ଆଦି 49

ଯାକୁବ ମେଁନେ ଉଂଣ୍ଡେଇଂକେ ଆସିର୍ବାଦ୍‌ ଡିଙ୍ଗ୍‌କେ

1 ଆରି ଯାକୁବ ମେଁନେ ଉଂଣ୍ଡେଇଂକେ ୱାଚେ ବାସଙ୍ଗ୍‌କେ, "ପେଇଂ ମୁଇଂଅରିଆ ଡିଙ୍ଗ୍‌ପା । ସାରାସାରି ବେଲା ପେନେ ଆଡ଼ାତ୍ରା ମେଃନି ଗଟେଏ, ଆତେନ୍‌ ଆପେକେ ବାସଙ୍ଗ୍‌ଣ୍ଡିଂକେ । 2 ଅ ଯାକୁବନେ ଉଂଣ୍ଡେଇଂ ମୁଇଂଅରିଆ ଡିଙ୍ଗ୍‌ଚେ ନେଙ୍ଗ୍‌ ସାମୁଆଁ ଅଁପା । ପେ ପେନେ ଆବା ଇସ୍ରାଏଲନେ ସାମୁଆଁ ଅଁପା ।"

ରୁବେନ୍‌

3 "ଅ ନେଙ୍ଗ୍‌ନେ ପର୍‌ତୁମ୍‌ ଉଂ ରୁବେନ୍‌, ନାଁ ନେଙ୍ଗ୍‌ ପର୍‌ତୁମ୍‌ ଜନମ୍‌ ନାଡିଙ୍ଗ୍‌କ୍ନେ ଉଂ । ନାଁ ନେଙ୍ଗ୍‌ନେ ସକତ୍‌ନେ ପର୍‌ତୁମ୍‌ ଚୁଚୁ; ବାରି ନେଙ୍ଗ୍‌ନେ ଗଡ଼େଇଂ ବିତ୍ରେ ନାଁ ସାପାବାନ୍‌ ସନ୍‌ମାନିତ ବାରି ବପୁ ନାଲେଃକେ । 4 ମାତର୍‌ ନାନେ ରୁପ୍‌ ବନ୍ୟା ରକମ୍‌ ଲେଃଗେ, ନାଁ ୱେ ନାୟାକେ ଣ୍ଡୁ । ନାଁନେ ମ୍ନାଃ ଆଲେଃ ଣ୍ଡୁ । ଡାଗ୍ଲା ନାଁ ନିଜର୍‌ ଆବା ଡୁଲେଗ୍‌ନେ ଡାଗ୍ରା ନାୱେକେ । ତେଲା ଆତେନ୍‌ ଅସୁଚି ନାଡିଙ୍ଗ୍‌କେ, ମେଁ ନିଂନେ ସିଙ୍ଗ୍‌ଲା‍ଅରିଆ ୱେକେ ।"

