Ezequiel 16

ಜೆರುಜಲೆಮಾಚಿ ಅವಿಶ್ವಾಸ್ಪಾನ್

1 ಮಾನಾ ಸರ್ವೆಸ್ಪರಾನ್ ಮಾಕಾ ಹಿ ಗೊಸ್ಟ್ ದಿಲ್ಯಾನ್. 2 ನರ್ ಮಾನ್ಸಾ ತಿಯಾ ಜೆರುಜಲೆಮಾಕ್ ತಿಜಿ ಬುರ್ಶಿ ಕಾಮಾ ಕಳ್ವುನ್, 3 ಸಾಂಗ್, ಸರ್ವೆಸ್ಪರಾನ್ ದೆವಾನ್, ಜೆರುಜಲೆಮಾಕ್ ಮನ್ತಲಿಕ್ ಹಿ ಗೊಸ್ಟ್ ಸಾಂಗ್, ತುಜಿ ಉಪಾಜಲ್ಲೆ ಕಾನಾನಾಂಚ್ಯಾ ದೆಸಾತ್, ಬಾಬಾ ತುಜೊ ಅಮೊರಿತಾಂಚೊ, ತುಜಿ ಬಾಯ್ ಹಿತ್ತಿತಾಂಚಿ. 4 ತಿಚ್ಯಾ ಉಪಾಜಲ್ಲ್ಯಾಚ್ಯಾ ವಿಶಯಾತ್ ಕಾಯ್ ಸಾಂಗು! ತಿಯಾ ಉಪಾಜಲ್ಲ್ಯಾ ದಿಸಿ ತುಜಿ ಬೊಂಬ್ಲಿ ಕಾಪುನ್ ಕೊನಿಬಿ ಭಾಂದುಕ್ನಾತ್, ತುಕಾ ಪಾನಿಯಾನ್ ಧುವ್ನ್ ನಿತಳ್ ಕರುಕ್ನಾತ್, ತುಕಾ ಉಲ್ಲೆಬಿ ಮಿಟ್ಟ್ ಲಾವ್ಕ್ನಾತ್, ತುಕಾ ಕಪ್ಡ್ಯಾತ್ ಲಪ್ಟುಕ್ನಾತ್. 5 ತುಕಾ ದಯಾ ದಾಕ್ವುನ್, ಕಾಳ್ಜಿ ದಾಕ್ವುನ್ ಕೊನಿಬಿ ತುಕಾ ಅಸ್ಲಿ ಮಜತ್ ಕರುಕ್ನಾತ್, ತಿಯಾ ಉಪಾಜಲ್ಲ್ಯಾ ದಿಸಿ ರಾಡ್ ಹೊಲ್ಲಿ ಹೊತ್ತೆ, ತುಕಾ ಮ್ಹಾಳಾತ್ ಟಾಕುನ್ ಸೊಡಲ್ಲೆ ಹೊತ್ತೆ.

6 ಮಿಯಾ ದಾಟುನ್ ಜಾತಾನಾ, ತುಜ್ಯಾ ರಗ್ತಾತುಚ್ ಲೊಳುನ್ಗೆತ್ ಹೊತ್ತ್ಯಾ ತುಕಾ ಬಗುನ್ ತಿಯಾ ರಗ್ತಾನ್ ಹೊಲಿ ಹೊಲ್ಲಿ ರಾಲ್ಯಾರ್ಬಿ ಝಿತ್ತಿ ರಾ ಮನುನ್ ಸಾಂಗ್ಲೊ. ಹೊಯ್ ತಿಯಾ ಬುರ್ಶಿ ಹೊಲ್ಯಾರ್ಬಿ ಝಿತ್ತಿ ರಾ ಮನುನ್ ವಾಚ್ವುಲೊ. 7 ಜಿಮ್ನಿ ವರ್‍ತಿ ಮೊಳ್ಕ್ಯಾ ಸಾರ್ಕೆ ಮಿಯಾ ತುಕಾ ವಾಡ್ವುತಾನಾ, ತಿಯಾ ವಾಡುನ್ ದಾಂಡ್ಗಿ ಹೊವ್ನ್, ಲೈ ಸುಂದರ್ ಹೊಲೈ, ತುಕಾ ಥಾನಾ ಯೆಲಿ, ತುಜಿ ಕೆಸಾ ಲಾಂಬ್ ಹೊಲಿ, ಖರೆ ತಿಯಾ ಕಪ್ಡೆ ನಸ್ತಾನಾ ನಾಗ್ಡೆ ಹೊಲ್ಲೆಯ್.

