1 ଏନ୍‌ ଇଡ଼ିଙ୍ଗ୍‌ ସ୍ନି ମୁଣ୍ଡେବେଲା ଅବ୍ରହାମ ମମ୍ରିନେ ଅଲୋନ୍‌ ସ୍ଲାଃ ବୁନ୍ଦେ ନିଜର୍ ତମ୍ୱୁନେ ଗାଲିଡାଗ୍ରା କଲେଃଗେ, ଏନ୍‌ ବେଲା ମାପ୍‌ରୁ ଆତେନ୍‌ ଜାଗାନ୍ୟା ଆମେକେ ଦର୍‌ସନ୍‌ ବିକେ । 2 ଅବ୍ରହାମ କେକେ ଞ୍ଜିରୁଆ ରେମୁଆଁ ମେଁନେ ସାମ୍ନାନ୍ୟା ତୁଆଁଲେ ଆର୍କେ । ଅବ୍ରହାମ ଏନ୍‌ କେକ୍ନେ ଇଡ଼ିଙ୍ଗ୍‌ ମେଇଂନେ ଡାଗ୍ରା ୱିର୍‌ ରାଙ୍ଗ୍‌ୱେକେ ବାରି ସାର୍‌ଲଚେ ବାସଙ୍ଗ୍‌କେ, 3 "ଅ ମାପ୍‌ରୁ, ଗୁଆରେ ଡିଂଣ୍ଡିଂକେ, ଅଃନା ନିଂ ଆଡ଼ାତ୍ରା ଅନୁଗ୍ରହ ନାଡିଂଏ, ତେଲା ଆକେନ୍‌ ଦାସ୍‌ନେ ଜାଗାଅରିଆ ଇଃତୁଡ଼ା ଲାଃଲା । 4 ନେଙ୍ଗ୍‌ ଇତୁଡ଼ା ଣ୍ଡିଆବାନ୍ ପେନେ ଞ୍ଚ ଗଡ଼୍ୟା ମ୍ୱିଏ ବାରି ପେଇଂ ଏନ୍‌ ସ୍ଲାଃ ବୁନ୍ଦେ ଇତୁଡ଼ା ପୁଣ୍ଡେପା । 5 ନେଙ୍ଗ୍‌ ଆପେକେ ଚଙ୍ଗ୍ ନ୍‌ସା ଇତୁଡ଼ା ବଲେ ମ୍ୱିଏ । ଏନ୍‌ ଇଡ଼ିଙ୍ଗ୍ ପେ ପେୱିଗ୍‌ଏ ।" ଆତେନ୍‌ ଞ୍ଜିରୁଆ ବାସଙ୍ଗ୍‌କେ, "ମେଃନେ ନିମାଣ୍ଡା, ଆତେନ୍‌ ଡିଙ୍ଗ୍‌ ।"

6 ଅବ୍ରହାମ୍‌ ଦାପ୍ରେ ତମ୍ୱୁ ବିତ୍ରେ ୱେଚେ ସାରାକେ ବାସଙ୍ଗ୍‌କେ, "ଞ୍ଜି ପୁଡ଼ି ନିମାଣ୍ଡା ମ‍ଇଦା ଡୁଙ୍ଗ୍‌ୱେଚେ ଚାନେଚେଃ ଦାପ୍ରେ ରୁଟି ତିଆର୍‌ ଡିଙ୍ଗ୍‌ ।" 7 ଏନ୍‌ ଇଡ଼ିଙ୍ଗ୍‌ ଅବ୍ରହାମ୍‌ ଅରେଃ ରାସି ବିତ୍‌ରେ ୱେଚେ ଅବ୍ରହାମ ମେଁନେ ମୁଇଂ ସୁନ୍ଦର୍‌ ପାଃଡ଼ିକିଗ୍‌ ଡୁଙ୍ଗ୍‌ପାଙ୍ଗ୍‌କେ । ବାରି ମେଁନେ ଚାକର୍‌କେ ବାସଙ୍ଗ୍‌କେ, ଦାପ୍ରେ ଆକାନ୍‌ ଚଙ୍ଗ୍‌ନେ ତିଆର୍‌ ଡିଙ୍ଗ୍‌ । 8 ଅବ୍ରହାମ ଉଡ଼ି ଡୁଏକ୍ନେ ଉଂଗୋଏଃଚି, ଉଡ଼ିକ୍ଲିଗ୍‌ ରୁଟି, ଉଡ଼ି ତ୍ରାଡ଼ିଆଃ, ଉଡ଼ି ଦଇ ଡୁଙ୍ଗ୍‌ପାଙ୍ଗ୍‌ଚେ ଆତେନ୍‌ ଞ୍ଜିରୁଆ ସେଃମଁ ବକେ । ଅବ୍ରହାମ ମେଇଂନେ ଡାଗ୍ରା ତୁଆଁଚେ ଚଙ୍ଗ୍‌ ନ୍‌ସା କୁସାମତି ଡିଙ୍ଗ୍‌କେ । ମେଇଂ ଆତେନ୍‌ ସ୍ଲାଃ ବୁନ୍ଦେ ଚଙ୍ଗ୍‌ଆର୍କେ ।

