1 ನರ್ ಮಾನ್ಸಾ, ತಿಯಾ ಇಜ್ರಾಯೆಲಾಚ್ಯಾ ಮಡ್ಡಿಯಾಕ್ನಿ ಹೆ ಪ್ರವಾದನ್ ಕರುನ್ ಅಸೆ ಸಾಂಗ್, ಇಜ್ರಾಯೆಲಾಚ್ಯಾ ಮಡ್ಡಿಯಾನೊ, ಸರ್ವೆಸ್ಪರಾಚೆ ಬೊಲ್ನೆ ಆಯ್ಕಾ. 2 ತುಮ್ಕಾ ಬಗುನ್ ವಿರೊಧಿ, ಆಹಾ, ಮನುನ್ಗೆತ್, ಹಿ ಜುನ್ನಿ ಘರಾ ಅಮ್ಚ್ಯಾ ತಾಬೆತ್ ಹೊಲಾತ್, ಮನುನ್ ಬಡಾಯ್ ಕರಲ್ಲ್ಯಾ ಸಾಟ್ನಿ, ಹಿ ಪ್ರವಾದನ್ ಸಾಂಗುಚೆ ಮನುನ್, ರಾಜಾ ಸರ್ವೆಸ್ಪರಾಚೊ ಹುಕುಮ್ ಹೊಲೊ. 3 ಸರ್ವೆಸ್ಪರ್ ಅಸೊ ಮನ್ತಾ, ಸಗ್ಳ್ಯಾಕ್ಡೆ ತುಡ್ವುಕ್ ಗಾವ್ನ್, ಹಾಳ್ ಹೊಲ್ಲೆ ತುಮಿ ಲೊಕಾಂಚ್ಯಾಕ್ಡೆ ಹುರಲ್ಲ್ಯಾಂಚ್ಯಾ ತಾಬೆತ್ ಹೊಲ್ಯಾಸಿ ನ್ಹಯ್! ಝುಟೆ ಬೊಲ್ತಲ್ಯಾಂಚ್ಯಾ ತೊಂಡಾತ್ ಗಾವ್ನ್, ಲೊಕಾಂಚ್ಯಾ ಶರಾಪಾಕ್ ಕಾರನ್ ಹೊಲ್ಯಾಸಿ ನ್ಹಯ್! 4 ತಸೆ ಹೊವ್ನ್, ಇಜ್ರಾಯೆಲಾಚ್ಯಾ ಮಡ್ಡಿಯಾನೊ, ರಾಜಾ ಸರ್ವೆಸ್ಪರಾಚೆ ಬೊಲ್ನೆ ಆಯ್ಕಾ, ಮಡ್ಡಿಯಾ, ಖಡ್ಡೆ ಅನಿ ಕೊಡ್ಲಾಕ್ನಿಬಿ, ಅನಿ ಡಂಗಳ್ ವಾಡಲ್ಲ್ಯಾ ಹಾಳ್ ಜಾಗ್ಯಾಕ್ನಿ ಬಿ ಭೊತ್ಯಾನಿ ಹೊತ್ತ್ಯಾ ಸಗ್ಳ್ಯಾ ಲೊಕಾನಿ ಚೊರಿ ಕರುನ್ ಚಾಳ್ವುತಲ್ಯಾ ಶಾರಾಕ್ನಿ ಸರ್ವೆಸ್ಪರ್ ಅಸೊ ಮನ್ತಾ. 5 ಮಾಜ್ಯಾ ದೆಶ್ಯಾಕ್ ತಾಬೆತ್ ಕರುನ್ಗೆವ್ನ್, ಸಗ್ಳ್ಯಾ ಮನಾನ್ ತಿರಸ್ಕಾರ್ ಕರುನ್, ಚೊರಿಕ್ ಡಕ್ಳುನ್ ಘಾಲುನ್ ಸೊಡ್ಲ್ಯಾರ್ಬಿ, ತೆಂಕಾ ಎದೊಮಾಚ್ಯಾಕ್ನಿ ಮಿಯಾ, ಹುರಲ್ಲ್ಯಾ ಲೊಕಾಕ್ನಿ ಲೈ ರಾಗಾನ್ ತಾಪುನ್ ಶರಾಪ್ ದಿಯ್ನಸ್ತಾನಾ ಸೊಡಿನಾ. 