8 ಮಿಯಾ ದಾಟುನ್ ಜಾತಾನಾ ಅಬಕ್ ತುಕಾ ಬಗ್ತಾನಾ, ತಿಯಾ ಲಗ್ನಾಚಿ ಹೊಲ್ಲೆಯ್, ತನ್ನಾ ಮಿಯಾ ಮಾಜ್ಯಾ ಕಾಂಬ್ರಾನಾಚಿ ಪದರ್ ತುಜ್ಯಾ ವರ್‍ತಿ ಘಾಲುನ್ ತುಜಿ ಮರ್ಯಾದ್ ಧಾಪ್ಲೊ, ತವ್ಡೆಚ್ ನಸ್ತಾನಾ ಮಿಯಾ ಗೊಸ್ಟ್ ದಿವ್ನ್ ಕರಾರ್ ಕರುನ್ ಘೆಟಲ್ಲ್ಯಾ ಸಾಟ್ನಿ ತಿಯಾ ಮಾಜಿ ಹೊಲೆಯ್, ಹಿ ಸರ್ವೆಸ್ಪರ್ ದೆವಾಚಿ ಗೊಸ್ಟ್. 9 ತನ್ನಾ ಮಿಯಾ ತುಕಾ ಪಾನಿ ನಾವ್ಸುನ್ ತುಜ್ಯಾ ವಯ್ಲೆ ರಗಾತ್ ಧುವ್ನ್, ತಿಕಾ ತೆಲ್ ಲಾವ್ಲೊ. 10 ತವ್ಡೆಚ್ ನಸ್ತಾನಾ ಮಿಯಾ ಹಾತಿನಿ ಕರಲ್ಲೆ ಕಪ್ಡೆ ತುಕಾ ನೆಸ್ವುನ್, ಸಮುಂದರಾಚ್ಯಾ ಬರ್ಯಾತ್ಲ್ಯಾ ಬರೆ ಚಮ್ಡ್ಯಾಚಿ ವ್ಹಾನಯಾ ತುಕಾ ನೆಸ್ವುನ್, ಕಿಮ್ತಿಚೆ ಕಪ್ಡೆ ತುಕಾ ನೆಸ್ವುನ್, ರೆಶ್ಮಿಚೆ ಕಾಂಬ್ರಾನ್ ಕಾಂಬರ್ಲೊ. 11 ಅನಿ ಮಿಯಾ ತುಜ್ಯಾ ಹಾತಾಕ್ನಿ ಕಾಕ್ನಾ ಅನಿ ಗಳ್ಯಾಕ್ ಪವ್ಳಿ, 12 ಅನಿ ನಾಕಾತ್ ನತ್ತ್, ಕಾನಾಕ್ ಕಾನಾತ್ಲಿ ಪುಲ್ಲ್ ಅನಿ ಟಕ್ಲ್ಯಾ ವರ್‍ತಿ ಸುಂದರ್ ಮುಕುಟ್ ಥವ್ನ್, ತುಕಾ ವಸ್ತಾನಿ ಶಿಂಗಾರ್ ಕರ್ಲೊ. 13 ತುಜಿ ವಸ್ತಾ ಚಾಂದಿ ಅನಿ ಸೊನ್ಯಾಚಿ, ತುಜೆ ಕಪ್ಡೆ ಕಿಮ್ತಿಚೆ ಕಪ್ಡೆ, ರೆಶ್ಮಿಚೆ ಕಾಂಬ್ರಾನ್, ಹಾತಿಚ್ಯಾ ಕರಲ್ಲೆ ಕಪ್ಡೆ, ತುಜಿ ಜೆವಾನ್ ಘಂವಾಚೆ ಬರೆ ಪಿಟ್ಟ್, ಮ್ಹಾಂವ್ ಅನಿ ತೆಲ್, ತುಜೆ ಸುಂದರ್ ಪಾನ್ ಲೈ ಸುಂದರ್, ತಿಯಾ ವಾಡುನ್ ರಾನಿ ಹೊಲೆಯ್. 14 ಮಿಯಾ ತುಕಾ ದಿಲ್ಲ್ಯಾ ಮಾಜ್ಯಾ ವಯ್ಭವಾ ವಯ್ನಾ ತಿಯಾ ಲೈ ಸುಂದರ್ ಹೊವ್ನ್ ವಾಡ್ಲೆಯ್, ತುಜೆ ಸುಂದರ್ ಪಾನ್ ಸಗ್ಳ್ಯಾಕ್ಡೆ ಪಗಳ್ಳಿ, ಹಿ ಸರ್ವೆಸ್ಪರ್ ದೆವಾಚಿ ಗೊಸ್ಟ್.

