1 ଲେୟା ବାରି ଯାକୁବନେ ସେଲା ଲେଃଗେ ଦୀଣା । ମେସୁଆ ଦୀଣା ଆତେନ୍‌ ଜାଗାନେ ସେଲାଇଂକେ କେନ୍‌ସା ୱେକେ । 2 ଆତେନ୍‌ ଦେସ୍‌ନେ ଇଃସାଙ୍ଗ୍‌ ଲେଃଗେ ହିବ୍ବୀୟ ହମୋର । ମେଁନେ ଉଂଡେ ଶିଖିମ ଦୀଣାକେ କେକେ । ଶିଖିମ ଦୀଣାକେ ଜବର୍‌ଦସ୍ତି ରାଙ୍ଗ୍‌ୱେକେ ବାରି ଆମେକେ କରାପ୍‌ ଆଃଡିଂକେ । 3 ଏନ୍‌ ଇଡ଼ିଙ୍ଗ୍‌ ଶିଖିମ ଦୀଣାନେ ଆଲାଦ୍‌ନ୍ୟା ପଡ଼େୱେକେ ବାରି ଆମେକେ ମିଟା ମିଟା ସାମୁଆଁ ବାସଙ୍ଗ୍‌କେ । 4 ଆରି ଶିଖିମ ନିଜର୍‌ ଆବା ହମୋରକେ ବାଲିର୍‌କେ, ନାଁ ଏନ୍‌ ସେଲା ଏତେ ବିବା ଆଃଡିଂ ବିଃଲା ।

5 ଏନ୍‌ ଇଡ଼ିଙ୍ଗ୍‌ ଯାକୁବ ନିଜର୍‌ ସେଲା ଦୀଣାକେ ଶିଖିମ କରାପ୍‌ କାମ୍‌ ଡିଙ୍ଗ୍‌ଡିଂକ୍ନେ ସାମୁଆଁ ଅଁକେ । ଆତେନ୍‌ ବେଲା ମେଁନେ ଉଂଣ୍ଡେଇଂ ଲିଜନ୍ୟା ପସୁ ମାନ୍ଦା ଏତେ ଲେଃଲା, ଯାକୁବ ମେଇଂ ପାଙ୍ଗ୍‌ ଜାକ ବୁଙ୍ଗ୍‌ ଲେଃଗେ । 6 ଆତେନ୍‌ ବେଲା ଶିଖିମନେ ଆବା ହମୋର ଯାକୁବ ଏତେ ବାଲିର୍‌ବାତା ଡିଙ୍ଗ୍‌ନ୍‌ସା ୱେକେ । 7 ଉଡ଼ିବେଲା ମେଇଂ ଲିଜବାନ୍‌ ପାଙ୍ଗ୍‌ଆର୍କେ । ଦୀଣାନେ ସାପା ବୟାଁଇଂ ଏନ୍‌ ସାମୁଆଁ ଅଁଆର୍‌କେ, ଆତେନ୍‌ ବେଲା ବୟାଙ୍କାର୍‌ ବାବ୍‌ରେ ରିସା ଡିଙ୍ଗ୍‌ଆର୍କେ, ଡାଗ୍ଲା ଶିଖିମ ଇସ୍ରାଏଲନ୍ୟା ଦେକ୍‌ରକମ୍‌ ଅପ୍‌ମାନ୍‌ ରକମ୍‌ କାମ୍‌ ଡିଙ୍ଗ୍‌କେ । ମେଁ ଯାକୁବନେ ସେଲା ଏତେ ଡୁଲେଗ୍‌ବୁଏଃନେ ଟିକ୍‌ ଆଲେଗେ । 8 ମାତର୍‌ ହମୋର ଆମେଇଂକେ ବାସଙ୍ଗ୍‌କେ, "ନେଙ୍ଗ୍‌ନେ ଉଂ ଶିଖିମ ଦୀଣାକେ ବିବା ଡିଙ୍ଗ୍‌ନେ ଚାଏଁଡିଙ୍ଗ୍‌କେ । ଦୟା ଡିଙ୍ଗ୍‌ ଆମେକେ ମେଁନେ ଏଃତେ ବିବା ଡିଙ୍ଗ୍‌ବିଃପା । 9 ଏନ୍‌ ବିବା ନେନେ ବିତ୍ରେ ମୁଇଂ ନିଅମ୍‌ ଡିଙ୍ଗ୍‌ଏ । ଏନ୍‌ ଇଡ଼ିଙ୍ଗ୍‌ ନେ ରେମୁଆଁଇଂ ପେନେ ସେଲାଇଂକେ ବାରି ପେଇଂନେ ରେମୁଆଁଇଂନେ ସେଲାଇଂକେ ବିବା ଡିଙ୍ଗ୍‌ ୟାଆର୍‌ଏ । 10 ପେଇଂ ନେ ଏତେ ଏନ୍‌ ଦେସ୍‌ନ୍ୟା ବାସା ପେୟାଏ, ବେପାର୍ ପେଡିଙ୍ଗ୍‌ଏ ବାରି ଜାଗା ଅଦିକାର୍‌ ଡିଙ୍ଗ୍‌ ପେୟାଏ ।"

