ଆଦି 40

ଯୋଷେଫ୍‌ ମୁସୁଡ଼ିଙ୍ଗ୍‌ନେ ଅର୍ତ ବାସଙ୍ଗ୍‌କେ

1 ଏନ୍‌ସାପା ଗଟ୍‌ନା ଇଡ଼ିଙ୍ଗ୍‌ ମିସର୍‌ନେ ଇଃସାଙ୍ଗ୍‌ ତାଲି ମୁତା ଡୁଙ୍ଗ୍‌ଣ୍ଡ୍ରେ ବାରି ଡୁଏଣ୍ଡ୍ରେ ନେ ଆଃ ନିଜର୍‌ ସାକାର୍‌ ମିସର୍‌ନେ ଇଃସାଙ୍ଗ୍‌ନେ ବିରଦ୍‌ରେ ପାପ୍‌ କାମ୍‌ ଡିଙ୍ଗ୍‌କେ । 2 ଆତ୍‌ବା ଫାରୋ ଏନ୍‌ ମ୍ୱାକ୍ଲିଗ୍‌ ଚାକର୍‌ ଆଡ଼ାତ୍ରା ରିସା ଡିଙ୍ଗ୍‌କେ, ଇଃସାଙ୍ଗ୍‌ନେ ତାଲି ମୁତା ଡୁଙ୍ଗ୍‌ଣ୍ଡ୍ରେ ବାରି ଡୁଏଣ୍ଡ୍ରେନେ ମ୍ନାଃ ନେତା । 3 ରକ୍ୟାଡିଙ୍ଗ୍‌ଣ୍ଡ୍ରେ ସନ୍ୟଇଙ୍ଗ୍‌ ଆଣ୍ଡିନେ ବନ୍ଦି ଡୁଆନ୍ୟା ଯୋଷେଫ ବନ୍ଦି ଡିଂଲେଃଗେ । ଆତ୍‌ଡାଗ୍ରା ଆମେଇଂକେ ବନ୍ଦି ଆଡିଙ୍ଗ୍‌ଚେ ବଗେ । 4 ଆତ୍‌ବା ରକ୍ୟାଡିଙ୍ଗ୍‌ଣ୍ଡ୍ରେ ସନ୍ୟଇଙ୍ଗ୍‌ ଯୋଷେଫନେ ନ୍ତିନ୍ୟା ଆମେଇଂକେ ଅପେଃ ବିଃଲା, ଯୋଷେଫ ମେଇଂନେ କିକେ ଜୁଜୁନେ ମୁଲେକେ । ଦେକ୍‌ରକମ୍‌ ମେଇଂ ଉଡ଼ିସି ଜେଲ୍‌ଡୁଆନ୍ୟା ଲେଃଆର୍‌ଗେ ।

5 ମେଁସୁଆ ମିଡିଗ୍‌ ମେଇଂ ମୁସୁଡ଼ିଙ୍ଗ୍‌ କେଆର୍କେ । ଆତେନ୍‌ ମ୍ୱାୟା ବନ୍ଦି ମିସର୍‌ନେ ଇଃସାଙ୍ଗ୍‌ନେ ତାଲି ମୁତା ଡୁଙ୍ଗ୍‌ଣ୍ଡ୍ରେ ବାରି ମ୍ନା ରାନ୍ଦାରି । ମ୍ୱାୟା ମୁଇଂ ମୁସୁଡ଼ିଙ୍ଗ୍‌ କେଆର୍କେ ବାରି ମ୍ୱାୟାନେ ମୁସୁଡ଼ିଙ୍ଗ୍‌ ଅରତ୍‌ ବିନି ବିନି ଲେଃଗେ । 6 ଯୋଷେଫ ଞ୍ଜିର୍‌ନୁଗ୍‌ ମେଇଂ ଡାଗ୍ରା ୱେଲା, ଯୋଷେଫ କେକେ, ଆତେନ୍‌ ମ୍ୱାୟା ବନ୍ଦି ଜାବର୍‌ ଇରିଆତୁଗ୍‌ ଡିଙ୍ଗ୍‌ଆର୍‌ଡିଂକେ । 7 ଜାଣ୍ଡେଇଂ ଜେଲ୍‌ ଡୁଆ ଲେଃଆର୍କେ, ଯୋଷେଫ ଫାରୋନେ ଚାକର୍‌ଇଂକେ ସାଲିଆକୁକେ, "ନାଁ ମେଁ ନ୍‌ସା ସାର୍ମୁଆଃକେ ଆଃସ୍ନୁଆର୍‌ଚେ କନାଲେଃକେ ?"

