1 ଯୋଷେଫକେ ମିସର୍‌ ଦେସ୍‌ନ୍ନିଆ ରାଙ୍ଗ୍‌ପାଙ୍ଗ୍‌ଲା, ଫାରୋନେ ମୁଇଂ କାମ୍‌ ଡିଂଣ୍ଡ୍ରେ, ମିସର୍ ଦେସ୍‌ନେ ପୋଟିଫର ମ୍ନିକ୍ନେ ରକ୍ୟାଡିଙ୍ଗ୍‌ଣ୍ଡ୍ରେ ସେନାପତି ଆମେକେ ଡୁଂପାଙ୍ଗ୍‌ବକ୍‌ଣ୍ଡ୍ରେ ଇଶ୍ମାୟେଲ୍‌ଣ୍ଡ୍ରେଇଂନେବାନ୍‌ ଯୋଷେଫକେ ବିଆର୍‌ବଗେ । 2 ମାତର୍‌ ମାପ୍‌ରୁ ଯୋଷେଫନେ ସାହା ଡିଙ୍ଗ୍‌କେ, ଏନ୍‌ସା ଯୋଷେଫ ମୁଇଂ ବାଗ୍ୟବାନ୍‌ ରେମୁଆଁ ଡିଙ୍ଗ୍‌କେ; ବାରି ମେଁ ନିଜର୍‌ ମିସର୍ ଦେସ୍‌ନେ ସାକାର୍‌ନେ ଡୁଆ ବାସାକେ । 3 ପୋଟୀଫର କେକେ ଜେ ମାପ୍‌ରୁ ଯୋଷେଫକେ ସାଇଜ ଡିଙ୍ଗ୍‌ଡିଂକେ । ଆରି ମାପ୍‌ରୁ ଯୋଷେଫନେ ସାହା ଲେଃଗେସା ମେଁ ଆଣ୍ଡିନେ କାମ୍‌ ଡିଙ୍ଗ୍‌କେ, ଆତେନ୍‌ ସିଦ୍‌ ଡିଂଡିଂଗେ । 4 ପୋଟୀଫର ଯୋଷେଫକେ ବାଚେ ଜାବର୍‌ ସାର୍ଦା ଡିଙ୍ଗ୍‌କେ । ମେଁ ଯୋଷେଫକେ ନିଜର୍‌ ଡୁଆ ସାକାର୍‌ ଆଡିଙ୍ଗ୍‌ଚେ ମେଁନେ ନ୍ତିନ୍ୟା ସାପା ଅପେଃ ବିକେ । 5 ଦେକ୍‌ରକମ୍‌ ମେଁ ଯୋଷେଫକେ ନିଜର୍‌ ଡୁଆ ବାରି ସାପାନେ ସାକାର୍‌ ଆଡିଙ୍ଗ୍‌କ୍ନେ ଦିନ୍‌ବାନ୍‌ ମାପ୍‌ରୁ ଯୋଷେଫନେ ନ୍‌ସା ଆତେନ୍‌ ମିସର୍ ଦେସ୍‌ନେ ରେମୁଆଁନେ ଡୁଆ ଆଡ଼ାତ୍ରା ଆସିର୍ବାଦ୍‌ ଡିଙ୍ଗ୍‌କେ । ଡୁଆ ବାରି ଲିଜ ସାପା ସମ୍ପତି ଆଡ଼ାତ୍ରା ମାପ୍‌ରୁନେ ଆସିର୍ବାଦ୍‌ ବାକେ ।

6 ପୋଟୀଫର ଯୋଷେଫକେ ସାପା ଦାଇତ୍‌ ବିଚେ ମେଁ ବାରି ମେଁନେ ଚଙ୍ଗ୍‌ନେ ଆନ୍ତାର୍‌ଚେ ମେଃଡିଗ୍‌ ବିସଏ ନ୍‌ସା ତେରେପେତେ ଆଡିଙ୍ଗ୍‌କେ ଣ୍ଡୁ । ଯୋଷେଫ କେନ୍‌ସା ଜାବର୍‌ ସୁନ୍ଦର୍‌ ଲେଃଗେ । 7 ଉଡ଼ିସି ଇଡ଼ିଙ୍ଗ୍‌ ପୋଟୀଫରନେ ସେଲାମ୍ବୁଏଃ ଯୋଷେଫକେ ନଜର୍‌ ତ୍ଲାଗ୍‌ ନ୍‌ସା ଲାଗେକେ । ମେଃସୁଆ ଆତେନ୍‌ ସେଲାମ୍ବୁଏଃ ଯୋଷେଫକେ ବାଲିର୍‌କେ, "ନେଙ୍ଗ୍‌ ଏତେ ଡୁଲେଗ୍‌ ।" 