ଶିମୀୟୋନ ଆରି ଲେବୀ

5 ଶିମୀୟୋନ ବାରି ଲେବୀ ମ୍ୱାୟା ସାଙ୍ଗ । ମେଇଂନେ କାଣ୍ଡା କାରାପ୍‌ କାଣ୍ଡା । 6 ମେଇଂ ଚୁପ୍‌ଚାପ୍‌ନା କରାପ୍‌ ଚିନ୍ତା ଡିଙ୍ଗ୍‌ଆର୍‌ଏ । ଅ ନେଙ୍ଗ୍‌ନେ ଜିବନ୍‌ ମେଇଂନେ ଚୁପ୍‌ଚାପ୍‌ନା କୁଟ୍‌ ଚିନ୍ତା‍ଅରିଆ ଆଗାଗେ । ମେଇଂନେ କୁକପାର୍‌ନ୍ୟା ଆମିସେଗେ, ଡାଗ୍ଲା ମେଇଂ ରିସା ଲେଃଗେସାଃ ରେମୁଆଁଇଂକେ ବାଗୁଏଆର୍‌କେ ବାରି ମେଇଂନେ ସାର୍ଦା ନ୍‌ସା ଅରେଃଇଂକେ ବାଗୁଏଃଆର୍କେ । 7 ମେଇଂନେ ରିସା ଅବିସାପ୍‌ ଡିଙ୍ଗ୍‌ଲେ । ଡାଗ୍ଲା ଆତେନ୍‌ ଜାବର୍‌ ଲେଃଗେ । ମେଇଂନେ ରିସା ଅବିସାପ୍‌ ଡିଙ୍ଗ୍‌ଲେ, ଡାଗ୍ଲା ଆତେନ୍‌ ନିସ୍ଟୁର୍‌ ଲେଃଗେ । ନେଙ୍ଗ୍‌ ଯାକୁବ ବଂସକୁଲ୍‌ ବିତ୍ରେ ଆମେଇଂକେ ବାଗ୍‌ ଣ୍ଡିଙ୍ଗ୍‌ଏ । ବାରି ଇସ୍ରାଏଲ ବିତ୍ରେ ଚିନ୍‌ବିନ୍‌ ଣ୍ଡିଙ୍ଗ୍‌ଏ । 8 ଯିହୁଦା, ନାବୟାଁଇଂ ନାନେ ପ୍ରସଂସା ଡିଙ୍ଗ୍‌ଆର୍‌ଏ । ନାଁ ନାନେ ସତ୍ରୁଇଂକେ ନାଜିତେକେ । ନାବୟାଁଇଂ ଆନାକେ ସାର୍‌ଲ ଆର୍‌ଏ । 9 ଯିହୁଦା ମୁଇଂ ଉଙ୍ଗ୍‌ ସିଂଅଁ ରକମ୍‌ ଲାଏଃଗେ । ଅ ନେଙ୍ଗ୍‌ନେ ଉଂଡେ, ନାଁ ନାନେ ସିକାରିକେ ବାଗୁଏଃନାବକେ । ମେଁ ପୁଣ୍ଡେ ନ୍‌ସା ଗୁଣ୍ଡ୍‌ଲି ବିଃକେ । ମେଁ ସିଂଅଁ ବାରି ଡିଆ ସିଂଅଁନେ ନ୍ୟାୟ୍ ଡୁଲେଗ୍‌ ବିଃକେ । ଜାଣ୍ଡେଃ ଆମେକେ ଆଃତଡ଼୍ୟାଃଏ ? 10 ଶୀଲୋନେ ପାଙ୍ଗ୍‌ ଜାକ ଯିହୁଦାବାନ୍‌ ଜେଲ୍‌ ଡୁଆ ବାରି ମେଁନେ ଞ୍ଚଅରିଆ ଡିଗ୍‌ ବିଚାର୍‌ ଡିଂଣ୍ଡ୍ରେନେ ଡୁଡୁ ଆୱେ ଣ୍ଡୁ । ମେଁ ଡାଗ୍ରା ରେମୁଆଁଇଂ ଅଦିକାର୍‌ ସାମୁଆଁ ବାସଙ୍ଗ୍‌ଆର୍‌ଏ । 