ଆଦି 46

ଡୁଆଣ୍ଡ୍ରେ ଏତେ ଯାକୁବ୍‌ ମିସର୍‌ ୱେକେ

1 ତେସା ଇସ୍ରାଏଲ ମିସର୍‌ ପାକା ୱେକେ । ସେନୁଗ୍‌ ଇସ୍ରାଏଲ ବେରଶେବାନ୍ୟା ୱେକେ । ଆତ୍‌ଡାଗ୍ରା ମେଁ ପର୍‌ମେସର୍‌ନେ ଉପାସ୍‌ ଡିଙ୍ଗ୍‌କେ । ମେଁନେ ଆବା ଇସ୍‌ହାକ୍‌ନେ ପର୍‌ମେସର୍‌ନେ ବାରି ମେଁ ଆତ୍‌ଡାଗ୍ରା ପୁଜା ଡିଙ୍ଗ୍‌କେ । 2 ମିଡିଗ୍‌ ପର୍‌ମେସର୍‌ ଇସ୍ରାଏଲ କେ ମୁସୁଡ଼ିଙ୍ଗ୍‌ନ୍ୟା ବାସଙ୍ଗ୍‌କେ, "ଯାକୁବ, ଯାକୁବ ।" ବାରି ଇସ୍ରାଏଲ ଉତର୍‌ ବିକେ, "ନେଙ୍ଗ୍‌ ଆକ୍‌ଡାଗ୍ରା ।"

3 ଏନ୍‌ଇଡ଼ିଙ୍ଗ୍‌ ପର୍‌ମେସର୍‌ ବାସଙ୍ଗ୍‌କେ, "ନେ ପର୍‌ମେସର୍‌ ନାଁ ଆବାନେ ପର୍‌ମେସର୍‌ । ମିସର୍‌ନ୍ୟା ୱେନ୍‌ସା ଆବ୍‌ଟଗେ । ମିସର୍‌ନ୍ୟା ନେ ନାନେ ମୁଇଂ ମ୍ନା ବଁସ୍‌କୁଲ୍‌ ତିଆର୍‌ ନେଡିଙ୍ଗ୍‌ଏ । 4 ନେଙ୍ଗ୍‌ ନାଁ ଏତେ ମିସର୍‌ନ୍ୟା ଉଁୱେଏ । ବାରି ନେ ଆନାକେ ବାର୍‌ମୁଇଂତର୍‌ ମିସର୍‌ବାନ୍‌ ୱାରାଙ୍ଗ୍‌ନେପାଙ୍ଗ୍‌ଏ । ନାଁ ମିସର୍‌ନ୍ୟା ଗୁଏ ନାୱେଏ । ନାଁ ଗୁଏନେ ବେଲା ଯୋଷେଫ ନାଁ ଡାଗ୍ରା ଲେଃଏ ।"

5 ଏନ୍‌ଇଡ଼ିଙ୍ଗ୍‌ ଯାକୁବ ବେରଶେବା ଆନ୍ତାର୍‌ଚେ ମିସର୍‌ ପାକା ୱେକେ । ଇସ୍ରାଏଲନେ ଉଂଣ୍ଡେଇଂ ମେଁନେ ଆବା ଯାକୁବକେ, ମେଁନେ ଉଂଣ୍ଡେଇଂକେ ବାରି ମେଁନେ ସେଲାମ୍ବୁଏଃଇଂକେ ଫାରୋ ବେବକ୍ନେ ଶଗଡ଼୍‌ନ୍ୟା ୱେଆର୍କେ । 6 ମେଇଂ ଡିଗ୍‌ ମେଇଂନେ ଲେଃକ୍ନେ ସାପା ପସୁଇଂ ଆରି ମେଇଂ ମେଃ ଜିନିସ୍‌ କିଣାନ ଦେସ୍‌ନ୍ୟା ଆର୍ଜେ ବଆର୍‌କେ, ବାରି ଆତେନ୍‌ ସାପା ମିସର୍‌ ଦେସ୍‌ନ୍ୟା ରାଙ୍ଗ୍‌ୱେଆର୍କେ, ଯାକୁବନେ ସାପା ବଂସ ଏତେ । 7 ମେଁନେ ଏତେ ମେଁନେ ଉଂଡେ, ସେଲାମ୍ବୁଏଃଅ ବାରି ଏଗ୍‌ଲେଡେଇଂ ସାପାରେ ମିସର୍‌ ଦେସ୍‌ନ୍ୟା ୱେଆର୍କେ ।

