ବୈଥେଲନ୍ୟା ଇସ୍ପର୍ ଯାକୁବ୍କେ ଆସିର୍ବାଦ୍
1 ଆରି ପର୍ମେସର୍ ଯାକୁବକେ ବାସଙ୍ଗ୍କେ, ନାଁ ବୈଥେଲନ୍ୟା ୱେଚେ ଆତ୍ଅରିଆ ବାସା । ବାରି ନାଁ ବୟାଁ ଏଷୌ ସାମ୍ନାବାନ୍ ଲାଗ୍ଡନେ ବେଲା ଆଣ୍ଡିନେ ପର୍ମେସର୍ ଦର୍ସନ୍ ବିଃବଗେ, ମେଁନେ ଉଦେସ୍ରେ ପୁଜାବେଦି ତିଆର୍ ଡିଙ୍ଗ୍ ।
2 ତେସା ଯାକୁବ ମେଁନେ ପରିବାର୍ ବାରି ମେଁନେ ଚାକର୍ଇଂକେ ବାସଙ୍ଗ୍କେ, "ପେଇଂ ଡାଗ୍ରା ସାପା ବିଦେସ୍ନେ ଦେବ୍ତାଇଂ ଲେଃକେ, ଆମେଇଂକେ ଜଗ୍ତ୍ଲାଗ୍ପା । ନିଜେ ନିଜେକେ ପର୍ଚଲ୍ ଆଡିଙ୍ଗ୍ପା ବାରି ନିଜର୍ ନିଜର୍ ପାଟାଇ ବାଦ୍ଲେପା । 3 ନେ ଆକାନ୍ ଜାଗା ଆନ୍ତାର୍ଚେ ବୈଥେଲନ୍ୟା ନେୱେପା । ନେଙ୍ଗ୍ ଆତ୍ଅରିଆ ମୁଇଂ ପୁଜା ବେଦି ତିଆର୍ ଣ୍ଡିଙ୍ଗ୍ଏ, ବାରି ଆତେନ୍ ପର୍ମେସର୍କେ ପୁଜା ଣ୍ଡିଙ୍ଗ୍ଏ, ଜା ନେଙ୍ଗ୍ନେ ଅସୁବିଦା ବେଲା ଆନେଙ୍ଗ୍ ଦୟା ଡିଙ୍ଗ୍ବକେ, ଆଣ୍ଡି ଡାଗ୍ରା ନେଙ୍ଗ୍ ଗୁଏଃ ବେଲା ପର୍ମେସର୍ ନେଙ୍ଗ୍ନେ ସାହା ଡିଙ୍ଗ୍କେ ।" 4 ଆତ୍ବା ମେଇଂ ମେଇଂନେ ଡାଗ୍ରା ଲେଃକ୍ନେ ବିଦେସି ଦେବ୍ତା ବାରି ନ୍ଲୁଗ୍ ଚଗ୍ନେ ସାପା ରାଙ୍ଗ୍ୱେଚେ ଯାକୁବକେ ବିଃଆର୍କେ, ମେଁ ଆତେନ୍ ସାପା ରାଙ୍ଗ୍ୱେଚେ ଶିଖିମ ଡାଗ୍ରା ଅଲୋନ ସ୍ଲାଃ ବୁନ୍ଦେ ବୁଡ଼ିଚେ ବଗେ ।
5 ଏନ୍ ଇଡ଼ିଙ୍ଗ୍ ମେଇଂ ଆତେନ୍ ଜାଗା ଆନ୍ତାର୍ ବିଃଆର୍କେ । ଆତେନ୍ ବେଲା ପିତୁର୍ ପାକାନେ ଇନିନ୍ୟା ପର୍ମେସର୍ନେ ବାନ୍ ବୁଟମେଗ୍ ପାଙ୍ଗ୍ଲା, ମେଇଂ ଯାକୁବନେ ଉଂଡେଇଂକେ ଆନୁଆଁ ଆର୍କେ । 