1 ମାପ୍‌ରୁ ଅବ୍ରାମକେ ବାସଙ୍ଗ୍‌କେ, "ନାଁନେ ଦେସ୍‌ ବାରି ନାଁନେ ରେମୁଆଁଇଂକେ ନାଁନେ ଆବାନେ ଡୁଆକେ ଆନ୍ତାର୍‌ ବିଃ । ନେଙ୍ଗ୍ ଆନାକେ ଆଣ୍ଡିନେ ଦେସ୍‌ ଣ୍ଡ୍ରାଃସୁଏଏ, ଆତେନ୍‌ ଦେସ୍‌ ୱେଲା । 2 ନେଙ୍ଗ୍‌ ନାନେବାନ୍‌ ମୁଇଂ ମ୍ନା କୁଟୁମ୍‌ ତିଆର୍‌ ନେଡିଙ୍ଗ୍‌ଏ । ନେଙ୍ଗ୍‌ ଆନାକେ ଆସିର୍ବାଦ୍‌ ଣ୍ଡିଙ୍ଗ୍‌ଏ ବାରି ନେଙ୍ଗ୍‌ ଆନାକେ ମ୍ନା ଣ୍ଡ୍ରାଃଡିଂଏ ବାରି ନାଁ ଆସିର୍ବାଦ୍‌ନେ ଚିନ୍‌ ନାଡିଙ୍ଗ୍‌ଏ ।"

3 ଜାଣ୍ଡେଇଂ ଆନାକେ ଆସିର୍ବାଦ୍‌ ଡିଙ୍ଗ୍‌ଆର୍‌ଏ, ନେଙ୍ଗ୍‌ ଆମେଇଂକେ ଆସିର୍ବାଦ୍‌ ଣ୍ଡିଙ୍ଗ୍‌ଏ ।