8 ମିସର୍ ଦେସ୍‌ନ୍ୟା ୱେଆର୍କେ ଇସ୍ରାଏଲ ବଂସ, ଡାଗ୍‌ଲା, ଯାକୁବ ବାରି ମେଁନେ ଉଂଣ୍ଡେଇଂନେ ମ୍ନି । ଯାକୁବନେ ମ୍ନା ଉଂଡେ ରୁବେନ । 9 ରୁବେନନେ ଉଂଣ୍ଡେଇଂ ଡିଙ୍ଗ୍‌ଆର୍କେ ହନୋକ, ପଲ୍ଲୁ, ହିଷ୍ରୋଣ ବାରି କର୍ମି । 10 ଶିମୀୟୋନନେ ଉଂଡେ ଯିମୂୟେଲ, ଯାମୀନ୍‌, ଓହଦ୍‌, ଯାଖୀନ, ସୋହର ବାରି ମେଁନେ କିଣାନ୍‌ନେ ସେଲାମ୍ବୁଏଃବାନ୍‌ ଜନମ୍‌ ଡିଙ୍ଗ୍‌କ୍ନେ ଉଂଡେ ଶୌଲ । 11 ଲେବୀନେ ଉଂଡେ ଗେର୍ଶନ, କହାତ୍‌ ଆରି ମରାରି । 12 ଯିହୁଦାନେ ଉଂଡେ ଏର, ଓନନ୍‌, ଶେଲା, ପେରସ୍‌ ବାରି ସେରହ । ମାତର୍‌ ଏର୍‌ ବାରି ଓନନ୍‌ କିଣାନ ଦେସ୍‌ନ୍ୟା ଗୁଏଲେଃଆର୍‌ଗେ । ପେରସନେ ଉଂଡେ ହିଷ୍ରୋଣ ବାରି ହାମୁଲ । 13 ଇଷାଖରନେ ଉଂଡେ ତୋଲୟ, ପୂୟ, ଯୋବ ବାରି ଶିମ୍ରୋନ୍‌ । 14 ସବୂଲୂନନେ ଉଂଡେ ସେରଦ, ଏଲୋନ ବାରି ଯହଲେଲ । 15 କିମେଇଂ ବାରି ସେଲା ଦୀଣା ପଦ୍ଦନ ଅରାମନ୍ୟା ଯାକୁବବାନ୍‌ ଜନମ୍‌ ଡିଂଲେକ୍ନେ ଲେୟାନେ ଉଂଡେ । ଦେକ୍‌ରକମ୍‌ ମେଇଂନେ ପରିବାର୍‌ ତେତିସ୍‌ ରେମୁଆଁ ଲେଃଆର୍‌ଗେ ।

16 ଗାଦନେ ଉଂଣ୍ଡେଇଂ ଡିଙ୍ଗ୍‌ଆର୍‌ଡିଂକେ ସିଫୋନ୍‌, ହଗି, ଶୂନୀ, ଇଷବୋନ, ଏରି, ଅରୋଦୀ ବାରି ଅରେଲୀ । 17 ଆଶେରନେ ଉଂଣ୍ଡେଇଂ ଯିମ୍ନା, ଯିଶ୍‌ବା, ଯିଶ୍‌ବି, ବରୀୟ ବାରି ମେଇଂନେ ତନା ସେରହ । ବାରି ବରୀୟନେ ଉଂଡେ ହେବର ବାରି ମଲ୍‌କୀୟେଲ । 18 ଲାବନ ନିଜର୍‌ ସେଲାମ୍ବୁଏଃଅ ଲେୟାକେ ସିଲ୍‌ପା ମ୍ନିକ୍ନେ ଦାସି ବିବଗେ । ମେଁ ଯାକୁବନେ ଏନ୍‌ ଗଡ଼େଇଂକେ ଜନମ୍‌ ବିବଗେ । କ୍ମେଇଂ ସଉଲ ରେମୁଆଁ ।

