1 ଆତେନ୍‌ ବେଲା ଯିହୁଦା ମେଁନେ ବୟାଁଇଂକେ ଆତାର୍‌ଚେ ହୀରା ମ୍ନିକ୍ନେ ମୁଇଂ ଅଦୁଲ୍ଲମୀୟ ଏତେ ଲେଃ ନ୍‌ସା ୱେକେ । 2 ଆତ୍‌ଡାଗ୍ରା ଶୂୟ ମ୍ନିକ୍ନେ ମୁଇଂ କିଣାନୀୟ ରେମୁଆଁନେ ମୁଇଂ ସେଲାକେ କେଚେ ବିବା ଡିଙ୍ଗ୍‌ଚେ ଆମେକେ କୁଡ଼େଃମାଡ଼େଃକେ । 3 ଆତନ୍‌ସାଃ ମେଁ ଗାଗ୍‌ଡ଼େଚେଃ ମୁଇଂ ଗଡ଼େଅକେ ଜନମ୍‌ ବିକେ । ମେଁ ମେଁନେ ମ୍ନି ଏର ବିକେ । 4 ଏନ୍‌ ଇଡ଼ିଙ୍ଗ୍‌ ମେଁ ବାରି ମୁଇଂ ଗଡ଼େଅ ଜନମ୍‌ ବିକେ । ବାରି ମେଁନେ ମ୍ନି ବିକେ ଓନନ୍‌ । 5 ଏନ୍‌ ଇଡ଼ିଙ୍ଗ୍‌ ମେଁ ଆରି ମୁଇଂ ଗଡ଼େଅକେ ଜନମ୍‌ ବିକେ ବାରି ମେଁନେ ମ୍ନି ବିକେ ଶେଲା । ଏନ୍‌ ଗଡ଼େଅ ଜନମ୍‌ ଡିଙ୍ଗ୍‌ନେ ବେଲା ଯିହୁଦା କଷୀବନ୍ୟା ଲେଃଗେ ।

6 ଆରି ଯିହୁଦା ତାମର ମ୍ନିକ୍ନେ ମୁଇଂ ସେଲା ରାଙ୍ଗ୍‌ପାଙ୍ଗ୍‌ଚେ ନିଜର୍‌ ମ୍ନା ଉଂଡେ ଏର ଏତେ ଆମେକେ ବିବା ଆଡିଙ୍ଗ୍‌ ବିକେ । 7 ମାତର୍‌ ଯିହୁଦାନେ ମ୍ନା ଉଂଡେ ଏର ମାପ୍‌ରୁନେ ମ୍‌ମୁଁଆଃନ୍ନିଆ ଟେମ୍ପର୍‌ ଲେଃଗେ । ଏନ୍‌ସା ମାପ୍‌ରୁ ଆମେକେ ନସ୍ଟ ଆଡିଙ୍ଗ୍‌କେ । 8 ଏନ୍‌ ଇଡ଼ିଙ୍ଗ୍‌ ଯିହୁଦା ଏରନେ ବୟାଁ ଓନନକେ ବାସଙ୍ଗ୍‌କେ, "ନାଁ ନାନେ ବୟାଁନେ ସେଲାମ୍ବୁଏଃ ଏତେ କୁଡ଼େଃମାଡ଼େଃ ଡିଙ୍ଗ୍‌ । ଜଦି ମେଁ ଗଡ଼େଅ ଜନମ୍‌ ଆଃଡିଙ୍ଗ୍‌ଏ, ଆତେନ୍‌ ଉଂଡେ ନାଁ ବୟାଁନେ ଉଂଡେ ଡାଗ୍‌ଚେ ବାସଙ୍ଗ୍‌ଆର୍‌ଏ ।" 9 ମାତର୍‌ ଆତେନ୍‌ ବଂସ ନାନେ ଆଡିଙ୍ଗ୍‌ ଣ୍ଡୁ, ଏନ୍‌ ମ୍ୟାଚେ ଓନନ୍‌ ବୟାଁନେ ସେଲାମ୍ବୁଏଃ ଏତେ କୁଡ଼େଃମାଡ଼େଃ ଡିଙ୍ଗ୍‌ କେଲା ବୟାଁନେ ବଂସ ତିଆର୍‌ ଆଡିଙ୍ଗ୍‌ନେ ଇକ୍‌ଚା ଆଲେଗେ, ଆତେନ୍‌ସା ମେଁ ତୁବଃନ୍ନିଆ ଆଃଜରେ ବିଃକେ । 10 ଏନ୍‌ସା ମାପ୍‌ରୁ ରିସା ଡିଙ୍ଗ୍‌କେ ବାରି ଓନନକେ ବାଗୁଏ ବିକେ । 11 ଆତେନ୍‌ ବେଲା ଯିହୁଦା ନିଜର୍‌ ମାଚୁଆ ତାମରକେ ବାସଙ୍ଗ୍‌କେ, ନେଉଂ ଶେଲା ମ୍ନା ମାଡିଙ୍ଗ୍‌ ଜାକ ନାଁ ଗୁଏସାଙ୍ଗ୍‌କୁଏ ଡିଙ୍ଗ୍‌ଚେ ନିଜର୍‌ ଆବା ଡୁଆ ୱେଚେ ଲାଃଲା । ଯିହୁଦା ବୁଟ ୱେକେ ଜେ, ଜଦି ମେଁନେ ବୟାଁଇଂ ରକମ୍‌ ଶେଲା ଡିଗ୍‌ ଗୁଏଃୱେଏ । ଏନ୍‌ସା ତାମର ମେଁନେ ଆବା ଡୁଆ ୱେଚେ ବାସାକେ,

