1 ବାରି ମିସର୍‌ ଦେସ୍‌ନ୍ୟା କିଆଉଁଆଃ ଲେଃକେ, ଏନ୍‌ ସାମୁଆଁ ଅଁଚେ ଯାକୁବ ନିଜର୍‌ ଉଂଣ୍ଡେଇଂକେ ବାସଙ୍ଗ୍‌କେ, ପେ ମେଃନ୍‌ସା ମୁଇଂଜା ମୁଇଂଜାନେ ସାର୍‌ମୁଆଃ ଆଡ଼ାତ୍ରା କେପେଡିଙ୍ଗ୍‌କେ ? 2 ନେଙ୍ଗ୍‌ ନ୍ଦ୍ରିଗ୍‌କେ ଜେ, ମିସର୍‌ ଦେସ୍‌ନ୍ୟା କିଆଉଁଆଃ ସଆର୍‌ଡିଂକେ । ତେସା ପେ ୱେଚେ କିଆଉଁଆଃ ବିଆର୍‌ ରାଙ୍ଗ୍‌ପାଙ୍ଗ୍‌ଲାପା । ଆତ୍‌ବା ନେ ମାଗୁଏଚେ ନେମ୍ୱ୍ରଏ । 3 ଯୋଷେଫନେ ଗୁଆ ବୟାଁ କିଆଉଁଆଃ ବିଆର୍‌ ନ୍‌ସା ମିସର୍‌ ଦେସ୍‌ନ୍ୟା ୱେଆର୍କେ । 4 ମାତର୍‌ ଯାକୁବ ବିନ୍ୟାମୀନକେ ଆବେକେ ଣ୍ଡୁ । ବିନ୍ୟାମୀନ୍ ଲେଃଗେ ଯୋଷେଫନେ ମୁଇଂ ଇୟାଙ୍ଗ୍‌ନେ ବୟାଁ । ଯାକୁବ ବୁଟକେ ଜେ, ଆତ୍‌ଡାଗ୍ରା ଡିଗ୍‌ ବିନ୍ୟାମୀନ୍ ନ୍‌ସା ମେଃଡିଗ୍‌ ଗଟ୍‌ନା ଗଟେ ୟାଏ ।

5 କିଣାନ୍‌ ଦେସ୍‌ନ୍ୟା ମୁର୍‌ଡି ବୟାଙ୍କାର୍‌ ଡିଙ୍ଗ୍‌କେ । ତେସା କିଣାନ୍‌ ଦେସ୍‌ବାନ୍‌ ଜାବର୍‌ ରେମୁଆଁ ମିସର୍‌ନ୍ୟା କିଆଉଁଆଃ ବିଆର୍‌ ନ୍‌ସା ୱେଆର୍କେ । ମେଇଂନେ ବିତ୍ରେ ଇସ୍ରାଏଲନେ ଉଂଣ୍ଡେଇଂ ଡିଗ୍‌ ଲେଃଆର୍‌ଗେ । 6 ଆତେନ୍‌ ବେଲା ଯୋଷେଫ ଆତେନ୍‌ ଦେସ୍‌ନେ ନେତା ଲେଃଗେ । ସାପା ଦେସ୍‌ନେ ରେମୁଆଁଇଂକେ କିଆଉଁଆଃ ସଡିଙ୍ଗ୍‌ଗେ । ଆତ୍‌ଡାଗ୍ରା ଯୋଷେଫନେ ବୟାଁଇଂ ପାଙ୍ଗ୍‌ଚେ ଆମେକେ ମୁଣ୍ଡିଆ ବଗ୍‌ଆର୍କେ । 