ବାରି ଜାଣ୍ଡେ ଆନାକେ ଅବିସାପ୍‌ ବିଃଆର୍‌ଏ, ନେଙ୍ଗ୍‌ ଆମେଇଂକେ ଅବିସାପ୍‌ ମ୍ୱିଏ ।

ନାନେ ବାନ୍‌ ନିଂ ମଚ୍‌ପୁର୍‌ନେ ସାପା ବଁସ୍‌କୁଲ୍‌କେ ଆସିର୍ବାଦ୍‌ ଣ୍ଡିଂଏ ।

4 ମାପ୍‌ରୁନେ ଆକେନ୍‌ ସାମୁଆଁ ଅନୁସାରେ ଅବ୍ରାମ ହାରୋଣକେ ଆନ୍ତାର୍‌ ବିକେ, ବାରି ଲୋଟ ମେଁନେ ଏଃତେ ୱେକେ । ହାରୋଣବାନ୍‌ ଆନ୍ତାର୍‌ଚେ ୱେକ୍ନେ ବେଲା ଅବ୍ରାମ୍‌ନେ ବଏସ୍‌ ପଚସ୍‌ତୁରି ବଏସ୍‌ ଡିଙ୍ଗ୍‌ଲେଃଗେ । 5 ଅବ୍ରାମ ମେଁନେ ସେଲାମ୍ବୁଏଃ ସାରୀକେ, ବୟାଁ ଉଂଡେ ଲୋଟକେ ବାରି ହାରୋଣ ଡାଗ୍ରା ନିଜର୍‌ ଆର୍ଜେକ୍ନେ ଦନ୍‌ ବାରି ଲେଃକ୍ନେ ପ୍ରାନିଇଂକେ ସାଚେ କିଣାନ ଦେସ୍‌ ପାକା ୱେଆର୍କେ । 6 ଅବ୍ରାମ ଆତେନ୍‌ ଦେସ୍ ମଜେ ବିଚେ ୱେକେ, ଶିଖିମନ୍ୟା ୱେଚା ଜାକ, ମୋରିନେ ଅଲୋନ୍‌ ସ୍ଲାଃ ବୁନ୍ଦେ ପାଂକେ । ଆତେନ୍‌ ବେଲା କିଣାନୀୟଇଙ୍ଗ୍‌ ଆତେନ୍‌ ଜାଗାନ୍ୟା ବାସା ଲେଃଆର୍‌ଗେ । 7 ମାପ୍‌ରୁ ଅବ୍ରାମକେ ଦର୍ସନ୍‌ ବିଚେ ବାସଙ୍ଗ୍‌କେ, "ନେଙ୍ଗ୍‌ ନାଁନେ ବଁସ୍‌କୁଲ୍‌କେ ଏନ୍‌ ଦେସ୍‌ ମ୍ୱିଏ ।" ମାପ୍‌ରୁ ଅବ୍ରାମକେ ଆଣ୍ଡିନେ ଜାଗାନ୍ୟା ଦର୍ସନ୍‌ ବିଃବଗେ । ଅବ୍ରାମ ଆତ୍‌ଅରିଆ ମାପ୍‌ରୁନେ ପାର୍‌ତନା ନ୍‌ସା ମୁଇଂ ପୁଜା ବେଦି ଆଃରେକେ । 8 ଏନ୍‌ ଇଡ଼ିଙ୍ଗ୍‌ ଅବ୍ରାମ ଆତେନ୍‌ ଜାଗା ଆନ୍ତାର୍‌ଚେ ବୈଥେଲନେ ପୁର୍ବ ପାକା କଣ୍ଡାନ୍ୟା ୱେଚେ ନିଜର୍‌ ତମ୍ୱୁ ତିଆର୍‌ ଡିଙ୍ଗ୍‌କେ । ଆତ୍‌ଅରିଆ ପଶ୍ଚିମ୍‌ ଦିଗ୍‌ନ୍ୟା ବୈଥେଲ୍‌ ଆରି ପୁର୍ବ ଦିଗ୍‌ ପାକା ଅୟ ଇନି ଲେଃଗେ । ବାରି ଆତ୍‌ଅରିଆ ମାପ୍‌ରୁନେ ମ୍ନିରେ ମୁଇଂ ପୁଜା ବେଦି ତିଆର୍‌ ଡିଙ୍ଗ୍‌ଚେ ମାପ୍‌ରୁନେ ମ୍ନିରେ ପାର୍‌ତନା ଡିଙ୍ଗ୍‌କେ । 9 ଏନ୍‌ ଇଡ଼ିଙ୍ଗ୍‌ ଅବ୍ରାମ ଅଲେଙ୍ଗ୍‌ ଅଲେଙ୍ଗ୍‌ଚେ ଦକିନ୍‌ ଦିଗ୍‌ ପାକା ୱେକେ ।

10 ଆତେନ୍‌ ବେଲା କିଣାନ୍‌ ଦେସ୍‌ ବୟାଙ୍କାର୍‌ ମୁର୍‌ଡ଼ି ଡିଙ୍ଗ୍‌କେ । ତେସା ଅବ୍ରାମ ବାସା ନ୍‌ସା ମିସର୍‌ ଦେସ୍‌ ପାକା ୱେକେ । 11 ମେଁ ଉଡ଼ିବେଲା ମିସର୍‌ ଦେସ୍‌ନେ ଡାଗ୍ରା ଡିଂକେ ଅବ୍ରାମ ନିଜର୍‌ ସେଲାମ୍ବୁଏଃ ସାରୀକେ ବାସଙ୍ଗ୍‌କେ, "ନେଙ୍ଗ୍‌ ମ୍ୟାନ୍ଲେକେ ନାଁ କେନ୍‌ସା ଜାବର୍‌ ସୁନ୍ଦର୍‌ । 12 ମିସର୍ ଦେସ୍‌ନେ ରେମୁଆଁଇଂ ଆନାକେ କେଆର୍‌ଏ ବାରି ମ୍ୟାଆର୍‌ଏ ଜେ, ନାଁ ନେଙ୍ଗ୍‌ନେ ସେଲାମ୍ବୁଏଃ । ତେସା ମେଇଂ ଆନିଂ ବାଗୁଏଃ ବିଃଆର୍‌ଏ ବାରି ଆନାକେ ଆମ୍ବ୍ର ବଆର୍‌ଏ । 13 ତେସା ନାଁ ରେମୁଆଁଇଂକେ ନାବାସଙ୍ଗ୍‌ଏ, ନାଁ ନେଙ୍ଗ୍‌ନେ ତନା ଡାଗ୍‌ଚେ ନାବାସଙ୍ଗ୍‌ଏ । ତେଲା ମେଇଂ ଆନେଙ୍ଗ୍ ଲିବିସ ଆର୍‌ଏ । ଦେକ୍‌ ରକମ୍‌ ନାଁ ନେଙ୍ଗ୍‌ନେ ଜିବନ୍‌କେ ରକ୍ୟା ନାଡିଙ୍ଗ୍‌ଏ ।" 14 ଉଡ଼ିବେଲା ଅବ୍ରାମ ମିସର୍ ଦେସ୍‌ନ୍ୟା ୱେଚାକେ । ମିସର୍‌ ଦେସ୍‌ନେ ରେମୁଆଁଇଂ ମେଁନେ ସେଲାମ୍ବୁଏଃକେ ଜାବର୍‌ ସୁନ୍ଦ୍‌ରି ଲେଃକ୍ନେ କେଆର୍କେ । 15 ବାରି ଫାରୋନେ ନେତାଇଂ ଆମେକେ କେଚେ ପ୍ରସଂସା ଡିଂଆର୍କେ, ଏନ୍‌ ଇଡ଼ିଙ୍ଗ୍‌ ଆତେନ୍‌ ସେଲାମ୍ବୁଏଃକେ ଫାରୋନେ ଡୁଆଅରିଆ ଡୁଙ୍ଗ୍‌ପାଙ୍ଗ୍‌ଆର୍କେ । 16 ଫାରୋ ମାତର୍‌ ଅବ୍ରାମକେ ଲିବିସ ଡିଙ୍ଗ୍‌କେ, ବାରି ଆମେକେ ମେଣ୍ଡା, ଅରେଃ, ଗଦ, ଚାକର୍‌ ଚାକର୍‌ବୁଏଃ ବାରି ଡିଆ ଗଦ ବାରି ଉଁଟ୍‌ ବିଃକେ ।