6 ଆରି ଯାକୁବ ବାରି ମେଇଂନେ ରେମୁଆଁଇଂ ସାପା କିଣାନ ଦେସ୍ ଡାଗ୍ରାନେ ଲୁସ୍ନ୍ୟା, ଡାଗ୍ଲା, ବୈଥେଲନ୍ୟା ୱେଚାଆର୍କେ । 7 ଆତ୍ଅରିଆ ମେଁ ମୁଇଂ ପୁଜା ବେଦି ତିଆର୍ ଡିଙ୍ଗ୍ଚେ ଆତେନ୍ ଜାଗାନେ ମ୍ନି ଏଲ ବୈଥେଲ ବିଃକେ । ଡାଗ୍ଲା ଯାକୁବ ବୟାଁକେ ବୁଟଚେ ଲାଗ୍ଡନେ ବେଲା ପର୍ମେସର୍ ଆତେନ୍ ଜାଗାନ୍ୟା ଆମେକେ ଦର୍ସନ୍ ବିଃବଗେ । 8 ଆତେନ୍ ଜାଗାନ୍ୟା ରିବିକାନେ ଦବୋରା ମ୍ନିକ୍ନେ ଧାତ୍ରୀ ଗୁଏ ୱେକେ ବାରି ଆମେକେ ବୈଥେଲନେ ଆଲ ଲେଃକ୍ନେ ଅଲୋନ ସ୍ଲାଃ ବୁନ୍ଦେ ଆତି ବିଃକେ । ତେସା ଆତେନ୍ ଜାଗାନେ ମ୍ନି ଅଲୋନ-ବାଖୁତ୍ ବିଃକେ ।
9 ଉଡ଼ିବେଲା ଯାକୁବ ପଦ୍ଦନ ଅରାମନ୍ୟା ଆଣ୍ଡେକେ, ପର୍ମେସର୍ ଆମେକେ ବାର୍ମୁଇଂତର୍ ଦର୍ସନ୍ ବିଃକେ । ପର୍ମେସର୍ ଯାକୁବକେ ଆସିର୍ବାଦ୍ ଡିଙ୍ଗ୍କେ । 10 ବାରି ପର୍ମେସର୍ ଆମେକେ ବାସଙ୍ଗ୍କେ, ନାଁ ମ୍ନି ଯାକୁବ, ମାତର୍ ନାଁ ମ୍ନି ବାରି ଯାକୁବ ଆଡିଙ୍ଗ୍ ଣ୍ଡୁ । ନାଁ ମ୍ନି ଇସ୍ରାଏଲ ଡିଙ୍ଗ୍ଏ । ବାରି ମେଁ ମେଁନେ ମ୍ନି ଇସ୍ରାଏଲ ବିଃକେ । 11 ପର୍ମେସର୍ ଆମେକେ ବାସଙ୍ଗ୍କେ, "ନେ ସାପାଟୁ ବପୁନେ ପର୍ମେସର୍, ନାଁନେ ପରିବାର୍ ଜାବର୍ ମ୍ନା ଡିଙ୍ଗ୍ଏ । ନାଁ ପରିବାର୍ ବାନ୍ ଗୁଲୁଏ ଜାତି ଡିଙ୍ଗ୍ଏ । ଇଃସାଙ୍ଗ୍ଇଂ ନାଁ ଜାତି ବାନ୍ ଜନମ୍ ଡିଙ୍ଗ୍ଆର୍ଏ । 12 ନେ ଅବ୍ରହାମ ବାରି ଇସ୍ହାକକେ ଆଣ୍ଡିନେ ଦେସ୍ ଦାନ୍ ଡିଙ୍ଗ୍ନେବକେ । ଆତେନ୍ ଦେସ୍ ଆନାକେ ବାରି ନାଁନେ ବବିସତ୍ ବଂସକୁଲ୍କେ ନେବିଏ ।" 