7 ଆତେନ୍‌ ବେଲା ଯୋଷେଫ ନିଜର୍‌ ବୟାଁଇଂକେ କେଚେ ସାମୁଁଆଃକେ, ମାତର୍‌ ମେଇଂନେ ସେନୁଗ୍‌ ଆସାମୁଁଆଃକ୍ନେ ରେମୁଆଁ ରକମ୍‌ ବେବଆର୍‌ ଡିଙ୍ଗ୍‌ଚେ ରିସାରେ ସାମୁଆଁ ବାସଙ୍ଗ୍‌କେ, ପେଇଂ ଆଣ୍ଡିବାନ୍‌ ପାଙ୍ଗ୍‌ପେଲେଃକେ ? ମେଇଂ ବାସଙ୍ଗ୍ଆର୍କେ, କିଣାନ ଦେସ୍‌ବାନ୍‌ କାଦି ବିଆର୍‌ ନ୍‌ସା ପାଙ୍ଗ୍‌ନେଲେଃକେ ।

8 ମାତର୍‌ ଯୋଷେଫ ନିଜର୍‌ ବୟାଁଇଂକେ ସାମୁଁଆଃକେ, ମାତର୍‌ ମେଇଂ ଆମେକେ ସାମୁଁଆଃ ଆୟାଆର୍କେ ଣ୍ଡୁ । 9 ଆତ୍‌ବା ଯୋଷେଫ ମେଇଂନେ ବିସଏରେ ଜେ ସାପା ମୁସୁଡ଼ିଙ୍ଗ୍‌ କେଲେଃଗେ, ଆତେନ୍‌ ମନେ ତ୍ଲାଗ୍‌ଚେ ଆମେଇଂକେ ବାସଙ୍ଗ୍‌କେ, ପେଇଂ ଆକ୍‌ଡାଗ୍ରା କିଆଉଁଆଃ ବିଆର୍‌ ନ୍‌ସା ପେପାଙ୍ଗ୍‌କେ ଣ୍ଡୁ । ପେ ଡଙ୍ଗା ରେମୁଆଁ । ନେ ଆଣ୍ଡିଡାଗ୍ରା ଦୁର୍ବଲ୍‌, ଆତେନ୍‌ ବିସଏରେ ମ୍ୟାଃନ୍‌ସା ପାଙ୍ଗ୍‌ପେଲେଃକେ ।

10 ମେଇଂ ବାସଙ୍ଗ୍‌ଆର୍କେ, ଣ୍ଡୁ ମାପ୍‌ରୁ, ଆତେନ୍‌ ଣ୍ଡୁ । ନାଁନେ ଏନ୍‌ ଚାକର୍‌ଇଂ କିଆଉଁଆଃ ବିଆର୍‌ ନ୍‌ସା ପାଙ୍ଗ୍‌ଲେଃଆର୍କେ । 11 ନେ ସାପାରେ ମୁଇଂ ଆବାନେ ଉଂ । ନେ ବିସ୍‌ବାସ୍‌ ରେମୁଆଁ । ନାଁନେ ଏନ୍‌ ଚାକର୍‌ଇଂ ଡଙ୍ଗାରେ ଣ୍ଡୁ । 12 ଏନ୍‌ ଇଡ଼ିଙ୍ଗ୍‌ ଯୋଷେଫ ଆମେଇଂକେ ବାସଙ୍ଗ୍‌କେ, "ପେ ନେନେ ଦୁର୍ବଲ୍‌ ମ୍ୟାଃନ୍‌ସା ଆକ୍‌ଡାଗ୍ରା ପାଙ୍ଗ୍‌ପେଲେଃକେ ।"

13 ମେଇଂ ବାଲିର୍‌ଆର୍କେ, "ଣ୍ଡୁ, ନେ ସାପାରେ ବୟାଁ, ନେ ପରିବାର୍‌ନ୍ୟା ଗମ୍ୱାର୍‌ ରେମୁଆଁ ବୟାଁ ନେଲେଃଗେ । ନେ ସାପାରେନେ ଆବା ମୁଇଂ ଆଃ । ନେ ଡାଆଁ ବୟାଁ ନେ ଡୁଆ ଆବାନେ ଡାଗ୍ରା ଲେଃକେ । ଆରି ମୁଇଂ ବୟାଁ ସେନୁଗ୍‌ ଗୁଏଲେଃକେ । ନେ ନାଁ ଡାଗ୍ରା ଚାକର୍‌ ରକମ୍‌ । ନେ କିଣାନ ଦେସ୍‌ବାନ୍‌ ପାଙ୍ଗ୍‌ନେଲେଃକେ ।"

