1 ମୁଲେବାନ୍‌ ପର୍‌ମେସର୍ କିତଂହିନି ଆରି ମଚ୍‌ପୁର୍‌ ତିଆର୍‌ ଡିଂକେ । 2 ମଚ୍‌ପୁର୍‌ନେ ଆତେନ୍‌ ବେଲା ରୁପ୍‌ ଆଲେଃଗେ ଆରି ମେଃଡିଗ୍‌ ଆଲେଃଗେ, ଆରି ସ୍ରି ଣ୍ଡିଆଃ ଆଡ଼ାତ୍ରା ତାଙ୍ଗ୍‌କିଗ୍‌ ଲେଃଗେ; ବାରି ପର୍‌ମେସର୍‌ନେ ଆତ୍ମା ଣ୍ଡିଆଃ ଆଡ଼ାତ୍ରା ପୁଏକୁର୍‌ ଲେଃଗେ । 3 ଏନ୍‌ଇଡ଼ିଂ ପର୍‌ମେସର୍‌ ବାସଙ୍ଗ୍‌କେ, "ତାର୍କିଗ୍‌ଲେଃ," ଆତ୍‌ବା ତାର୍କିଗ୍‌କେ । 4 ଆରି ପର୍‌ମେସର୍‌ ତାର୍କିଗ୍‌କେ କେକେ ଜେ, ଆତେନ୍‌ ନିମାଣ୍ଡାଃ; ତେସାଃ ପର୍‌ମେସର୍‌ ତାଙ୍ଗ୍‌କିଗ୍‌ବାନ୍‌ ତାର୍କିଗ୍‌କେ ଅଲ୍‌ଗା ଆଃଡିଂକେ । 5 ବାରି ପର୍‌ମେସର୍‌ ତାର୍‌କିଗ୍‌ନେ ମ୍ନି ସ୍ମି ଆରି ତାଙ୍ଗ୍‌କିଗ୍‌ନେ ମ୍ନି ମିଡିଗ୍‌ ବିଃକେ । ତେସାଃ ଲମ୍‌ଡିଗ୍‌ ଆରି ତାରାଃଚେଃ ପର୍‌ତୁମ୍‌ ଦିନ୍‌ ଡିଂକେ ।

6 ଏନ୍‌ଇଡ଼ିଂ ପର୍‌ମେସର୍‌ ବାସଙ୍ଗ୍‌କେ, "ଣ୍ଡିଆଃ ବିତ୍ରେ ମେଃଡିଗ୍‌ ମାଲେଚେ ଣ୍ଡିଆଃକେ ମ୍ୱାର୍‌ ବାଗ୍‌ରେ ବିନ୍‌ ଆଡିଙ୍ଗ୍‌ଲେ ।" 7 ଦେକ୍‌ରକମ୍‌ ପର୍‌ମେସର୍ ଶୂନ୍ୟ ତିଆର୍‌ ଡିଙ୍ଗ୍‌ଚେ ଶୂନ୍ୟନେ ଆଡ଼ାତ୍ରା ଲେଃକ୍ନେ ଣ୍ଡିଆବାନ୍‌ ଶୂନ୍ୟନେ ଆଲ ଲେଃକ୍ନେ ଣ୍ଡିଆକେ ଅଲ୍‌ଗା ଆଡିଙ୍ଗ୍‌କେ; ତେଲା ଦେତ୍‌ରକମ୍‌ ଡିଂକେ । 8 ଆରି ପର୍‌ମେସର୍ ଆତେନ୍‌ ଶୂନ୍ୟନେ ମ୍ନି କିତଂହିନି ବିଃକେ । ବାରି, ଲମ୍‌ଡିଗ୍‌ ଆରି ତାରାଃଚେ ଦୁତିୟ ଦିନ୍‌ ଡିଂକେ ।

9 ଆରି ପର୍‌ମେସର୍‌ ବାସଙ୍ଗ୍‌କେ, କିତଂହିନିନେ ଆଲ ଲେଃକ୍ନେ ସାପା ଣ୍ଡିଆ ମୁଇଂ ଡାଗ୍ରା ରିସିଙ୍ଗ୍‌ଲେ ଆରି ତୁବଃ ତିଆର୍‌ ଡିଙ୍ଗ୍‌ଲେ; ତେଲା ଦେତ୍‌ରକମ୍‌ ଡିଂକେ । 10 ବାରି ପର୍‌ମେସର୍‌ ତୁବନେ ମ୍ନି ମଚ୍‌ପୁର୍‌ ଆରି ଣ୍ଡିଆ ରାସିନେ ମ୍ନି କେଣ୍ଡିଆ ବିଃକେ; ଆରି ପର୍‌ମେସର୍‌ ଆତେନ୍‌ ନିମାଣ୍ଡା କେକେ । 