6 ಅಸೆ ರ್‍ಹಾತಾನಾ ಇಜ್ರಾಯೆಲ್ ದೆಶ್ಯಾಚ್ಯಾ ವಿಶಯಾಚಿ ದೆವಾಚಿ ಗೊಸ್ಟ್ ಹಿ, ತೆಜ್ಯಾ ಮಡ್ಡಿಯಾಕ್ನಿ, ಕೊಡ್ಲಾ, ಖಡ್ಡ್ಯಾಕ್ನಿ ಸಾಂಗುಚೆ ಮನುನ್ ಹುಕುಮ್ ಹೊಲಾ, ಸರ್ವೆಸ್ಪರ್ ಅಸೊ ಮನ್ತಾ, ಆಹಾ, ಮಿಯಾ ಲೈ ರಾಗಾನ್ ಅನಿ ರಾಗಾನ್ ಸಾಂಗ್ಲಾ, ತುಮಿ ದುಶ್ರ್ಯಾ ಲೊಕಾಂಚ್ಯಾಕ್ನಾ ಅವ್ಮಾನ್ ಅನ್ಬೊಗ್ ಕರ್ಲ್ಯಾಸಿ ನ್ಹಯ್! 7 ತಸೆ ಹೊವ್ನ್ ಸರ್ವೆಸ್ಪರ್ ಅಸೊ ಮನ್ತಾ, ತುಮ್ಚ್ಯಾ ಭೊತ್ಯಾನಿ ಹೊತ್ತಿ ತಿ ಲೊಕಾಚ್ ಅಪ್ನಾಂಚ್ಯಾ ವರ್‍ತಿ ಪಡಲ್ಲ್ಯಾ ಅವ್ಮಾನಾಕ್ ಅನ್ಭೊಗ್ ಕರ್‍ತಾತ್, ತೆ ಖರೆಚ್ ಹಾಯ್, ಮನುನ್ ಹಾತ್ ಉಕ್ಲುನ್ ಆನ್ ಘಾಲುನ್ ಸಾಂಗ್ತಾ. 8 ಇಜ್ರಾಯೆಲಾಚ್ಯಾ ಮಡ್ಡಿಯಾನೊ, ತುಮ್ಚಿ ಝಾಡಾ ಟಾಂಕಿಯಾ ಪಗ್ಳುನ್, ಮಾಜ್ಯಾ ಇಜ್ರಾಯೆಲ್ ಲೊಕಾಕ್ನಿ ಫಳ್ ದಿತಾತ್, ತೆಚಿ ಯೆನೆ ಜಗ್ಗೊಳ್ ಹಾಯ್. 9 ಅಬಕ್, ಮಿಯಾ ತುಮ್ಚ್ಯಾ ಪಕ್ಷಾಚೊ, ತುಮ್ಚ್ಯಾಕ್ಡೆ ಪರತ್ಲೊ, ತುಮ್ಚ್ಯಾಕ್ಡೆ ನಾಂಗರ್ತ್ಯಾಸಿ ಅನಿ ಪೆರ್ತ್ಯಾಸಿ ಬಿ ಹೊಯ್. 10 ತುಮ್ಚ್ಯಾಕ್ಡೆ ಲೈ ಲೊಕಾ ಮಟ್ಲ್ಯಾರ್, ಇಜ್ರಾಯೆಲ್ ಪಿಳ್ಗಿಚಿ ಸಗ್ಳಿ ಲೊಕಾ ವಸ್ತಿ ರಾಯ್ ಸಾರ್ಕೆ ಕರ್ತಾ, ಸಗ್ಳಿ ಶಾರಾ ಲೊಕಾನಿ ಭರುನ್ ರ್‍ಹಾತ್ಯಾತ್, ಪಾಡ್ ಪಡಲ್ಲ್ಯಾ ಜಾಗ್ಯಾ ವಯ್ನಾ ಮೊಟಿ ಮೊಟಿ ಘರಾ ಭಾಂದುನ್ ಹೊತಾತ್. 