ମନଃଶି ବାରି ଇଫ୍ରୟିମକେ ଆସିର୍ବାଦ୍
1 ଆତେନ୍ ସାପା ଗଟ୍ନା ଇଡ଼ିଙ୍ଗ୍ ଜାଣ୍ଡେ ମୁଇଂଜା ଯୋଷେଫକେ ବାସଙ୍ଗ୍ ବେକେ । ନାଁ ଆବା ଆଃସି ଲେଃକେ । ଆତ୍ବା ମେଁ ନିଜର୍ ମ୍ୱାକ୍ଲିଗ୍ ଉଂଡେ ମନଃଶି ବାରି ଇଫ୍ରୟିମକେ ସଙ୍ଗେ ସାଚେ ୱେକେ । 2 ଆତେନ୍ ବେଲା ଜାଣ୍ଡେ ଯାକୁବକେ ବାସଙ୍ଗ୍କେ, କେଲା, ନାଁଉଂ ଯୋଷେଫ ନାଁ ଡାଗ୍ରା ପାଙ୍ଗ୍ଲେଃକେ । ଆତ୍ବା ଇସ୍ରାଏଲ୍ ନିଜ୍କେ ଡାଟ୍ ଆଡିଙ୍ଗ୍ଚେ ସିଙ୍ଗ୍ଲାନ୍ୟା ତଡ଼୍ୟା କକେ । 3 ଏନ୍ଇଡ଼ିଙ୍ଗ୍ ଯାକୁବ ଯୋଷେଫକେ ବାସଙ୍ଗ୍କେ, "ସାପାଟୁ ବପୁନେ ପର୍ମେସର୍ କିଣାନ ଦେସ୍ନେ ଲୁସ୍ ମ୍ନିକ୍ନେ ଜାଗାନ୍ୟା ଆନେଙ୍ଗ୍ ଦର୍ସନ୍ ବିଃକେ, ପର୍ମେସର୍ ଆତ୍ଡାଗ୍ରା ଆନେଙ୍ଗ୍ ଆସିର୍ବାଦ୍ ଡିଙ୍ଗ୍କେ । 4 ପର୍ମେସର୍ ଆନେଙ୍ଗ୍ ବାସଙ୍ଗ୍କେ, କେଲା, ନେଙ୍ଗ୍ ନାନେ ପରିବାର୍କେ ମ୍ନା ଆଡିଙ୍ଗ୍ ମ୍ୱିଏ, ବାରି ନାବାନ୍ ଗୁଲୁଏ ରେମୁଆଁ ତିଆର୍ ଣ୍ଡିଙ୍ଗ୍ଏ । ନାନେ ବଂସକୁଲ୍କେ ମାଡାନେ କାଲ୍ନେ ଅଦିକାର୍ ନ୍ସା ଏନ୍ ଦେସ୍ ମ୍ୱିଏ ।"
5 "ବାରି ଏବେ ନାନେ ମ୍ୱାକ୍ଲିଗ୍ ଉଂଡେ ଲେଃକେ । ଏନ୍ ମ୍ୱାକ୍ଲିଗ୍ ଉଂଡେ ମିସର୍ନ୍ୟା ନେଙ୍ଗ୍ ପାଙ୍ଗ୍ନେ ସେନୁଗ୍ ଜନମ୍ ଡିଙ୍ଗ୍ଲେଃଆର୍ଗେ । ନାନେ ମ୍ୱାକ୍ଲିଗ୍ ଉଂଡେ ଇଫ୍ରୟିମ ବାରି ମନଃଶି ନେଙ୍ଗ୍ନେ ନିଜର୍ ଉଂ ରକମ୍ । ମେଇଂ ରୁବେନ ବାରି ଶିମୀୟୋନନେ ରକମ୍ ନେଙ୍ଗ୍ ନ୍ସା ଲେଃଆର୍କେ । 6 କ୍ମେଇଂନେ ଇଡ଼ିଙ୍ଗ୍ ନାନେ ମୁଃଡ଼ି ଉଙ୍ଗ୍ ଜନମ୍ ଡିଙ୍ଗ୍ଏ । ମେଇଂ ନାନେ ଡିଙ୍ଗ୍ଆର୍ଏ, ବାରି ମେଇଂନେ ବୟାଁଇଂନେ ଏତେ ମେଇଂ ସମ୍ପତି ବାଆର୍ଏ । 7 ପଦ୍ଦନ ଅରାମବାନ୍ କିଣାନ ଦେସ୍କେ ନେଙ୍ଗ୍ନେ ୱେନେ ବେଲା ରାହେଲ ଇଫ୍ରାଥାନ୍ୟା ଗାଲିନ୍ୟା ଗୁଏୱେକେ । ଆତେନ୍ସା ନେଙ୍ଗ୍ ଆମେକେ ଇଫ୍ରାଥାନ୍ୟା ବେଥଲିହିମନ୍ୟା ଆତି ମ୍ୱିକେ ।"
8 ଆରି ଇସ୍ରାଏଲ୍ ଯୋଷେଫନେ ଉଂଡେଇଂକେ କେଚେ ସାଲିଆକୁକେ, କ୍ମେଇଂ ଜାଣ୍ଡେ ?