11 ଏନ୍‌ଇଡ଼ିଂ ପର୍‌ମେସର୍‌ ବାସଙ୍ଗ୍‌କେ, "ମଚ୍‌ପୁର୍‌ ଚେଃମୁଆଁ ଆରି ମନ୍‌କେ ମ୍ବ୍ରନେ ଆଁମାଃ ଆରି ବିଅନ୍‌ ନିଜର୍‌ ନିଜର୍‌ ଜାତି ଅନୁସାରେ ଚୁଚୁ ସାଃନେ ଚୁଚୁ ସ୍ଲାଃ ତୁବଃ ଆଡ଼ାତ୍ରା ତିଆର୍‌ ଡିଙ୍ଗ୍‌ଲେ," ତେଲା ଦେତ୍‌ରକମ୍‌ ଡିଂକେ । 12 ଡାଗ୍‌ଲା, ମଚ୍‌ପୁର୍‌ ଚେଃମୁଆଁ ଆରି ନିଜର୍‌ ନିଜର୍‌ ଜାତି ଅନୁସାରେ ମୁଞ୍ଜି ସାଃନେ ଆଁମାଃ ଆରି ନିଜର୍‌ ନିଜର୍‌ ଜାତି ଅନୁସାରେ ମୁଞ୍ଜି ବିଃନେ ଚୁଚୁ ସ୍ଲାଃ ତିଆର୍‌ ଡିଂକେ; ବାରି ପର୍‌ମେସର୍‌ ଆତେନ୍‌ ନିମାଣ୍ଡାଃ କେକେ । 13 ଆତ୍‌ବାନ୍‌ ଲମ୍‌ଡିଗ୍‌ ବାରି ତାରାଃଚେ ତୁର୍ତିୟ ଦିନ୍‌ ଡିଂକେ ।

14 ଆରି ପର୍‌ମେସର୍‌ ବାସଙ୍ଗ୍‌କେ, ମିଣ୍ଡିଗ୍‌ବାନ୍‌ ସ୍ମିକେ ବିନେ ଆଡିଂନେ ନ୍‌ସା କିତଂହିନିନ୍ୟା ତାର୍କିଗ୍‌ଇଂ ତିଆର୍‌ ଡିଂଆର୍‌ଲେ; ବାରି ଆତେନ୍‌ ସାପା ଚିନ୍‌, ରୁତୁ, ସ୍ମି ଆରି ମୁଆଁ‌ନେ ଚିନ୍‌ ଡିଂଲେ । 15 ଆରି ମଚ୍‌ପୁର୍‌ନ୍ୟା ତାର୍କିଗ୍‌ ବିଃନେ ନ୍‌ସା କିତଂହିନିନ୍ୟା ଆତେନ୍‌ ତାର୍କିଗ୍‌ଇଂ ଲେଃଆର୍‌ଲେ; ତେଲା ଦେତ୍‌ରକମ୍‌ ଡିଂକେ । 16 ଦେକ୍‌ରକମ୍‌ ପର୍‌ମେସର୍‌ ସ୍ମି ସାସନ୍‌ ଡିଂନ୍‌ସା ମୁଇଂ ମ୍ନା ତାର୍କିଗ୍‌ ଆରି ମିଣ୍ଡିଗ୍‌ ସାସନ୍‌ ଡିଂନ୍‌ସା ମେଁବାନ୍‌ ଡାଆଁ ମୁଇଂ ତାର୍କିଗ୍‌ ଆଃରେକେ, ଆରି ଡିଗ୍‌ ଚାଙ୍କୁଆଇଂ ତିଆର୍‌ ଡିଂକେ । 17 ତେସାଃ ମଚ୍‌ପୁର୍‌ନ୍ୟା ତାର୍‌କିଗ୍‌ ବିଃ ନ୍‌ସା ଆରି ସ୍ମି ଆରି ମିଡିଗ୍‌ ଆଡ଼ାତ୍ରା ସାସନ୍‌ ଡିଂନ୍‌ସାଃ, 18 ଆରି ତାର୍‌କିଗ୍‌କେ ତାଙ୍ଗ୍‌କିଗ୍‌ବାନ୍‌ ବିନେ ଆଡିଙ୍ଗ୍‌ ନ୍‌ସା, ପର୍‌ମେସର୍‌ କିତଂଇନିନ୍ୟା ଆତେନ୍‌ ତାର୍କିଗ୍‌ଇଂ ତିଆର୍‌ ଡିଂକେ; ଆରି ପର୍‌ମେସର୍‌ ଆକେନ୍‌ ସାପା ନିମାଣ୍ଡା କେକେ । 19 ଆତ୍‌ବାନ୍‌ ମିଣ୍ଡିଗ୍‌ ଆରି ଞ୍ଜିର୍‌ ଡିଂଚେ ଅଁ ଦିନ୍‌ ଡିଂକେ ।

