1 ଅବ୍ରାମନେ ସେଲାମ୍ବୁଏଃ ସାରୀନେ ଗଗିସିଆ ଆଲେଗେ । ମେଁନେ ମୁଇଂ ହାଗାର ମ୍ନିକ୍ନେ ମିସର୍ ଦେସ୍‌ନେ ଚାକର୍‌ବୁଏଃ ଲେଃଗେ । 2 ସାରି ଅବ୍ରାମକେ ବାସଙ୍ଗ୍‌କେ, "ମାପ୍‌ରୁ ଆନେଙ୍ଗ୍‌ ବାଞ୍ଜି ଆଡିଙ୍ଗ୍‌ ବକେ । ତେସା ନେଙ୍ଗ୍‌ କୁସାମୁତି ଡିଙ୍ଗ୍‌ଣ୍ଡିଂକେ, ଏନ୍‌ ଚାକର୍‌ବୁଏଃ ଏତେ କୁଡ଼େଃମାଡ଼େଃ ଡିଂ । ଇଙ୍ଗ୍‌ଚା ନେଙ୍ଗ୍‌ କ୍ମେନ୍‌ସା ଗଡ଼େଅ ବା ଇଁୟାଏ ।" ତେସା ଅବ୍ରାମ ସାରୀନେ ସାମୁଆଁକେ ସାଃକେ । 3 ଅବ୍ରାମ କିଣାନ ଦେସ୍‌ନ୍ୟା ଗୁଆ ମୁଆଁ ବାସାକ୍ନେ ଇଡ଼ିଙ୍ଗ୍‌ ମେଁନେ ସେଲାମ୍ବୁଏଃ ସାରୀ ନିଜର୍‌ ମିସର୍ ଦେସ୍‌ନେ ଚାକର୍‌ବୁଏଃ ହାଗାରକେ ନିଜର୍‌ ଆଣ୍ଡା ଅବ୍ରାମ ଏତେ ବିହେ ଆଡିଙ୍ଗ୍‌କେ । 4 ଅବ୍ରାମ ହାଗାର ଏତେ ଡୁଆ ସାଃଲା, ମେଁ ଗାଗ୍‌ଡ଼େକେ । ବାରି ନିଜର୍‌ ଗାଗ୍‌ଡ଼େକ୍ନେ ମ୍ୟାଚେ ମେଁନେ ସାକାର୍‌ବୁଏଃକେ ମେଁ ଜାବର୍‌ ସନ୍‌ମାନ୍‌ ଆବିକେ ଣ୍ଡୁ ।

5 ମାତର୍‌ ସାରୀ ଅବ୍ରାମକେ ବାସଙ୍ଗ୍‌କେ, "ଏନ୍‌ ନାନେ ବୁଲ୍‌ ଜେ ନେଙ୍ଗ୍‌ନେ ଚାକର୍‌ବୁଏଃ ଆନେଙ୍ଗ୍‌ କରାପ୍‌ ବେବଆର୍‌ ଡିଙ୍ଗ୍‌ଡିଂକେ । ନେଙ୍ଗ୍‌ ଆମେକେ ଆନାକେ ବିଃମ୍ୱକେ, ଏନ୍‌ ଇଡ଼ିଙ୍ଗ୍‌ ମେଁ ଗାଗ୍‌ଡ଼େକେ ବାରି ଏନ୍‌ ଇଡ଼ିଙ୍ଗ୍‌ ମେଁ ଆନେଙ୍ଗ୍‌ ଉଡ଼ି ସନ୍‌ମାନ୍‌ ବିଃନେ ଦର୍‌କାର୍‌, ଅତେନ୍‌ ସନ୍‌ମାନ୍‌ ଆବିକେ ଣ୍ଡୁ । ତେସାଃ ନେଙ୍ଗ୍‌ ଚାଏଁ ଣ୍ଡିଂକେ ଜେ, ମାପ୍‌ରୁ ନାଁନେ ଆରି ନେଙ୍ଗ୍‌ନେ ବିଚାର୍‌ ଡିଙ୍ଗ୍‌ଲେ ।"

6 ମାତର୍‌ ଅବ୍ରାମ ସାରୀକେ ବାସଙ୍ଗ୍‌କେ, "ହାଗାର ନାଁନେ ଦାସି । ନାଁ ମେଁନେ ଆଡ଼ାତ୍ରା ମେଃନେ ଚାଏଁ ନାଡିଙ୍ଗ୍‌କେ, ଆତେନ୍‌ ଡିଙ୍ଗ୍‌ ନାୟାଏ ।" ତେସା ସାରି ମେଁନେ ଆଡ଼ାତ୍ରା ଜାବର୍‌ କସ୍ଟ ବିଲା, ହାଗାର ଆମେକେ ଆନ୍ତାର୍‌ଚେ ଲାଗ୍‌ଡକେ ।