9 ଆତ୍ବା ଯୋଷେଫ ଆବାକେ ବାସଙ୍ଗ୍କେ, କ୍ମେଇଂ ନେଙ୍ଗ୍ନେ ଉଂଡେ, ପର୍ମେସର୍ ଆକ୍ମେଇଂକେ ଏନ୍ ଦେସ୍ନ୍ୟା ଆନେଙ୍ଗ୍ ବିବକେ । ତେଲା ଜାକୁବ୍ ବାସଙ୍ଗ୍କେ, "କୁସାମୁତି ଡିଙ୍ଗ୍ଣ୍ଡିଂକେ, ଆକ୍ମେଇଂକେ ନେଙ୍ଗ୍ ଡାଗ୍ରା ରାଙ୍ଗ୍ପାଙ୍ଗ୍ଲା । ନେଙ୍ଗ୍ ଆକ୍ମେଇଂକେ ଆସିର୍ବାଦ୍ ଣ୍ଡିଙ୍ଗ୍ଏ ।" 10 ଜାକୁବ୍ ଜାବର୍ ଡକ୍ରା ଡିଙ୍ଗ୍ଲେଃଲା ଆମେକେ ନିମାଣ୍ଡା ମ୍ମୁଁଆଃ ତ୍ନା ଆଡିଂଗେ । ତେସା ଯୋଷେଫ ମେଁନେ ଉଂଣ୍ଡେଇଂକେ ଇସ୍ରାଏଲ ପାକା ୱାରାଙ୍ଗ୍ୱେକେ । ଜାକୁବ୍ ଆମେଇଂକେ ବଏନ୍ତାକେ ବାରି କଣ୍ଡକେ । 11 ଏନ୍ଇଡ଼ିଙ୍ଗ୍ ଇସ୍ରାଏଲ୍ ଯୋଷେଫକେ ବାସଙ୍ଗ୍କେ, "ନେଙ୍ଗ୍ ଅଃନାଡିଗ୍ ବାବେ ନ୍ନାଲେଃଗେ, ନେଙ୍ଗ୍ ଆନାକେ ବାରି କିକେ ନ୍ନାୟାଏ ଣ୍ଡୁ । ମାତର୍ ପର୍ମେସର୍ ଆଃକେ ବିକେ, ଆନାକେ ବାରି ନାଉଂଇଂକେ ।" 12 ଏନ୍ଇଡ଼ିଙ୍ଗ୍ ଯୋଷେଫ ଆବାନେ ବୁଲୁବାନ୍ ଆମେଇଂକେ ରାଙ୍ଗ୍ୱେଚେ ନିଜେ ମୁଣ୍ଡିଆ ବଗ୍ଚେ ସାର୍ଲକେ ।
13 ଯୋଷେଫ ଆତେନ୍ ମ୍ୱାୟାକେ ରାଙ୍ଗ୍ୱେଚେ ନିଜର୍ ଦକିନ ନ୍ତିନ୍ୟା ଇଫ୍ରୟିମକେ ସାଚେ ଇସ୍ରାଏଲ୍ନେ ଞ୍ଚଙ୍ଗ୍ନ୍ତି ପାକା ବାରି ଞ୍ଚଙ୍ଗ୍ନ୍ତି ନ୍ତିନ୍ୟା ମନଃଶିକେ ସାଚେ ଜାକୁବ୍ନେ ବେସ୍ୟା ପାକା ଆକ ବିକେ । 14 ଇସ୍ରାଏଲ୍ ନିଜର୍ ବେସ୍ୟାତି ଲମ୍ୱେଚେ ଡାଆଁନେ ଇଫ୍ରୟିମନେ ବାଆଃ ଆଡ଼ାତ୍ରା ବକେ, ଏନ୍ଇଡ଼ିଙ୍ଗ୍ ଜାକୁବ୍ ମେଁନେ ଞ୍ଚଙ୍ଗ୍ତି ମନଃଶିନେ ବାଆଃ ଆଡ଼ାତ୍ରା ବକେ, ଜାଣ୍ଡେକି ସେନୁଗ୍ ଜନମ୍ ଡିଙ୍ଗ୍ଲେଃଗେ । 