19 ବାରି ଯାକୁବନେ ସେଲାମ୍ବୁଏଃ ରାହେଲନେ ମ୍ୱାକ୍ଲିଗ୍‌ ଉଂଡେ ଯୋଷେଫ ବାରି ବିନ୍ୟାମୀନ୍ । 20 ଯୋଷେଫନେ ଉଂଡେ ମନଃଶି ବାରି ଇଫ୍ରୟିମ ମିସର୍‌ ଦେସ୍‌ନ୍ୟା ଜନମ୍‌ ଡିଙ୍ଗ୍‌ଲେଃଆର୍‌ଗେ । ଓନ୍‌ ଇନି‌ ଡାଗ୍ରା ପୋଟୀଫେର ପୁଜାରିନେ ଆସନତ୍‌ ମ୍ନିକ୍ନେ ସେଲା ଆମେଇଂକେ ଜନମ୍‌ ଆଡିଙ୍ଗ୍‌ବଗେ । 21 ବିନ୍ୟାମୀନନେ ଉଂଣ୍ଡେଇଂ ଡିଙ୍ଗ୍ଆର୍କେ, ବେଲା ଆରି ବେଖର, ଅସବେଲା, ଗେରା, ନାମନ, ଏହୀ, ରୋଶ, ମୁପ୍‌ପୀମ୍‌, ହୁପ୍‌ପୀମ ବାରି ଅର୍ଦ । 22 ଏନ୍‌ ଚଉଦ ରେମୁଆଁ ଯାକୁବନେବାନ୍‌ ଜନମ୍‌ ଡିକ୍ନେ ରାହେଲନେ ଉଂଣ୍ଡେଇଂ ।

23 ଆରି ଦାନ୍‌ନେ ଉଂଡେ ହୁଶୀମ । 24 ନପ୍ତାଲୀନେ ଉଂଡେ ଯହସିୟେଲ, ଗୁନି, ୟେସର ବାରି ଶିଲୋମ ଲେଃଗେ । 25 କ୍ମେଇଂ ବିଲହାନେ ଉଂଣ୍ଡେଇଂ ଡିଙ୍ଗ୍‌ଆର୍‌ଡିଂକେ । ଲାବନ ବିଲହାକେ ଦାସି ବାବ୍‌ରେ ମେଁନେ ସେଲାମ୍ବୁଏଃଅ ରାହେଲକେ ବିବଗେ । ତେସା ଯାକୁବନେ ଗୁକ୍ଲିଗ୍‌ ବଂସକୁଲ୍‌ ବିଲହାବାନ୍‌ ଜନମ୍‌ ଡିଙ୍ଗ୍‌ଲେଃଆର୍‌ଗେ ।

26 ଯାକୁବନେ ବଂସକୁଲ୍‌, ଜାଣ୍ଡେ ମେଁନେ ଏତେ ମିସର୍‌ନ୍ୟା ୱେଆର୍କେ । ଯାକୁବନେ ଉଂଣ୍ଡେଇଂ ବାରି ମାଚୁଆଣ୍ଡେଇଂକେ ଆନ୍ତାର୍‌ଚେ ମେଇଂ ଛ‍ଅଷଟି ରେମୁଆଁ ଲେଃଆର୍‌ଗେ । 27 ଯୋଷେଫନେ ଗୁକ୍ଲିଗ୍‌ ଉଂଡେ ମିସର୍‌ନ୍ୟା ଜନମ୍‌ ଡିଙ୍ଗ୍‌ଲେଃଆର୍‌ଗେ । ତେସା ଦେକ୍‌ରକମ୍‌ ବାବ୍‌ରେ ସାପା ସତୁରି ରେମୁଆଁ ମିସର୍‌ନ୍ୟା ବାସାଲେଃଆର୍‌ଗେ ।

