1 Ni aatɔkɔ mi alɛ, "Otii obi, takafayila di nkpaa lɛfɔ suoto ninkakatɛko fɔ." 2 Aatɔɔkakatɛko mi ni yi, Ninwuna nwu labuo mi kaamɛ aabatakatɛ mi aase di nkpaa nii suoto, ni lanu nwɔ aatɔɔkakatɛko mi nɛ.

3 Aatɔkɔ mi alɛ: "Otii obi, kokpee fɔ Israel batii ɔkyɛ, di batokopĩtɛ kale ka nintɔɔtaka bayɛ mi ni di suoto nfũ; mma ku bate lɛma lɛtaka bayɛ mi di suoto diɛbadu miɛ dii le mmle. 4 Batii ba ɔkyɛ kokpee fɔ ni nle batii ba ninambu ni lɛsaa, bakpe ni kafɔɔ onunsie. Laatɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ.’ 5 Bɛɛkyɔɔ atoko woo, beesĩ woo- diekye batokopĩtɛ bale- babatofo alɛ ɔlaabuɛtɛtɛ owo ntodiwɛ ma kaamɛ. 6 Kafɔɔ, otii obi, tanyɛkɛ ma ee faayɛkɛ sɛlaa lɛma. Tanyɛkɛ, kuntɛ akuna ku siwuu simuu lɛmana fɔ siekyi, fasi kafɔɔ di nkpakana kamɛ. Tanyɛkɛ sɛlaa se boobuɛ nii ee baakpee fɔ difu, nu di batokopĩtɛ batii bale. 7 Dikpeni feebuɛ sɛlaa nii fɛɛta ma, bɛɛkyɔɔ atoko woo, beesĩ woo, diekye batokopĩtɛ bale. 8 Kafɔɔ afɔ yi, otii obi, kyɔɔ atoko di ɔlaa wɔ kɔtɔkɔ fɔ ni. Tambla otokopĩ fɛle batokopĩtɛ nwu; bɛ kanya lɛfɔ faale lɛsaa le kɔta fɔ ni."

9 Ninfɛ lanyu nɛ, ni lanya kɔnɛɛ lananfi kuakyɔɔ mi nɛ. Kukũ kunwii lasiɛ di kɔnɛɛ nwu kamɛ, 10 ni aafukuti kũ di anu nii nɛ. Baakpana sikunu ku kaku owi ku dibuo sɛlaa baatika di nkyɛ nwu nnyɔ suoto.