15 ଆରି ଜାକୁବ୍ ଯୋଷେଫକେ ଆସିର୍ବାଦ୍ ଡିଙ୍ଗ୍ଚେ ବାସଙ୍ଗ୍କେ, "ଆଣ୍ଡିନେ ପର୍ମେସର୍ନେ ସାମ୍ନେ ନେଙ୍ଗ୍ନେ ନ୍ତା ଞ୍ଜା ଅବ୍ରହାମ ବାରି ଇସ୍ହାକ୍ ୱେ ୱିଗ୍ ଡିଙ୍ଗ୍ଲେଃଆର୍ଗେ । ଆଣ୍ଡିନେ ପର୍ମେସର୍ ଜନମ୍ବାନ୍ ଏଃ ଜାକ ଆନେଙ୍ଗ୍ ଜତନ୍ ଡିଙ୍ଗ୍ବକେ । 16 ମେଁ ଦୁତ୍ ଲେଃଗେ, ଜାଣ୍ଡେ ଆନେଙ୍ଗ୍ ବିପଦ୍ବାନ୍ ରକ୍ୟା ଡିଙ୍ଗ୍ବକେ । ନେଙ୍ଗ୍ ପାର୍ତନା ଡିଙ୍ଗ୍ଣ୍ଡିଂକେ, ମେଁ ଏନ୍ ଗଡ଼େଇଂକେ ଆସିର୍ବାଦ୍ ଡିଙ୍ଗ୍ଲେଃ । ମେଇଂ ନେଙ୍ଗ୍ ମ୍ନିରେ ବାରି ନେଙ୍ଗ୍ନେ ନ୍ତା ଞ୍ଜା ଅବ୍ରହାମ ବାରି ଇସ୍ହାକ୍ନେ ମ୍ନି ସାଃଆର୍ଏ । ନେଙ୍ଗ୍ ପାର୍ତନା ଡିଙ୍ଗ୍ଣ୍ଡିଂକେ, ମେଇଂ ମ୍ନା ଡିଙ୍ଗ୍ଆର୍ଲେଃ ବାରି ଦେସ୍ ମେଇଂନେ ପରିବାର୍ ବାନ୍ ଜାବର୍ ରେମୁଆଁ ଡିଙ୍ଗ୍ୱେଏ ।"
17 ଯୋଷେଫ ଇଫ୍ରୟିମନେ ବାଡ଼େକେ ବାସଙ୍ଗ୍କେ, ଆବା ଦେକ୍ରକମ୍ ଣ୍ଡୁ ଆକେନ୍ ଡିଂଡିଂକେ ମ୍ନା ଉଂଡେ ଆକେନ୍ ଆଡ଼ାତ୍ରା ଇଞ୍ଚଙ୍ଗ୍ନ୍ତି ବଏ । 18 ଯୋଷେଫ ମେଁନେ ଆବାକେ ବାସଙ୍ଗ୍କେ, "ନାଁ ନାନେ ଞ୍ଚଙ୍ଗ୍ନ୍ତି ବୁଲୁଅରିଆ ନାବକେ । ମନଃଶି ସେନୁଗ୍ ଜନମ୍ ଡିଙ୍ଗ୍କ୍ନେ ଗଡ଼େଅ । ନାଁ ନାନେ ଞ୍ଚଙ୍ଗ୍ନ୍ତି ମନଃଶିନେ ବାଆଃନ୍ୟା ବ ।"