11 ଶିଖିମ ଦୀଣାନେ ଆବାକେ ବାରି ବୟାଁଇଂକେ ବାଲିର୍‌କେ, ଦୟା ଡିଙ୍ଗ୍‌ଚେ ଆନେଙ୍ଗ୍‌ ଗ୍ରହନ୍‌ ଡିଙ୍ଗ୍‌ପା । ପେ ମେଃନି ପେବାସଙ୍ଗ୍‌ଏ, ଆତେନ୍‌ ନେଙ୍ଗ୍‌ ମ୍ୱିଏ । 12 ଜଲାପାତି ବାରି ଉଃଡ଼ି ଜିନିସ୍‌ ପେସାଲ୍ୟାଏ, ପେଇଂନେ ସାମୁଆଁ ଅନୁସାରେ ମ୍ୱିଏ । ମାତର୍‌ ଡିଲାଡିଗ୍‌ ନେଙ୍ଗ୍‌ ଏତେ ଏନ୍‌ ସେଲାକେ ବିବା ଡିଙ୍ଗ୍‌ ବିଲାପା ।

13 ତେଲା ଶିଖିମ ଯାକୁବନେ ଉଂଣ୍ଡେଇଂନେ ତନା ଦୀଣାକେ କରାପ୍‌ କାମ୍‌ ଡିଙ୍ଗ୍‌ବକ୍ନେସାଃ ମେଇଂ ଶିଖିମ ବାରି ମେଁନେ ଆବା ହମୋର ଏଃତେ ଚାଲାକି ବାବ୍‌ରେ ବାଃଲିର୍‌ବାଃତାଚେ ବାଃଲିର୍‌ଆର୍କେ, 14 "ନେ ନାଁ ଏତେ ନେନେ ତନାକେ ବିବା ଡିଙ୍ଗ୍‌ ବିଃନେ ନେୟା ଣ୍ଡୁ । ଡାଗ୍ଲା ପେଇଂ ଏଃ ଜାକ ସୁନ୍ନତ ପେଡିଙ୍ଗ୍‌କେ । ନେ ତନା ଏତେ ବିବା ଡିଙ୍ଗ୍‌ନେ ଜାବର୍‌ ବୁଲ୍‌ ଡିଙ୍ଗ୍‌ଏ । 15 ଡାଗ୍ଲା ନେ ନେନେ ତନା ଏତେ ଆନାକେ ବିବା ଆଡିଙ୍ଗ୍‌ ନେବିଏ, ଜଦି ନାଁ ବାରି ନାଁନେ ଦେସ୍‌ନେ ସାପା ଙ୍ଗିର୍‌ବୁଏଃ ରେମୁଆଁ ନେଇଂନେ ରକମ୍‌ *ସୁନ୍ନତ ଡିଙ୍ଗ୍‌ଆର୍‌ଏ । 16 ଏନ୍‌ ଇଡ଼ିଙ୍ଗ୍‌ ପେନେ ରେମୁଆଁଇଂ ନେଇଂନେ ସେଲାଇଂକେ ବିବା ଡିଙ୍ଗ୍‌ ୟାଆର୍‌ଏ । ବାରି ନେନେ ଙ୍ଗିର୍‌ବୁଏଃଇଂ ପେଇଂନେ ସେଲାଇଂକେ ବିବା ଡିଙ୍ଗ୍‌ ୟାଆର୍‌ଏ । ଏନ୍‌ ଇଡ଼ିଙ୍ଗ୍‌ ନେ ମୁଇଂଅରିଆ ନେବାସାଏ, ମୁଇଂ ରକମ୍‌ ଡିଙ୍ଗ୍‌ ନେୟାଏ । 17 ଜଦି ପେ ସୁନ୍ନତ ଡିଙ୍ଗ୍‌ ନ୍‌ସା ମନା ପେଡିଙ୍ଗ୍‌ଏ, ତେଲା ନେ ନେନେ ତନା ଦୀଣାକେ ରାଙ୍ଗ୍‌ନେଡଏ ।"