14 ମାତର୍‌ ଯୋଷେଫ ଆମେଇଂକେ ବାସଙ୍ଗ୍‌କେ, "ଣ୍ଡୁ, ନେଙ୍ଗ୍‌ ମ୍ୟାଃଣ୍ଡିଙ୍ଗ୍‌ ପେ ଡଙ୍ଗାରେ । 15 ମାତର୍‌ ନେଙ୍ଗ୍‌ ଆପେକେ ବାସଙ୍ଗ୍‌ଣ୍ଡିଙ୍ଗ୍ ଜେ, ପେନେ ସତ୍‌ ଆଃସୁଏପା । ଫାରୋନେ ମ୍ନିରେ ପାର୍‌ମାନ୍‌ ଡିଙ୍ଗ୍‌ଚେ ବାସଙ୍ଗ୍‌ଣ୍ଡିଂକେ ଜେ, ପେନେ ଡାଆଁ ବୟାଁ ଆକ୍‌ଡାଗ୍ରା ମାପାଙ୍ଗ୍‌ ଜାକ ନେଙ୍ଗ୍‌ ଆପେକେ ୱିଗ୍‌ ନ୍‌ସା ନ୍ନାବି ଣ୍ଡୁ । 16 ନେଙ୍ଗ୍‌ ପେନେ ବିତ୍ରେ ମୁଇଂଜାକେ ଆନ୍ତାର୍‌ ମ୍ୱିଏ, ମେଁ ୱେଚେ ପେନେ ଡାଆଁ ବୟାଁକେ ଆକ୍‌ଡାଗ୍ରା ୱା ରାଙ୍ଗ୍‌ପାଙ୍ଗ୍‌ଏ । ମେଁ ପାଙ୍ଗ୍‌ ଜାକ ପେ ବନ୍ଦିଡୁଆନ୍ୟା ପେଲେଃଏ । ନେଙ୍ଗ୍‌ ଙ୍କେଏ, ପେ ସତ୍‌ ବାସଙ୍ଗ୍‌ ପେଡିଙ୍ଗ୍‌କେ ଲେଃ ପେ ଡଙ୍ଗାରେ, ନିଂ ଫାରୋନେ ମ୍ନିରେ ପାର୍‌ମାନ୍‌ ଡିଂଚେ ବାସଙ୍ଗ୍‌ଣ୍ଡିଂକେ ।" 17 ତେସା ଯୋଷେଫ ଆମେଇଂକେ ଜିର୍‌ସି ନ୍‌ସା ବନ୍ଦିଡୁଆନ୍ୟା ବଗେ । 18 ଜିର୍‌ସି ଇଡ଼ିଙ୍ଗ୍‌, ଯୋଷେଫ ଆମେଇଂକେ ବାସଙ୍ଗ୍‌କେ, "ନେଙ୍ଗ୍‌ ପର୍‌ମେସର୍‌କେ ବୁଟ ମ୍‌ମ୍ୟାଃକେ । ଏନ୍‌ସା ଏନ୍‌ କାମ୍‌ ଡିଂପା, ତେଲା ପେ ପେମ୍ୱ୍ରଏ । 19 ପେ ଜଦି ବିସ୍‌ବାସ୍‌ ରେମୁଆଁ, ତେଲା ପେ ବୟାଁଇଂ ବିତ୍ରେ ଜାଡିଗ୍‌ ମୁଇଂଜା ବନ୍ଦି ଡୁଆ ଲାଲାପା । ବାରି ବିନ୍‌ ସାପାରେ କିଆଉଁଆଃ ପେନେ ରେମୁଆଁଇଂ ନ୍‌ସା ରାଙ୍ଗ୍‌ୱିଗ୍‌ଲାପା । 