8 ଆତେନ୍‌ ମ୍ୱାୟା ବନ୍ଦି ଉତର୍‌ ବିଃଆର୍କେ, "ନେ ତୁଗୁଆ ମିଡିଗ୍‌ ମୁସୁଡ଼ିଙ୍ଗ୍‌ ନେକେକେ । ମାତର୍‌ ଆତେନ୍‌ ବୁଜେ ନେୟାକେ ଣ୍ଡୁ । ଆତେନ୍‌ ମୁସୁଡ଼ିଙ୍ଗ୍‌ନେ ଅର୍ତ ବାସଙ୍ଗ୍‌ ନ୍‌ସା ଜାଡିଗ୍‌ ଣ୍ଡୁ ।" ତେଲା ଯୋଷେଫ ଆମେଇଂକେ ବାସଙ୍ଗ୍‌କେ, "ପର୍‌ମେସର୍‌ ଜାଣ୍ଡେ କି ମୁସୁଡ଼ିଙ୍ଗ୍‌ ଡିଗ୍‌ ବୁଜେ ୟାଏ ବାରି ମେଁନେ ଅର୍ତ ଡିଗ୍‌ ବାସଙ୍ଗ୍‌ ୟାଏ । ତେସା ନେଙ୍ଗ୍‌ ଆପେକେ ଗୁଆରେ ଡିଙ୍ଗ୍‌ଣ୍ଡିଂକେ, ଆତେନ୍‌ ମୁସୁଡ଼ିଙ୍ଗ୍‌ ବିସଏରେ ଆନେଙ୍ଗ୍‌ ବାଲିର୍‌ପା ।"

ଦ୍ରାକ୍ୟା ରସ୍‌ ବିମ୍ୟାକ୍ନେ ରେମୁଆଁନେ ମୁସୁଡ଼ିଙ୍ଗ୍‌

9 ତେସା ଇଃସାଙ୍ଗ୍‌ନେ ମ୍ନା ରକ୍ୟାଡିଙ୍ଗ୍‌ଣ୍ଡ୍ରେ ଯୋଷେଫକେ ମେଁନେ ମୁସୁଡ଼ିଙ୍ଗ୍‌ ବିସଏରେ ବାଲିର୍‌କେ, "କେଲା, ମୁଇଂ ଅଙ୍ଗୁର୍‌ ସ୍ଲାଃ ନେଙ୍ଗ୍‌ ସାମ୍‌ନେ ଲେଃଗେ । 10 ଆତେନ୍‌ ଅଙ୍ଗୁର୍‌ ସ୍ଲାଃନ୍ୟା ଞ୍ଜିକ୍ଲିଗ୍‌ କେନ୍ଦା ଲେଃଗେ, ଆତେନ୍‌ ଚୁଚୁ ଡିଙ୍ଗ୍‌ଚେ ବାରି ଆତ୍‌ଡାଗ୍ରା ସାରୀକେ, ଆରି ମେଁନେ ଜୁପାନ୍ୟା ଚୁଚୁ ସାଃଚେ ବ୍ଲେକେ । 11 ଆତେନ୍‌ ବେଲା ନେଙ୍ଗ୍‌ ନ୍ତିନ୍ୟା ଫାରୋନେ ଣ୍ଡିଆ ଉଗ୍‌ନେ ମୁତା ଲେଃଲା ଆତେନ୍‌ ମୁତାନ୍ୟା ନେଙ୍ଗ୍‌ ଅଙ୍ଗୁର୍‌ ଚୁଚୁ ସାଚେ ପିଚ୍‌କେଚେ ଫାରୋନେ ନ୍ତିନ୍ୟା ଆତେନ୍‌ ମୁତା ମ୍ୱିକେ ।"