11 ತುಮ್ಚ್ಯಾಕ್ಡೆ ಲೈ ಲೊಕಾಕ್ನಿ ಅನಿ ಜನಾವರಾಕ್ನಿ ವಾಡ್ವಳ್ಕಿ ಕರ್ತಾ, ತೆನಿ ವಾಡುನ್ ಲೈ ಹೊತಾತ್, ಅದ್ದಿ ಹೊತ್ತ್ಯಾ ಸಾರ್ಕೆಚ್ ತುಮ್ಚ್ಯಾಕ್ಡೆ ಲೊಕಾಕ್ನಿ ಭರುನ್, ತುಮ್ಕಾ ಅದ್ದಿ ಹೊತ್ತ್ಯಾಕಿಂತಾಬಿ ಲೈ ಬರ್ಯಾ ಜಾಗ್ಯಾಕ್ ಹಾನ್ತಾ, ತನ್ನಾ ಮಿಯಾಚ್ ಸರ್ವೆಸ್ಪರ್ ಮನುನ್ ತುಮ್ಕಾ ಖರೆಚ್ ಕಳ್ತಾ. 12 ಮಡ್ಡಿಯಾಂಚ್ಯಾ ಜಾಗ್ಯಾ ಮಿಯಾ ತುಮ್ಚ್ಯಾಕ್ಡೆ ಲೊಕಾ ಫಿರಿ ಸಾರ್ಕೆ ಕರ್ತಾ, ಮಾಜ್ಯಾ ಇಜ್ರಾಯೆಲ್ ತುಜ್ಯಾಕ್ಡೆ ಲೊಕಾ ಫಿರುನ್ಗೆತ್ ತುಕಾ ಆಸ್ತಿ ಕರುನ್ಗೆತಾತ್, ತಿಯಾ ವಾಂಜ್ಡಿ ಹೊವ್ನ್ ನ್ಹಯ್. 13 ಸರ್ವೆಸ್ಪರ್ ಅಸೊ ಮನ್ತಾ, ತಿಯಾ ಮಾನ್ಸಾಕ್ನಿ ಖಾತಲೊ ಹೊವ್ನ್ ತುಜ್ಯಾ ಲೊಕಾಕ್ನಿ ವಾಂಜ್ಡೊ ತರಾಸ್ ದಿಲ್ಲೆ, ಮನುನ್ ತುಕಾ ಶರಾಪ್ತಾತ್ ನ್ಹಯ್. 14 ತಿಯಾ ಹೆಜ್ಯಾನ್ ಫಿಡೆ ಮಾನ್ಸಾಕ್ನಿ ಖೊತಲೊ ಹೊವ್ನ್ ರಾಯ್ ನ್ಹಯ್, ತುಜ್ಯಾ ಲೊಕಾಕ್ನಿ ಹೆಜ್ಯಾನ್ ಫಿಡೆ ಲೆಕಾಚೊ ತರಾಸ್ ದಿಯ್ ನ್ಹಯ್. 15 ತುಜ್ಯಾ ಕಾನಾಕ್ನಿ ಭಾಯ್ಲ್ಯಾ ದೆಶಾಚೆ ನಕ್ಕೊ ಮನ್ತಲಿ ಗೊಸ್ಟಿಯಾ ಆಯ್ಕಿನಾತ್, ತಿಯಾ ಲೊಕಾಂಚ್ಯಾಕ್ನಾ ಅನಿ ಪರ್‍ತುನ್ ಅವ್ಮಾನ್ ಕರುನ್ಗೆಯ್ ನ್ಹಯ್, ತಿಯಾ ಅನಿ ಪರ್‍ತುನ್ ತುಜಿ ಲೊಕಾ ಪಡುಕ್ ಕಾರನ್ ಹೊವ್ನ್ ರಾಯ್ ನ್ಹಯ್, ಹೆ ರಾಜಾ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್.