ମିସର୍‌ନ୍ନିଆ ଯାକୁବ୍‌ ଆରି ମେଁ ଡୁଆଣ୍ଡ୍ରେ

28 ଆରି ଯୋଷେଫ ଗୋଶନ ପ୍ରଦେସ୍‌ନ୍ୟା ୱେନ୍‌ସା ଗାଲି ଡିରକମ୍‌ ଆଃସୁଏଃଏ, ଏନ୍‌ସା ଯାକୁବ ନିଜର୍‌ ସେନୁଗ୍‌ ଯିହୁଦାକେ ଯୋଷେଫ ଡାଗ୍ରା ବେକେ । ଏନ୍‌ଇଡ଼ିଙ୍ଗ୍‌ ମେଇଂ ଗୋଶନ ଦେସ୍‌ନ୍ୟା ୱେଚାଆର୍କେ । 29 ଆତ୍‌ବା ଯୋଷେଫ ନିଜର୍‌ ଆବା ଇସ୍ରାଏଲନେ ଏତେ କୁଡ଼େଃନ୍‌ସା ରତ୍‌ ସଜେଚେ ଗୋଶନ ଦେସ୍‌ନ୍ୟା ୱେକେ । ବାରି ଆମେକେ କେଚେ ଆମେକେ କଣ୍ଡଚେ ଜାବର୍‌ ପର୍‌ ଜାକ ଅଃକେ । 30 ଏନ୍‌ଇଡ଼ିଙ୍ଗ୍‌ ଇସ୍ରାଏଲ ଯୋଷେଫକେ ବାସଙ୍ଗ୍‌କେ, "ଏବେ ନେଙ୍ଗ୍‌ ସାନ୍ତିରେ ଙ୍ଗୁଏଃଏ । ନେଙ୍ଗ୍ ଆନାକେ ଙ୍କେକେ, ବାରି ମ୍‌ମ୍ୟାଃକେ ଜେ, ନା ମ୍ୱ୍ର ନାଲେକେ ।"

31 ଆରି ଯୋଷେଫ ନିଜର୍‌ ବୟାଁଇଂକେ ବାରି ଆବାନେ ପରିବାର୍‌କେ ବାସଙ୍ଗ୍‌କେ, "ନେଙ୍ଗ୍‌ ୱେଚେ ଫାରୋକେ ମ୍ୱାସଙ୍ଗ୍‌ଏ । କିଣାନ ଦେସ୍‌ବାନ୍‌ ନେଙ୍ଗ୍‌ନେ ବୟାଁଇଙ୍ଗ୍‌ ବାରି ଆବାନେ ପରିବାର୍‌ ନେଙ୍ଗ୍‌ ଡାଗ୍ରା ପାଙ୍ଗ୍‌ଲେଃଆର୍‌କେ । 32 ମେଇଂ ପସୁ ତୁର୍ତ୍ୟାରେ ଆରି ପସୁଇଂ ବେପାର୍‌ ଡିଂଣ୍ଡ୍ରେ, ତେସା ମେଇଂ ନିଜର୍‌ ଅରେଃ ଗିମିଃ ମାନ୍ଦା ସାପା ରାଙ୍ଗ୍‌ପାଙ୍ଗ୍‌ ବଆର୍‌କେ । 33 ଆତ୍‌ବା ଫାରୋ ଆପେକେ ୱାଚେ, ପେନେ ବେବଆର୍‌ ବିସଏରେ ସାଲ୍ୟାଃକୁଏ । 34 ପେ ଆମେକେ ପେବାସଙ୍ଗ୍‌ଏ, ନେ ପସୁ ତୁର୍ତ୍ୟାରେ, ନେ ପରିବାର୍‌ ସାପାରେ ପସୁ ବେପାରି, ବାରି ନେନେ ସେନୁଗ୍‌ ଉଡ଼ିବେଲା ନେ ଙ୍ଗିରେ ନେଲେଃଗେ, ଜିବନ୍‌ ପ୍ରାନିଇଂନେ ଜତନ୍‌ ଡିଙ୍ଗ୍‌ ରାଙ୍ଗ୍‌ଡନେଡିଙ୍ଗ୍‌କେ । ଏନ୍‌ଇଡ଼ିଙ୍ଗ୍‌ ଫାରୋ ଆପେକେ ଗୋଶନନ୍ୟା ଲେଃନ୍‌ସା ଆଦେସ୍‌ ବିଏ । ଡାଗ୍ଲା ମିସର୍‌ନେ ରେମୁଆଁଇଂ ପସୁ ବିଚଙ୍ଗ୍‌ଣ୍ଡ୍ରେକେ ମେଇଂନେ ଏରିଆ‌ନ୍ୟା ଲେଃନ୍‌ସା ଗିନ୍‌ ଡିଂଆର୍‌ଏ ।"