15 ಖರೆ ತಿಯಾ ತುಜ್ಯಾ ಸುಂದರ್ ಪಾನಾನ್ ವಿಶ್ವಾಸ್ ಥವ್ನ್, ಮಿಯಾ ನಾವ್ ಘೆಟ್ಲೊ ಮನುನ್ ಮಸ್ತಿ ಕರುನ್, ದಾಟುನ್ ಜಾತಲ್ಯಾ ಹರ್ ಎಕ್ಲ್ಯಾ ವಾಂಗ್ಡಾ ನಿಜಲೈ, 16 ತಿಯಾ ಫುಜಾ ಕರ್‍ತಲೆ ಜಾಗೆ ಭಾಂದುನ್ಗೆವ್ನ್ ತುಜ್ಯಾ ನಾನಾ ನಮುನ್ಯಾಚಿ ವಸ್ತಾನಿ ತೆಕಾ ಶಿಂಗಾರ್ ಕರುನ್ಗೆವ್ನ್ ಥೈ ಬುರ್ಸೆಪಾನ್ ಕರ್‍ಲೆ, ಹೆ ಹೊವ್ ನಸುಚೆ ಹೊತ್ತೆ, ಅನಿ ಹೊತಲೆ ನತ್ತೆ. 17 ಅನಿ ಮಿಯಾ ಮಾಜ್ಯಾ ಸೊನ್ಯಾನ್ ಅನಿ ಚಾಂದಿನ್ ತುಕಾ ಕರ್ಸುನ್ ದಿಲ್ಲಿ ವಸ್ತಾ ಘೆವ್ನ್, ತೆಜ್ಯಾನ್ ಘವ್ಮಾನ್ಸಾಂಚಿ ಮುರ್ತಿಯಾ ಕರುನ್ ತೆಂಚ್ಯಾ ವಾಂಗ್ಡಾ ವ್ಯಬಿಚಾರ್ ಕರ್‍ಲೆ. 18 ತುಜಿ ಹಾತಿಚ್ಯಾ ಕರಲ್ಲೆ ಕಪ್ಡೆ ಘೆವ್ನ್, ಮುರ್ತಿಯಾಕ್ನಿ ತೆ ನೆಸ್ವುನ್ ತೆಂಚ್ಯಾ ಫಿಡೆ ಮಾಜೆ ಭೆಟ್ವುತಲೆ ತೆಲ್ ಅನಿ ಧುಪ್ ಭೆಟ್ವುಲೈ. 19 ಮಿಯಾ ದಿಲ್ಲಿ ಬಾರಿಕ್ಲಿ, ತುಕಾ ದಿಲ್ಲೆ ಜೆವಾನ್, ಘಂವಾಚೆ ಬರೆ ಪಿಟ್ಟ್, ತೆಲ್, ಮ್ಹಾಂವ್ ಹೆ ಸಗ್ಳೆ ತಿಯಾ ತ್ಯಾ ಮುರ್ತಿಯಾಂಚ್ಯಾ ಇದ್ರಾಕ್ ಬರ್ಯಾವಾಸೆಚಿ ಬಲಿ ಕರುನ್ ಭೆಟ್ವುಲೆಯ್, ಹೆ ಸರ್ವೆಸ್ಪರ್ ದೆವಾಚೆ ಬೊಲ್ನೆ ಹೊವ್ನ್ ಹಾಯ್. 20 ತವ್ಡೆಚ್ ನಸ್ತಾನಾ ತಿಯಾ ಮಾಜ್ಯಾಕ್ನಾ ಉಪಾಜಲ್ಲಿ ಚೆಡ್ವಾ ಅನಿ ಝಿಲ್ಗೆ ಧರುನ್ ಮುರ್ತಿಯಾಕ್ನಿ ಜೆವಾನ್ ಹೊಂವ್ದಿತ್ ಮನುನ್ ಬಲಿ ಭೆಟ್ವುಲೆಯ್, ಹಿ ಬಾರಿಕ್ ಗೊಸ್ಟ್ ಮನುನ್ ಚಿಂತಲೈ ಕಾಯ್! 21 ತೆ ಮಿರ್ಸುಚೆ ಮನುನ್ ತಿಯಾ ಮಾಜ್ಯಾ ಪೊರಾಕ್ನಿ ಸೊಡುನ್ ಮುರ್ತಿಯಾಕ್ನಿ ಬಲಿ ಭೆಟ್ವುನ್ ದಿಲೈ ಕಾಯ್? 22 ತುಜಿ ಹಿ ಬುರ್ಶಿಕಾಮಾ, ವ್ಯೆಭಿಚಾರ್ ತಿಯಾ ಪರ್‍ತುನ್-ಪರ್‍ತುನ್ ಕರ್ತಾನಾ ತಿಯಾ ಕಪ್ಡೆ ನಸ್ತಾನಾ ನಾಗ್ಡೆ ಹೊವ್ನ್ ತುಜ್ಯಾ ರಗ್ತಾತ್ ತಿಯಾ ಲೊಳುನ್ಗೆತ್ ಹೊತ್ತೆ ತುಜೆ ಬಾಳ್ಸೆಪಾನ್ ತಿಯಾ ಯಾದಿಕ್ ಹಾನುನ್ ಘೆವ್ಕ್ ನಾ. 23 ಅಯ್ಯೊ, ತುಜಿ ಗತ್ ಕಾಯ್ ಮನುನ್ ಸಾಂಗು, ಹಿ ಸರ್ವೆಸ್ಪರ್ ದೆವಾಚಿ ಗೊಸ್ಟ್.

ಜೆರುಜಲೆಮಾಚೆ ವ್ಯಬಿಚಾರಾಚೆ ಜಿವನ್

24 ತಿಯಾ ಹಿ ಬುರ್ಶಿ ಕಾಮಾ ಕರಲ್ಲೆ ತವ್ಡೆಚ್ ನಸ್ತಾನಾ, ಹರ್ ಎಕ್ ಚವ್ಕಾತ್ ಮಂಟಪ್ ಭಾಂದುನ್ ಕರುನ್ ಕಟ್ಟೊ ಕರುನ್ಗೆಟಲೆಯ್. 25 ಹರ್ ಎಕ್ ವಾಟೆಚ್ಯಾ ತುದಿಕ್ ಕಟ್ಟೊ ಭಾಂದುನ್ಗೆವ್ನ್ ತುಜೆ ಸುಂದರ್ ಪಾನ್ ನಿಚ್ ಕಾಮಾಕ್ ಒಪ್ಸುನ್, ದಾಟುನ್ ಜಾತಲ್ಯಾ ಸಗ್ಳ್ಯಾಂಚ್ಯಾ ವಾಂಗ್ಡಾ ಮಿಳುನ್ ಜಾಸ್ತಿಚೆ ಸುಳ್ ಪಾನ್ ಕರ್‍ಲೆ. 26 ತಿಚ್ಯಾ ಸೆಜಾರಿ ಲೊಕಾ ಇಜಿಪ್ತ್ ಕಾರಾಂಚ್ಯಾಕ್ನಾಬಿ ತಿಯಾ ಮಿಳುನ್ ಲೈ ವ್ಯೆಭಿಚಾರ್ ಕರುನ್, ಮಾಕಾ ಚಾವ್ತಾಳಿ ಸಾರ್ಕೆ ಕರ್‍ಲೆ. 27 ತಸೆಹೊವ್ನ್, ಮಿಯಾ ತುಜ್ಯಾ ವರ್‍ತಿ ಹಾತ್ ಉಕ್ಲುನ್, ತುಜೆ ಖಾನ್ ಕಮ್ಮಿ ಕರ್ಲೊ, ತುಕಾ ದ್ವೆಶ್ ಕರುನ್ ತುಜ್ಯಾ ಬುರ್ಸ್ಯಾ ಕಾಮಾಕ್ನಿ ಸೊಸುನ್ ಘೆಯ್ನಸಲ್ಲ್ಯಾ ಪಿಲಿಸ್ತಿಯಾಂಚ್ಯಾ ದಾಂಡ್ಗ್ಯಾ ಚೆಡ್ವಾಂಚ್ಯಾ ಹಾತಿತ್ ಸಿಗಾ ಘಾಟ್ಲೊ. 28 ಅನಿ ತವ್ಡೆಚ್ ಫಿರೆ ಹೊಯ್ನಾ ಮನುನ್ ಆಶುರ್ಯಾಂಚ್ಯಾ ವಾಂಗ್ಡಾಬಿ ನಿಜಲೈ, ಹೊಯ್ ತೆಂಚ್ಯಾಕ್ನಾ ನಿಜ್ಲ್ಯಾರ್ಬಿ ತುಕಾ ನಿಜ್ ಯೆವ್ಕ್ ನಾ. 29 ತವ್ಡೆಚ್ ನಸ್ತಾನಾ, ತಿಯಾ ಲೈ ಯಾಪಾರ್ ಕರ್‍ತಲ್ಯಾ ಕಸ್ದಿಯಾಂಚ್ಯಾ ದೆಸಾಕ್ ಮಿಳುನ್ ಥೈಬಿ ಲೈ ವ್ಯೆಭಿಚಾರ್ ಕರ್‍ಲೆ, ಜಾಲ್ಯಾರ್ಬಿ ಧ್ಯಾಯ್ ಭರುಕ್ನಾ.