11 ମେଁ ଅଙ୍ଗୁର୍‌ ସ୍ଲାଃ ଡାଗ୍ରା ନିଜର୍‌ ଉଂଗଦକେ ଗାଗ୍‌ଏ । ମେଁ ନିମାଣ୍ଡା ଅଙ୍ଗୁର୍‌ ସ୍ଲାଃ ଡାଗ୍ରା ନିଜର୍‌ ଡିଆ ଗଦ ଉଂଡେକେ ଗାଗ୍‌କେ । ମେଁ ଅଙ୍ଗୁର୍‌ ରସ୍‌ ଏଃତେ ନିଜେ ସାଃକ୍ନେ ସକା ବାରି ନିଜର୍‌ ଅଡ଼େଗ୍‌କ୍ନେ ସକା ତାଣ୍ଡ୍ୟାଏ । 12 ମେଁନେ ମ୍ମୁଆଃ ଅଙ୍ଗୁର୍‌ ରସ୍‌ବାନ୍‌ ଜାବର୍‌ ଚି ବାରି ମେଁନେ ଗ୍ନି ତ୍ରାଡ଼୍ୟାବାନ୍‌ ଜାବର୍‌ ତୁଲୁଏ ଡିଙ୍ଗ୍‌ଏ । 13 ସବୂଲୂନ୍‌ କେଣ୍ଡିଆ ଆଡ଼ା ବାସାଏ । ମେଁ ଜାହାଜ୍‌ ରିସିଙ୍ଗ୍‌ନେ ବନ୍ଦର ଡିଙ୍ଗ୍‌ଏ । ବାରି ସୀଦୋନ ଜାକ ମେଁନେ ଅଦିକାର୍‌ ସିମା ଡିଂଏ । 14 ଇଷାଖର ଗଦ ରକମ୍‌, ମେଁ ମେଣ୍ଡା ସାଲ୍‌ ବିତ୍ରେ ଡୁଲେଗ୍‌ଲା । 15 ମେଁ ପୁଣ୍ଡେନେ ଜାଗାକେ ନିମାଣ୍ଡା ବାରି ଦେସ୍‌କେ ସୁନ୍ଦର୍‌ କେକେ । ଏନ୍‌ ଇଡ଼ିଙ୍ଗ୍‌ ମେଁ ଜାବର୍‌ ଲିଗିଙ୍ଗ୍‌ ଡୁଙ୍ଗ୍‌ନେ ଇକ୍‌ଚା ଡିଙ୍ଗ୍‌କେ । ମେଁ କସ୍ଟ କାମ୍‌ ଡିଙ୍ଗ୍‌ନ୍‌ସା ଚାକର୍‌ ଡିଙ୍ଗ୍‌କେ । 16 "ଦାନ ଇସ୍ରାଏଲ ବିନ୍‌ ବିନ୍‌ନେ ବଂସକୁଲ୍‌ ସମାନ୍ ଡିଙ୍ଗ୍‌ଚେ ନିଜର୍‌ ନିଜର୍‌ ରେମୁଆଁଇଂନେ ବିଚାର୍‌ ଡିଙ୍ଗ୍‌ଏ । 17 ଦାନ ଗାଲିପାକା ବୁବଃ ରକମ୍‌ ବାରି ଗାଲିଅରିଆ ବିସ୍‌ ଲେଃକ୍ନେ ବୁବ ରକମ୍‌ । ଜାଣ୍ଡେ କି ଗଡ଼ାଇଂନେ ଞ୍ଚକେ ଗଗ୍‌ଟାଃଏ, ଆଣ୍ଡିଡାଗ୍ରା ଗଡ଼ାନ୍ୟା ଅଲେଗ୍‌ଣ୍ଡ୍ରେ ତୁବନ୍ୟା ଲଃଆର୍‌ଏ । 18 ଅ ମାପ୍‌ରୁ, ନେଙ୍ଗ୍‌ ନାଁ ବାନ୍‌ ଉଦାର୍‌ ବାନ୍‌ସା ଉର୍‌ ନ୍‌ଲେକେ ।" 19 "ଡଙ୍ଗାରେଇଂ ଗାଦକେ ଆକ୍ରମନ୍‌ ଡିଂଆର୍‌ଏ । ମାତର୍‌ ଗାଦ୍‌ ଆମେଇଂକେ ପ୍ଲା ପାକା ଆକ୍ରମନ୍‌ ଡିଙ୍ଗ୍‌ଏ ।"

