ଆଦି 24

ଇସ୍‌ହାକ୍‌ ନ୍‌ସା ସେଲାମ୍ବୁଏଃ

1 ଅବ୍ରହାମ ଡକ୍ରା ଅବସ୍ତାରେ ମ୍ୱ୍ର ଲେଃଗେ । ମାପ୍‌ରୁ ଅବ୍ରହାମକେ ସାପା ବିସଏରେ ଆସିର୍ବାଦ୍‌ ଡିଙ୍ଗ୍‌ବଗେ । 2 ଏନ୍‌ସା ଅବ୍ରହାମ୍‌ ନିଜର୍‌ ଡୁଆନେ ସାପା କାମ୍‌ନେ ଦାଇତ୍‌ରେ ଲେଃକ୍ନେ ଡକ୍ରା ଚାକର୍‌କେ ବାସଙ୍ଗ୍‌କେ, "ନେଙ୍ଗ୍‌ କୁସାମୁତି ଡିଙ୍ଗ୍‌ଣ୍ଡିଂକେ, ନାଁ ନେଙ୍ଗ୍‌ ବୁଲୁନ୍ୟା ନ୍ତି ଲିଗ୍‌ । 3 ନେଙ୍ଗ୍‌ କିତଂ ବାରି ମଚ୍‌ପୁର୍‌ ତିଆର୍‌ ଡିