ଆଦି 3

ରେମୁଆଁନେ ସାମୁଆଁ ଅମାନି

1 ମାପ୍‌ରୁ ପର୍‌ମେସର୍‌ନେ ଆଃରେକ୍ନେ ତୁବଃଅରିଆ ଅଲେଙ୍ଗ୍‌ନେ ପସୁଇଂନେ ବିତ୍ରେ ବୁବ ସାପାବାନ୍‌ ଚାଲାକି ଲେଃଗେ । ମେଃସୁଆ ତେନ୍‌ ବୁବଃ ସେଲାମ୍ବୁଏଃକେ ସାଲ୍ୟାଃକୁକେ, ଅ ସେଲାମ୍ବୁଏଃ,ଏନ୍‌ ମେଃନେ ସତ୍, ଡୁଗ୍‌ଡିନେ ମେଃଡିଗ୍‌ ସ୍ଲାଃନେ ଚୁଚୁ ଚୁଚଙ୍ଗ୍‌ ନ୍‌ସା ପର୍‌ମେସର୍‌ ଆପେକେ ମନା ଡିଂବକେ ?

2 ସେଲାମ୍ବୁଏଃ ବୁବଃକେ ବାସଙ୍ଗ୍‌କେ, ନେ ଡୁଗ୍‌ଡିନେ ସାପା ସ୍ଲାଃନେ ଚୁଚୁ ଚଙ୍ଗ୍‌ ନେୟାଏ; 3 ମାତର୍‌ ଡୁଗ୍‌ଡିନେ ମଜେ ଲେଃକ୍ନେ ସ୍ଲାଃନେ ଚୁଚୁ ବିସଏରେ ପର୍‌ମେସର୍‌ ବାସଙ୍ଗ୍‌ବକେ, ପେଇଂ ଆତେନ୍‌ ପେଚଙ୍ଗ୍‌ ଣ୍ଡୁ କି ପେଲିଗ୍‌ ଣ୍ଡୁ, ଆତେନ୍‌ ପେଡିଙ୍ଗ୍‌ଲା ପେଗୁଏଃଏ ।

4 ବୁବଃ ସେଲାମ୍ବୁଏଃକେ ବାସଙ୍ଗ୍‌କେ, ପେ ମେଃଡିଗ୍‌ ବାବ୍‌ରେ ପେଗୁଏଃ ଣ୍ଡୁ; 5 ମେଃଡାଗ୍‌ଲା ପର୍‌ମେସର୍‌ ମ୍ୟାଲେଃକେ ଜେ, ପେଇଂ ଅଃନା ଆତେନ୍‌ ପେଚଙ୍ଗ୍ଏ, ଆତେନ୍‌ ଦିନ୍‌ ପେଇଂନେ ମ୍ମୁଆଁ ତ୍ନାଏ । ତେଲା ପେଇଂ ପର୍‌ମେସର୍‌ନେ ରକମ୍‌ ନିମାଣ୍ଡା ଆରି କରାପ୍‌ନେ ଗ୍ୟାନ୍‌ ପେବାଏ ।

6 ଆତେନ୍‌ ସେଲାମ୍ବୁଏଃ କେକେ ଜେ, ଆତେନ୍‌ ସ୍ଲାଃ କେନ୍‌ସା ସୁନ୍ଦର୍‌ ବାରି ଚଙ୍ଗ୍‌ ନ୍‌ସା ନିମାଣ୍ଡା । ମେଁ ଗିଆନ୍‌ ବାନ୍‌ସା ଇକ୍‌ଚା ଡିଂକେ । ତେସା ମେଁ ଆତେନ୍‌ ସ୍ଲାଃନେ ଚୁଚୁ ରୁଏକେ ବାରି ଚଙ୍ଗ୍‌କେ । ବାରି ନିଜର୍‌ ଆଣ୍ଡାକେ ଚଙ୍ଗ୍‌ ନ୍‌ସା ବିଃକେ ବାରି ମେଁ ଡିଗ୍‌ ଆତେନ୍‌ ଚଙ୍ଗ୍‌କେ । 7 ଆତ୍‌ବା ମେଇଂନେ ମ୍ମୁଁଆଃ ତ୍ନାକେ, ମେଇଂ ମ୍ୟାଃଆର୍‌କେ ଜେ ନେ ଡିଗ୍‌ଚା ନେଲେଃକେ, ତେସା ମେଇଂ ଲିୱା ସ୍ଲାଃନେ ଉଲିଆ ଗାଃଚେ ଆମେକେ ତଗ୍‌ଚେ ପାଟାଇ ରକମ୍‌ ୱାଡ଼େଗ୍‌ଆର୍‌କେ ।

8 ଲମ୍‌ଡିଗ୍‌ ବେଲା ମାପ୍‌ରୁ ପର୍‌ମେସର୍‌ ଡୁଗ୍‌ଡି ବିତ୍ରେ ଅଲେଙ୍ଗ୍‌ ଡିଂଗେ । ଆଦମ ଆରି ଅବା ଏନ୍‌ ସାମୁଆଁ ଅଁଆର୍‌କେ, ବାରି ମେଇଂ ପର୍‌ମେସର୍‌ନେବାନ୍‌ ବୁଃଡ଼ି ନ୍‌ସା ଡୁଗ୍‌ଡିନେ ସ୍ଲାଃଇଙ୍ଗ୍‌ ଡାଗ୍ରା ବୁଃଡ଼ିଆର୍‌କେ । 9 ମାପ୍‌ରୁ ପର୍‌ମେସର୍‌ ଆଦମକେ ୱାଚେ ବାସଙ୍ଗ୍‌ଆର୍‌କେ, "ନାଁ ଆଣ୍ଡିଡାଗ୍ରା ?"

10 ଆଦମ ଉତର୍‌ ବିଃକେ, "ନେଙ୍ଗ୍‌ ଡୁଗ୍‌ଡି ବିତ୍ରେ ନାଁ ପାଙ୍ଗ୍‌ନେ ସବଦ୍‌ ଅଁଚେ ନେଙ୍ଗ୍‌ ଡିକ୍‌ଚା ନ୍‌ଲେକ୍ନେ ନ୍‌ସାଃ ବୁଟମେଗ୍‌ଚେ ବୁଃଡ଼ିଚେ ନ୍‌ଲେକେ ।"

11 ମାପ୍‌ରୁ ପର୍‌ମେସର୍‌ ଆଦମକେ ବାସଙ୍ଗ୍‌କେ, "ନାଁ ଡିକ୍‌ଚା ନାଲେଃକେ, ଏନ୍‌ ଜାଣ୍ଡେ ଆନାକେ ବାସଙ୍ଗ୍‌କେ ? ନେଙ୍ଗ୍‌ ମୁଃଡ଼ି ସ୍ଲାଃନେ ଚୁଚୁ ଚଙ୍ଗ୍‌ ନ୍‌ସା ମନା ଡିଙ୍ଗ୍‌ମ୍ୱଗେ, ଆତେନ୍‌ କି ନାଁ ଚଙ୍ଗ୍‌ ପେଲେଃକେ ?"

12 ଆଦମ ଉତର୍‌ ବିଃକେ, "ନାଁ ନେଙ୍ଗ୍‌ ନ୍‌ସା ଆଣ୍ଡିନେ ସେଲାମ୍ବୁଏଃ ତିଆର୍‌ ଡିଙ୍ଗ୍‌ନାବକେ । ମେଁ ଆନେଙ୍ଗ୍‌କେ ଆତେନ୍‌ ଚୁଚୁ ଚଙ୍ଗ୍‌ ନ୍‌ସା ବିଃକେ । ତେସା ନେଙ୍ଗ୍‌ ଆତେନ୍‌ ଞ୍ଚଙ୍ଗ୍‌କେ ।"

13 ଅଃତେନ୍‌ବେଲା ମାପ୍‌ରୁ ପର୍‌ମେସର୍‌ ସେଲାମ୍ବୁଏଃକେ ବାସଙ୍ଗ୍‌କେ, "ଦେକ୍‌ରକମ୍‌ ନାଁ ମେଃନ୍‌ସା ନାଡିଂକେ ?" ସେଲାମ୍ବୁଏଃ ବାସଙ୍ଗ୍‌କେ, "ବୁବଃ ଆନେଙ୍ଗ୍‌ ଆଃବାୟା ବିଃକେ, ତେସା ନେଙ୍ଗ୍‌ ଆତେନ୍‌ ଞ୍ଚଙ୍ଗ୍‌କେ ।"

ମାପ୍‌ରୁନେ ଡଣ୍ଡ୍‌ ଆଦେସ୍‌

14 ଆତ୍‌ବା ମାପ୍‌ରୁ ପର୍‌ମେସର୍‌ ବୁବଃକେ ବାସଙ୍ଗ୍‌କେ, ଆକେନ୍‌ କାମ୍‌ ନାଡିଂକ୍ନେ ନ୍‌ସାଃ ନାଁ ସାପା ଇନି ପସୁ ବାରି କଣ୍ଡା ପସୁବାନ୍‌ ଜାବର୍‌ ଅବିସାପ୍‌ ନାଡିଂଗେ । ନାଁ ନାଁନେ ସୁଲୁଏଃ ଏଃତେ କ୍ଲିଗ୍‌ ଜିବନ୍‌ ନାଅଲେଙ୍ଗ୍‌ଏ ବାରି ନାଁ ଦୁଲି ନାଚଙ୍ଗ୍‌ଏ । 15 ଆରି ନିଂ ନାଁନେ ଆରି ସେଲାମ୍ବୁଏଃନେ ବିତ୍ରେ, ବାରି ନାଁନେ ବଂସ ଆରି ମେଁନେ ବଂସ ବିତ୍ରେ ବିରଦ୍‌ ବାବ୍‌ନା ଣ୍ଡ୍ରାଃଡିଂଏ; ମେଁ ନାଁନେ ବାଆଃକେ ବଗ୍‌ଏ ଆରି ନାଁ ମେଁନେ ଞ୍ଚକେ ନାଆଃଏ ।

16 ଆତ୍‌ବା ଆତେନ୍‌ ସେଲାମ୍ବୁଏଃକେ ବାସଙ୍ଗ୍‌କେ, "ନେଙ୍ଗ୍‌ ନାଁନେ ଣ୍ଡିଆକୁମାନେ ଦୁକା ଜାବର୍‌ ଆମ୍ନାଃ ମ୍ୱିଏ, ନାଁ ଦୁକାସୁକା ଡିଂଚେ ଗଡ଼େଅକେ ଣ୍ଡିଆ ନାକୁମାଏ; ବାରି ଆଣ୍ଡା ଆଡ଼ାତ୍ରା ନାଁନେ ବାସ୍‌ନା ଲେଃଏ, ମେଁ ନାଁନେ ଆଡ଼ାତ୍ରା ସାସନ୍‌ ଡିଙ୍ଗ୍‌ଏ ।"

17 ବାରି ପର୍‌ମେସର୍‌ ଆଦମକେ ବାସଙ୍ଗ୍‌କେ, "ନେଙ୍ଗ୍‌ ଆନାକେ ଆତେନ୍‌ ସ୍ଲାଃନେ ଚୁଚୁ ମାଚଙ୍ଗ୍‌ ନ୍‌ସା ବାସଙ୍ଗ୍‌ମ୍ୱଗେ, ମାତର୍‌ ନାଁ ନାଁନେ ସେଲାମ୍ବୁଏଃନେ ସାମୁଆଁ ସାଃଚେ ଆତେନ୍‌ ଚୁଚୁ ନାଚଙ୍ଗ୍‌କେ । ତେସା ନାଁ ନ୍‌ସା ତୁବଃ ଅବିସାପ୍‌ ଡିଂଗେ, ନାଁ ନାଁନେ କ୍ଲିଗ୍‌ ଜିବନ୍‌ କସ୍ଟ ଡିଂଚେ ଆତ୍‌ବା କାଦି ନାବାଏ । 18 ତୁବନ୍ୟା ଗ୍ରେଃ ଆରି ଲାଟା ସ୍ଲାଃ ତାର୍‌ଏ । ବାରି ନାଁ ଲିଜନେ ଆମାଃ ନାଚଙ୍ଗ୍‌ଏ । 19 ନାଁ ଗୁଏଃ ଜାକ ସାର୍ମୁଆଃନେ ସଲେନ୍ୟା କାଦି ନାଡିଂଏ, ନାଁ ଚଙ୍ଗ୍‌ନେ ବାନ୍‌ସା ଜାବର୍‌ କସ୍ଟ ନାଡିଂଏ । ଆନାକେ ଦୁଲିବାନ୍‌ ତିଆର୍‌ ଣ୍ଡିଙ୍ଗ୍‌କେ, ଦୁଲିନ୍ୟା ବାର୍‌ମୁଇଂତର୍‌ ନାମିସୁଃଏ ।"

20 ଆଦମ ନିଜର୍‌ ସେଲାମ୍ବୁଏଃନେ ମ୍ନି ହବା ବିଃକେ । ଡାଗ୍ଲା ମେଁ ଜିବନ୍‌ ଲେଃକ୍ନେ ରେମୁଆଁଇଂନେ ଇୟାଙ୍ଗ୍‌ ଡିଂଏ । 21 ମାପ୍‌ରୁ ପର୍‌ମେସର୍‌ ପସୁ ଉକ୍‌ସାନେ ପାଟାଇ ତିଆର୍‌ ଡିଂଚେ ଆଦମ ବାରି ମେଁନେ ସେଲାମ୍ବୁଏଃ ଅବାକେ ଆୱାଡ଼େଗ୍‌କେ ।

ଆଦାମ ଆରି ଅବାକେ ଡୁଗ୍‌ଡିବାନ୍‌ ଆଃତାର୍‌ ବିକେ

22 ଏନ୍‌ଇଡ଼ିଂ ମାପ୍‌ରୁ ପର୍‌ମେସର୍‌ ବାସଙ୍ଗ୍‌କେ, "କେଲା, ରେମୁଆଁ ନିମାଣ୍ଡା ବାରି କରାପ୍‌ନେ ବୁଦିଗ୍ୟାନ୍‌ ଡିଂଚେ ନିଂ ରକମ୍‌ ମେଇଂ ଡିଂଲେଃକେ; ବାରି ଏବେ ମେଁ ଡିରକମ୍‌ ନ୍ତି ଲମ୍ୱେଚେ ଅମ୍ରୁତ୍‌ ସ୍ଲାଃନେ ଚୁଚୁ ଚଙ୍ଗ୍‌ନେ ନିମାଣ୍ଡା ଣ୍ଡୁ । ଜଦି ମେଁ ଏନ୍‌ ପାଚଙ୍ଗ୍‌, ତେଲା ମେଁ ଅମର୍‌ ପାଡିଂ ।" 23 ତେସା ମାପ୍‌ରୁ ପର୍‌ମେସର୍‌ ଏଦନ ଡୁଗ୍‌ଡିବାନ୍‌ ଆମେଇଂକେ ଆଃତାର୍‌ ବିଃକେ । ମେଁ ଆଣ୍ଡିନେ ତୁବବାନ୍‌ ତିଆର୍‌ ଡିଂଲେଃକେ, ଆତ୍‌ଅରିଆ ଚାସ୍‌କାମ୍‌ ଡିଂନ୍‌ସା ବାସଙ୍ଗ୍‌କେ । 24 ମାପ୍‌ରୁ ପର୍‌ମେସର୍‌ ଦେକ୍‌ରକମ୍‌ ଆଦମକେ ନୁଆଁ ବିଃକେ; ବାରି ଅମ୍ରୁତ୍‌ ସ୍ଲାଃନେ ଗାଲି ଉର୍‌ ନ୍‌ସା ମେଁ ପୁରୁବ୍‌ ଦିଗ୍‌ ପାକା କିରୂବ ଦୁତ୍‌ଇଂକେ ବାରି ଅଁ ଦିଗ୍‌ ପାକା ପୁଏକୁର୍‌ ଲେଃନେ ସୁଆ ଡୁଆଲେକ୍ନେ କାଣ୍ଡା ଏଦନ ଡୁଗ୍‌ଡିନେ ଗିଗାନେ ଗାଲିଅରିଆ ଆନ୍ତଃ ବିଃକେ ।