8 ମାତର୍‌ ଯୋଷେଫ ମନା ଡିଙ୍ଗ୍‌କେ । ମେଁ ବାସଙ୍ଗ୍‌କେ, "କେଲା, ଏନ୍‌ ଡୁଆ ମେଃନି ଲେଃଗେ ନେଙ୍ଗ୍‌ ସାକାର୍‌ ଆତେନ୍‌ ଇସାବ୍‌ ଆଡିଙ୍ଗ୍‌ ଣ୍ଡୁ । ମେଁ ନେଙ୍ଗ୍‌ ନ୍ତିନ୍ୟା ସାପା ସର୍ପେ ବିଃବକେ । 9 ଏନ୍‌ ଡୁଆ ମେଁ ଆନେଙ୍ଗ୍‌ ମେଁ ଏତେ ସମାନ୍‌ ଆଡିଙ୍ଗ୍‌ ବକେ । ନେଙ୍ଗ୍ ମେଁନେ ସେଲାମ୍ବୁଏଃ ଏତେ ପାପ୍‌ ଡିଙ୍ଗ୍‌ ନ୍ନାୟା ଣ୍ଡୁ । ଏନ୍‌ ବୁଲ୍‌ ଡିଙ୍ଗ୍‌ଏ, ଏନ୍‌ ପର୍‌ମେସର୍‌ନେ ବିରଦ୍‌ରେ ପାପ୍ ଡିଙ୍ଗ୍‌ଏ ।" 10 ଆତେନ୍‌ ସେଲାମ୍ବୁଏଃ କାଲାହା ଆମେକେ ଦେକ୍‌ ରକମ୍‌ ବାଲିର୍‌ଏ । ମାତର୍‌ ଯୋଷେଫ ମେଁନେ ଏତେ ଡୁଲେଗ୍‌ ନ୍‌ସା କାଲାଆଃ ମନା ଡିଙ୍ଗ୍‌ମ୍ୟାଃକେ ।

11 ମେଃସୁଆ ଯୋଷେଫ ଡୁଆ ବିତ୍ରେ ନିଜର୍‌ କାମ୍‌ ଡିଙ୍ଗ୍‌ ନ୍‌ସା ୱେକେ । ଆତେନ୍‌ ବେଲା ମେଁ ମୁଇଂଜା ଆଃ ଆତେନ୍‌ ଡୁଆ ବିତ୍ରେ ଲେଃଗେ । 12 ଯୋଷେଫ ସାକାର୍‌ନେ ସେଲାମ୍ବୁଏଃ ମେଁନେ ସକାକେ ସାଚେ ଗୁଚେ ବାଲିର୍‌କେ, "ନେଙ୍ଗ୍‌ ଏତେ ଡୁଲେଗ୍‌ ।" ମାତର୍‌ ଯୋଷେଫ ଆତେନ୍‌ ଡୁଆବାନ୍‌ ରାତେଗ୍‌ଚେ ଲାଗ୍‌ଡକେ, ମାତର୍‌ ମେଁନେ ନ୍ତିନ୍ୟା ମେଁନେ ସକା ଲେଃୱେଗେ । 13 ଉଡ଼ିବେଲା ଆତେନ୍‌ ସେଲାମ୍ବୁଏଃ ଯୋଷେଫକେ ନିଜର୍‌ ନ୍ତିନ୍ୟା ନିଜର୍‌ ସକା ଆନ୍ତାର୍‌ଚେ ବାଏରେ ଲାଗ୍‌ଡନେ କେକେ, 14 ଆତେନ୍‌ ଡୁଆନେ ବାଏରେନେ ରେମୁଆଁଇଂକେ ୱାଚେ ମେଁ ବାଲିର୍‌କେ, କେଲାପା, ମେଁ ନେଙ୍ଗ୍‌ ଏତେ ଡୁଲେଗ୍‌ ନ୍‌ସା ମୁଇଂ ଏବ୍ରୀୟକେ ରାଙ୍ଗ୍‌ପାଙ୍ଗ୍‌ ବକେ । ମେଁ ବିତ୍ରେ ଗାଚେ ନେଙ୍ଗ୍‌ ଏତେ ଡୁଲେଗ୍‌ ନ୍‌ସା ବାସଙ୍ଗ୍‌କେ । ନେଙ୍ଗ୍‌ ଜାବର୍‌ ୱାସାର୍‌ଚେ ଉଁୱାକେ । 15 ନେଙ୍ଗ୍‌ ୱାସାର୍‌ଚେ ୱାନେ ଅଁଚେ ମେଁ ନିଜର୍‌ ସକା ନେଙ୍ଗ୍‌ ଡାଗ୍ରା ଆନ୍ତାର୍‌ଚେ ବାଏରେ ଲାଗ୍‌ଡକେ ।

