1 Mikã me atsue, ndukilɔnrɔ̃;

minɔ nnɛgbe mi nɖebi dzoroa.

Fiɛ maaɣe me ne, Bosate ɔɔkpere me,

ta kayiri ame ne ɔ̃ɔkpere wũ iyere.

2 Ɔbara wũ kanya sɔ kase lɛ ipɛmi nɛ mba ɔbe.

Ɔkɔla me i ɔ̃ kɔrɔ̃ ame.

Ɔbara me lɛ sirɛ̃ pɔlɔpɔlɔa

fiɛ ɔkɔla me i mirɛ̃koto ame.

3 Ɔɣere me sɔ, "Wũ ɔɖabo aɖe,

i Israel, nwɔ iso loɖi wũ kuwarɛ lote."

4 Ɣɛɛ loɣɛ sɔ, "Loɔbara karabara kusia na.

lobara wũ ɔle ɔkpɛ siefe kere iɖe fiɛ kuira iibɔrɛ i kame.

Ɣɛɛ nnɛ nɖe wũ ɔkpɛ pia i Bosate kɔrɔ̃ ame.

Wũ kuso pia i wũ Ɣaa kɔrɛ."

5 Kiniɔ ne Bosate sɔ -

ɔ̃, nwɔ lobara me i kayiri ame sɔ loɖe ɔ̃ ɔɖabo

si lokɔ Yakob lokpesegu lobɔ wũ

si lokɔ Israel maturi ma losame lobɔ wũ.

Alasɔ loba kuwarɛ i Bosate anɔmi ame

fiɛ Bosate nɖe wũ ɔle.

6 Ɔto ɔɣɛ sɔ, "Ira tɛmi iɖe sɔ aaɖe wũ ɔɖabo

aledza Yakob kumele isɛra

akɔ mma loɔmɔɛ̃ lola i Israel abɔ.

Loatã aɖe ɔtɔ atã maɣɔsɔrɛse,

sɔ aabɔ wũ iɖi atã karɔ̃ ɔɖuɖu iso."

7 Bosate, Israel Ɖidze

gu Ɔsekelea to ɔɣɛ sɔ,

nwɔ manyɔ pupurii, ɔturi wɔ kaɖe ɔtsiri,

nwɔ nɖe maɖeisoi ɔɖabo sɔ,

"Magara to maanya-ɔ fiɛ maata maya

fiɛ magaramabi to maanya mabɔ ati karɔ̃,

ala Bosate, nwɔ nɖe ɔnukuarese,

Israel Ɔsekelea, nwɔ loɖi-ɔ ɔso."

8 Bosate sɔ,

"Ɔwi wɔ loanyɔ-ɔ nnya ne, lotɔrã-ɔ.

Iyi nɛ loɖi-ɔ ne loabuai-ɔ.

Lonyɔ-ɔ iso fiɛ loki i fɔ iso

lokã ndamu lotã maturi,

si loasɛra karɔ̃

si aaledza kaɖekɔ̃ ga loɔkpese ikpakpi iɣɛ.

9 Ɣere mayorɛdze sɔ, 'Mibɔrɛ miba,'

Ɣere mma i idududu ame sɔ, 'Mina isɛguso!'

"Mato maaɖe ara i siri kuruɛ

fiɛ maanya sikuakaɖekɔ̃ i abemi ɔɖuɖu wa kuira na iso.

10 Kukã ɣee kutukã iisibakpɛ̃ ma,

fiɛ fafuĩ ame ɔwiri wɔ mba, ɔtɔwiri oo kuɣɛ̃ kerebee oo iibaɖe ma.

Ɔ̃ wɔ nsɛ ɔnyɔ ma nnya aaɖe ma katɔ̃

ɔkɔ ma ɔkɛlɛgu ndu kagodɛkɔ̃.

11 Siri aaki i wũ abe ɔɖuɖu iso,

fiɛ loaledza wũ siri siare ibara.

12 Nyɔ lo, maturi to maase i kadzorokɔ̃ maba -

mawɛ̃ to maabɔrɛ i kato, mawɛ̃ aabɔrɛ i kuɣɛ̃iyokabokɔ̃,

fiɛ mawɛ̃ aabɔrɛ i Aswan*49.12 Aswan: Ne ame nɖe Sinim ne. ibuiti ame.

13 Kato i kuɖokpo, mila kulu ku isoɣɔ!

Karɔ̃, lɛlɛ!

Abe, mika kuka ku kulu!

Alasɔ Bosate sɛ ɔpia ɔ̃ maturi kɔrɔ̃ i kayiri

fiɛ ɔto ɔ̃anyɔ ɔ̃ maturi ma nto mawe anyɛ nnya.