16 ಮಾಕಾ ಸರ್ವೆಸ್ಪರಾನ್ ಹಿ ಗೊಸ್ಟ್ ದಿಲ್ಯಾನ್, 17 ನರ್ ಮಾನ್ಸಾ, ಇಜ್ರಾಯೆಲ್ ಲೊಕಾ ಸ್ವತ್ಯಾಚ್ಯಾ ದೆಸಾತ್ ವಸ್ತಿ ರ್‍ಹಾತಾನಾ, ಅಪ್ನಾಚ್ಯಾ ಬುರ್ಸ್ಯಾ ವಾಟೆನಿ ಅನಿ ಬುರ್ಸ್ಯಾ ಕಾಮಾನಿ ತೆ ಬುರ್ಸೆ ಕರ್ಲ್ಯಾನಿ, ತೆಂಚಿ ಹಿ ಚಾಲ್ನುಕ್ ಭಾಯ್ರ್ ಹೊಲ್ಲಿಚೆ ಬುರ್ಶಿ ಪಾನಾ ಸಾರ್ಕೆ ಮಾಕಾ ಬುರ್ಸೆ ಹೊಲೆ. 18 ತೆನಿ ದೆಶಾಚ್ಯಾ ವರ್‍ತಿ ರಗಾತ್ ವೊತುನ್, ತೆಕಾ ಅಪ್ನಾಚ್ಯಾ ಮುರ್ತಿಯಾನಿ ಬುರ್ಸೆ ಕರಲ್ಲ್ಯಾ ಸಾಟ್ನಿ, ಮಿಯಾ ತೆಂಚ್ಯಾ ವರ್‍ತಿ ಮಾಜಿ ರಾಗಾಚಿ ಆಗ್ ವೊತ್ ತಾ. 19 ತೆಂಕಾ ಲೊಕಾಂಚ್ಯಾ ಮದ್ದಿ ಪಗ್ಳುನ್ ಘಾಲುನ್, ತೆಂಚ್ಯಾ ಬುರ್ಸ್ಯಾ ಕಾಮಾಕ್ನಿ ಅನಿ ಬುರ್ಸ್ಯಾ ಚಾಲ್ನುಕಿಕ್ ಸಮಾ ಶಿಕ್ಷ್ಯಾ ದಿತಾ. 20 ತೆನಿ ತ್ಯಾ ಲೊಕಾಚ್ಯಾಂತ್ನಿ ಮಿಳ್ಲ್ಯಾಮಾನಾ, ಒಹೊ, ಹೆನಿ ಸರ್ವೆಸ್ಪರಾಚಿ ಲೊಕಾ, ತೆಜ್ಯಾ ದೆಶ್ಯಾತ್ನಾ ಬುರ್ಸೆ ಹೊವ್ನ್ ಯೆಲಾತ್ ಮನುನ್ಗೆವ್ನ್, ಮಾಜ್ಯಾ ನಿತಳ್ ನಾವಾಕ್ ಅವ್ಮಾನ್ ಕರ್‍ತಾತ್. 21 ಇಜ್ರಾಯೆಲ್ ಲೊಕಾನಿ ಸಗ್ಳ್ಯಾ ಲೊಕಾಂಚ್ಯಾತ್ನಿ ಮಿಳುನ್ ಮಾಜ್ಯಾ ನಿತಳ್ ನಾವಾಕ್ ಅವ್ಮಾನ್ ಕರಲ್ಲ್ಯಾ ಸಾಟ್ನಿ ಮಿಯಾ ಮನಾತ್ ಲೈ ಬೆಜಾರ್ ಕರುನ್ಗೆಟ್ಲೊ. 