12 ଆତ୍‌ବା ଯୋଷେଫ ଆମେଇଂକେ ବାସଙ୍ଗ୍‌କେ, "ଏନ୍‌ ଅରତ୍‌ ଡିଙ୍ଗ୍‌କେ, ଆତେନ୍‌ ଞ୍ଜିକ୍ଲିଗ୍‌ କେନ୍ଦାନ୍ୟା ଞ୍ଜି ଦିନ୍‌ ବୁଜେଏ । 13 ଞ୍ଜି ଦିନ୍‌ ବିତ୍ରେ ଫାରୋ ଆପେକେ ବାଃଆ ଟେକେଚେ ଆପେକେ ନିଜର୍‌ ଡାଗ୍ରା ଆପେକେ କାମ୍‌ ବିଏ । ଆତ୍‌ବା ପେ ସେନୁଗ୍‌ ରକମ୍‌ ଉଗ୍‌ନେ ମୁତା ଡୁଙ୍ଗ୍‌ଣ୍ଡ୍ରେ ଡିଙ୍ଗ୍‌ଚେ ବାରି ମୁଇଂତର୍‌ ଫାରୋନେ ନ୍ତିନ୍ୟା ଉଗ୍‌ନେ ମୁତା ପେବିଏ । 14 ମାତର୍‌ ପେନେ ମଙ୍ଗଲ୍‌ ଡିଙ୍ଗ୍‌ଲା, ଆନେଙ୍ଗ୍‌ ମନେ ନାତ୍ଲାଗ୍‌ଏ । ବାରି ନେଙ୍ଗ୍‌ ଆଡ଼ାତ୍ରା ଦୟା ଡିଙ୍ଗ୍‌ଚେ ଫାରୋନେ ଡାଗ୍ରା ନେଙ୍ଗ୍‌ ବିସଏ ବାଲିର୍‌ଚେ ଆନେଙ୍ଗ୍‌ ଏନ୍‌ ଜେଲ୍‌ ଡୁଆବାନ୍ ମୁକ୍ତି ନାଡିଙ୍ଗ୍‌ଏ । 15 ଡାଗ୍ଲା ଏବ୍ରୀୟଇଂନେ ଦେସ୍‌ବାନ୍‌ ରେମୁଆଁଇଂ ଆନେଙ୍ଗ୍‌ ଜବର୍‌ଦସ୍ତି ଡଙ୍ଗାଚେ ରାଙ୍ଗ୍‌ପାଙ୍ଗ୍‌ ବଆର୍‌କେ । ବାରି ଏନ୍‌ ଜାଗାନ୍ୟା ଡିଗ୍‌ ନେଙ୍ଗ୍‌ ମେଃଡିଗ୍‌ ବୁଲ୍‌ ନ୍ନାଡିଙ୍ଗ୍‌କେ ଣ୍ଡୁ । ଏଲେଡିଗ୍‌ କ୍ମେଇଂ ଆନେଙ୍ଗ୍‌ ଏନ୍‌ ଜେଲ୍‌ ଡୁଆନ୍ନିଆ ବନ୍ଦି ଆଡିଙ୍ଗ୍‌ବକେ ।"

16 ଆତ୍‌ବା ମେଁ ନିମାଣ୍ଡା ଅରତ୍‌ ବାସଙ୍ଗ୍‌କେ । ମ୍ନାଃ ରାନ୍ଦାରି ଏନ୍‌ କେଚେ ଯୋଷେଫକେ ବାଲିର୍‌କେ, ନେଙ୍ଗ୍‌ ଡିଗ୍‌ ମୁସୁଡ଼ିଙ୍ଗ୍‌ କେନ୍‌ଲେକେ । କେଲା, ନେଙ୍ଗ୍‌ ବାଃଆ ଆଡ଼ାତ୍ରା ଞ୍ଜିକ୍ଲିଗ୍‌ ଡାଲା ରୁଟି ଲେଃଗେ । 17 ସାପାବାନ୍‌ ଆଡ଼ାତ୍ରାନେ ମୁତାନ୍ୟା ଫାରୋନେ ଚଙ୍ଗ୍‌ନ୍‌ସା ବିନ୍‌ ବିନ୍‌ ରକମ୍‌ ଚଙ୍ଗ୍‌ନେ ଜିନିସ୍‌ ଲେଃଗେ । ବାରି ପ୍ଲିଗ୍‌ଇଂ ପାଙ୍ଗ୍‌ଚେ ନେଙ୍ଗ୍‌ନେ ବାଃଆନ୍ୟା ଲେଃକ୍ନେ ମୁତାବାନ୍‌ ଚଙ୍ଗ୍‌ ଆର୍କେ ।

