1 ଇ ସାରେ ଗଟନାତେ ପେର୍କେ ମିସ୍ରିୟ ରାଜାନ୍‌ ତିନ୍ଦାନ୍‌ ଉନ୍ଦାନ୍‌ ଗିନେ କାଞ୍ଜାନଣ୍ଡ୍‌ ନୁ ସାୟେପ୍ରକାର୍‌ ତାମ୍‌ ପ୍ରବୁ ମିସର ରାଜାନ୍‌ ବିରୁଦ୍ଦ୍‌ତେ ପାପ ମାଡ଼୍‌ତଣ୍ଡ୍‌। 2 ଆସୁଟ୍‌ ଫାରୋ ତାନ୍‌ ମୁକ୍ୟ ତିନ୍ଦାନ୍‌ ଉନ୍ଦାନ୍‌ ଗିନେ କାଞ୍ଜାନଣ୍ଡ୍‌ ନୁ ମୁକ୍ୟ ସାୟେପ୍ରକାର୍‌ ଇ ରେଣ୍ଡ୍‌ କାମ୍‌ ପର କପାମ୍‌ ଆତ୍‌ତଣ୍ଡ୍‌, 3 ମେଣ୍ଡେ ରକ୍ଷାମାଡ଼ାନ୍‌ ସୈନ୍ୟାଦିପତିତେ ବେନ୍‌ ବନ୍ଦି ଲୋନ୍‌ ଯୋଷେପ୍‌ ବନ୍ଦି ମାତ୍‌ତଣ୍ଡ୍‌, ଆଗେ ଅଡ଼୍‌କିଂଙ୍କ୍‌ ବନ୍ଦି ମାଡ଼ି ନେହ୍‌ତଣ୍ଡ୍‌। 4 ଆସୁଟ୍‌ ରକ୍ଷାମାଡ଼ାନ୍‌ ସୈନ୍ୟାଦିପତି ଯୋଷେପ୍‌ତେ କାୟ୍‌ଦାଗେ ଅଡ଼୍‌କିଂଙ୍କ୍‌ ସମର୍ପଣ ମାଡ଼୍‌ତାଙ୍କ୍‌, ଯୋଷେପ୍‌ ଅଡ଼୍‌କିଂଙ୍କ୍‌ ବୁଜାମାଡ଼ାନଙ୍କ୍‌ ପସ୍ପ୍‌ତଣ୍ଡ୍‌। ଇଦ୍‌ ଲେକାମ୍‌ ଅଡ଼୍‌ ବେସ୍‌କ୍‌ଦିନା ତାନାତାଗ୍‌ ମାତ୍‌ତଣ୍ଡ୍‌।

5 ତାନ୍‌ପେର୍କେ ମିସର ରାଜାନ୍‌ ଆ ତାନାତାଗେ ମାନ୍ଦାନ୍‌ ତିନ୍ଦାନ୍‌ ଉନ୍ଦାନ୍‌ ଗିନେ କାଞ୍ଜାନଣ୍ଡ୍‌ ନୁ ସାୟେତାୱୁ ଇର୍‌ୱୁଡ଼୍‌ ଅଣ୍ଡୟ୍‌ ନାର୍କା ରେଣ୍ଡ୍‌ ପ୍ରକାର୍‌ ରେଣ୍ଡ୍‌ ସାପ୍ନା ଉଡ଼୍‌ତଡ଼୍‌। 6 ଆସୁଟ୍‌ ଯୋଷେପ୍‌ ନାର୍କୁକେ ଅଡ଼୍‌ ଗାରେ ୱାଦାନ୍‌ ୱେଲେ ଅଡ଼୍‌କିଂଙ୍କ୍‌ ମୁର୍‌ମୁରା ମାନ୍ଦାନାଦ୍‌ ଉଡ଼୍‌ତଣ୍ଡ୍‌। 7 ଆସୁଟ୍‌ ଫାରୋନ୍‌ ବେନ୍‌ କାମ୍‌ତଡ଼୍‌ ତାନ୍‌ ପ୍ରବୁନ୍‌ ତାନାତାଗ୍‌ ବନ୍ଦ୍‌ ମାତ୍‌ତଡ଼୍‌, ଅଡ଼୍‌କିଂଙ୍କ୍‌ ଅଣ୍ଡ୍‌ ପାଚ୍ରାରାମାଡ଼୍‌ତଣ୍ଡ୍‌, ନେଣ୍ଡ୍‌ ମି ମକମ୍‌ ମୁର୍‌ମୁରା ବାତେଙ୍କ୍‌ ?