9 ତେନ୍‌ଇଡ଼ିଙ୍ଗ୍‌ ମେଇଂ ଆମେକେ ସାଲିଆକୁଆର୍କେ, ନାଁନେ ସେଲାମ୍ବୁଏଃ ସାରା ଆଣ୍ଡିଡାଗ୍ରା ? ମେଁ ବାସଙ୍ଗ୍‌କେ, କେଲାପା, ମେଁ ତମ୍ୱୁନ୍ୟା ଲେଃଗେ ।

10 ଆତ୍‌ବାନ୍ ମେଁ ବାସଙ୍ଗ୍‌କେ, "ଆକେନ୍‌ ରୁତୁ ବାରି ମୁଇଂତର୍ ନାଁନେ ତମ୍ୱୁନ୍ୟା ନେପାଙ୍ଗ୍‌ଏ । ଏନ୍‌ବେଲା ନାଁନେ ସେଲାମ୍ବୁଏଃ ମୁଇଂ ଗଡ଼େଅ ଜନମ୍‌ ନାବିଃଏ ।" ସାରା ତମ୍ୱୁ ପ୍ଲାଃ ଲେଃଚେ ଏନ୍‌ ସାମୁଆଁ ଦ୍ରିଗ୍‌ଡିଂଗେ । 11 ଆତେନ୍‌ ବେଲା ଅବ୍ରହାମ୍‌ ବାରି ସାରା ଜାବର୍‌ ଡକ୍ରା ଡିଂଲେଃଗେ, ଆରି ବୟସ୍‌ ଡିଗ୍‌ ଜାବର୍‌ ଡିଂୱେଲେଃଗେ । ବାରି ସାରାନେ ଗଡ଼େଅ ଜନମ୍‌ ବିଃନେ ବ‍ଏସ୍‌ ଡାୱେଲେଗେ । 12 ତେସା ସାରା ଲୁଆଃକେ ବାରି ମନେ ମନେ ବାସଙ୍ଗ୍‌କେ, "ନେଙ୍ଗ୍‌ନେ ଆକେନ୍‌ ସାରାସାରି ବେଲା କି ଦେକ୍‌ରକମ୍‌ ସାର୍ଦା ଡିଂଏ ? ଡେକ୍‌ କେଲା ନିଂନେ ମାପ୍‌ରୁ ଡିଗ୍‌ ଡକ୍ରା ।"

13 ଅଃତେନ୍‌ବେଲା ମାପ୍‌ରୁ ଅବ୍ରହାମ୍‌କେ ବାସଙ୍ଗ୍‌କେ, "ନିଜେନେ ଡକ୍ରା ବେଲା କି ଡିଲାଡିଗ୍‌ ଗଡ଼େଅ ଜନମ୍‌ ଡିଂଏ, ଆକେନ୍‌ ଏତେଚେ ସାରା ମେଃନ୍‌ସାଃ ଲୁଆଃକେ ? 14 ମାପ୍‌ରୁନେ ଇରିୟାଃତୁଗ୍‌ ଆଣ୍ଡିନେ କାମ୍‌ ? ଏନ୍‌ ଆର୍କେ ବାର୍‌ମୁଇଂତର୍‌ ପାଙ୍ଗ୍‌ଲା, ବାସଙ୍ଗ୍‌ମ୍ବକ୍ନେ ବେଲା ନିଂ ଆଣ୍ଡେ ମ୍ପାଙ୍ଗ୍‌ଏ, ଆତେନ୍‌ ବେଲା ସାରାନେ ନ୍ତିଅରିଆ ଗଡ଼େଅ ଲେଃଏ ।"

15 ମାତର୍‌ ସାରା ମନା ଡିଙ୍ଗ୍‌ଚେ ବାସଙ୍ଗ୍‌କେ, "ନେଙ୍ଗ୍‌ ନ୍ନାଲୁଆଃକେ" ଦେକ୍‌ରକମ୍‌ ବୁଟଚେ ବାସଙ୍ଗ୍‌ବଗେ । ମାତର୍‌ ମାପ୍‌ରୁ ବାସଙ୍ଗ୍‌କେ, "ନେଙ୍ଗ୍‌ ମ୍ୟାନ୍‌ଲେଃକେ, ଆକାନ୍‌ ସତ୍‌ ଣ୍ଡୁ । ନାଁ ନାଲୁଆଃକେ ।"