30 ಸರ್ವೆಸ್ಪರ್ ದೆವ್ ಅಸೊ ಸಾಂಗ್ತಾ, ತುಜೊ ಮನ್ ವ್ಯಬಿಚಾರಾಕ್ ಸಿಕ್ ಹೊವ್ನ್ ಗೆಲಾ, ಯೆವ್ಡಿ ಸಗ್ಳಿ ಬುರ್ಶಿ ಕಾಮಾ ಕರುನ್ ಭಾಂದಲ್ಲಿ ನತ್ತಿ ಸುಳ್ ಪಾನಾಚಿ ಬಾಯ್ಕೊ ಮಾನುಸ್ ಹೊಲೆಯ್ ನ್ಹಯ್. 31 ಹರ್ ಎಕ್ ಒನಿಚ್ಯಾ ಆಕ್ರಿಕ್ ತಿಯಾ ಖೊಲಿ ಭಾಂಧುನ್ ಸಗ್ಳ್ಯಾ ಚವ್ಕಾತ್ನಿ ಪಿಟ್ಟ್ ಭಾಂಧುನ್ ಘೆಟ್ಲೆಯ್, ಗಾವಲ್ಲೆ ಸಗ್ಳೆಬಿ ಕಮ್ಮಿಚೆ ಮನುನ್ ತಿರಸ್ಕಾರ್ ಕರ್‍ತಲ್ಯಾ ಸುಳಿ ಸಾರ್ಕಿ ತಿಯಾ ಚಲ್ತಲಿ ನ್ಹಯ್. 32 ತಿಯಾ ವ್ಯೆಭಿಚಾರ್ ಕರ್ತಲಿ ಘವಾ ವಯ್ಲಿ ಬಾಯ್ಕೊ ಮಾನುಸ್, ಘವಾಚ್ಯಾ ಬದ್ಲಾಕ್ ದುಶ್ರ್ಯಾಚ್ಯಾ ಮಿಳ್ತಲಿ ರಾಂಡ್ ತಿಯಾ. 33 ಸಗ್ಳ್ಯಾಕ್ಡೆ ವ್ಯೆಭಿಚಾರ್ ಕರ್‍ತಲ್ಯಾ ಬಾಯ್ಕೊ ಮನ್ಸಿಕ್ ಪಯ್ಸೆ ದಿವ್ನ್ ಹೊತಾ, ಖರೆ ತಿಯಾ ತುಜ್ಯಾ ಧಗ್ಡಾಕ್ನಿ ತಿಯಾಚ್ ಪಯ್ಸೆ ದಿತೆಯ್, ತೆನಿ ಸಗ್ಳ್ಯಾ ಭಾಜುಕ್ನಾ ತುಜ್ಯಾಕ್ಡೆ ಎವ್ನ್ ತುಜ್ಯಾ ವಾಂಗ್ಡಾ ನಿಜುಕ್ ತಿಯಾಚ್ ತೆಂಕಾ ಭೊಮಾನ್ ದಿತೆಯ್. 34 ತುಜ್ಯಾ ವ್ಯಬಿಚಾರಾಕ್ ಅನಿ ಹುರಲ್ಲ್ಯಾ ರಾಂಡಾಂಚ್ಯಾ ವ್ಯಬಿಚಾರಾಕ್ನಿ ವ್ಯತ್ಯಾಸ್ ಹಾಯ್, ತುಜ್ಯಾಕ್ಡೆ ವ್ಯಬಿಚಾರ್ ಕರುಕ್ ಕೊನ್ಬಿ ತುಜ್ಯಾ ಫಾಟ್ನಾ ಯೆಯ್ನಾತ್, ತಿಯಾಚ್ ದಿತೆಯ್ ಖರೆ ತುಕಾ ಕಾಯ್ಬಿ ಗಾಯ್ನಾ, ತುಜೆ ಬುರ್ಸೆಪಾನ್ ಲೈಚ್ ಹೊಲ್ಲೆ ಖರೆ.