7 ମାପ୍‌ରୁନେ ଦୁତ୍‌ ଆମେକେ ମୁଇଂ ଜର୍‌ନାଡ଼ିଆଃ ଡାଗ୍ରା କେକେ । ଆତେନ୍‌ ଜର୍‌ନାଡ଼ିଆଃ ଶୂର ପାକା ୱେଡିଙ୍ଗ୍‌କ୍ନେ ଗାଲିଅରିଆ ଲେଃଗେ । 8 ମାପ୍‌ରୁନେ ଦୁତ୍‌ ବାସଙ୍ଗ୍‌କେ, "ହାଗାର, ସାରୀନେ ଦାସି, ନାଁ ଆଣ୍ଡିବାନ୍‌ ନାପାଙ୍ଗ୍‌କେ ବାରି ନାଁ ଆଣ୍ଡିପାକା ୱେ ନାଡିଙ୍ଗ୍‌କେ ?" ହାଗାର ବାସଙ୍ଗ୍‌କେ, "ନେଙ୍ଗ୍‌ ନେଙ୍ଗ୍‌ନେ ସାକାର୍‌ବୁଏଃ ସାରି ଡାଗ୍ରାବାନ୍‌ ଲାଗ୍‌ଡ ଣ୍ଡିଂକେ ।"

9 ମାପ୍‌ରୁନେ ଦୁତ୍‌ ହାଗାରକେ ବାସଙ୍ଗ୍‌କେ, "ନାଁନେ ସାକାର୍‌ବୁଏଃ ଡାଗ୍ରା ଆଣ୍ଡେ ୱିଗ୍‌ଲା, ବାରି ନିଜେ ମେଁନେ ଡାଗ୍ରା କେମା ସାଲିଆ ।" 10 ମାପ୍‌ରୁନେ ଦୁତ୍‌ ହାଗାରକେ ବାସଙ୍ଗ୍‌କେ, "ନାଁନେ ଗୁଲୁଏ ବଂସକୁଲ୍‌ ଜନମ୍‌ ଡିଙ୍ଗ୍‌ଆର୍‌ଏ । ରେମୁଆଁଇଂ ଏଜା ଆୟାଆର୍‌ ଣ୍ଡୁ ।" 11 ମାପ୍‌ରୁନେ ଦୁତ୍‌ ବାରି ଦେକ୍‌ରକମ୍‌ ବାସଙ୍ଗ୍‌କେ, "ହାଗାର ଏବେ ନା ଗାଗ୍‌ଡ଼େ ନାଲେଃକେ । ନାଁ ସୁଲୁଏବାନ୍‌ ମୁଇଂ ଙ୍ଗିର୍‌ବଃଅ ଜନମ୍‌ ଡିଙ୍ଗ୍‌ଏ । ନାଁ ମେଁନେ ମ୍ନି ଇଶ୍ମାୟେଲ ନାବିଏ । ଡାଗ୍ଲା ମାପ୍‌ରୁ ନାଁନେ ଦୁକ୍‌ ଅଁଲେଃକେ । 12 ବାରି, ମେଁ ରେମୁଆଁଇଂନେ ବିତ୍ରେ କଣ୍ଡାନେ ଗଦ ରକମ୍‌ ଡିଂଏ । ମେଁନେ ନ୍ତି ସାପାରେନେ ବିରଦ୍‌ରେ, ବାରି ସାପାରେନେ ନ୍ତି ମେଁନେ ବିରଦ୍‌ରେ ଲେଃଏ । ବାରି ମେଁ ମେଁନେ ବୟାଁଇଂନେ ଏଃତେ ବିରଦି ବାବ୍‌ରେ ବାସାଏ ।"

13 ଏନ୍‌ ଇଡ଼ିଙ୍ଗ୍‌ ହାଗାର ମାପ୍‌ରୁନେ ଏନ୍‌ ମ୍ନି ବକେ, ଆତେନ୍‌ଇଂ, ମଦ୍ଦର୍ଶକ ପର୍‌ମେସର୍‌, ମେଃଡାଗ୍‌ଲା ମେଁ ବାସଙ୍ଗ୍‌କେ, ଜେ ଆନିଂକେ କିକେଡିଂକେ, ମେଁନେ ଦର୍ସନ୍‌ ଇଡ଼ିଂ ନିଂ କି ଆକ୍‌ଅରିଆ ଆରି ମ୍ବ୍ରଏ ! 14 ତେସା ଆତେନ୍‌ କୁଇଁସାଲ୍‌ନେ ମ୍ନି ବେର-ଲହୟ-ରୋୟୀ ବକେ । ଆତେନ୍‌ କୁଇଁସାଲ୍‌ କାଦେସ ବାରି ବେରଦ ମଜେ ଲେଃଗେ ।

15 ହାଗାର ଅବ୍ରାମନେ ଆତ୍‌ଲା ଉଂଣ୍ଡେକେ ଜନମ୍‌ ବିକେ ବାରି ଅବ୍ରାମ ମେଁନେ ମ୍ନି ଇଶ୍ମାୟେଲ ବିକେ । 16 ଅବ୍ରାମନେ ଚୟାଲିସ୍‌ ମୁଆଁ ବେଲା ହାଗାର ଅବ୍ରାମନେ ନ୍‌ସାଃ ଇଶ୍ମାୟେଲ୍‌କେ ଜନମ୍‌ ବିଃକେ ।