17 ମାତର୍‌ ଅବ୍ରାମନେ ସେଲାମ୍ବୁଏଃ ସାରୀ ନ୍‌ସା ମାପ୍‌ରୁ ଫାରୋ ବାରି ମେଁନେ ପରିବାର୍‌ ଆଡ଼ାତ୍ରା ବୟାଙ୍କାର୍‌ ମୁର୍‌ଡିବାନ୍‌ ଡଣ୍ଡ୍‌ ବିକେ । 18 ତେସା ଫାରୋ ଅବ୍ରାମକେ ୱାଚେ ବାସଙ୍ଗ୍‌କେ, ନାଁ ମେଁ ନ୍‌ସା ନେଁନେ ଏଃତେ ଦେକ୍‌ ରକମ୍‌ ବେବଆର୍‌ ନାଡିଙ୍ଗ୍‌କେ ? 19 ସାରୀ ନାଁନେ ସେଲାମ୍ବୁଏଃ ଡାଗ୍‌ଚେ ଏନ୍‌ ସାମୁଆଁ ଆନେକେ ମେଁ ନ୍‌ସା ନାବାସଙ୍ଗ୍‌କେ । ଆମେକେ ମେଁ ନ୍‌ସା ନିଜର୍‌ ତନା ଡାଗ୍‌ଚେ ନାବାସଙ୍ଗ୍‌କେ । ନେଙ୍ଗ୍‌ ଆମେକେ ନେଙ୍ଗ୍‌ନେ ସେଲାମ୍ବୁଏଃ ଆଡିଙ୍ଗ୍‌ଚେ ବିହେ ଡିଙ୍ଗ୍‌ନ୍‌ସା ଡୁଙ୍ଗ୍‌ମ୍ପାଂକେ । ମାତର୍‌ ନେଙ୍ଗ୍‌ ଏବେ ଆମେକେ ଆଃଆଣ୍ଡେ ବିଃଣ୍ଡିଂ । ଆମେକେ ସାଚେ ଆକ୍‌ବାନ୍ ଲାଗ୍‌ଡଲା । 20 ଫାରୋ ମେଁନେ ରେମୁଆଁଇଂକେ ଅବ୍ରାମ ବିସ‍ଏରେ ଆଦେସ୍‌ ବିଃକେ, ଆରି ମେଁଇଂ ସାପା ଦନ୍‌ ସମ୍ପତି ଏଃତେ ଆମେଇଂକେ ଆରି ମେଁନେ ସେଲାମ୍ବୁଏଃକେ ବେ ବିଃଆର୍‌କେ ।