18 ଆତେନ୍‌ ବେଲା ଯୋଷେଫ ଉତର୍‌ ବିକେ, "ଏନ୍‌ ଅରତ୍‌ ଆକାନ୍‌ । ଆତେନ୍‌ ଞ୍ଜିକ୍ଲିଗ୍‌ ଡାଲା ଞ୍ଜି ଦିନ୍‌କେ ବୁଜେଡିଂକେ । 19 ଞ୍ଜି ଦିନ୍‌ ବିତ୍ରେ ଫାରୋ ନାଁ କୁଲ୍‌ବାନ୍‌ ନାଁନେ ବାଃଆ ସିତଗ୍‌ଚେ ସ୍ଲାଃ ଆଡ଼ାତ୍ରା ଆୱେଜଙ୍ଗ୍‌ ବିଏ । ବାରି ପ୍ଲିଗ୍‌ଇଂ ପାଙ୍ଗ୍‌ଚେ ପେନେ ଗାଗ୍‌ଡ଼େବାନ୍‌ ପେନେ ଚିଲି ଚଙ୍ଗ୍‌ଏ ।"

ଯୋଷେଫକେ ଆବ ବିକେ

20 ଏନ୍‌ ଇଡ଼ିଙ୍ଗ୍‌ ଞ୍ଜି ଦିନ୍‌ ବିତ୍ରେ ଫାରୋନେ ଜନମ୍‌ ଦିନ୍‌ ପିଙ୍ଗ୍‌ଚାଲା, ମେଁ ନିଜର୍‌ ସାପା ଚାକର୍‌ଇଂ ନ୍‌ସା ଚଙ୍ଗ୍‌ନେ ତିଆର୍‌ ଡିଙ୍ଗ୍‌କେ । ଆତ୍‌ବା ମେଁ ନିଜର୍‌ ସାପା ଚାକର୍‌ ସାମ୍‌ନେ ଉଗ୍‌ନେ ମୁତା ଡୁଙ୍ଗ୍‌ଣ୍ଡ୍ରେକେ ବାରି ମ୍ନାଃ ରାନ୍ଦାରିନେ ବାଆଃ ଟେକେଆର୍‌କେ । 21 ଟିକ୍‌ ଦେତ୍‌ରକମ୍‌ ଯୋଷେଫ ମେଁନେ ମୁସୁଡ଼ିଙ୍ଗ୍‌ନେ ଅରତ୍‌ ବିସଏରେ ଫାରୋ ମ୍ନାଃ ରେମୁଆଁକେ ମେଁନେ ନିଜର୍‌ ଡାଗ୍ରା ବାର୍‌ମୁଇଂତର୍‌ କାମ୍‌ ବିକେ । ଆତ୍‌ବା ମେଁ ଫାରୋନେ ନ୍ତିନ୍ୟା ଉଗ୍‌ନେ ମୁତା ବିଃନେ ମୁଲେଃକେ । 22 ମାତର୍‌ ଆତେନ୍‌ ମ୍ନାଃ ରାନ୍ଦାରିକେ ସ୍ଲାଃନ୍ୟା ଆୱେଜଙ୍ଗ୍‌ ବିକେ । 23 ଏଲେଡିଗ୍‌ ମ୍ନା ଉଗ୍‌ନେ ମୁତା ଡୁଙ୍ଗ୍‌ଣ୍ଡ୍ରେ ଯୋଷେଫକେ ମନେ ଆତ୍ଲାଗ୍‌କେ ଣ୍ଡୁ । ମେଁ ଯୋଷେଫନେ ସାମୁଆଁ ଆବଃ ବିକେ ।