ಜೆರುಜಲೆಮಾಚ್ಯಾ ವಿಶಯಾತ್ ದೆವ್ ಝಡ್ತಿ ಕರ್‍ತಲೆ

35 ಅಸೆ ರ್‍ಹಾತಾನಾ ವ್ಯಬಿಚಾರನಿ, ಸರ್ವೆಸ್ಪರಾಚಿ ಹಿ ಗೊಸ್ಟ್ ಆಯ್ಕ್! 36 ಸರ್ವೆಸ್ಪರ್ ದೆವ್ ಅಸೆ ಸಾಂಗ್ತಾ, ಮಿತಿ ಮಿರಲ್ಲೆ ತುಜಿ ಆಂಗಾಚಿ ಆಶ್ಯಾ, ತುಜ್ಯಾಕ್ಡೆ ವ್ಯಬಿಚಾರ್ ಕರಲ್ಲ್ಯಾ ತುಜ್ಯಾ ಧಗ್ಡಾಕ್ನಿ ತುಕಾ ಹೊಲ್ಲೆ ಮರ್ಯಾದ್ ಪಾನ್, ತುಜಿ ಸಗ್ಳಿ ಬುರ್ಶಿ ಮುರ್ತಿಯಾ, ತಿಯಾ ತೆಂಕಾ ಭೆಟ್ವಲ್ಲೆ ತುಜ್ಯಾ ಪೊರಾಂಚೆ ರಗಾತ್, 37 ಹೆ ಸಗ್ಳೆ ಮಿಯಾ ಬಗುನ್, ತಿಯಾ ವ್ಯಬಿಚಾರ್ ಕರಲ್ಲ್ಯಾ ತುಜ್ಯಾ ಸಗ್ಳ್ಯಾ ಧಗ್ಡಾಕ್ನಿ ಅನಿ ತಿಯಾ ವ್ಯಬಿಚಾರ್ ಕರಲ್ಲ್ಯಾ ಸಗ್ಳ್ಯಾಕ್ನಿ ತುಕಾ ಕುಸ್ಡೆ ಕರ್‍ತಲ್ಯಾ ಸಗ್ಳ್ಯಾಂಚ್ಯಾ ವಾಂಗ್ಡಾ ಭೊತ್ಯಾನಿ ತುಕಾ ವಿರೊಧ್ ಹೊವ್ನ್ ಮಿಳ್ವುನ್, ತೆಂಚ್ಯಾ ಡೊಳ್ಯಾಂಚ್ಯಾ ಇದ್ರಾಕುಚ್ ತುಕಾ ನಾಗ್ಡೆ ಕರುನ್ ತುಜಿ ಮರ್ಯಾದ್ ಮ್ಹಾಳಾಕ್ ಹಾನ್ತಾ. 38 ವ್ಯೆಭಿಚಾರ್ ಕರ್‍ತಲ್ಯಾ, ಅನಿ ರಗಾತ್ ಗಳ್ವುತಲ್ಯಾ ಬಾಯ್ಕಾಮಾನ್ಸಿಯಾಕ್ನಿ ಸಮಾ ಶಿಕ್ಷ್ಯಾ ದಿವ್ನ್ ರಾಗಾನ್ ಅನಿ ಕಿಚ್ಚಾನ್ ತುಜೆ ರಗಾತ್ ಗಳ್ವುತಾ. 39 ಮಿಯಾ ತುಕಾ ಭೊತ್ಯಾನಿ ಹೊತ್ತ್ಯಾಂಚ್ಯಾ ಹಾತಿತ್ ಗಾಯ್ ಸಾರ್ಕೆ ಕರ್ತಾ, ತೆನಿ ತುಜಿ ಮಂಟಪ್ ಪಾಡ್ವುನ್, ಕಟ್ಟೆ ಫೊಡುನ್, ತುಜೆ ಕಪ್ಡೆ ಕಾಡುನ್, ತುಜಿ ವಸ್ತಾ ಚೊರುನ್ಗೆವ್ನ್ ಜಾವ್ನ್, ತುಕಾ ಯೆವ್ಡೆಚ್ ಖಾಲಿ ಸೊಡುನ್ ಜಾತಾತ್. 40 ತೆನಿ ತುಜ್ಯಾ ವಿಶಯಾತ್ ಬಯ್ಟೆಕ್ ಬಲ್ವುನ್, ತುಕಾ ಗುಂಡೆ ಮಾರುನ್ ಜಿವ್ ಕಾಡ್ತಾತ್, ತಲ್ವಾರಿನ್ ತೊಡ್ತಾತ್. 41 ತುಜಿ ಘರಾ ಆಗಿನ್ ಜಾಳ್ವುತಾತ್, ಲೈ ಬಾಯ್ಕಾಮನ್ಸಾಂಚ್ಯಾ ಇದ್ರಾಕ್ ತುಕಾ ಶಿಕ್ಷ್ಯಾ ದಿತಾತ್, ತಿಯಾ ತುಜೆ ಸುಳ್ ಪಾನ್ ಇಬೆ ಕರಿಸಾರ್ಕೆ ಮಿಯಾ ಕರ್ತಾ, ತಿಯಾ ತುಜ್ಯಾ ಧಗ್ಡಾಕ್ನಿ ಹೆಜ್ಯಾನ್ ಫಿಡೆ ಪಯ್ಸೆ ದಿವ್ಕ್ ಹೊಯ್ನಾ. 42 ಅಸೆ ಮಿಯಾ ತುಜೆ ವಯ್ಲೊ ಸಗ್ಳೊ ರಾಗ್ ಕಾಡುನ್ಗೆಟ್ಲ್ಯಾ ಮಾನಾ ಮಾಜೊ ರಾಗ್ ತುಜೆಕ್ನಾ ಜಾತಾ, ಮಿಯಾ ಶಾಂತ್ ಹೊವ್ನ್ ಹೆಜ್ಯಾನ್ ಫಿಡೆ ರಾಗ್ ಹೊಯ್ನಾ. 43 ತಿಯಾ ತುಜ್ಯಾ ದಾಂಡ್ಗ್ಯಾ ಪಾನಾಚಿ ದಿಸಾ ಯಾದ್ ಕರಿನಸ್ತಾನಾ ಹಿ ಬುರ್ಶಿಕಾಮಾ ಕರುನ್ ಮಾಕಾ ಚಾವ್ತಾಳಿ ಸಾರ್ಕೆ ಕರ್‍ಲೆ ಸಾಟ್ನಿ ಅಬಕ್, ಮಿಯಾ ತುಜ್ಯಾ ಬುರ್ಸ್ಯಾಚಿ ಶಿಕ್ಷ್ಯಾ ತುಜ್ಯಾ ಆಂಗಾರ್ ಘಾಲ್ತಾ, ತಿಯಾ ಮೆಜುಕ್ ಹೊಯ್ನಾ ತವ್ಡಿಚ್ ನ್ಹಯ್ ಹಿ ಪೊಜ್ಡಿ ಕಾಮಾ ಕರುನ್ಗೆತ್ ಗೆಲ್ಲೆ ನಸ್ತಾನಾ, ಹಿ ಬುರ್ಶಿ ಕಾಮಾ ಬಿ ಕರ್‍ಲೆ ನ್ಹಯ್, ಹಿ ಸರ್ವೆಸ್ಪರ್ ದೆವಾಚಿ ಗೊಸ್ಟ್.