18 ଏନ୍‌ ନିଅମ୍‌ ହମୋର ବାରି ମେଁନେ ଉଂଡେ ଶିଖିମକେ ସାର୍ଦା ଆଡିଙ୍ଗ୍‌କେ । 19 ଦୀଣାନେ ବୟାଁଇଂନେ ସାମୁଆଁରେ ସୁନ୍ନତ ଡିଙ୍ଗ୍‌ ନ୍‌ସା ଶିଖିମ ସାର୍ଦାରେ ଗ୍ରହନ୍‌ ଡିଙ୍ଗ୍‌କେ । ଶିଖିମ ମେଇଂନେ ବଂସନ୍ୟା ଜାବର୍‌ ମ୍ନାଃ ରେମୁଆଁ ଲେଃଗେ ।

20 ଆରି ହମୋର ବାରି ମେଁନେ ଉଂଡେ ଶିଖିମ ନିଜର୍‌ ଇନି ପାଙ୍ଗ୍‌ଚେ ଇନିନେ ରେମୁଆଁଇଂନେ ଏତେ ବାଲିର୍‌ବାତା ଡିଙ୍ଗ୍‌ଚେ ବାସଙ୍ଗ୍‌କେ; 21 ଏନ୍‌ ରେମୁଆଁଇଂ ନେଇଂନେ ଏତେ କୁଟୁମ୍‌ ଡିଙ୍ଗ୍‌ ନ୍‌ସା ୱେଡିଙ୍ଗ୍‌କେ । ଏନ୍‌ସା ଆକାନ୍‌ ଦେସ୍‌ କ୍ମେଇଂକେ ବାସା ନ୍‌ସା ବାରି ବେପାର୍‌ ଡିଙ୍ଗ୍‌ ନ୍‌ସା ବିଃପା । ଡାଗ୍ଲା ଏନ୍‌ ଦେସ୍‌ ମେଇଂ ନ୍‌ସା ଜାବର୍‌ ଅଦିକାର୍‌ ଲେଃଗେ । ବାରି ନେ ମେଇଂନେ ସେଲା ବିବା ଡିଙ୍ଗ୍‌ନେ ବାରି ନେନେ ସେଲା ଆମେଇଂକେ ବିବା ବିଃନେ । 22 ମେଇଂ ଆନେକେ ଗ୍ରଅନ୍ ଡିଙ୍ଗ୍‌ ନ୍‌ସା ବାରି ନେନେ ଏତେ ବାସା ନ୍‌ସା ମୁଇଂ ସାମୁଆଁ ନେ ସାପାରେକେ ଡିଙ୍ଗ୍‌ନେ ପଡ଼େଏ । ମେଇଂ ରକମ୍‌ ନେ ସାପାରେ ଙ୍ଗିର୍‌ବୁଏଃଇଂ ସୁନ୍ନତ ଡିଙ୍ଗ୍‌ନେ ପଡ଼େଏ । 23 ଜଦି ନେ ଦେକ୍‌ରକମ୍‌ ନେଡିଙ୍ଗ୍‌ଏ, ତେଲା ନେ ମେଇଂନେ ପସୁଇଂ ବାନ୍‌ ସାକାର୍‌ ଡିଙ୍ଗ୍‌ ନେୟାଏ । ତେସା ନେ ମେଇଂନେ ଏତେ ନିଅମ୍‌ ଡିଙ୍ଗ୍‌ନେ ଦର୍‌କାର୍‌ । ବାରି ମେଇଂ ଆକ୍‌ଅରିଆ ନେନେ ଏତେ ବାସାଆର୍‌ଏ । 24 ଅଃତେନ୍‌ବେଲା ହମୋର ଆରି ମେଁନେ ଉଂଡେ ଶିଖିମ୍‌ନେ ଆକେନ୍ ସାମୁଆଁରେ ମେଁନେ ଇନି ଗାଲି ବିଃଚେଃ ତାର୍‌ୱେନେ ସାପା ରେମୁଆଁ ରାଜି ଡିଙ୍ଗ୍‌ଆର୍କେ; ତେଲା ମେଁନେ ଇନି ଗାଲି ବିଃଚେଃ ତାର୍‌ୱେନେ ସର୍‌ତେ ଙ୍ଗିର୍‌ବୁଏଃଇଂ ସୁନ୍ନତ ଡିଙ୍ଗ୍‌ଆର୍କେ ।