14 Ɣɛɛ Zion ɔɣɛ sɔ, "Bosate ɔnyua me ɔsɛ,

Sate ɔɔɣara me."

15 "Ɔrɔ̃go aaɣara ɔ̃ ɔbi wɔ nto ɔmeme

fiɛ ɔ̃ibanyɔ ɔbi wɔ ɔ̃ mɔmɔ ɔɣe nnya ɣɛɛ?

Atoasɔ ɔ̃aɣara ne,

Mme loibaɣara mi!

16 Nyɔ lo, loɔtsɛrɛ fɔ iyere losia i wũ kɔrɔ̃tata iso,

fɔ abere se i wũ anɔmi ame ɖaa.

17 Fɔ mabibirɛrɛĩ sɛ mapɛ siwa makpese maba,

fiɛ mma lowɔra-ɔ, ɔɔtu i fɔ ame makpa.

18 Kɔlɛ fɔ anɔ kato nyɔ ara kilɔ si anya.

Fɔ mabi ɔɖuɖu ɔsikanya mato maba fɔ kɔrɛ.

Bosate sɔ, "Ayi kumɛgɔ i lopia ngbã ne,

aapia ma ɔɖuɖu lɛ akɛrɛra awe;

aapia ma lɛ ɔrɔ̃go wɔ nto makɔ awe.

19 "Atoasɔ mawɔra-ɔ fiɛ mabibiɛ-ɔ

manina fɔ karɔ̃ ne,

kiniɔ ne kato kaayigu maturi,

fiɛ mma lonina kã to maakɛlɛ kadzorokɔ̃.

20 Fɔ mabi ma aɣe i fɔ kafɔrɔ̃ ikɛlɛ ame

to maakpese maba maaɣɛ sɔ,

'Kakɔi gagbe iimɔ katã bo;

tã bo karɔ̃ bua si bosɛ.'

21 Iyɔ aato aaɣɛ i fɔ ɔtu ame sɔ,

'Nna lotã me mabi magbe?

Wũ mabi gbodzoo ɔkpi fiɛ loisibaɣe ɔbi;

fiɛ masore mawɛ̃ makɛlɛgu kafɔrɔ̃ iso fiɛ masa me maɖi.

Nna lonyɔ mabi magbe iso?

Lokamu i ngbe wũ ɔnɔwɛ̃,

ɣɛɛ mmagbe ne - lɛ mabɔrɛ?' "

22 Bosate Wɔ Nsiguso sɔ,

"Nyɔ lo, nto lokpa maɣɔsɔrɛdze kɔrɔ̃,

loakɔlɛ wũ kameleɖukui kato lotã ma.

Iyɔ mato maasu mi mabibirɛrɛĩ mabɔ i ma nrɔɔ̃ ame

fiɛ maasore mi mabibirɔ̃gomi i ilio mabɔ.

23 Magara to maakpese makɔse matã fɔ mabi,

fiɛ ma magararɔ̃go aatã fɔ mabi anyɛ mameme.

Mato maabɔitikarɔ̃ fiɛ makɔlɛ anɔ mafu i karɔ̃ i fɔ anɔmi ame.

Mato maaɣa ɔsebu i fɔ ngba iso.

Iyɔ ne miatsue sɔ Mme nɖe Bosate.

Mma losu ɔriinyɔ mapia i wũ ame iibaɖe kunuarɛ."

24 Si kpãrɛrɛĩ ɔmɔɛ̃ ara ne maawo ɔfɔ wã i ɔ̃ nrɔɔ̃ ame?

Ɣee si ɔtilese ɔmɔɛ̃ maturi ɔpia i sisande ame ne, maawo ma ɔfɔ ɔpia ngbã?

25 Ɣɛɛ Bosate ɔtã mmuai sɔ,

"Aĩ, maafɔ masande i kpãrɛrɛĩ nrɔɔ̃ ame,

fiɛ maafɔ kakpãramɔɛã mabɔrɛgu i ɔtilese nrɔɔ̃ ame.

Loakpɛ̃gu mma nto makpɛ̃gu-ɔ,

fiɛ loaɖi fɔ mabi.

26 Loatã mma nto mawedza-ɔ anyɛ ɔɖe ma mɔmɔ sina.

Mato maanɛ ma mɔmɔ ima marɛ̃ lɛ wain manɛ awe.

Iyɔ maturi awune ɔɖuɖu aatsue

sɔ Mme, Bosate ne, Mme nɖe fɔ Ɖidze,

fɔ Didze, Yakob Ɔlesatere."