ಅವ್ಸಿ ಸಾರ್ಕಿ ಲೆಕ್

44 ಸಾಂಗ್ನಿಯಾತ್ನಿ ಹುಶಾರ್ ಹೊತ್ತಿ ಲೊಕಾ ಅವ್ಸಿ ಸಾರ್ಕಿ ಲೆಕ್ ಮನುನ್ ಮನ್ತಲಿ ಗೊಸ್ಟ್ ತುಜ್ಯಾ ವಿಶಯಾತ್ ಸಾಂಗ್ತಾತ್. 45 ಘವಾಚೊ ಅನಿ ಪೊರಾಂಚೊ ಕಂಟಾಳೊ ಯೆತಲ್ಯಾ ಅವ್ಸಿಕ್ ತಿಯಾ ಸಮಾ ಹೊಲ್ಲಿ ಲೆಕ್ ಹಾಸ್, ಘವಾಚೊ ಅನಿ ಪೊರಾಂಚೊ ಕಂಟಾಳೊ ಕರುನ್ ಘೆತಲ್ಯಾ ತುಜ್ಯಾ ಅಕ್ಕಾಚ್ಯಾ ತಕ್ಕ್ ತಿಯಾ ಹಾಸ್, ತುಜಿ ಬಾಯ್ ಹಿತ್ತಿಯಾಂಚಿ ಅನಿ ಬಾಬಾ ಅಮೊರಿತಾಂಚೊ.