20 ମାତର୍‌ ପେ ପେନେ ଡାଆଁ ବୟାଁକେ ନେଙ୍ଗ୍‌ ଡାଗ୍ରା ରାଙ୍ଗ୍‌ପେପାଙ୍ଗ୍‌ଏ । ତେଲା ନେଙ୍ଗ୍‌ ମ୍‌ମ୍ୟାଃଏ ଜେ, ପେ ସତ୍‌ ବାସଙ୍ଗ୍‌ପେଡିଙ୍ଗ୍‌କେ । ବାରି ପେଇଂ ବାରି ପେଗୁଏ ଣ୍ଡୁ ।" ଆତ୍‌ବା ମେଇଂ ଦେତ୍‌ରକମ୍‌ ଡିଙ୍ଗ୍‌ଆର୍କେ ।

21 ମେଇଂ ମେଇଂନେ ବିତ୍ରେ ବାଲିର୍‌ବାତା ଡିଙ୍ଗ୍‌ଆର୍କେ, "ନେଃ ନେଃନେ ଡାଆଁ ବୟାଁ ଯୋଷେଫକେ ବାଗୁଏ ନେଃବକେସା ନେଃ ପାପ୍‌ ଡିଂନେଃଡିଙ୍ଗ୍‌କେ; ନେଃ କେନେଲେଃକେ, ମେଁ ଉଡ଼ି କସ୍ଟ ବାଲେଃଗେ । ଆମେକେ ରକ୍ୟା ଡିଙ୍ଗ୍‌ ନ୍‌ସା ଉଡ଼ି ଗୁଆରେକେ, ମାତର୍‌ ନେଃ ମେଁ ଆଡ଼ାତ୍ରା ମେଁନେ ସାମୁଆଁ ନେଃଅଁକେ ଣ୍ଡୁ । ତେସା ଏବେ ନେଃ କସ୍ଟରେ ପଡ଼େ ନେଲେଃକେ ।"

22 ରୁବେନ୍‌ ଆମେଇଂକେ ବାସଙ୍ଗ୍‌କେ, "ନେଙ୍ଗ୍‌ ବାସଙ୍ଗ୍‌ମ୍ୱଗେ, ପେ ମେଁନେ ଆଡ଼ାତ୍ରା ମେଃଡିଗ୍‌ ପାପ୍‌ କାମ୍‌ ଆଡିଙ୍ଗ୍‌ପା । ମାତର୍‌ ପେ ଆତେନ୍‌ ବେଲା ନେଙ୍ଗ୍ ସାମୁଆଁ ପେଅଁକେ ଣ୍ଡୁ । ତେସା ନେଃ ଏନ୍‌ କସ୍ଟ ବାନେଃଡିଙ୍ଗ୍‌କେ ।" 23 ଯୋଷେଫ୍‌ ମେଇଂନେ ଏତେ ମ୍ୱାକ୍ଲିଗ୍‌ ବାଷା ମ୍ୟାଃଲେକ୍ନେ ରେମୁଆଁ ଏତେ ବାଲିର୍‌ବାତା ଡିଙ୍ଗ୍‌ଡିଂଗେ । ଯୋଷେଫ୍‌ ମେଇଂନେ ସାମୁଆଁ ବୁଜେ ଡିଂକେ ଡାଗ୍‌ଚେ ମେଇଂ ମ୍ୟାଃ ଆୟାଆର୍କେ ଣ୍ଡୁ । 24 ତେସା ଯୋଷେଫ ମେଇଂନେବାନ୍‌ ସ୍ଲ ୱେଚେ ଅଃକେ । ଉଡ଼ିପର୍‌ ଇଡ଼ିଙ୍ଗ୍‌ ଯୋଷେଫ ମେଇଂନେ ଡାଗ୍ରା ୱେକେ । ମେଁନେ ବୟାଁଇଂନେବାନ୍‌ ମୁଇଂଜାକେ, ଡାଗ୍‌ଲା, ଶିମୀୟୋନକେ ସାଃଚେ ମେଁନେ ବୟାଁଇଂନେ ସାମ୍‌ନେ ଗାଗ୍‌କେ ।