8 ଅଡ଼୍‌ ଉତ୍ତର୍‌ ଇତ୍‌ତଡ଼୍‌, ମାମ୍‌ ସାପ୍ନା ଉଡ଼୍‌ତମ୍‌, ମାତ୍ର ତାନ୍‌ ଅର୍ଥ କେତାନଙ୍କ୍‌ ବେନ ଇଲେଣ୍ଡ୍‌। ଆସୁଟ୍‌ ଯୋଷେପ୍‌ ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ଅର୍ଥ ତେ ଜ୍ଞାନ୍‌ ବାତେ ପରମେଶ୍ୱର୍‌ତେ ପାକେ ଆୟ ? ବିନୟ ମାଡ଼ୁତାନ୍‌, ମିୟାଦ୍‌ ସାପ୍ନା ନାକିଙ୍କ୍‌ କେଲ୍‌ମୁଟ୍‌।

9 ଆସୁଟ୍‌ ବେଡ଼ିୟେ ତିନ୍ଦାନ୍‌ ଉନ୍ଦାନ୍‌ ଗିନେ କାଞ୍ଜାନଣ୍ଡ୍‌ ଯୋଷେପ୍‌ତିଙ୍କ୍‌ ତାନ୍‌ ସାପ୍ନାତେ ଗଟ୍‌ କେତ୍‌ତଣ୍ଡ୍‌, ଉଡ଼ା, ଅଣ୍ଡୟ୍‌ ଅଙ୍ଗୁର୍‌ଟଣ୍ଡେ ନା' ମୁନେ ମାତ୍‌ତା, 10 ଆ ଅଙ୍ଗୁର୍‌ଟଣ୍ଡେତାଗ୍‌ ମୁଣ୍ଡ୍‌ କମା ମାତ୍‌ତା, ମେଣ୍ଡେ ଆୱ୍‌ କାୟା ଆଦ୍‌ତାଙ୍କ୍‌ ଆସୁଟ୍‌ ପୁଙ୍ଗା ପୁୟ୍‌ତା, ମେଣ୍ଡେ ସାରେ କମାନାଗ୍‌ ଜପା ଜପା କାୟାଆସ୍‌ ପାଣ୍ଡ୍‌ତା। 11 ଆସୁଟ୍‌ ନା' କାୟ୍‌ଦାଗେ ଫାରୋନ୍‌ ପାନପାତ୍ର ମାତ୍‌ତାଙ୍କ୍‌ ଆ ପାତ୍ରତାଗେ ନାନ୍‌ ଆ ଅଙ୍ଗୁର୍‌କାୟା ଅସ୍‌ ପିସ୍‌କି ଫାରୋନ୍‌ କାଇଦାଗ୍‌ ଇତ୍‌ତାନ୍‌।