22 ತಸೆ ಹೊವ್ನ್, ತಿಯಾ ಇಜ್ರಾಯೆಲ್ ಲೊಕಾಕ್ನಿ ಅಸೆ ಸಾಂಗ್, ಸರ್ವೆಸ್ಪರ್ ಅಸೊ ಮನ್ತಾ, ಇಜ್ರಾಯೆಲ್ ಲೊಕಾನೊ, ತುಮ್ಚ್ಯಾ ಸಾಟ್ನಿ ನ್ಹಯ್, ತುಮಿ ಲೊಕಾತ್ನಿ ಗುಸುನ್ ಬುರ್ಸೆಪಾನಾಕ್ ಗುರಿ ಕರಲ್ಲ್ಯಾ ಮಾಜ್ಯಾ ನಾವಾಚ್ಯಾ ಸಾಟ್ನಿಚ್, ಮಿಯಾ ಕಾಯ್ತರ್ಬಿ ಕರ್ತಾ. 23 ಲೊಕಾತ್ನಿ ಮರ್ಯಾದಿಕ್ ಗುರಿ ಹೊಲ್ಲ್ಯಾ ಮಟ್ಲ್ಯಾರ್, ತುಮಿ ಲೊಕಾತ್ನಿ ಮರ್ಯಾದಿಕ್ ಗುರಿ ಕರಲ್ಲ್ಯಾ ಮಾಜ್ಯಾ ಮೊಟ್ಟ್ಯಾ ನಾವಾಚಿ ಮಾನ್ ಮಿಯಾ ರಾಕುನ್ಗೆತಾ, ಅಸೆ ಮಿಯಾ ತೆಂಚ್ಯಾ ಡೊಳ್ಯಾಚ್ಯಾ ಇದ್ರಾಕ್ ತುಮ್ಕಾ ರಾಕ್ವನ್ ಕರ್‍ತಲ್ಯಾ ವಯ್ನಾ, ಮಿಯಾಚ್ ಸರ್ವೆಸ್ಪರ್ ಮನ್ತಲೆ ತೆಂಕಾ ಕಳ್ತಾ, ಹೆ ರಾಜಾ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್. 24 ಮಿಯಾ ತುಮ್ಕಾ ಲೊಕಾಚ್ಯಾಂಕ್ನಾ ಸೊಡ್ಸುನ್, ಸಗ್ಳ್ಯಾ ದೆಶಾಂತ್ನಾ ಗೊಳಾ ಕರುನ್, ಸ್ವತ್ಯಾಚ್ಯಾ ದೆಸಾಕ್ ಯೆಯ್ ಸಾರ್ಕೆ ಕರ್ತಾ. 25 ಮಿಯಾ ತುಮ್ಚ್ಯಾ ವರ್‍ತಿ ನಿತಳ್ ಪಾನಾಚೆ ಪಾನಿ ಸಿಪಡ್ತಾನಾ, ತುಮಿ ನಿತಳ್ ಹೊತ್ಯಾಸಿ, ತುಮ್ಚ್ಯಾ ಸಗ್ಳ್ಯಾ ಮುರ್ತಿಯಾಂಚ್ಯಾಕ್ನಾ ಅನಿ ಬುರ್ಸೆಪಾನಾಕ್ನಾ ತುಮ್ಕಾ ಶುದ್ದ್ ಕರ್ತಾ. 