16 ଆତେନ୍‌ ରେମୁଆଁଇଂ ଆତ୍‌ବାନ୍‌ ତଡ଼୍ୟାଚେ ସଦୋମ ପାକା ୱେଆର୍କେ, ଅବ୍ରହାମ୍‌ ଗାଲି ଆଃସୁଏ ନ୍‌ସା ମେଇଂନେ ସଙ୍ଗେ ୱେକେ । 17 ମାପ୍‌ରୁ ବାସଙ୍ଗ୍‌କେ, "ନେଙ୍ଗ୍‌ ମେଃନି ଡିଙ୍ଗ୍‌ ନ୍‌ସା ଇକ୍‌ଚା ଡିଙ୍ଗ୍‌ନ୍‌ଲେକେ, ଆତେନ୍‌ କି ଅବ୍ରହାମ୍‌ବାନ୍‌ ମ୍ବୁଃଡ଼ିଏ ? 18 ଅବ୍ରହାମ୍‌ନେ ବାନ୍‌ ମୁଇଂ ମ୍ନାନେ ବାରି ବପୁ ଲେଃକ୍ନେ କୁଟୁମ୍‌ ତିଆର୍‌ ଡିଙ୍ଗ୍‌ଏ ବାରି ମଚ୍‌ପୁର୍‌ନେ ସାପା କୁଟୁମ୍‌ ମେଁନେବାନ୍‌ ଆସିର୍ବାଦ୍‌ ବାଆର୍‌ଏ । 19 ମେଃଡାଗ୍‌ଲା ମେଁନେ ଇଡ଼ିଂଡେନେ ଗଡ଼େଇଂ ଆରି ଡୁଆଣ୍ଡ୍ରେ ଡିରକମ୍‌ ନ୍ୟାୟ୍‌ ଆରି ଦରମ୍‌ କାମ୍‌ ଡିଂନ୍‌ସାଃ ମାପ୍‌ରୁନେ ଗାଲି ଅଲେଙ୍ଗ୍‌ଆର୍‌ଏ, ଆକେନ୍‌ସାଃ ଆମେଇଂକେ ମେଁ ଡିରକମ୍‌ ଆଦେସ୍‌ ବିଃଏ, ଆକେନ୍‌ ନ୍‌ସାଃ ନିଂ ଆମେକେ ସ୍ରି ମ୍ବକେ; ତେଲା ମାପ୍‌ରୁ ଅବ୍ରହାମ୍‌ନେ ବିସ‍ଏରେ ଆପ୍‌ନାନେ ସାପା ସାମୁଆଁ ପୁରନ୍‌ ଆଃଡିଂଏ ।"

20 ଏନ୍‌ ଇଡ଼ିଙ୍ଗ୍‌ ମାପ୍‌ରୁ ଅବ୍ରହାମ୍‌କେ ବାସଙ୍ଗ୍‌କେ, "ନେଙ୍ଗ୍‌ ଗୁଲୁଏ ନିନ୍ଦା ଅଁ ନ୍‌ଲେକେ, ସଦୋମ ବାରି ହମୋରାନେ ରେମୁଆଁଇଂ ଜାବର୍‌ ପାପ୍‌ ଡିଙ୍ଗ୍‌ବଆର୍କେ । 21 ତେସା ନେଙ୍ଗ୍‌ ଆତ୍‌ଅରିଆ ଙ୍ଗୁଏଃଏ ବାରି ଙ୍କେଏ, ଜଦି ମେଇଂ ଦେତ୍‌ରକମ୍‌ ଡିଙ୍ଗ୍‌ବଆର୍କେ, ଆଣ୍ଡିନେ ନେଙ୍ଗ୍‌ ଅଁ ନ୍‌ଲେକେ । ଜଦି ଣ୍ଡୁ, ନେଙ୍ଗ୍‌ ମ୍ୟାନ୍‌ସା ଚାଏଁଣ୍ଡିଂକେ ।"