12 ଆସୁଟ୍‌ ଯୋଷେପ୍‌ ଅଂକିଙ୍କ୍‌ କେତ୍‌ତଣ୍ଡ୍‌, ଇଦିନ୍‌ ଅର୍ଥ ଇଦ୍‌; ଆ ମୁଣ୍ଡ୍‌ କମାଙ୍କ୍‌ ମୁଣ୍ଡ୍‌ ଦିନା ବୁଜାଆଦୁତା। 13 ମୁଣ୍ଡ୍‌ ଦିନାନ୍‌ ଲୋପେ ଫାରୋ ତାଲ୍‌ ତେୟ୍‌ସ୍‌ ନିକିଙ୍କ୍‌ ନିଜର୍‌ ପଦତାଗ୍‌ ମେଣ୍ଡନ୍‌ଦାମ୍‌ ନିଯୁକ୍ତ ମାଡ଼ିତଣ୍ଡ୍‌; ଆସୁଟ୍‌ ନିମେ ମୁନେତ୍‌ ଲେକାମ୍‌ ତିନ୍ଦାନ୍‌ ଉନ୍ଦାନ୍‌ ଗିନେ କାଞ୍ଜାନଣ୍ଡ୍‌ ଅସ୍‌ ମେଣ୍ଡନ୍‌ଦାମ୍‌ ଫାରୋନ୍‌ କାଇଦାଗ୍‌ ତିନ୍ଦାନ୍‌ ଉନ୍ଦାନ୍‌ ଗିନେ କାଞ୍ଜାନଣ୍ଡ୍‌ ଆଦ୍‌ତିନ୍‌। 14 ମାତ୍ର ନିକ୍‌ ସାୟେ ଆତ୍କେ, ନାକିଙ୍କ୍‌ ଏର୍କ୍‌ ମାଡ଼ିତିନ୍‌, ମେଣ୍ଡେ ନା' ପର ଦୟା ମାଡ଼ି ଫାରୋନ୍‌ ମୁନେ ନା ବିଷୟ୍‌ କେସ୍‌ ନାକିଙ୍କ୍‌ ଇ ତାନାକଞ୍ଚ୍‌ ପେସ୍ପିତିନ୍‌। 15 ବାତେଙ୍କ୍‌ଇତ୍କେ ଏବ୍ରିୟଡ଼୍‌ ଦେଶ୍‌କଞ୍ଚ୍‌ ନାରୁଡ଼୍‌ ନାକିଙ୍କ୍‌ ନିଜାମ୍‌ ଡଙ୍ଗି ମେଣ୍ଡେ ତାସ୍‌ ମିନ୍ଦେଡ଼୍‌; ମେଣ୍ଡେ ଇ ପଡ଼ିୟ୍‌ତାଗେ ଆନ୍ତେ ନାନ୍‌ ବାତ୍‌ ମାଡ଼ନ୍‌, ଇତ୍କେବା ଅଡ଼୍‌ ନାକିଙ୍କ୍‌ ଇ ତାନାତାଗ୍‌ ବନ୍ଦ୍‌ ମାଡ଼ିମିନ୍ଦେଡ଼୍‌।

16 ଆସୁଟ୍‌ ଅଣ୍ଡ୍‌ ଲେକେତ୍‌ ବିଷୟ କେତ୍‌ତଣ୍ଡ୍‌, ବେଡ଼ିୟେ ସୁପକାର୍‌ ଇଦ୍‌ ଉଡ଼ି ଯୋଷେପ୍‌ତିଙ୍କ୍‌ କେତ୍‌ତଣ୍ଡ୍‌, ନାନ୍ ଆନ୍ତେ ସାପ୍ନା ଉଡ଼ି ମିନ୍ଦେନ୍‌; ଉଡ଼ାଟ୍‌ ନା ତାଲେତ୍‌ ପର ମୁଣ୍ଡ୍‌ ଜୁଡ଼ି ୱାସ୍‌ତେ ପିଟା। 17 ସାରେକେ ପରତ୍ ଜୁଡ଼୍‌ଦାଗ୍‌ ଫାରୋନ୍‌ କାଦିତ୍‌ ମାଇଦିଙ୍କ୍‌ ରକମ୍‌ ରକମ୍‌ ଲେକାମ୍‌ କାଦି ମାତ୍‌ତା; ମେଣ୍ଡେ ପିଟେ ୱାସ୍‌ ନା ତାଲ୍‌ତାଗ୍‌ ମାନ୍ଦାନ୍‌ ଜୁଡ଼୍‌ଦାଗାଙ୍କ୍‌ ଅସ୍‌ ତିତ୍‌ତା।