13 ଏନ୍ ଇଡ଼ିଙ୍ଗ୍ ପର୍ମେସର୍ ଆତେନ୍ ଜାଗା ଆନ୍ତାର୍ଚେ ଆରାତ୍ରା ୱେକେ । 14 ଯାକୁବ ଆତ୍ଡାଗ୍ରା ମୁଇଂ ବାଲିର୍ବାତାକ୍ନେ ଜାଗାଅରିଆ କମ୍ୱ ଆଃରେକେ । ଯାକୁବ ଆତ୍ ଡାଗ୍ରା ଉଗ୍ନେ ବଲି ବିଃକେ ବାରି ଞ୍ଚୁ କିଗ୍କେ । 15 ମେଁ ଆତେନ୍ ଜାଗାନେ ମ୍ନି ବୈଥେଲ ବକେ । ଡାଗ୍ଲା ଏନ୍ ଜାଗାନ୍ୟା ପର୍ମେସର୍ ମେଁନେ ଏତେ ବାଲିର୍ବାତା ଡିଙ୍ଗ୍ବଗେ ।
ରାହେଲ ଗୁଏକେ
16 ଯାକୁବ ବାରି ମେଁନେ ଦଲ୍ ବୈଥେଲ ଆନ୍ତାର୍ଆର୍କେ, ମେଇଂ ଇଫ୍ରାଥାନ୍ୟା ୱେଚା ନ୍ସା ଇତୁଡ଼ା ସ୍ଲ ଲେଃଗେ; ରାହେଲନେ ଣ୍ଡିଆକୁମାନେ ଦୁକାସୁକା ଡିଙ୍ଗ୍କେ ବାରି ମେଁ ଣ୍ଡିଆ କୁମାନେ ଜାବର୍ କସ୍ଟ ଡିଙ୍ଗ୍କେ । 17 ଣ୍ଡିଆକୁମାନେ ଦୁକା ଜାବର୍ କସ୍ଟ ଡିଙ୍ଗ୍ଲା, ଧାତ୍ରୀ ଆମେକେ ବାଲିର୍କେ, "ଆବ୍ଟଗେ, ନାଁନେ ଆକାନ୍ ପାରେ ଙ୍ଗିର୍ବୁଏଃଅ ଜନମ୍ ଡିଙ୍ଗ୍ଏ ।" 18 ରାହେଲ ଙ୍ଗିର୍ବୁଏଃଅ ଜନମ୍ ବିଚେ ଗୁଏକେ । ଗୁଏନେ ସେନୁଗ୍ ରାହେଲ ଆତେନ୍ ଗଡ଼େଅନେ ମ୍ନି ବିଃକେ; ବିନୋନୀ35:18 ନେଙ୍ଗ୍ କଷ୍ଟରେ ଜନମ୍ ଡିଂମ୍ୱକ୍ନେ ଉଂଡେ, ମାତର୍ ଯାକୁବ ଆମେକେ ୱାକେ ବିନ୍ୟାମୀନ୍ । 35:18 ଇଞ୍ଚଙ୍ଗ୍ତି ପାକାନେ ଉଂଡେ
19 ଦେକ୍ ରକମ୍ ରାହେଲ ଗୁଏକେ, ଇଫ୍ରାଥା, ଡାଗ୍ଲା, ବେଥଲିହିମନ୍ୟା ୱେନେ ଗାଲି ଡାଗ୍ରା ଆମେକେ ଆତି ବିଃଆର୍କେ । 20 ରାହେଲକେ ଆତିକ୍ନେ ଜାଗାନ୍ୟା ଯାକୁବ ମୁଇଂ ସ୍ତମ୍ୱ ତିଆର୍ ଡିଙ୍ଗ୍କେ । ଆତେନ୍ ସ୍ତମ୍ୱ ଏଃ ଜାକ ରାହେଲକେ ଆତି ବକ୍ନେ ଡାଗ୍ଚେ ସାମୁଆଃଆର୍ଏ । 21 ଆରି ଇସ୍ରାଏଲ ଆତ୍ବାନ୍ ତାର୍ଚେ ଏଦର ଗଡ଼ ପୁଆଃଚେ ଆତ୍ ଡାଗ୍ରା ତମ୍ୱୁ ତିଆର୍ ଡିଙ୍ଗ୍କେ ।