16 ଏନ୍‌ ଇଡ଼ିଙ୍ଗ୍‌ ମେଁ ଆତେନ୍‌ ସକାକେ ମେଁନେ ଆଣ୍ଡା ପାଙ୍ଗ୍‌ ଜାକ ମେଁନେ ଡାଗ୍ରା ବଗେ । 17 ମେଁ ମେଁନେ ଆଣ୍ଡାକେ ଆତେନ୍‌ ସାପା ସାମୁଆଁଇଂ ବାଲିର୍‌କେ, "ନାଁ ଆଣ୍ଡିନେ ଏବ୍ରୀୟ ଚାକର୍‌କେ ରାଙ୍ଗ୍‌ପାଙ୍ଗ୍‌ ନାବକେ, ମେଁ ଆନେଙ୍ଗ୍‌ କୁଡ଼େଃମାଡ଼େଃ ନ୍‌ସା ନେଙ୍ଗ୍‌ ଡାଗ୍ରା ପାଙ୍ଗ୍‌ଲେଃଗେ । 18 ମାତର୍‌ ମେଁ ଉଡ଼ିବେଲା ନେଙ୍ଗ୍‌ ଡାଗ୍ରା ପାଙ୍ଗ୍‌କେ, ନେଙ୍ଗ୍‌ ୱାସାର୍‌ ମ୍ୱିଲା, ମେଁ ମେଁନେ ସକା ଆନ୍ତାର୍‌ଚେ ବାଏରେ ଲାଗ୍‌ଡକେ ।"

19 ଯୋଷେଫନେ ସାକାର୍‌ ମେଁନେ ସେଲାମ୍ବୁଏଃନେବାନ୍‌ ଏନ୍‌ ସାପା ସାମୁଆଁ ଅଁକେ ଆରି ମେଁ ଜାବର୍‌ ରିସା ଡିଙ୍ଗ୍‌କେ । 20 ଆତ୍‌ଡାଗ୍ରା ମୁଇଂ ଜେଲ୍‌ ଡୁଆ ଲେଃଗେ, ଯୋଷେଫ୍‌ନେ ସାକାର୍‌ ଆମେକେ ଡୁଙ୍ଗ୍‌ୱେଚେ ଇଃସାଙ୍ଗ୍‌ଇଂକେ ବନ୍ଦି ଆଃଡିଂକ୍ନେ ଡୁଆଅରିଆ ବନ୍ଦି ଆଃଡିଂକେ । ତେସା ଯୋଷେଫ ଆତେନ୍‌ ଜେଲ୍‌ ଡୁଆ ଲେଃଗେ । 21 ମାତର୍‌ ମାପ୍‌ରୁ ଯୋଷେଫ ଏଃତେ ଲେଃଗେ । ମାପ୍‌ରୁ ମେଁନେ ଆଡ଼ାତ୍ରା ଦୟା ଡିଙ୍ଗ୍‌ଚେ ଜେଲ୍‌ ଡୁଆ ଉର୍‌ସାଙ୍ଗ୍‌ଣ୍ଡ୍ରେନେ ସାମ୍‌ନାରେ ଆମେକେ ଆସିର୍ବାଦ୍‌ନେ ଗଡ଼େଅ ଆଡିଙ୍ଗ୍‌କେ । 22 ଆତ୍‌ବା ଆତେନ୍‌ ଜେଲ୍‌ ଡୁଆ ଉର୍‌ସାଙ୍ଗ୍‌ଣ୍ଡ୍ରେଇଂ ବନ୍ଦି ଲେଃକ୍ନେ ସାପା ବନ୍ଦି ରେମୁଆଁଇଂକେ ସାମ୍ୱାଲେ ନ୍‌ସା ଯୋଷେଫନେ ନ୍ତିନ୍ୟା ସର୍ପେ ବିଃଆର୍କେ । ବାରି ମେଇଂ ମେଃନି ଡିଙ୍ଗ୍‌ଆର୍କେ, ଆତେନ୍‌ ସାପାନେ ସାକାର୍‌ ମେଁ ଡିଙ୍ଗ୍‌କେ । 23 ଜେଲ୍‌ ଡୁଆ ଉର୍‌ସାଙ୍ଗ୍‌ଣ୍ଡ୍ରେ ଯୋଷେଫନେ ନ୍ତିବାନ୍‌ ମେଃଡିଗ୍‌ ବିସଏରେ ମ୍ମୁଆଃ ଆତ୍ଲାଗ୍‌ ଆର୍କେ, ଡାଗ୍ଲା ମାପ୍‌ରୁ ମେଁନେ ଏତେ ଲେଃଗେ । ବାରି ମେଁ ମେଃଡିଗ୍‌ ଡିଙ୍ଗ୍‌ଏ, ମାପ୍‌ରୁ ଆତେନ୍‌ ସିଦ୍‌ ଆଃଡିଙ୍ଗ୍‌କେ ।