20 "ଆଶେର ନିମାଣ୍ଡା କାଦି ତିଆର୍‌ ଡିଙ୍ଗ୍ଏ । ମେଁ ଇସାଙ୍ଗ୍‌କେ ଇଃସାଙ୍ଗ୍‌ ଚଙ୍ଗ୍‌ନେ ତିଆର୍‌ ଡିଙ୍ଗ୍‌ଏ ।"

21 "ନପ୍ତାଲୀ ମନ୍‌କେ ୱେକ୍ନେ ମୁଇଂ ହରିଣୀ ରକମ୍‌, ମେଁ ସାର୍ଦା ଡିଙ୍ଗ୍‌କ୍ନେ ରକମ୍‌ ସାମୁଆଁ ବାଃଲିର୍‌ଏ ।"

22 "ଯୋଷେଫ ଚୁଚୁ ଚୁନେ ସ୍ଲାଃନେ ଉଲିଆଃ । ମେଁ ଜର୍‌ନା ଡାଗ୍ରାନେ ଚୁଚୁ ଚୁନେ ସ୍ଲାଃନେ ଉଲିଆଃ ରକମ୍‌ । ମେଁନେ କେନ୍ଦା କାଲାଆଃ ଆଡ଼ାତ୍ରା ଚ୍ଲେ ଲେଃଏ । 23 ଆଁୟାଃ ସାଃଣ୍ଡ୍ରେଇଂ ଆମେକେ ଜାବର୍‌ କସ୍ଟ ବିବକେ । ବାରି ଆମେକେ ଙାଁ ଟୁଇଙ୍ଗ୍‌ଚେ କସ୍ଟ ବିବକେ । 24 ମାତର୍‌ ମେଁନେ ଆୟାଁ ଡାଟ୍‌ ଲେଃଗେ, ବାରି ମେଁନେ ଗାଗ୍‌ଡ଼େ ଯାକୁବକେ ବପୁ ବିଃଣ୍ଡ୍ରେ ପର୍‌ମେସର୍‌ ଇସ୍ରାଏଲ୍‌ନେ ରକ୍ୟାଡିଂଣ୍ଡ୍ରେ ଆରି ସେବାଡିଂଣ୍ଡ୍ରେ ସୁଗୁଆ ଉଡ୍ରା ଡିଂଏ । 25 ଆବା ପର୍‌ମେସର୍‌ ସାଇଜ ଡିଙ୍ଗ୍‌ଏ ବାରି ସାପାଟୁ ବପୁ ପର୍‌ମେସର୍‌ କିତଂବାନ୍‌ ଆନାକେ ଆସିର୍ବାଦ୍‌ ଡିଙ୍ଗ୍‌ଏ । କିତଂବାନ୍‌ ମଙ୍ଗଲ୍‌ ବାରି ସ୍ରିକ୍ନେ କେଣ୍ଡିଆଃ ସୁଲୁଏବାନ୍‌ ମଙ୍ଗଲ୍‌ ବିଃଚେ ଆନାକେ ଆସିର୍ବାଦ୍‌ ଡିଙ୍ଗ୍‌ଏ । ମେଁ ବାନ୍‌ ମେଁନେ ନ୍ତିବାନ୍‌ ନ୍ତି ସକ୍ତିସାଲି ଡିଂକେ । 26 ନେଙ୍ଗ୍‌ନେ ନ୍ତା ଞ୍ଜାନେ ଆସିର୍ବାଦ୍ ବାନ୍‌ ପେ ବ୍‌ବାନେ ଆସିର୍ବାଦ୍‌ ଜାବର୍‌ । ଆତେନ୍‌ ସାପାଦିନା ଲେଃକ୍ନେ କଣ୍ଡାନେ ଟିପେ ଜାକ ଚ୍ଲେ ଲେଃଏ । ଆତେନ୍‌ ଯୋଷେଫନେ ବାଆଃନ୍ୟା, ଣ୍ଡୁଲା ନାଁବୟାଁନେ ବାନ୍‌ ଅଲ୍‌ଗା ଆଡିଙ୍ଗ୍‌ ବକ୍ନେ ରେମୁଆଁବାନ୍‌ ବାଆଃନ୍ୟା ଗଟେଏ ।"

27 ବିନ୍ୟାମୀନ୍ ମୁଇଂ କିଡ଼େସଃ ଲେଃକ୍ନେ ନାକା ରକମ୍‌ । ଞ୍ଜିର୍‌ନୁଗ୍‌ ମେଁ ସିକାର୍‌ ଡିଙ୍ଗ୍‌ଚେ ଚଙ୍ଗ୍ଏ । ଅଗ୍‌ଲେ ଲେଃକ୍ନେ ମିଡିଗ୍‌ ମେଁ ମ୍ୱାୟା ବାଟାଚେ ଚଙ୍ଗ୍‌ଆର୍‌ଏ । 28 କ୍ମେଇଂ ଇସ୍ରାଏଲ୍‌ନେ ଗମ୍ୱାର୍‌ ବଂସ । କ୍ମେଇଂନେ ଆବା ଆସିର୍ବାଦ୍‌ ଡିଙ୍ଗ୍‌ନେ ବେଲା ଏନ୍‌ ସାମୁଆଁ ବାସଙ୍ଗ୍‌ଚେ କ୍ମେଇଂନେ ଆଡ଼ାତ୍ରା ମୁଇଂଜାକେ ଜାବର୍‌ ଆସିର୍ବାଦ୍‌ ଡିଙ୍ଗ୍‌କେ ।