25 ଯୋଷେଫ ମେଁନେ ଚାକର୍‌ଇଂକେ ଆଦେସ୍‌ ବିଃକେ । ମେଇଂନେ ମୁନାଅରିଆ କିଆଉଁଆଃ ବର୍‌ତି ଆଡିଙ୍ଗ୍‌ ବିଃପା । ମେଁନେ ବୟାଁଇଂ ଆତେନ୍‌ କିଆଉଁଆଃ ନ୍‌ସା ଡାବୁ ବିଃଆର୍କେ । ମାତର୍‌ ଯୋଷେଫ ଆତେନ୍‌ କିଆଉଁଆଃ ନ୍‌ସା ଡାବୁ ଆସାଲ୍ୟାକେ ଣ୍ଡୁ । ମେଁ ମେଇଂନେ ଡାବୁ ମେଇଂନେ ମୁନା ବିତ୍ରେ ଆଃଗା ବିଃକେ । ଏନ୍‌ ଇଡ଼ିଙ୍ଗ୍‌ ଯୋଷେଫ ଆମେଇଂକେ ୱିଗ୍‌ନେ ବେଲା ଆମେଇଂକେ ଚଙ୍ଗ୍‌ ନ୍‌ସା କାଦି ବିଃଏ । 26 ତେଲା ମେଁନେ ବୟାଁଇଂ ମେଇଂନେ ଗଦ ଗୁଗ୍‌ଡ୍ୟାନ୍ୟା ଲେଃକ୍ନେ ମୁନାଅରିଆ କିଆଉଁଆଃ ଲାଦେଚେ ଆତେନ୍‌ ଜାଗାବାନ୍‌ ୱିଗ୍‌ଆର୍କେ । 27 ଆତେନ୍‌ ମିଡିଗ୍‌ ମେଁନେ ବୟାଁଇଂ ମୁଇଂ ଜାଗାନ୍ୟା ଲେଃଆର୍‌ଗେ । ବୟାଁଇଂନେ ବିତ୍ରେ ମୁଇଂଜା ଗଦକେ ଚଙ୍ଗ୍‌ନେ ବିଃନ୍‌ସା ମୁନା ରଃଡ଼ାକେ ବାରି କେକେ ଜେ, ମେଇଂନେ ଡାବୁ ଲେଃଗେ । 28 ମେଁ ମେଁନେ ବିନ୍‌ ବୟାଁଇଂକେ ଏନ୍‌ ସାପା ବାସଙ୍ଗ୍‌କେ, "କେଲାପା, ନେଙ୍ଗ୍‌ ଆଣ୍ଡିନେ ଡାବୁ କିଆଉଁଆଃ ନ୍‌ସା ବିଃମ୍ୱଗେ, ଆତେନ୍‌ ଆକ୍‌ଅରିଆ ଲେଃକେ । ମୁଡ଼ି ରେମୁଆଁ ନେଙ୍ଗ୍‌ ମୁନାନ୍ୟା ଆଃଗା ବିଃବକେ ।" ମେଁନେ ସାପା ବୟାଁଇଂ ବୁଟମେଗ୍‌ ଆର୍କେ । ମେଇଂ ନିଜର୍‌ ନିଜର୍‌ ବିତ୍ରେ ବାଲିର୍‌ବାତା ଡିଂଆର୍କେ, "ପର୍‌ମେସର୍‌ ନେଃନେ ଆଡ଼ାତ୍ରା ମେଃନି ଡିଙ୍ଗ୍‌ଡିଂକେ ?"