12 ଗୁଲୁଏସି ୱେକ୍ନେ ଇଡ଼ିଂ, ଶୂୟନେ ସେଲାମ୍ବଃଅ ଯିହୁଦାନେ କୁନୁଏଃଡ଼େ ଗୁଏଃକେ; ତେନ୍‌ ଇଡ଼ିଂ ଯିହୁଦା ସାନ୍ତି ବାଚେଃ ଅଦୁଲ୍ଲମୀୟ ହୀରା ମ୍ନିକ୍ନେ ସାଙ୍ଗ ଏଃତେ ତିମ୍ନା‍ଅରିଆ ନିଜର୍‌ ମେଣ୍ଡା ଉଗ୍‌ବଃ ଗୁଆଃ ଜଗ୍‌ତ୍ଲାଗ୍‌ଣ୍ଡ୍ରେଇଂନେ ଡାଗ୍ରା ୱେକେ । 13 ଆତେନ୍‌ ବେଲା ଜାଣ୍ଡେ ମୁଇଂଜା ତାମରକେ ବାଲିର୍‌ ବିକେ । ପେମଙ୍ଗ୍‌ ମେଣ୍ଡା ଉଗ୍‌ବ ଗୁଆଃନ୍‌ସା ତିମ୍ନା‍ନ୍ନିଆ ୱେଲେଃଗେ । 14 ତାମର ସାପାବେଲା ଗୁଏସାଙ୍ଗ୍‌କୁଏ ପାଟାଇ ୱାଡ଼େଗ୍‌ ଡିଙ୍ଗ୍‌କେ । ତେସା ମେଁ ବିନ୍‌ନେ ପାଟାଇ ୱାଡ଼େଗ୍‌ଚେ ମେଁନେ ସାର୍‌ମୁଆଃକେ ବୁଡ଼ିଚେ ତିମ୍ନା‍ନେ ଗାଲି ପାକାପାକି ଐନମନ୍ୟା ଗାନେ ଜାଗାନ୍ୟା କଲେଃଗେ । ଡାଗ୍ଲା ମେଁ କେକେ, ଶେଲା ମ୍ନା ଡିଙ୍ଗ୍‌ଚେ ଡିଗ୍‌ ଆମେକେ ବିବା ଆଡିଙ୍ଗ୍‌କେ ଣ୍ଡୁ ।

15 ଆତେନ୍‌ ବେଲା ଯିହୁଦା ଆମେକେ କେଚେ ବେସ୍ୟା ଡାଗ୍‌ଚେ ବାବେକେ, ଡାଗ୍ଲା ମେଁ ସାର୍‌ମୁଆଃ ଡାବଗେ । 16 ତେସା ଯିହୁଦା ମେଁନେ ଡାଗ୍ରା ୱେଚେ ବାସଙ୍ଗ୍‌କେ, "ନାଁ ଏତେ ଆନେଙ୍ଗ୍‌ କୁଡ଼େଃମାଡ଼େଃ ଡିଙ୍ଗ୍‌ନେ ବିଲା ।" ମେଁ ନିଜର୍‌ନେ ମାଚୁଆ ଡାଗ୍‌ଚେ ମ୍ୟାଃ ଆଲେଃଗେ । ତାମର ବାସଙ୍ଗ୍‌କେ, "ନାଁ ଆନେଙ୍ଗ୍‌ ମେଃନି ନାବିଏ ?"