20 ଏନ୍‌ଇଡ଼ିଙ୍ଗ୍‌ ପର୍‌ମେସର୍‌ ବାସଙ୍ଗ୍‌କେ, ଣ୍ଡିଆନ୍ୟା ବାସା ଲେଃଆର୍‌କ୍ନେ ପ୍ରାନିଇଂ ସାପା ଜାବର୍‌ ବାବ୍‌ରେ ଡିଂଆର୍‌ଲେ ଆରି ମଚ୍‌ପୁର୍‌ ଆଡ଼ାତ୍ରା କିତଙ୍ଗ୍‌ହିନିନ୍ୟା ପ୍ଲିଗ୍‌ଇଂ ୱାଲେଃଆର୍‌ଲେ । 21 ଆରି ପର୍‌ମେସର୍‌ ମ୍ନା ଆଃଡ଼ ସାପା ଆରି ନିଜର୍‌ ନିଜର୍‌ ଜାତି ଅନୁସାରେ ଜାବର୍‌ ବାବ୍‌ରେ କେଣ୍ଡିଆଃନ୍ନିଆ ଲେଃମ୍ୟାଃକ୍ନେ ପ୍ରାନିଇଂ ଆରି ନିଜର୍‌ ନିଜର୍‌ ଜାତି ଅନୁସାରେ ପ୍ଲିଗ୍‌ଇଂନେ ତିଆର୍‌ ଡିଂକେ । ପର୍‌ମେସର୍‌ ଏନ୍‌ ସାପା ନିମାଣ୍ଡା କେକେ । 22 ବାରି ପର୍‌ମେସର୍‌ ଆମେଇଂକେ ଆସିର୍ବାଦ୍‌ ଡିଂଚେ ବାସଙ୍ଗ୍‌କେ, "ଜାତିକୁଟୁମ୍‌ ଆରି ଜାବର୍‌ ବଂସ ଡିଂଚେ କେଣ୍ଡିଆନେ ଣ୍ଡିଆ ପୁରୁନ୍‌ ଡିଂପା, ଆରି ମଚ୍‌ପୁର୍‌ନ୍ୟା ପ୍ଲିଗ୍‌ଇଂ ଗୁଲୁଏ ମାନ୍ଦା ଡିଂଆର୍‌ଲେ ।" 23 ଆତ୍‌ବାନ୍‌ ମିଣ୍ଡିଗ୍‌ ଆରି ଞ୍ଜିର୍‌ ଡିଂଚେ ମାଲ୍‌ସି ଡିଂକେ ।

24 ଏନ୍‌ଇଡ଼ିଙ୍ଗ୍‌ ପର୍‌ମେସର୍‌ ବାସଙ୍ଗ୍‌କେ, "ନିଜର୍‌ ନିଜର୍‌ ଜାତି ଅନୁସାରେ ପ୍ରାନିଇଂ ଡାଗ୍‌ଲା ଡୁଆନେ ପସୁ ଆରି ରେଃସ ଅଲେଙ୍ଗ୍‌ନେ ଜନ୍ତୁ ଆରି ନିଜେ ନିଜେନେ ଜାତି ଅନୁସାରେ ଦର୍‌ତନିନ୍ୟା କଣ୍ଡାନେ ପସୁଇଂ ତିଆର୍‌ ଡିଙ୍ଗ୍‌ଆର୍‌ଲେ"; ତେଲା ଦେତ୍‌ରକମ୍‌ ଡିଂକେ । 25 ଦେକ୍‌ରକମ୍ ପର୍‌ମେସର୍ ନିଜର୍‌ ନିଜର୍‌ ଜାତି ଅନୁସାରେ କଣ୍ଡା ପସୁଇଂ ଆରି ନିଜର୍‌ ନିଜର୍‌ ଜାତି ଅନୁସାରେ ଡୁଆନେ ପସୁଇଂ ଆରି ନିଜର୍‌ ନିଜର୍‌ ଜାତି ଅନୁସାରେ ସାପା ତୁବନ୍ୟା ଅଲେଙ୍ଗ୍‌ନେ ଗଲେନେ ପସୁ ତିଆର୍‌ ଡିଂକେ; ଆରି ପର୍‌ମେସର୍‌ ଆତେନ୍‌ ସାପା ନିମାଣ୍ଡା କେକେ ।

26 ଏନ୍‌ଇଡ଼ିଙ୍ଗ୍‌ ପର୍‌ମେସର୍‌ ବାସଙ୍ଗ୍‌କେ, "ନିଂ ନିଜର୍‌ ରୁପ୍ ଆରି ନିଜର୍‌ ରକମ୍‌ ରେମୁଆଁ ଆଃରେଏ । ମେଇଂ ଣ୍ଡିଆନ୍ୟା ଲେଃନେ ଆଃଡ଼ ଆରି ବିନ୍‌ ବିନ୍‌ ରକମ୍‌ନେ ପ୍ଲିଗ୍‌ଇଂ ଆରି ପସୁଇଂ ଆରି ସାପା ମଚ୍‌ପୁର୍‌ ଆରି ତୁବନ୍ୟା ଅଲେଙ୍ଗ୍‌ନେ ସାପା ଗଲେନେ ପସୁ ଆଡ଼ାତ୍ରା ସାସନ୍‌ ଡିଂଆର୍‌ଏ ।" 27 ଏନ୍‌ଇଡ଼ିଂ ପର୍‌ମେସର୍‌ ନିଜର୍ ମୁର୍ତିରେ ରେମୁଆଁକେ ଆଃରେକେ; ପର୍‌ମେସର୍‌ନେ ରୁପ୍ ରକମ୍‌ ମେଁ ଆମେକେ ଆଃରେକେ; ଙ୍ଗିର୍‌ବୁଏଃ ଆରି ସେଲାମ୍ବୁଏଃ ଆଃଡିଂଚେ ମେଁ ଆମେଇଂକେ ଆଃରେକେ । 28 ଆରି ପର୍‌ମେସର୍‌ ଆମେଇଂକେ ଆସିର୍ବାଦ୍‌ ଡିଂକେ; ବାରି ପର୍‌ମେସର୍‌ ଆମେଇଂକେ ବାସଙ୍ଗ୍‌କେ, "ଜାତିକୁଟୁମ୍‌ ଆରି ଜାବର୍‌ ବଂସ ଡିଙ୍ଗ୍‌ପା, ବାରି ମଚ୍‌ପୁର୍‌କେ ପୁରୁନ୍‌ ଆଃଡିଂଚେ ସାସନ୍‌ ଡିଙ୍ଗ୍‌ପା, ଆରି ଣ୍ଡିଆନ୍ୟା ଲେଃକ୍ନେ ଆଃଡ଼ ଆରି କିତଂନେ ପ୍ଲିଗ୍‌ଇଂ ଆରି ତୁବଃନ୍ୟା ଗଲେଃ ଅଲେଙ୍ଗ୍‌ନେ ପସୁଇଂ ଆଡ଼ାତ୍ରା ସାସନ୍‌ ଡିଂପା ।" 29 ପର୍‌ମେସର୍‌ ଆରି ବାସଙ୍ଗ୍‌କେ, "କେଲା, ନେଙ୍ଗ୍‌ ତୁବଃନ୍ୟା ଲେଃକ୍ନେ ସାପା ମନ୍‌କେ ମ୍ବ୍ରନେ ଆଁମାଃ ଆରି ସାପା ମନ୍‌କେ ମ୍ବ୍ରନେ ଚୁଚୁ ବିଃନେ ସ୍ଲାଃ ଆପେକେ ମ୍ବିଃଗେ, ଆତେନ୍‌ ପେଇଂନେ କାଦି ଡିଂଏ । 30 ବାରି, ମଚ୍‌ପୁର୍‌ନେ ସାପା ପସୁ ଆରି କିତଂ ଆଡ଼ାତ୍ରା ୱାଲେଃନେ ପ୍ଲିଗ୍‌ଇଂ ଆରି ତୁବଃଡାଗ୍ରା ଗଲେଃ ଅଲେଙ୍ଗ୍‌ନେ ଜନ୍ତୁ, ଏନ୍‌ ସାପା ପ୍ରାନିନେ କାଦି ନ୍‌ସାଃ ନିଂ ସାପା ଚେଃମୁଆଁ ଜିନିସ୍‌ ମ୍ବିଃକେ"; ତେଲା ଦେତ୍‌ରକମ୍‌ ଡିଙ୍ଗ୍‌କେ । 31 ପର୍‌ମେସର୍‌ ନିଜେନେ ତିଆର୍‌ ଡିଙ୍ଗ୍‌କ୍ନେ ସାପା ଜିନିସ୍‌ ଆଡ଼ାତ୍ରା କେକେ, ଆରି କେଲା, ସାପା ଜାବର୍‌ ନିମାଣ୍ଡା । ଆତ୍‌ବାନ୍‌ ଲମ୍‌ଡିଗ୍‌ ଆରି ଞ୍ଜିର୍‌ ଡିଂଚେଃ ତୁର୍‌ ଦିନ୍‌ ଡିଂକେ ।