29 ଆରି ମେଇଂ କିଣାନ ଦେସ୍‌ନ୍ୟା ନିଜର୍‌ ଆବା ଯାକୁବ ଡାଗ୍ରା ପିଙ୍ଗ୍‌ଚାଚେ ନିଜର୍‌ ଆଡ଼ାତ୍ରା ମେଃ ମେଃନି ଗଟେଲେଃଗେ, ଆତେନ୍‌ ସାପା ଆମେକେ ବାଲିର୍‌ଆର୍କେ । 30 "ଆଣ୍ଡିନେ ରେମୁଆଁ ଆତେନ୍‌ ଦେସ୍‌ନେ ସାକାର୍‌, ମେଁ ଆନେକେ ଦେସ୍‌ନେ ଡଙ୍ଗାରେ ଡାଗ୍‌ଚେ କରାପ୍‌ ସାମୁଆଁ ବାସଙ୍ଗ୍‌କେ । 31 ତେଲା ନେ ଆମେକେ ନେବାସଙ୍ଗ୍‌କେ, ନେ ବିସ୍‌ବାସ୍‌ ରେମୁଆଁ, ଡଙ୍ଗାରେ ଣ୍ଡୁ । 32 ନେ ଗମ୍ୱାର୍‌ ବୟାଁ, ସାପାରେ ମୁଇଂ ଆବାନେ ଉଂ । ନେନେ ବିତ୍ରେ ମୁଇଂ ବୟାଁ ଣ୍ଡୁ, ବାରି କିଣାନ ଦେସ୍‌ନେ ଆବା ଡାଗ୍ରା ବାର୍‌ମୁଇଂ ଡାଆଁ ବୟାଁ ଲେଃକେ । 33 ଆତେନ୍‌ ବେଲା ଦେସ୍‌ନେ ସାକାର୍‌ ଆତେନ୍‌ ରେମୁଆଁ ଆନେକେ ବାସଙ୍ଗ୍‌କେ, ଏନ୍‌ ଡିଙ୍ଗ୍‌ଲା, ନିଂ ଆପେକେ ବିସ୍‌ବାସ୍‌ ରେମୁଆଁ ଡାଗ୍‌ଚେ ବୁଜେ ଇଁୟାଏ । ପେ ନିଜର୍‌ ମୁଇଂ ବୟାଁକେ ନିଂ ଡାଗ୍ରା ବଚେ ପେ ଡୁଆ ମୁର୍‌ଡି ଡିଂଲାଏକେ ଆତେନ୍‌ସା କିଆଉଁଆଃ ରାଙ୍ଗ୍‌ୱିଗ୍‌ଲାପା । 34 ଏନ୍‌ ଇଡ଼ିଙ୍ଗ୍‌ ପେନେ ଡାଆଁ ବୟାଁକେ ନେଙ୍ଗ୍‌ ଡାଗ୍ରା ରାଙ୍ଗ୍‌ପାଙ୍ଗ୍‌ଲାପା, ତେଲା ନେଙ୍ଗ୍‌ ମ୍‌ମ୍ୟାଃଏ ଜେ, ପେଇଂ ବିସ୍‌ବାସ୍‌ ରେମୁଆଁ । ଜଦି ପେ ସତ୍‌ ବାସଙ୍ଗ୍‌ପେଡିଙ୍ଗ୍‌କେ, ତେଲା ନେଙ୍ଗ୍‌ ପେନେ ବୟାଁକେ ପେନେ ଡାଗ୍ରା ଆଃଆଣ୍ଡେ ମ୍ୱିଏ । ନେଙ୍ଗ୍‌ ଆପେକେ ପେନେ ବୟାଁକେ ମ୍ୱିଏ ବାରି ଆପେକେ ନେଙ୍ଗ୍‌ ଦେସ୍‌ବାନ୍‌ କିଆଉଁଆଃ ବିଆର୍‌ନ୍‌ସା ଆଦେସ୍‌ ମ୍ୱିଏ ।"