26 ಮಿಯಾ ತುಮ್ಕಾ ನ್ಹವ್ವೊ ಮನ್ ದಿವ್ನ್, ತುಮ್ಚ್ಯಾಕ್ಡೆ ನ್ಹವ್ವೊ ಆತ್ಮೊ ಉಪ್ಜಿಸಾರ್ಕೆ ಕರ್ತಾ. ತುಮ್ಚ್ಯಾಕ್ನಾ ಗುಂಡೊಹೊಲ್ಲೊ ಮನ್ ಕಾಡುನ್, ತುಮ್ಕಾ ಮ್ಹಂವ್ವ ಮನ್ ದಿತಾ. 27 ಮಾಜೊ ಆತ್ಮೊ ತುಮ್ಚ್ಯಾಕ್ಡೆ ರಾಯ್ ಸಾರ್ಕೆ ದಿವ್ನ್, ತುಮಿ ಮಾಜ್ಯಾ ನೆಮಾಂಚ್ಯಾ ಸಾರ್ಕೆ ಚಲಿ ಸಾರ್ಕೆ ಕರ್ತಾ, ತುಮಿ ಮಾಜ್ಯಾ ಹುಕುಮಾ ಮಾನುನ್ ಚಲ್ತ್ಯಾಸಿ. 28 ಮಿಯಾ ತುಮ್ಚ್ಯಾ ಪುರ್ವಜಾಕ್ನಿ ದಿಲ್ಲ್ಯಾ ದೆಸಾತ್ ತುಮಿ ವಸ್ತಿ ರ್‍ಹಾತ್ಯಾಸಿ. ಅನಿ ತುಮಿ ಮಾಜಿ ಲೊಕಾ ಹೊವ್ನ್ ರ್‍ಹಾತ್ಯಾಸಿ, ಮಿಯಾ ತುಮ್ಕಾ ದೆವ್ ಹೊವ್ನ್ ರ್‍ಹಾತಾ. 29 ಮಿಯಾ ತುಮ್ಕಾ ಸಗ್ಳ್ಯಾ ಬುರ್ಸ್ಯಾತ್ನಾ ಉದ್ದಾರ್ ಕರುನ್, ಪಿಕ್ ವಾಡುಂದಿತ್ ಮನುನ್ ಹುಕುಮ್ ದಿವ್ನ್, ತೆ ವಾಡ್ವುತಾ ಅನಿ ತುಮ್ಕಾ ಪರ್‍ತುನ್ ಬರ್‍ಗಾಲ್ ಯೆಯ್ನಾ ಸಾರ್ಕೆ ಕರ್ತಾ. 30 ತುಮಿ ಬರ್ಗಾಲಾತ್ಲೆ ಮನುನ್ ತುಮ್ಕಾ ಲೊಕಾನಿ ಚಾಳ್ವಿ ನಾ ಸಾರ್ಕೆ ಮಿಯಾ ಝಾಡಾಚಿ ಫಳ್ ಅನಿ ಸೆತಾಚೆ ಪಿಕ್ ವಾಡ್ವುತಾ. 31 ತನ್ನಾ ತುಮಿ ತುಮ್ಚಿ ಬುರ್ಶಿ ವಾಟಾ ಅನಿ ಬುರ್ಶಿ ಕಾಮಾ ಯಾದೆಕ್ ಹಾನುನ್ಗೆವ್ನ್, ತುಮ್ಚ್ಯಾ ಚುಕೆಂಚ್ಯಾ ಅನಿ ಬುರ್ಸ್ಯಾ ಕಾಮಾಂಚ್ಯಾ ವಯ್ನಾ, ತುಮ್ಚ್ಯಾ ವರ್‍ತಿ ತುಮ್ಕಾಚ್ ಬುರ್ಸೆ ದಿಸ್ತಾ.

