନୁ ତାନ୍‍ ପିଲୁଡ଼୍‌ତେ ଲୋପେ ରାମ୍‌କ୍‌ ଜନ୍ମ ମାଡ଼ିତମ୍‍; ଅଣ୍ଡ୍‌ ନି ତାଲ୍‍ତିଙ୍କ୍‍ ରେହ୍‍ତିତଣ୍ଡ୍‌ ନୁ ନିମେ ତାଂକିଙ୍କ୍‍ ବଟ୍‌ମିଣ୍ଡାନାଗ୍‌ ରେଃତିନ୍‌।

16 ଆସୁଟ୍‍ ଆ ନାଟାଡ଼୍‍ତିଙ୍କ୍‍ କେତ୍‍ତଣ୍ଡ୍‍, ମାମ୍‌ମେ ନି ଡଙ୍କେତ୍‌ ଆଦାନ୍‌ ଦିନ୍‌ ଅଦିକ୍‍ ବଡ଼ାମାଡ଼ିତମ୍‍, ନିମେ ନପିନେ ପିଲା ଜନ୍ମ ମାଡ଼ିତିନ୍‍; ମେଣ୍ଡେ ମୁଦ୍‍ପାନ୍‍ ପରୁ ନିୟାଦ୍‍ ଗାବ୍‌ମାନ୍ତେ, ଅଣ୍ଡ୍ ନି ପର ଅଦିକାର ମାଡ଼ିତଣ୍ଡ୍‍।

17 ମେଣ୍ଡେ ଅଣ୍ଡ୍‍ ଆଦମ୍‌ତିଙ୍କ୍‌ କେତ୍‍ତଣ୍ଡ୍‍, ବେନ୍‌ ମାଡ଼େତ୍‍ କାୟା ତିନ୍ଦାନଙ୍କ୍‌ ମିକିଙ୍କ୍‌ ମନା ମାଡ଼ିମାତ୍‌ତମ୍‌, ଆଦ୍‌ ମିଡ଼୍‌ ତିତ୍‌ତିଡ଼୍, ନିମେ ନି ମୁତେନ୍‍ ଗଟି କେଞ୍ଜି ଆଦ୍‌ ତିଞ୍ଜ୍‍ମିନ୍ଦେନି; ଆଦିଙ୍କ୍‌ ନି ସେଙ୍ଗେ ବୁମ୍‍ ଅବିଶାପ୍‍ ଆତ୍‌ତେ; ନିମେ ସାରେଦିନାମ୍‌ କଷ୍ଟ ଆସ୍‌ ତିନ୍ଦାଙ୍କ୍‍ ପାହେମ୍‍ଆଦ୍‍ତିଡ଼୍‍। 18 ଆଗାଙ୍କ୍‌ କୟେ ନୁ ଗୋକରା ମାଡ଼େ ମଡ଼୍‌ତିତ୍‌, ମେଣ୍ଡେ ନିମେ ୱାୟେତ୍‍ କଞ୍ଚ୍‍ କାଦି ତିନ୍ଦ୍‍ତିଡ଼୍‍। 19 ନିମେ ବେନ୍‍ ମାଣ୍ଡୁଲ୍‍ତାଗାଙ୍କ୍‍ ତିଆର୍‍ ଆତ୍‌ତିନ୍‌, ଆଗେ କାଇଲକଟ ମାନ୍‍ନା ଜାକ ମକମ୍‍ତେ ଉବାମ୍‍ତେ ତିନ୍ଦ୍‍ତିଡ଼୍‍; ବାତେଙ୍କ୍‍ଇତ୍କେ ନିମେ ମାଣ୍ଡୁଲ୍ ନୁ ମାଣ୍ଡୁଲ୍‍ତାଗ୍‍ ମେଣ୍ଡନ୍‌ଦାମ୍‍ କାଇଲିତିନ୍‍।

