1 ପର୍‌ମେସର୍‌ ନୋହକେ ବାରି ମେଁନେ ଏତେ ଜାହାଜ୍‌ନ୍ୟା ଲେଃକ୍ନେ ସାପା ମ୍ୱ୍ରଲେଃକ୍ନେ ପ୍ରାନିକେ ମନେ ତ୍ଲାଗ୍‌କେ । ପର୍‌ମେସର୍‌ ମଚ୍‌ପୁର୍‌ ଆଡ଼ାତ୍ରା ୱେଡ଼୍ୟା ଆଃୱେଡ଼ିଆକେ, ତେଲା ବନ୍ୟା ଣ୍ଡିଆଃ ଗଣ୍ଡାଃକେ; 2 କିତଂବାନ୍‌ ଣ୍ଡିଆ ଗୁର୍‌ନେ ବନ୍ଦ୍‌ ଡିଙ୍ଗ୍‌ୱେକେ ଆରି ତୁବନ୍ୟା ଲେଃକ୍ନେ ଣ୍ଡିଆ ଗିଡ଼୍ୟାୱେକେ, କିତଂନେ ଗାଲି ସାପା ବନ୍ଦ୍‌ ଡିଙ୍ଗ୍‌ୱେକେ । 3 ମଚ୍‌ପୁର୍‌ନ୍ୟା ଣ୍ଡିଆ ଜାର୍‌ଚେ ସଏ ପଚାସ୍‌ ଦିନ୍‌ ଇଡ଼ିଙ୍ଗ୍‌ ଗଣ୍ଡା ୱେକେ । 4 ଏନ୍‌ ଇଡ଼ିଙ୍ଗ୍‌ ଗୁ ଆର୍କେନେ ସତ୍‌ର ଦିନା ଆରାରାଟ୍‌ କଣ୍ଡା ଆଡ଼ାତ୍ରା ଜାହାଜ୍‌ ଲାଗେଚେ ଲେଃଗେ । 5 ଦେକ୍‌ରକମ୍‌ ଗୁଆ ଆର୍କେ ଜାକ ଣ୍ଡିଆଃ ଗଣ୍ଡାଃକେ; ଆତେନ୍‌ ଗୁଆ ଆର୍କେନେ ପର୍‌ତୁମ୍‌ ଦିନା କଣ୍ଡାଇଙ୍ଗ୍‌ ତ୍ନାକେ ।

6 ଏନ୍‌ଇଡ଼ିଂ ଆରି ଚାଲିସ୍‌ ଦିନ୍‌ ଇଡ଼ିଙ୍ଗ୍‌ ନୋହ ନିଜେ ଆଃରେକ୍ନେ ଜାହାଜ୍‌ନେ ଜର୍‌କା‌ ରଃବିକେ, 7 ମୁଇଂ ଗିଃଗ୍ୟାଃ ଆୱାଲେ ବିକେ । ଆତ୍‌ବା ମଚ୍‌ପୁର୍‌ନେ ଣ୍ଡିଆ ନ୍‌ସୁଆର୍‌ନେ ଜାକ ମେଁ ଆଙ୍କ୍‌ଆନ୍ତ୍‌ ୱାଲେ ଅଲେଙ୍ଗ୍‌କେ । 8 ବାରି ମୁଇଂତର୍‌, ନୋହ ତୁବନ୍ୟା ଣ୍ଡିଆ ନ୍‌ସୁଆର୍‌ଗେ ଲେଃ ଣ୍ଡୁ, ଆତେନ୍‌ ମ୍ୟା ନ୍‌ସା ମୁଇଂ କୁକୁର୍ୟାଃ ଆୱାଲେ ବିକେ, 9 ଆତେନ୍‌ ବେଲା ମଚ୍‌ପୁର୍‌ନ୍ୟା ଣ୍ଡିଆ ଲେଃଲା କୁକୁର୍ୟାଃ ନିଜେ କୁକନ୍‌ସା ଜାଗା ମାବାଚେ ଜାହାଜ୍‌ନ୍ୟା ନୋହନେ ଡାଗ୍ରା ଆଣ୍ଡେ ପାଙ୍ଗ୍‌କେ, ଆତ୍‌ବା ମେଁ ନ୍ତି ଲମ୍ୱେଚେ କୁକୁର୍ୟାଃକେ ସାଚେ ଜାହାଜ୍‌ ବିତ୍ରେ ନିଜେନେ ଡାଗ୍ରା ଡୁଙ୍ଗ୍‌ପାଙ୍ଗ୍‌କେ । 