22 ମ୍ୱାୟା ରେମୁଆଁ ସଦୋମ ପାକା ୱେକେ, ଆତେନ୍‌ ବେଲା ଅବ୍ରହାମ୍‌ ମାପ୍‌ରୁନେ ଏତେ ଲେଃଗେ । 23 ଏନ୍‌ ଇଡ଼ିଙ୍ଗ୍‌ ଅବ୍ରହାମ୍‌ ମାପ୍‌ରୁନେ ଡାଗ୍ରା ୱେଚେ ବାସଙ୍ଗ୍‌କେ, "ଅ ମାପ୍‌ରୁ ନାଁ ମେଃନି ଦରମ୍‌ ରେମୁଆଁଇଂକେ ଦୁସ୍‌ଟ‍ ରେମୁଆଁଇଂ ଏତେ ନସ୍ଟ ଆଡିଙ୍ଗ୍‌ ନ୍‌ସା ଇକ୍‌ଚା ଡିଙ୍ଗ୍‌ନାଡିଙ୍ଗ୍‌କେ ?" 24 ଡିଂଲେଃଏ, ଇନି ବିତ୍ରେ ପଚାସ୍‌ ରୁଆ ଦରମ୍‌ ରେମୁଆଁ ଲେଃଆର୍‌ଏ, ଆତେନ୍‌ ବିତ୍ରେ ପଚାସ୍‌ ରୁଆ ଦରମ୍‌ ରେମୁଆଁ ଆତ୍‌ଲା ଆତେନ୍‌ ଜାଗା ରକ୍ୟା ମାଡିଙ୍ଗ୍‌ଚେ ଦଂସ ଆଡିଙ୍ଗ୍‌ ନାବିଏ ? 25 ଦୁସ୍‌ଟ‍ ଏତେ ଦରମ୍‌ ରେମୁଆଁକେ ବିନାସ୍‌ ଆଡିଙ୍ଗ୍‌ନେ କାମ୍‌ ନାଁନେ ବାନ୍‌ ସ୍ଲ ଲେଃଲେ ବାରି ଦରମ୍‌ ରେମୁଆଁକେ ଦୁସ୍ଟନେ ଏତେ ସମାନ୍‌ ଆଡିଙ୍ଗ୍‌ନେ ନାଁନେ ବାନ୍‌ ସ୍ଲ ଲେଃଲେ । ସାପା ମଚ୍‌ପୁର୍‌ନେ ବିଚାର୍‌କର୍ତା ଲେଃ ନ୍ୟାୟ୍ ବିଚାର୍‌ ଆଡିଙ୍ଗ୍‌ଆର୍‌ ଣ୍ଡୁ ?

26 ଆତ୍‌ବାନ୍‌ ମାପ୍‌ରୁ ବାସଙ୍ଗ୍‌କେ, ନେ ଅଃନା ସଦୋମ ସହର୍‌ନ୍ୟା ପଚାସ୍‌ ରୁଆ ଦରମ୍‌ ରେମୁଆଁକେ ନେକେଏ, ତେଲା ମେଇଂନେସା ଆତେନ୍‌ ଜାଗା ରକ୍ୟା ଣ୍ଡିଙ୍ଗ୍‌ଏ ।

27 ଆତ୍‌ବାନ୍‌ ଅବ୍ରହାମ୍‌ ବାସଙ୍ଗ୍‌କେ, ମାପ୍‌ରୁ ନେଙ୍ଗ୍‌ ନାଁନେ ଡାଗ୍ରା ଦୁଲି ବାରି ଉଗ୍‌ସ ଲିଗ୍‌ଲା ଡିଗ୍‌ ମାପ୍‌ରୁନେ ଡାଗ୍ରା ସାମୁଆଁ ବାସଙ୍ଗ୍‌ ନ୍‌ସା ଚାଏଁଣ୍ଡିଂକେ । 28 ଡିଙ୍ଗ୍‌ପାରେ, ପଚାସ୍‌ ରୁଆ ଦରମ୍‌ ରେମୁଆଁ ବିତ୍ରେ ମାଲ୍‌ଡା ଗଣ୍ଡା ଲେଃଆର୍‌ଏ, ଆତେନ୍‌ ମାଲ୍‌ଡା ଗଣ୍ଡା ଲେଃକେ ଡାଗ୍‌ଚେ ନାଁ ସାପା ଇନି ନସ୍ଟ ଆଡିଙ୍ଗ୍‌ ନାବିଏ ? ମାପ୍‌ରୁ ବାସଙ୍ଗ୍‌କେ, ନେ ପଇଁଚାଲିସ ରୁଆ ଦରମ୍ ରେମୁଆଁକେ ଙ୍କେଲା, ଆତାନ୍ ଇନିକେ ନସ୍ଟ ନାଡିଙ୍ଗ୍‌ ଣ୍ଡୁ ।