46 ತುಜ್ಯಾ ಉತ್ತರ್ ದಿಕ್ಕಾಕ್ ಅಪ್ನಾಚ್ಯಾ ದಾಂಡ್ಗ್ಯಾ ಚೆಡ್ವಾಕ್ನಿ ಘೆವ್ನ್ ವಸ್ತಿ ರಾತಲಿ ಸಮಾರ್ಯ್ ತುಜಿ ಅಕ್ಕಾ, ತುಜ್ಯಾ ದಕ್ಷಿನ್ ದಿಕ್ಕಾಕ್ ದಾಂಡ್ಗ್ಯಾ ಚೆಡ್ವಾಂಚ್ಯಾ ವಾಂಗ್ಡಾ ವಸ್ತಿ ರಾತಲಿ ಸೊದೊಮ್ ತುಜಿ ಭೆನ್. 47 ಖರೆ ತಿಯಾ ಚಲಲ್ಲಿ ಬುರ್ಶಿವಾಟ್ ತೆನಿ ಚಲಲ್ಲಿ ಸಾರ್ಕಿ ನ್ಹಯ್, ತುಜಿ ಕಂಟಾಳ್ಯಾಚಿ ಕಾಮಾ ತೆನಿ ಕರಲ್ಲಿ ಸಾರ್ಕಿ ನ್ಹಯ್, ತೆಂಚಿ ಬುರ್ಶಿ ಚಾಲ್ನುಕ್ ಉಲ್ಲಿಸಿಚ್ ಮನುನ್ ತಿಯಾ ತೆಂಚ್ಯಾಕಿಂತಾಬಿ ಲೈ ಬುರ್ಶಿ ಚಾಲ್ನುಕ್ ಚಲ್ಲೆಯ್. 48 ಸರ್ವೆಸ್ಪರ್ ದೆವ್ ಅಸೆ ಸಾಂಗ್ತಾ, ಮಾಜ್ಯಾ ಜಿವಾಚ್ಯಾ ವರ್‍ತಿ ಆನ್, ತಿಯಾ ಅನಿ ತುಜ್ಯಾ ಲೆಕಿಯಾನಿ ಚಲಲ್ಲ್ಯಾ ಸಾರ್ಕೆ ಸೊದೊಮ್ ತುಜಿ ತಂಗಿನ್ ಹೊಂವ್ದಿತ್, ತಿಚ್ಯಾ ಲೆಕಿಯಾನಿ ಹೊಂವ್ದಿತ್ ಚಲುಕ್ನಾತ್. 49 ಸೊದೊಮ್ ಮನ್ತಲ್ಯಾ ತುಜ್ಯಾ ತಂಗಿಚಿ ಚುಕ್ ಬಗ್, ಬಡಾಯ್ ಕರ್‍ತಲೆ, ಪೊಟ್ ಭರುನ್ ಘೆತಲೆ, ಅಪ್ನಾಚ್ಯಾ ಸ್ವತ್ಯಾಚ್ಯಾ ಸುಕಾತ್ ಬುಡುನ್ ರ್‍ಹಾತಲೆ, ಹೆ ತಿಚ್ಯಾಕ್ಡೆ ಅನಿ ತಿಚ್ಯಾ ಲೆಕಿಯಾಂಚ್ಯಾಕ್ಡೆ ಹೊತ್ತೆ, ತವ್ಡೆಚ್ ನಸ್ತಾನಾ ತಿ ಗರಿಬಾಕ್ನಿ ಮಜತ್ಕಾರಿ ಹೊವ್ಕ್ ನಾ. 50 ತೆನಿ ಮಸ್ತಿನ್ ಮಾಜ್ಯಾ ಡೊಳ್ಯಾಚ್ಯಾ ಇದ್ರಾಕ್ ಕಂಟಾಳ್ಯಾಚಿ ಕಾಮಾ ಕರ್ಲ್ಯಾನಿ, ತೆ ಕಾಮಾ ಬಗುನ್ ತೆಂಕಾ ನಾಸ್ ಕರ್ಲೊ. 51 ಸಮಾರ್ಯ್ ಮನ್ತಲಿನ್ಬಿ ತಿಯಾ ಕರಲ್ಲ್ಯಾ ಪಾಪಾತ್ನಿ ಅರ್ಧೊ ಪಾಪ್ಬಿ ಕರುಕ್ನಾ, ತಿಯಾ ತುಜ್ಯಾ ಅಕ್ಕಾ ತಂಗಿಯಾಂಚ್ಯಾಕಿಂತಾ ಕಂಟಾಳಾಚಿ ಕಾಮಾ ಕರ್‍ಲೆ, ತಿಯಾ ಕರಲ್ಲ್ಯಾ ಮೆಜುಕ್ ಹೊಯ್ನಾ ತವ್ಡ್ಯಾ ಬುರ್ಸ್ಯಾ ಕಾಮಾನಿ ತೆನಿ ಚುಕಿದಾರ್ ನ್ಹಯ್ ಮನುನ್ ತಿಯಾ ದಾಕ್ವುನ್ ದಿಲೈ. 52 ತುಜಿ ಚುಕಾಚ್ ತುಜ್ಯಾ ಅಕ್ಕಾ ತಂಗಿಯಾಂಚ್ಯಾ ಭಾಜುಕ್ನಾ ಹೊವ್ನ್ ಇಬೆರಾಲ್ಲ್ಯಾ ಸಾಟ್ನಿ ತುಕಾ ಬರೆ ದಿಸುಕ್ ಪಾಜೆ, ತೆಂಚ್ಯಾ ಕಿಂತಾ ಲೈ ಬುರ್ಶಿ ಪಾಪಾ ಕರಲ್ಲ್ಯಾ ವಯ್ನಾ, ತೆನಿ ತುಜ್ಯಾ ಕಿಂತಾ ಬರೆ ಸಾರ್ಕೆ ದಿಸುನ್ ಯೆವ್ಲಾತ್, ತಿಯಾ ಮರ್ಯಾದ್ ದಿಸುಚಿ, ಲಜ್ಜ್ಯಾ ಕರುಚಿ, ತುಜ್ಯಾ ಅಕ್ಕಾ, ತಂಗಿಯಾಕ್ನಿ ಚುಕ್ ನಸಲ್ಲೆ ಮನುನ್ ದಾಕ್ವುನ್ ದಿಲೈ.