10 ଆରି ଗୁ ଦିନା ଇଡ଼ିଙ୍ଗ୍‌ ନୋହ ଜାହାଜ୍‌ବାନ୍‌ ବାର୍‌ମୁଇଂତର୍‌ କୁକୁର୍ୟାଃକେ ଆୱାଲେ ବିକେ; 11 ଆତେନ୍‌ ଦିନା ଲମ୍‌ଡିଗ୍‌ କେଲା ଆତେନ୍‌ କୁକୁର୍ୟାଃ ମେଁନେ ତୁମୁଆଃନ୍ୟା ଜୀତ ସ୍ଲାଃନେ ତ୍ମି ଉଲିଆ ଲେଃଗେ; ନୋହ ଏନ୍‌ କେଚେ ମ୍ୟାକେ ଜେ ମଚ୍‌ପୁର୍‌ ଆଡ଼ାତ୍ରା ଣ୍ଡିଆ ଗଣ୍ଡା ୱେଗେ ଡାଗ୍‌ଚେ ନୋହ ମ୍ୟାଃକେ । 12 ଆରି ଗୁ ଦିନ୍‌ ୱେକ୍ନେ ଇଡ଼ିଙ୍ଗ୍‌ ନୋହ ଜାହାଜ୍‌ବାନ୍‌ ବାର୍‌ମୁଇଂତର୍‌ କୁକୁର୍ୟାଃକେ ଆୱାଲେ ବିକେ । ମାତର୍‌ କୁକୁର୍ୟାଃ ବାର୍‌ମୁଇଂତର୍‌ ମେଁନେ ଡାଗ୍ରା ଆଣ୍ଡେ ଆପାଙ୍ଗ୍‌କେ ଣ୍ଡୁ ।

13 ଏନ୍‌ ଇଡ଼ିଙ୍ଗ୍‌ ନୋହ ଜାହାଜ୍‌ନେ କାପାଟ୍‌ ରଃଚେ ମେଁ କେକେ ଜେ, ତୁବଃ ସାପା ନ୍‌ସୁଆର୍‌ ୱେଗେ । ଏନ୍‌ ଲେଃଗେ ପର୍‌ତୁମ୍ ଆର୍କେନେ ପର୍‌ତୁମ୍‌ ଦିନ୍‌ । ନୋହକେ ଆତେନ୍‌ ବେଲା ତୁର୍‌ ଶହ ମୁଇଂ ମୁଆଁ ଡିଙ୍ଗ୍‌ଲେଃଗେ । 14 ଦେକ୍‌ରକମ୍‌ ଦୁତିୟ ଆର୍କେନେ ସତେଇସ୍‌ ଦିନା ମଚ୍‌ପୁର୍‌ନେ ତୁବଃ ସାପା ନ୍‌ସୁଆର୍‌କେ ।

15 ଆରି ପର୍‌ମେସର୍‌ ନୋହକେ ବାସଙ୍ଗ୍‌କେ, 16 ନାଁ ନାନେ ସେଲାମ୍ବୁଏଃ ଆରି ଗଡ଼େଇଂ ଆରି ମାଚୁଆଇଂକେ ସଙ୍ଗେ ସାଚେ ଜାହାଜ୍‌ବାନ୍‌ ତାର୍‌ଚେ ୱେଲାପା । 