29 ଅବ୍ରହାମ ଆରି ବାସଙ୍ଗ୍‌କେ, "ନାଁ ଜଦି ଆତ୍‌ଅରିଆ ଚାଲିସ୍‌ ରୁଆ ଦରମ୍‌ ରେମୁଆଁ ନାକେଏ, ତେଲା ନାଁ ମେଃନି ଆତେନ୍‌ ଇନିକେ ଦଂସ ଆଡିଙ୍ଗ୍‌ ନାବିଏ ?" ମାପ୍‌ରୁ ବାସଙ୍ଗ୍‌କେ, "ଜଦି ନେଙ୍ଗ୍‌ ଆତ୍‌ଅରିଆ ଚାଲିସ୍‌ ରୁଆ ଦରମ୍‌ ରେମୁଆଁ ଙ୍କେଏ, ତେଲା ନେଙ୍ଗ୍‌ ଆତେନ୍‌ ଇନିକେ ଦଂସ ନାଡିଙ୍ଗ୍‌ ଣ୍ଡୁ ।"

30 ବାର୍‌ମୁଇଂତର୍‌ ଅବ୍ରହାମ ବାସଙ୍ଗ୍‌କେ, "ମାପ୍‌ରୁ ରିସା ଆଡିଙ୍ଗ୍‌ଲା ବାର୍‌ମୁଇଂ ସାମୁଆଁ ମ୍ୱାସଙ୍ଗ୍‌ଏ । ଡିଙ୍ଗ୍‌ପାରେ ଆତ୍‌ଅରିଆ ତିରିସ୍‌ ରୁଆ ମିଲେଆର୍‌ଏ, ଆତେନ୍‌ ମେଃନି ଦଂସ ଆଡିଙ୍ଗ୍ ନାବିଏ ।" ମାପ୍‌ରୁ ବାସଙ୍ଗ୍‌କେ, "ଆତ୍‌ଅରିଆ ତିରିସ୍‌ ରୁଆ ମିଲେଲା, ଆତେନ୍‌ ଇନିକେ ଦଂସ ନାଡିଙ୍ଗ୍‌ ଣ୍ଡୁ ।"

31 ଅବ୍ରହାମ ବାସଙ୍ଗ୍‌କେ, "ମାପ୍‌ରୁନେ ଡାଗ୍ରା ନେଙ୍ଗ୍‌ ବାର୍‌ମୁଇଂତର୍‌ ସାମୁଆଁ ବାସଙ୍ଗ୍‌ ନ୍‌ସା ଚାଏଁଣ୍ଡିଂକେ । ଡିଙ୍ଗ୍‌ପାରେ ଆତ୍‌ଅରିଆ କୁଡ଼ିଏ ରୁଆ ଲେଃଆର୍‌ଏ । ମାପ୍‌ରୁ ବାସଙ୍ଗ୍‌କେ, ଆତେନ୍‌ କୁଡ଼ିଏ ରୁଆ ନ୍‌ସା ନେଙ୍ଗ୍‌ ଆତେନ୍‌ ଇନି ଦଂସ ନାଡିଙ୍ଗ୍‌ ଣ୍ଡୁ ।"

32 ଅବ୍ରହାମ୍‌ ବାସଙ୍ଗ୍‌କେ, ମାପ୍‌ରୁ ରିସା ଆଡିଙ୍ଗ୍‌ଲା ବାରି ମୁଇଂତର୍‌ ମ୍ୱାସଙ୍ଗ୍‌ଏ । ଡିଙ୍ଗ୍‌ପାରେ ଆତ୍‌ଅରିଆ ଗୁଆ ରୁଆ ଲେଃଆର୍‌ଏ । ମାପ୍‌ରୁ ବାସଙ୍ଗ୍‌କେ, ଆତେନ୍‌ ଗୁଆ ରୁଆ ନ୍‌ସା ନେଙ୍ଗ୍‌ ଆତେନ୍‌ ଦଂସ ନାଡିଙ୍ଗ୍‌ ଣ୍ଡୁ । 33 ମାପ୍‌ରୁ ଅବ୍ରହାମ୍‌ନେ ଏତେ ବାଲିର୍‌ବାତା ଡାକ୍ନେ ଇଡ଼ିଙ୍ଗ୍‌, ମାପ୍‌ରୁ ଆତ୍‌ବାନ୍‌ ଲାଗ୍‌ଡକେ, ବାରି ଏନ୍‌ ଇଡ଼ିଙ୍ଗ୍‌ ଅବ୍ରହାମ ନିଜର୍‌ ତମ୍ୱୁନ୍ୟା ଆଣ୍ଡେକେ ।