19 ମାତର୍ ମେଁନେ ଆବା ଇକ୍ଚା ମାଡିଙ୍ଗ୍ଚେ ବାସଙ୍ଗ୍କେ, "ଅ ଉଂ, ଆତେନ୍ ନେଙ୍ଗ୍ ମ୍ୟାଃନ୍ଲେ । ନେଙ୍ଗ୍ ଡିଗ୍ ମ୍ୟାଃନ୍ଲେକେ, ମେଁନେ ଡିଗ୍ ମୁଇଂ କୁଟୁମ୍ ଡିଙ୍ଗ୍ଏ, ବାରି ମେଁ ମ୍ନା ଡିଙ୍ଗ୍ଏ । ମାତର୍ ନାନେ ଡାଆଁନେ ଗଡ଼େଅ ମେଁବାନ୍ ଜାବର୍ ମ୍ନା ଡିଙ୍ଗ୍ଏ ବାରି ମେଁନେ ବଂସ ଜାବର୍ ଡିଙ୍ଗ୍ଏ ।"
20 ତେସା ଜାକୁବ୍ ଆତେନ୍ ମ୍ୱାୟାକେ ଆସିର୍ବାଦ୍ ଡିଙ୍ଗ୍ଚେ ବାସଙ୍ଗ୍କେ, "ଉଡ଼ିବେଲା ଇସ୍ରାଏଲ୍ନେ ରେମୁଆଁଇଂ ବିନ୍ଣ୍ଡ୍ରେକେ ଆସିର୍ବାଦ୍ ଡିଙ୍ଗ୍ଆର୍ଏ, ମେଇଂ ନାନେ ମ୍ନି ସାଃଆର୍ଏ । ମେଇଂ ବାସଙ୍ଗ୍ଆର୍ଏ, ଇଫ୍ରୟିମ ବାରି ମନଃଶି ରକମ୍ ପର୍ମେସର୍ ଆପେକେ ଡିଙ୍ଗ୍ଲେଃ ।" ଦେକ୍ରକମ୍ ଜାକୁବ୍ ମନଃଶିବାନ୍ ଇଫ୍ରୟିମକେ ମ୍ନା ଆଃଡିଙ୍ଗ୍କେ ।
21 ଏନ୍ଇଡ଼ିଙ୍ଗ୍ ଇସ୍ରାଏଲ୍ ଯୋଷେଫକେ ବାସଙ୍ଗ୍କେ, "ନେଙ୍ଗ୍ନେ ଗୁଏନେ ବେଲା ପିଙ୍ଗ୍ଚା ଡିଙ୍ଗ୍କେ । ପର୍ମେସର୍ ଆପେକେ ସାହା ଡିଙ୍ଗ୍ଲେ । ମେଁ ଆପେକେ ବାର୍ମୁଇଂତର୍ ପେନେ ନ୍ତା ଞ୍ଜାଇଂନେ ଦେସ୍ନ୍ୟା ରାଙ୍ଗ୍ୱେଏ । 22 ନେଙ୍ଗ୍ ଆନାକେ ମେଃନେ ମ୍ୱିକେ, ଆଣ୍ଡିନେ କି ନାଁ ବୟାଁଇଂକେ ନାବିକେ ଣ୍ଡୁ, ନେଙ୍ଗ୍ ନିଜର୍ କାଣ୍ଡା ବାରି ଙାୟାଃବାନ୍ ଇମୋରୀୟଇଂନେ ନ୍ତିବାନ୍ ଆଣ୍ଡିନେ ବାଗ୍ ବାନ୍ଲେଃକେ, ନାନେ ବୟାଁଇଂ ବାଟା ଆତେନ୍ ଜାବର୍ ବାଗ୍ ଆନାକେ ମ୍ୱିକେ ।"
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)