35 ଏନ୍‌ ଇଡ଼ିଙ୍ଗ୍‌ ବୟାଁଇଂ ମେଁନେ କିଆଉଁଆଃ କାଲି ଆଡିଙ୍ଗ୍‌ନ୍‌ସା ଚାଏଁଆର୍କେ । ବାରି ସାପା ବୟାଁଇଂ ମେଁନେ ସାମ୍‌ନାରେ ଡାବୁ, ମୁନା ବାଆର୍‌କେ । ସାପା ବୟାଁ ବାରି ମେଇଂନେ ଆବା ଏନ୍‌ ଡାବୁ କେଚେ ବୁଟଚେ ଜୁର୍‌ନେ ଲାଗେଆର୍କେ । 36 ଯାକୁବ ଆମେଇଂକେ ବାସଙ୍ଗ୍‌କେ, "ପେ ମେଃନି ବାବେ ପେଡିଙ୍ଗ୍‌କେ, ନେଙ୍ଗ୍‌ ନେଙ୍ଗ୍‌ନେ ସାପା ଉଂଇଂକେ ଆଃଗୁଏ ମ୍ୱିଏ ? ଯୋଷେଫ ଣ୍ଡୁ, ଶିମୀୟୋନ ଣ୍ଡୁ, ବାରି ପେ ଏବେ ବିନ୍ୟାମୀନକେ ଡିଗ୍‌ ରାଙ୍ଗ୍‌ୱେନେ ଚାଏଁ ପେଡିଙ୍ଗ୍‌କେ । ଆକେନ୍‌ ସାପା ବିପଦ୍‌ ନେଙ୍ଗ୍‌ ଆଡ଼ାତ୍ରା ପାଂଡିଂକେ ।" 37 ମାତର୍‌ ରୁବେନ ମେଁନେ ଆବାକେ ବାସଙ୍ଗ୍‌କେ, "ଆବା ନେଙ୍ଗ୍‌ ଅଃନା ନାଁ ଡାଗ୍ରା ଆମେଇଂକେ ରାଙ୍ଗ୍‌ନାପାଙ୍ଗ୍‌, ତେଲା ନାଁ ନେଙ୍ଗ୍‌ନେ ମ୍ୱାକ୍ଲିଗ୍‌ ଉଂକେ ବାଗୁଏ ନାବିଏ । ନେଙ୍ଗ୍‌ ନ୍ତିନ୍ୟା ଆମେକେ ଆନ୍ତାର୍‌ବି । ନେଙ୍ଗ୍‌ ଆମେକେ ବାର୍‌ମୁଇଂତର୍‌ ରାଙ୍ଗ୍‌ପାଙ୍ଗ୍‌ ମ୍ୱିଏ ।" 38 ମାତର୍‌ ଯାକୁବ ଆମେଇଂକେ ବାସଙ୍ଗ୍‌କେ, "ନେଙ୍ଗ୍‌ ବିନ୍ୟାମୀନକେ ପେ ଏତେ ନ୍ନାଆନ୍ତାର୍‌ ଣ୍ଡୁ । ମେଁନେ ବୟାଁ ଗୁଏଃଲେଃକେ । ମେଁ ମୁଇଂଜା ଆଃ ଲେଃକେ । ଜଦି ମେଁ ପେ ଏତେ ମିସର୍‌ ଦେସ୍‌ ୱେଏ ବାରି ଗାଲିନ୍ୟା ମେଃଡିଗ୍‌ ଡିଙ୍ଗ୍‌ୱେଏ, ତେଲା ପେ ଆନେଙ୍ଗ୍‌ ଦୁକ୍‌ରେ ଏନ୍‌ ବ୍ଲେକ୍ନେ ଉଗ୍‌ବଃ ଏତେ ରାଃଚ୍ୟାନ୍ତୁଗ୍‌ ପେବେଏ ।"