ଯାକୁବ୍‌ ଗୁଏନେ ବାରି ଆତିନେ

29 ଏନ୍‌ ଇଡ଼ିଙ୍ଗ୍‌ ଜାକୁବ ମେଁନେ ଉଂଣ୍ଡେଇଂକେ ଆଦେସ୍‌ ବିଃଚେ ବାସଙ୍ଗ୍‌କେ, "ନେଙ୍ଗ୍‌ ନେଙ୍ଗ୍‌ନେ ରେମୁଆଁଇଂନେ ଡାଗ୍ରା ମିସୁନ୍‌ସା ୱେ ଣ୍ଡିଙ୍ଗ୍‌କେ, ନେଙ୍ଗ୍‌ ଉଡ଼ିବେଲା ଗୁଏଃଏ ନେଙ୍ଗ୍‌ନେ ନ୍ତା ଞ୍ଜାଇଂ ଏତେ ଇଫ୍ରୋଣନେ ହିତ୍ତୀୟ ଲିଜନେ ପାର୍‌ନ୍ୟା ଆତିପା । 30 ଏନ୍‌ସା ଅବ୍ରହାମ ରାଃଚ୍ୟାନେ ଜାଗାକେ ଅଦିକାର୍‌ ନ୍‌ସା କିଣାନ ଦେସ୍‌ନେ ମମ୍ରିନେ ସାମ୍‌ନେ ଲେଃକ୍ନେ ମୁଃଡ଼ିନେ ମକ୍‌ପେଲାନେ ଲିଜ ହିତ୍ତୀୟ ଇଫ୍ରୋଣବାନ୍‌ ବିଆର୍‌ ବକେ, ଆତେନ୍‌ ହିତ୍ତୀୟ ଇଫ୍ରୋଣନେ ଲିଜଅରିଆ ଲେଃକ୍ନେ ଗୁହାନ୍ୟା ନେଙ୍ଗ୍‌ନେ ନ୍ତା ଞ୍ଜାଇଂନେ ଡାଗ୍ରା ଆନେଙ୍ଗ୍‌ ଆତି ପେବିଏ ।" 31 ଅବ୍ରହାମ ବାରି ମେଁନେ ସେଲାମ୍ବୁଏଃ ସାରାକେ ଆତ୍‌ଡାଗ୍ରା ଆତି ବଆର୍‌କେ । ଇସ୍‌ହାକ୍‌ ବାରି ମେଁନେ ସେଲାମ୍ବୁଏଃ ରିବିକା ଆତ୍‌ଡାଗ୍ରା ଆଃଆତି ବଆର୍‌ଗେ । ନେଙ୍ଗ୍‌ ଡିଗ୍‌ ଆତ୍‌ଅରିଆ ଲେୟାକେ ଆତି ମ୍ୱକେ । 32 ଆତେନ୍‌ ଲିଜ ମଜେ ଲେଃକ୍ନେ ଗୁହା ହେତୀୟ ଉଙ୍ଗ୍‌ଡେଇଂନେବାନ୍‌ ବିଆର୍‌ବ୍ନ । ଆତେନ୍‌ ଜାଗାଅରିଆ ଆନେଙ୍ଗ୍‌କେ ଆତି । 33 ଦେକ୍‌ରକମ୍‌ ଯାକୁବ ମେଁନେ ଉଂଣ୍ଡେଇଂ ଏତେ ବାଲିର୍‌ବାତା ଡିଙ୍ଗ୍‌ନେ ଆଡାକ୍ନେ ଇଡ଼ିଙ୍ଗ୍‌ ଡୁଲେଗ୍‌ନ୍ୟା ଅରିଆ ମ୍ୱାକ୍ଲିଗ୍‌ ଞ୍ଚ ମୁଇଂଅରିଆ ଆଃଡିଂଚେ ଗୁଏଃକେ । ବାରି ରେମୁଆଁଇଂ ଏତେ ମିସୁଃକେ ।