25 ଜିର୍‌ସି ଇଡ଼ିଙ୍ଗ୍‌, ଆତେନ୍‌ ଜାଗାନେ ରେମୁଆଁଇଂ ସୁନ୍ନତ ଡିଙ୍ଗ୍‌ଚେ କଷ୍ଟରେ ଲେଃଆର୍କେ । ଦୀଣାନେ ବୟାଁ ଶିମୀୟୋନ ବାରି ଲେବୀ, ଯାକୁବନେ ଏନ୍‌ ମ୍ୱାକ୍ଲିଗ୍‌ ଉଂଡେ ନିଜର୍‌ କାଣ୍ଡା ସାଃଚେ ମାବ୍‌ଟ କୁଟା ଆତେନ୍‌ ଇନି ଜୁଦ୍‌ ଡିଙ୍ଗ୍‌ଚେ ସାପା ଙ୍ଗିର୍‌ବୁଏଃଇଂକେ ବାଗୁଏ ବିଃଆର୍କେ । 26 ଦୀଣାନେ ବୟାଁ ଶିମୀୟୋନ ବାରି ଲେବୀ, ହମୋରକେ ବାରି ମେଁନେ ଉଂଡେ ଶିଖିମକେ କାଣ୍ଡା ଏଃତେ ବାଗୁଏଚେ ମେଇଂ ଦୀଣାକେ ଶିଖିମନେ ଡୁଆବାନ୍‌ ରାଙ୍ଗ୍‌ୱେଆର୍କେ । 27 ଯାକୁବନେ ଉଂଣ୍ଡେଇଂ ଆତେନ୍‌ ଇନିନ୍ୟା ୱେଆର୍କେ, ଆଣ୍ଡିଡାଗ୍ରା ମେଇଂନେ ତନାକେ କରାପ୍‌ କାମ୍‌ ଡିଙ୍ଗ୍‌ବଆର୍କେ, ବାରି ସାପା ଜିନିସ୍‌ ଡଙ୍ଗା ରାଙ୍ଗ୍‌ଡଆର୍କେ । 28 ବାରି ମେଇଂ ମେଣ୍ଡା, ଅରେଃ ବାରି ଗଦ ସାପା ବାରି ଇନିନେ, ଲିଜନେ ସାପା ଜିନିସ୍‌ ଡଙ୍ଗା ଆର୍କେ । 29 ବାରି ମେଇଂନେ ଗଡ଼େଇଂ ବାରି ସେଲାମ୍ବୁଏଃଇଂକେ ବନ୍ଦି ଆଡିଙ୍ଗ୍‌ଚେ ସାପା ଦନ୍‌ସମ୍ପତି ବାରି ଡୁଆନେ ସାପା ଡଙ୍ଗା ଆର୍କେ ।

30 ମାତର୍‌ ଯାକୁବ ଶିମୀୟୋନ ବାରି ଲେବୀକେ ବାଲିର୍‌କେ, "ପେଇଂ ଆନେଙ୍ଗ୍‌ ଜାବର୍‌ ଅସୁବିଦାନ୍ୟା ପେତ୍ଲାଗ୍‌କେ । ଆକ୍‌ଅରିଆନେ ସାପା ରେମୁଆଁ ଆନେଙ୍ଗ୍‌ ଇଙ୍ଗ୍‌ଚେଃ ଆର୍‌ଏ । ସାପା କିଣାନୀୟ ସାପା ପରିଷୀୟ ସାପା ରେମୁଆଁ ନେଙ୍ଗ୍‌ନେ ବିରଦ୍‌ ଡିଙ୍ଗ୍‌ଆର୍‌ଏ । ନେଇଂନେ ଗଣ୍ଡା ରେମୁଆଁ । ଜଦି ଏନ୍‌ ଜାଗାନେ ରେମୁଆଁଇଂ ନେ ଏତେ ଜୁଦ୍‌ ଡିଙ୍ଗ୍‌ ନ୍‌ସା ମୁଇଂଅରିଆ ଡିଙ୍ଗ୍‌ଆର୍‌ଏ । ତେଲା ନେଃ ଦଂସ ଡିଙ୍ଗ୍‌ ୱେଡିଙ୍ଗ୍‌ଏ । ବାରି ନେନେ ସାପା ରେମୁଆଁ ନେଙ୍ଗ୍‌ ଏତେ ଡା ୱେଆର୍‌ଏ ।"

31 ମାତର୍‌ ବୟାଁଇଂ ବାଲିର୍‌ଆର୍କେ, "ଆତେନ୍‌ ରେମୁଆଁଇଂ ନେ ତନା ଆଡ଼ାତ୍ରା ମୁଇଂ ଅଡ଼ାରେଗ୍‌ ରକମ୍‌ ବେବଆର୍‌ ଡିଙ୍ଗ୍‌ଚେ ଟିକ୍‌ ଆଡିଙ୍ଗ୍‌ଆର୍କେ ।"