32 ಸರ್ವೆಸ್ಪರ್ ಅಸೊ ಮನ್ತಾ, ಮಿಯಾ ಹೆ ರಾಕ್ವನಿಚೆ ಕಾಮ್ ತುಮ್ಚ್ಯಾ ಸಾಟ್ನಿ ಕರುಲಾಗುಕ್ನಾ ಮನ್ತಲೆ ತುಮ್ಕಾ ಕಳುನ್. ಇಜ್ರಾಯೆಲ್ ಲೊಕಾನೊ, ತುಮ್ಚ್ಯಾ ಬುರ್ಸ್ಯಾ ಚಾಲಿಯಾಕ್ನಿ ಮರ್ಯಾದ್ ಕರುನ್ಗೆವಾ ಅನಿ ಲಜ್ಜ್ಯಾ ಕರುನ್ಗೆವಾ. 33 ಸರ್ವೆಸ್ಪರ್ ಅಸೊ ಮನ್ತಾ, ಮಿಯಾ ತುಮ್ಕಾ ತುಮ್ಚ್ಯಾ ಸಗ್ಳ್ಯಾ ಚುಕೆಂತ್ನಾ ನಿತಳ್ ಕರ್‍ತಲ್ಯಾ ದಿಸಿ ಸಗ್ಳ್ಯಾ ಶಾರ್‍ಹಾತ್ನಿ ಲೊಕಾನಿ ಭರ್ತಾ. ಹಾಳ್ ಪಡಲ್ಲ್ಯಾ ಜಾಗ್ಯಾ ವೈನಿ ಮೊಟಿ ಮೊಟಿ ಘರಾ ಭಾಂದುನ್ ಹೊತಾತ್. 34 ದಾಟುನ್ ಜಾತಲ್ಯಾಂಚ್ಯಾ ಇದ್ರಾಕ್ ಪಾಡ್ ಪಡುನ್ ಡಂಗಳ್ ಹೊಲ್ಲ್ಯಾ ಜಿಮ್ನಿಕ್ ನಾಂಗರ್ತ್ಯಾಸಿ ಕರ್‍ತಾತ್. 35 ತನ್ನಾ ಲೊಕಾ, ಡಂಗಳ್ ಹೊಲ್ಲೆ ಹೆ ದೆಶ್ ಎದೆನ್ ಮ್ಹಳ್ಯಾ ಸಾರ್ಕೆ ಹೊಳ್ವುಲ್ಲಾ, ಪಡುನ್ ಜಾವ್ನ್ ಹಾಳ್ ಹೊಲ್ಲಿ ಶಾರಾ, ಮೊಟ್ಟ್ಯಾ ಮೊಟ್ಟ್ಯಾ ಘರಾನಿ ಭರುನ್, ಲೊಕಾನಿ ಭರುನ್ ಹಾಯ್ ನ್ಹಯ್ ಮನುಲ್ಲಾತ್. 36 ಮಿಯಾ ಸರ್ವೆಸ್ಪರಾನುಚ್ ಪಡುನ್ ಗೆಲ್ಲೆ ಭಾಂದುನ್, ಹಾಳ್ ಹೊಲ್ಲೆ ವಾಡ್ವುಲಾ ಮನುನ್ ತುಮ್ಚ್ಯಾ ಭೊತ್ಯಾನಿ ಹೊತ್ತ್ಯಾ ಲೊಕಾಕ್ನಿ ಕಳ್ತಾ, ಹೆ ಮಿಯಾ ಸರ್ವೆಸ್ಪರಾನುಚ್ ಸಾಂಗ್ಲಾ, ಅನಿ ಕರ್ತಾ.

37 ಸರ್ವೆಸ್ಪರ್ ಅಸೊ ಮನ್ತಾ, ಮಿಯಾ ಅನಿ ಎಕ್ ವಿಶಯಾತ್, ಇಜ್ರಾಯೆಲಾಂಚಿ ಮಾಗ್ನಿ ಆಯ್ಕುನ್ ಜವಾಬ್ ದಿತಾ, ಮಟ್ಲ್ಯಾರ್ ತೆಂಚೆ ಅಂಕೆ ಬಕ್ರ್ಯಾಚ್ಯಾ ಹಿಂಡಾ ಸಾರ್ಕೆ ಕರುನ್ ವಾಡ್ವುತಾ. 38 ಎಚುನ್ ಥವಲ್ಲ್ಯಾ ತಾಂಡ್ಯಾ ಸಾರ್ಕೆ ಅನಿ ಸನಾತ್ನಿ ಜರುಜಲೆಮಾಕ್ ಎವ್ನ್ ಮಿಳ್ತಲ್ಯಾ ತಾಂಡ್ಯಾಚಿ ಲೊಕಾ ಹಾಳ್ ಪಡಲ್ಲ್ಯಾ ಶಾರ್‍ಹಾತ್ನಿ ತಾಂಡೆ ಹೊವ್ನ್ ಗೊಳಾ ಹೊತಾತ್, ತನ್ನಾ ಮಿಯಾಚ್ ಸರ್ವೆಸ್ಪರ್ ಮನುನ್ ತೆಂಕಾ ಕಳ್ತಾ.