17 ନାଁନେ ଏତେ ସାପା ପସୁଇଂକେ ଆଃତାର୍‌ ଡୁଙ୍ଗ୍‌ପାଙ୍ଗ୍‌ଲା । ସାପା ପସୁ, ସାପା ପ୍ଲିଗ୍‌, ସାପା ତୁବନ୍ୟା ରେଃସଚେ ଅଲେଙ୍ଗ୍‌ନେ ପ୍ରାନି ମେଇଂ ମଚ୍‌ପୁର୍‌ନ୍ୟା ବର୍ତି ଡିଙ୍ଗ୍ଆର୍‌ଲେ । ବାରି ମଚ୍‌ପୁର୍‌ନ୍ୟା ଜାତିକୁଟୁମ୍‌ ଆରି ଜାବର୍‌ ବଂସ ଡିଙ୍ଗ୍‌ଆର୍‌ଲେ । 18 ଆତ୍‌ବାନ୍‌ ନୋହ ନିଜର୍‌ ସେଲାମ୍ବୁଏଃ, ଉଂ ବାରି ଉଂନେ ମାଚୁଆଇଂକେ ସଙ୍ଗେ ସାଚେ ବାଏରେ ତାର୍‌ଆର୍‌କେ । 19 ବାରି, ନିଜର୍ ନିଜର୍ ଜାତି ଅନୁସାରେ ସାପା ପସୁ ଆରି ସାପା ତୁବନ୍ୟା ଅଲେଙ୍ଗ୍‌କ୍ନେ ଜିବନ୍‌ ପ୍ରାନିଇଂକେ ସାପା ପ୍ଲିଗ୍‌ ମେଇଂନେ ପରିବାର୍‌ ଏତେ ଜାହାଜ୍‌ବାନ୍‌ ବାଏରେ ପାଙ୍ଗ୍‌ଆର୍‌କେ ।

20 ଏନ୍‌ଇଡ଼ିଙ୍ଗ୍‌ ନୋହ ମାପ୍‌ରୁନେ ମ୍ନିରେ ମୁଇଂ ପୁଜା ବେଦି ତିଆର୍‌ ଡିଂକେ । ନୋହ ଆତ୍‌ଅରିଆ ସୁଚି ପସୁ ବାରି ପ୍ଲିଗ୍‌ଇଂକେ ମାପ୍‌ରୁନେ ମ୍ନିରେ ସୁଆ ବଲି ଡିଂକେ । 21 ଆତ୍‌ବା ମାପ୍‌ରୁ ଆତ୍‌ନେ ନିମାଣ୍ଡା ବାସ୍ନା ଗ୍ରହନ୍‌ ଡିଙ୍ଗ୍‌ଚେ ମେଃନେ ମେଃନେ ବାସଙ୍ଗ୍‌କେ, ନେ ରେମୁଆଁ ନ୍‌ସା ବାରି ଅବିସାପ୍‌ ନ୍ନାବି ଣ୍ଡୁ, ଅଃନାଡିଗ୍ ଡାଆଁରେବାନ୍‌ ରେମୁଆଁନେ ମନ୍‌ନ୍ୟା ବାବ୍‌ନା କରାପ୍‌, ଏଲେଡିଗ୍‌ ନେ ଡିରକମ୍‌ ଡିଙ୍ଗ୍‌ନେବକେ, ଦେତ୍‌ରକମ୍‌ ବାର୍‌ମୁଇଂତର୍‌ ଅଃନାଡିଗ୍ ସାପା ପ୍ରାନିକେ ନସ୍ଟ ନ୍ନାଡିଙ୍ଗ୍‌ ଣ୍ଡୁ । 22 ଅଃନା ଜାକ ମଚ୍‌ପୁର୍‌ ଲେଃଏ, ଆତେନ୍‌ ଜାକ ବିବିଗ୍‌ ୱେନେ ବେଲା, ରାସଃ ଆରି ନ୍ନାସେଙ୍ଗ୍‌, ବାରି ନ୍ନାସେଙ୍ଗ୍‌ ଆରି ରାସଃ କିଗ୍‌, ଆରି ସ୍ମି ବାରି ମିଡିଗ୍‌, ଏନ୍‌ ସାପା ମଚ୍‌ପୁର୍‌ନ୍ୟା ଚାଲେ ଲେଃଏ ।