18 ଆସୁଟ୍‌ ଯୋଷେପ୍‌ ଉତ୍ତର୍‌ ଇତ୍‌ତଣ୍ଡ୍‌, ଇଦିନ୍‌ ଅର୍ଥ ଇଦ୍‌, ଆ ମୁଣ୍ଡ୍‌ ଜୁଡ଼ିନେ ମୁଣ୍ଡ୍‌ ଦିନା ବୁଜାଆଦୁତା। 19 ମୁଣ୍ଡ୍‌ ଦିନାନ୍‌ ଲୋପେ ଫାରୋ ନି ମେନ୍ଦୁଲ୍‌କଞ୍ଚ୍‌ ନି ତାଲ୍‌ତିଙ୍କ୍‌ ତେଇସ୍‌ ନିକିଙ୍କ୍‌ ମାଡ଼େତ୍‌ ପର ୱେଃତିତଣ୍ଡ୍‌, ମେଣ୍ଡେ ପିଟେ ୱାସ୍‌ ନି ଆୱ୍‌ଗିଙ୍କ୍‌ ତିନ୍ଦ୍‌ତା।

20 ଆସୁଙ୍କ୍‌ ମୁଣ୍ଡ୍‌ଦିନ୍‌ତେ ଫାରୋନ୍‌ ଜନ୍ମଦିନ୍‌ ହେୱ୍‌ତାଙ୍କ୍‌ ଅଣ୍ଡ୍‌ ତାନ୍‌ ସାରେ ଦାସଡ଼୍‌କିନ୍‌ ସେଙ୍ଗେ ବଜି ତିଆର୍‌ ମାଡ଼୍‌ତଣ୍ଡ୍‌। ଆସୁଟ୍‌ ଅଣ୍ଡ୍‌ ତାନ୍‌ ସାରେ ଦାସଡ଼୍‌ ମୁନେ ବେଡ଼ିୟଣ୍ଡ୍‌ ତିନ୍ଦାନ୍‌ ଉନ୍ଦାନ୍‌ ଗିନେ କାଞ୍ଜାନଣ୍ଡ୍‌ ନୁ ବେଡ଼ିୟଣ୍ଡ୍‌ ସୂପକାରନ୍‌ ମିକା କାର୍ଙ୍ଗତଡ଼୍‌। 21 ମେଣ୍ଡେ ଯୋଷେପ୍‌ କେସ୍‌ ମାନ୍ଦାନ୍‌ ଲେକାମ୍‌ ଫାରୋ ବେଡ଼ିୟଣ୍ଡ୍‌ ତିନ୍ଦାନ୍‌ ଉନ୍ଦାନ୍‌ ଗିନେ କାଞ୍ଜାନଙ୍କ୍‌ ନିଜର୍‌ ପଦତାଗ୍‌ ମେଣ୍ଡନ୍‌ଦାମ୍‌ ନିଯୁକ୍ତ ମାଡ଼୍‌ତଣ୍ଡ୍‌; ଆସୁଟ୍‌ ଅଣ୍ଡ୍‌ ଫାରୋନ୍‌ କାୟ୍‌ଦେକଞ୍ଚ୍‌ ପାନପାତ୍ର ଇଦାନଙ୍କ୍‌ ପସ୍ପ୍‌ତଣ୍ଡ୍‌। 22 ମାତ୍ରମ୍‌ ଅଣ୍ଡ୍‌ ବେଡ଼ିୟଣ୍ଡ୍‌ ସୂପକାରଙ୍କ୍‌ ମାଡ଼୍‌ତାଗେ ୱେଃସିତ୍‌ତଣ୍ଡ୍‌; 23 ଆଦିଙ୍କ୍‌ ବା, ବେଡ଼ିୟଣ୍ଡ୍‌ ତିନ୍ଦାନ୍‌ ଉନ୍ଦାନ୍‌ ଗିନେ କାଞ୍ଜାନଣ୍ଡ୍‌ ଯୋଷେପ୍‌ତିଙ୍କ୍‌ ଏର୍କ୍‌ ମାଡ଼ଣ୍ଡ୍‌, ମାତ୍ରମ୍‌ ଅଂକିଙ୍କ୍‌ ମାର୍ଙ୍ଗିତ୍‌ତଣ୍ଡ୍‌।