20 ଆଦମ୍‌ ନିଜର ମୁତେନ୍‍ ପେଦେର୍ ହବା ଇତ୍‍ତଣ୍ଡ୍‍, ବାତେଙ୍କ୍‍ଇତ୍କେ ଆଦ୍‌ ଜିୱେମାନ୍ଦାନଡ଼୍‌ ୟାୟ୍ ଆତ୍‌ତେ। 21 ମେଣ୍ଡେ ସଦାପ୍ରବୁ ପରମେଶ୍ୱର ପଶୁ ତଲ୍‍କେତ୍‌ ସିଲେ ତିଆର୍‍ ମାଡ଼ି ଆଦମ୍‌ ନୁ ତାନ୍‍ ମୁତେଙ୍କ୍‍ କେର୍‍ପ୍ସ୍‍ତଣ୍ଡ୍।

22 ଅନନ୍ତର ସଦାପ୍ରବୁ ପରମେଶ୍ୱର କେତ୍‍ତଣ୍ଡ୍, ଉଡ଼ାଟ୍‍, ନାରୁଣ୍ଡ୍‍ ସାୟେତାଦ୍‍ ପିନ୍ଦ୍‍ୱାଦ୍‍ କାମ୍‌ ପାହେମ୍‍ଆସ୍‍ ମା ଲେକାମ୍‍ ଅର୍‍ତୁଣ୍ଡ୍‍ ଆସ୍‍ମିନ୍ଦେଣ୍ଡ୍‍; ମେଣ୍ଡେ ଇଞ୍ଜେ ଅଣ୍ଡ୍ ବେଦ୍‍ପୁଟୁଙ୍କ୍‍ କାୟ୍‍ ଆୟିସ୍‍ ସଦସତ୍‌ ମାଡ଼େତ୍ କାୟା ଆନ୍ତେ କଇସ୍‍ ତିଞ୍ଜ୍ ତେର୍‍ୱେ ଜିଉନ୍‍ ପାହେମ୍‍ ଆଇମା କି, 23 ଆଦିନ୍‌ ମାଇଦିଙ୍କ୍‍ ସଦାପ୍ରବୁ ପରମେଶ୍ୱର ଏଦନ ବଗିଚାତାଗ୍‌ ଅଡ଼୍‍କିଙ୍କ୍‍ ପେସ୍ପିତ୍‍ତଣ୍ଡ୍ ନୁ ଅଣ୍ଡ୍‍ ବେନ୍ ମାଣ୍ଡୁଲ୍‍କଞ୍ଚ୍ ତିଆର୍‍ ଆସ୍‍ମାତ୍‍ତଣ୍ଡ୍‍, ଆଦିଙ୍କ୍‌ ଚାଷ୍‍ପାଡ଼ିୟ୍‍ ମାଡ଼ାଙ୍କ୍‍ ଅଡ଼୍‍କିଙ୍କ୍‍ ହେଞ୍ଚ୍‌ତଣ୍ଡ୍‌। 24 ଆଦ୍‌ ଲେକାମ୍‍ ଅଣ୍ଡ୍ ଆଦମ୍‌ତିଙ୍କ୍‌ ପେସ୍ପିତ୍‍ତଣ୍ଡ୍‍; ମେଣ୍ଡେ ସଦସତ୍‌ ମାଡ଼େତ୍‍ ଆର୍ ରକ୍ଷା ମାଡ଼ାନ୍‍ ମାଇଦିଙ୍କ୍‍ ଏଦନ୍‍ ବଗିଚାତେ ପଡ଼ଦ୍ ପେୟିତାନ୍‌ପାକେ କିରୁବ କି ନୁ ନାଲୁପାକା ଉଡ ମାନ୍ଦାନ୍‍ ୱେସ୍‌ତେ କଡ଼୍‍ଗ ତିଆର୍‍ ମାଡ଼୍‍ତଣ୍ଡ୍‍।