ଯାକୁବନେ ଉଂଡେଇଂ
22 ଆତେନ୍ ଦେସ୍ନ୍ୟା ଇସ୍ରାଏଲ ବାସା ଲେଃକ୍ନେ ବେଲା ରୁବେନ୍ ୱେଚେ ନିଜର୍ ଆବାନେ ବିଲହା ମ୍ନିକ୍ନେ ଡାଆଁ ସେଲାମ୍ବୁଏଃ ଏଃତେ କୁଡ଼େଃମାଡ଼େଃ ଡିଙ୍ଗ୍କେ, ବାରି ଇସ୍ରାଏଲ ଆତେନ୍ ଅଁଚେ ରିସା ଡିଂୱେକେ ।
23 ମେଇଂନେ ବିତ୍ରେ ରୁବେନ୍ ଯାକୁବନେ ମ୍ନା ଉଂଡେ । ଶିମୀୟୋନ, ଲେବୀ, ଯିହୁଦା, ଇଷାଖର ବାରି ସବୂଲୂନ୍ କ୍ମେଇଂ ଲେୟାନେ ଉଂଡେ । 24 ଯୋଷେଫ୍ ବାରି ବିନ୍ୟାମୀନ୍ ରାହେଲନେ ଉଂଡେ । 25 ବାରି ଦାନ୍ ବାରି ନପ୍ତାଲୀ ରାହେଲନେ ଚାକ୍ରାନି ବିଲହାନେ ଉଂଡେ । 26 ବାରି ଗାଦ୍ ବାରି ଆଶେର୍ ଲେୟାନେ ଚାକ୍ରାନି ସିଲ୍ପାନେ ଉଂଡେ । ଯାକୁବନେ ଏନ୍ ସାପା ଉଂଡେ ପଦ୍ଦନ ଅରାମନ୍ୟା ଜନମ୍ ଡିଙ୍ଗ୍ଲେଆର୍ଗେ ।
ଇସ୍ହାକ୍ନେ ଗୁଏଃନେ
27 ଏନ୍ ଇଡ଼ିଙ୍ଗ୍ ମେଁ କିରୀୟଥ-ଅର୍ବ, ଡାଗ୍ଲା, ହିବ୍ରୋଣ ଇନିନେ ଡାଗ୍ରା ମମ୍ରି ମ୍ନିକ୍ନେ ଆଣ୍ଡିନେ ଜାଗା ଅବ୍ରହାମ ବାରି ଇସ୍ହାକ ବାସା ଲେଃଆର୍ଗେ । ଆତେନ୍ ଜାଗାନ୍ୟା ଯାକୁବ ନିଜର୍ ଆବା ଇସ୍ହାକ୍ ଡାଗ୍ରା ୱେଚାକେ । 28 ଇସ୍ହାକ୍ ସଏ ଅଃସେ ମୁଆଁ ମ୍ୱ୍ରକେ । 29 ଆରି ଇସ୍ହାକ୍ ଡକ୍ରା ବାରି ଜାବର୍ ମୁଆଁ ମ୍ୱ୍ରଚେ ଗୁଏୱେକେ । ନିଜର୍ ରେମୁଆଁଇଂନେ ଡାଗ୍ରା ଆତି ବିଃଆର୍କେ । ବାରି ମେଁନେ ଉଂଡେ ଏଷୌ ବାରି ଯାକୁବ ଆମେକେ ଆତି ବିଃଆର୍କେ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)