ಸೊದೊಮ್ ಅನಿ ಸಮಾರ್ಯಾಚೆ ಪರ್‍ತುನ್ ಭಾಂದಾಪ್

53 ಸೊದೊಮ್ ಅನಿ ತಿಜಿ ಲೆಕಿಯಾ, ಸಮಾರ್ಯ್ ಅನಿ ತಿಜಿ ಲೆಕಿಯಾ ಹೆಂಚಿ ಸಂಕಟ್ ಮಿಯಾ ಚುಕ್ವುತಾ, ತೆಂಚ್ಯಾ ವಾಂಗ್ಡಾ ತುಜಿ ಸಂಕಟಾಬಿ ಚುಕ್ವುತಾ. 54 ಅಸೆ ರ್‍ಹಾತಾನಾ, ತಿಯಾ ತುಜ್ಯಾ ಮೆಜ್ನಿಕ್ ಹೊಯ್ ನಸಲ್ಲ್ಯಾ ತವ್ಡ್ಯಾ ಕಂಟಾಳ್ಯಾಚ್ಯಾ ಕಾಮಾಂಚ್ಯಾ ವಯ್ನಾ ತೆಂಕಾ ಸಮಾಧಾನ್ ಕರಲ್ಲ್ಯಾ ಸಾಟ್ನಿ ಲಜ್ಜೆಕ್ ಗಾವ್ತೆಯ್, 55 ತನ್ನಾ ಸಮಾರ್ಯ್, ಸೊದೊಮ್, ಮನ್ತಲಿ ಅಕ್ಕಾ ತಂಗಿಯಾ, ತೆಂಚಿ ಲೆಕಿಯಾಬಿ, ಅಪ್ನಾಚ್ಯಾ ಪಯ್ಲೆಚ್ಯಾ ಸ್ಥಿತಿಕ್ ಜಾತಾತ್, ತಿಯಾಬಿ ಅನಿ ತುಜ್ಯಾ ಲೆಕಿಯಾಚ್ಯಾ ತುಮ್ಚ್ಯಾ ಪಯ್ಲೆಚ್ಯಾ ಸ್ಥಿತಿಕ್ ಪಾವ್ತ್ಯಾಸಿ. 56 ಆರಾಮಿಚಿ ಲೆಕಿಯಾ, ತಿಚ್ಯಾ ಭೊತ್ಯಾಚಿ ಸಗ್ಳಿ ಲೊಕಾ ತುಕಾ ಕನ್ನಾಬಿ ಚಾಳ್ವುಲಾಗಲ್ಲಿ ಪಿಲಿಸ್ತಿಯಾಂಚಿ ಲೆಕಿಯಾ, ತಿಯಾ ಹೆಂಚ್ಯಾ ಸಗ್ಳ್ಯಾಂಚ್ಯಾ ಶರಾಪಿಕ್ ಗುರಿ ಹೊವ್ಚ್ಯಾ ಪಯ್ಲೆ, 57 ತುಜೆ ಬುರ್ಸೆಪಾನ್ ಮ್ಹಾಳಾಕ್ ಯೆತಲ್ಯಾ ಅದ್ದಿತ್ಯಾ ತುಜ್ಯಾ ಮಸ್ತಿಚ್ಯಾ ಎಳಾರ್, ಆಮಾಮಿಯಾಂಚ್ಯಾ ಲೆಕಿಂಚ್ಯಾಕ್ನಾ ಅನಿ ಪಿಲಿಸ್ತಿಯಾಂಚ್ಯಾ ಲೆಕಿಯಾಂಚ್ಯಾಕ್ನಾ ತುಜೆ ನಾವ್ ತೆಂಚ್ಯಾ ತೊಂಡಾತ್ ಯೆವ್ಕ್ ನಾ. 58 ತುಜ್ಯಾ ಬುರ್ಸ್ಯಾ ಚಾಲ್ನುಕಿಚೆ ಫಳ್ ತಿಯಾಚ್ ಖಾತಲೆ ಹೊಲೆ, ಹಿ ಸರ್ವೆಸ್ಪರಾಚೆ ಬೊಲ್ನೆ.

ಶಾಶ್ವತಾಕ್ ರಾತಲೊ ಕರಾರ್

59 ಸರ್ವೆಸ್ಪರ್ ದೆವಾನ್ ಅಸೊ ಮನ್ತಾ, ತಿಯಾ ಕರಾರ್ ಮೊಡುನ್ ಮಾಜಿ ಆನ್ ಮೊಡುನ್, ತಿಯಾ ಕರಲ್ಯಾ ತಕ್ಕ್ ಮಿಯಾ ಶಿಕ್ಷ್ಯಾ ದಿತಾ. 60 ಅಸೆ ತರ್ಬಿ ಮಿಯಾ ತುಜ್ಯಾ ದಾಂಡ್ಗೆಪಾನಾತ್ ತುಜ್ಯಾಕ್ನಾ ಕರುನ್ಗೆಟಲ್ಲೊ ಕರಾರ್ ಯಾದೆಕ್ ಹಾನುನ್ಗೆವ್ನ್, ತುಜ್ಯಾ ವಾಂಗ್ಡಾ ಕನ್ನಾಬಿ ಚುಕಿನಸಲ್ಲೊ ಕರಾರ್ ಕರುನ್ಗೆವ್ನ್ ಖಾತ್ರಿ ಕರ್ತಾ. 61 ಹೆಚ್ಯಾ ಪ್ರಕಾರ್ ಮಿಯಾ ಲೆಕಿಯಾಕ್ನಿಕಿ ಸಾರ್ಕೆ ತುಕಾ ದಿಲ್ಲಿ ತುಜಿ ಅಕ್ಕಾ ಅನಿ ತಂಗಿಯಾ ತುಜ್ಯಾಕ್ಡೆ ಮಿಳ್ತಾನಾ, ತಿಯಾ ತುಜಿ ಬುರ್ಶಿಕಾಮಾ ಯಾದ್ ಕರುನ್ ಘೆವ್ನ್ ಲಜ್ತೆಯ್. ಹಿ ಮಾಜಿ ದಯಾ ತುಜ್ಯಾ ಫಾಟ್ಲ್ಯಾ ಕರಾರಾಚೊ ಫಳ್ ನ್ಹಯ್. 62 ಮಿಯಾ ಹ್ಯೊ ಕರಾರ್ ತುಜಾಕ್ನಾ ಕರುನ್ಗೆತಾನಾ, ಮಿಯಾಚ್ ಸರ್ವೆಸ್ಪರ್ ಮನುನ್ ತುಕಾ ಗೊತ್ತ್ ಹೊತಾ. 63 ಮಿಯಾ ತುಜಿ ಬುರ್ಶಿ ಕಾಮಾ ಮಾಪಿ ಕರಲ್ಲ್ಯಾ ಮಾನಾ, ತಿಯಾ ತೆಂಕಾ ಯಾದೆಕ್ ಲಜ್ಜುನ್, ಅವ್ಮಾನ್ ಕರುನ್ ಘೆವ್ನ್, ತುಕಾ ಹೊಲ್ಲ್ಯಾ ಅವ್ಮಾನಾ ಸಾಟ್ನಿ ತಿಯಾ ತೊಂಡ್ ಫೊಡಿನಸ್ತಾನಾ ರ್‍ಹಾತೆಯ್, ಹಿ ಸರ್ವೆಸ್ಪರಾಚೆ ಬೊಲ್ನೆ.