17 ଯିହୁଦା ବାସଙ୍ଗ୍‌କେ, "ନେଙ୍ଗ୍‌ନେ ଗିମିଃ ମାନ୍ଦା ବାନ୍ ଉଂମିଃ ମୁଇଂ ବେମ୍ୱିଏ ।" ତାମର ବାଲିର୍‌କେ, "ନେଙ୍ଗ୍‌ ଆତେନ୍‌ ରାଜି । ପର୍‌ତୁମ୍‌ ଉଂମିଃ ପାଙ୍ଗ୍‌ ଜାକ ବାନ୍ଦା ବିଃ ବଲା ।"

18 ଯିହୁଦା ବାସଙ୍ଗ୍‌କେ, ମେଃନି ପାର୍‌ମାନ୍‌ ମ୍ୱିଏ ? ତାମର ବାଲିର୍‌କେ, ନାଁନେ ବାରି ନେଙ୍ଗ୍‌ନେ ସୁତା, ବାରି ନ୍ତି ଡୁଡୁ ଆତ୍‌ବା ଯିହୁଦା ଆମେକେ ଆତେନ୍‌ ସାପା ବିଚେ କୁଡ଼େଃମାଡ଼େଃ ଡିଙ୍ଗ୍‌କେ, ଆତ୍‌ବା ମେଁ କୁଡ଼େଃମାଡ଼େଃ ଡିଙ୍ଗ୍‌ଲା ଗାଗ୍‌ଡ଼େ ଡିଙ୍ଗ୍‌ୱେକେ । 19 ଏନ୍‌ ଇଡ଼ିଙ୍ଗ୍‌ ତାମର ଡୁଆ ୱିଗ୍‌କେ, ବାରି ମେଁନେ ସାର୍‌ମୁଆଃ ବୁଡ଼ି ବଗେ ଆରି ଏନ୍‌ ଇଡ଼ିଙ୍ଗ୍‌ ମେଁ ବାର୍‌ମୁଇଂତର୍‌ ଗୁଏସାଙ୍ଗ୍‌କୁଏ ପାଟାଇ ୱାଡ଼େଗ୍‌କେ ।

20 ଏନ୍‌ ଇଡ଼ିଙ୍ଗ୍‌ ଯିହୁଦା ଆତେନ୍‌ ସେଲାମ୍ବୁଏଃ ବାନ୍‌ ପାର୍‌ମାନ୍‌ ଡିଂକ୍ନେ ଜିନିସ୍‌ ରାଙ୍ଗ୍‌ୱେ ନ୍‌ସା ନିଜର୍‌ ଅଦୁଲ୍ଲମୀୟ କୁଟୁମ୍‌ ଇରାନେବାନ୍‌ ଉଂମିଃ ବେବିଃକେ । ମାତର୍‌ ମେଁ ଆମେକେ କେ ଆୟାକେ ଣ୍ଡୁ । 21 ତେସା ମେଁ ଆତ୍‌ଡାଗ୍ରାନେ ରେମୁଆଁଇଂକେ ସାଲିଆକୁକେ, "ଐନମ ଗାଲି ଡାଗ୍ରା ମୁଡ଼ି ବେସ୍ୟା ଲେଃଗେ, ମେଁ ଆଣ୍ଡିକା ?" ରେମୁଆଁଇଂ ବାଲିର୍‌ଆର୍କେ, "ଆକ୍‌ଡାଗ୍ରା ମେଃଡିଗ୍‌ ବେସ୍ୟା ଆଲେଃ ଣ୍ଡୁ ।"

22 ତେସା ଯିହୁଦାନେ କୁଟୁମ୍‌ ଯିହୁଦା ଡାଗ୍ରା ଆଣ୍ଡେ ୱେଚେ ବାସଙ୍ଗ୍‌କେ, "ନେଙ୍ଗ୍‌ ଆତେନ୍‌ ସେଲାମ୍ବୁଏଃକେ ନ୍ନା‍ଅବାକେ ଣ୍ଡୁ; ବାରି ଆତ୍‌ଡାଗ୍ରାନେ ରେମୁଆଁଇଂକେ ନ୍‌ସାଲ୍ୟାଃକୁଲା, ମେଇଂ ବାଲିର୍‌ଆର୍କେ, ଆକ୍‌ଡାଗ୍ରା ମୁଡ଼ି ବେସ୍ୟା ଆଲେଃ ଣ୍ଡୁ ।"

23 ତେସା ଯିହୁଦା ବାସଙ୍ଗ୍‌କେ, "ମେଁ ଆଣ୍ଡିନେ ଜିନିସ୍‌ ବଗେ, ଆତେନ୍‌ ମେଁ ବଲେଃ । ନେ ମେଃନ୍‌ସା ଗିଆସ ନେଡିଙ୍ଗ୍‌ଏ । ନେ ଚାଏଁନେଡିଙ୍ଗ୍‌କେ, ଆମେକେ ମୁଇଂ ଉଂମିଃ ବିନ୍‌ସା ମାତର୍‌ ଆମେକେ ନେଅବାକେ ଣ୍ଡୁ । ଅକେନ୍‌ ଜତେସ୍ଟ ।"

24 ଗୁଲୁଏ ଞ୍ଜି ଆର୍କେ ୱେକ୍ନେ ଇଡ଼ିଙ୍ଗ୍‌, ଜାଣ୍ଡେ ମୁଇଂଜା ଯିହୁଦାକେ ବାସଙ୍ଗ୍‌କେ, "ନାଁ ଉଂଣ୍ଡେନେ ସେଲାମ୍ବୁଏଃ ତାମର ବେସ୍ୟା ରକମ୍‌ ଗାଗ୍‌ଡ଼େ ଲେଃଗେ ।" ଏନ୍‌ ଇଡ଼ିଙ୍ଗ୍‌ ଯିହୁଦା ବାସଙ୍ଗ୍‌କେ, "ଆମେକେ ବାଜାର୍‌ ରାଙ୍ଗ୍‌ପାଙ୍ଗ୍‌ଚେ ସୁଆନ୍ୟା ଆଃଗିପା ।"

25 ରେମୁଆଁଇଂ ତାମରକେ ବାଗୁଏ ନ୍‌ସା ୱେଆର୍କେ, ମାତର୍‌ ମେଁ ମେଁନେ ମାମାଡ଼େ ଡାଗ୍ରା ସାମୁଆଁ ବାଲିର୍‌ ବେକେ, "ଏନ୍‌ ସାପା ପାଟାଇ ଜାଣ୍ଡେନେ ମେଁ ଆନେଙ୍ଗ୍‌ ଗାଗ୍‌ଡ଼େ ଆଡିଙ୍ଗ୍‌ବକେ । ଏନ୍‌ ନେଙ୍ଗ୍‌ନେ ସୁତା ବାରି ଡୁଡୁ ଜାନେ ଆତେନ୍‌ ସାମୁଆଁ କେଲା ?"

26 ଆତ୍‌ବା ଯିହୁଦା ଆତେନ୍‌ ସାପା ଜିନିସ୍‌ ନେଙ୍ଗ୍‌ନେ ଡାଗ୍‌ଚେ ବାସଙ୍ଗ୍‌କେ, "ନେଙ୍ଗ୍‌ ବୁଲ୍‌ ଡିଙ୍ଗ୍‌ମ୍ୱକେ । ନେଙ୍ଗ୍‌ ପାର୍‌ମାନ୍‌ ଡିଙ୍ଗ୍‌ମ୍ୱକେ ଶେଲାକେ ବିନ୍‌ସା ମାତର୍‌ ଆତେନ୍‌ ଡିଙ୍ଗ୍‌ ନ୍ନାବକେ ।" ବାରି ଯିହୁଦା ମେଁନେ ଏତେ କାଲାଆଃ ସମ୍ପର୍କ ଆବକେ ଣ୍ଡୁ ।

27 ତାମରନେ ଜନମ୍‌ ଆଡିଙ୍ଗ୍‌ନେ ବେଲା ପିଙ୍ଗ୍‌ଚାକେ, ମେଇଂ କେଆର୍କେ ଜେ ମେଁ ଜାଆଁଲା ଜନମ୍‌ ଆଡିଙ୍ଗ୍‌ଏ । 28 ମେଁ ଉଡ଼ି ବେଲା ଜନମ୍‌ ଡିଙ୍ଗ୍‌କେ, ଆତେନ୍‌ ବେଲା ମୁଇଂ ଗଡ଼େଅନେ ନ୍ତି ତାର୍‌କେ, ଆତ୍‌ବା ନ୍‌ସାଃ ସାଃଣ୍ଡ୍ରେ ମେଁନେ ଆତେନ୍‌ ନ୍ତିନ୍ୟା ସିନ୍ଦୁର୍‌ ବାନାନେ ସୁତା ଗାଗ୍‌ଚେ ବାଲିର୍‌କେ, "ଏନ୍‌ ମ୍ନା ।" 29 ମାତର୍‌ ମେଁ ନିଜର୍‌ ନ୍ତି ଗୁବିଲା, କେଲାପା, ମେଁନେ ବୟାଁ ତାର୍‌କେ, ଆତ୍‌ବା ନ୍ସା ସାଣ୍ଡ୍ରେ ବାଲିର୍‌କେ, "ନାଁ ଜାବର୍‌ ବାବ୍‌ରେ ଟମେଗ୍‌ ନାବକେ ।" ତେସା ମେଁନେ ମ୍ନି ପେରସ୍‌ ବିଃକେ । 30 ଏନ୍‌ ଇଡ଼ିଙ୍ଗ୍‌ ବିନ୍‌ନେ ଗଡ଼େଅ ଜନମ୍‌ ଡିଙ୍ଗ୍‌କେ, ଏନ୍‌ ଗଡ଼େଅନେ ନ୍ତିନ୍ୟା ସିନ୍ଦୁର୍‌ ବାନାନେ ସୁତା ମେଁନେ ନ୍ତିନ୍ୟା ଲେଃଗେ, ମେଁ ମେଁନେ ମ୍ନି ସେରହ ବିକେ ।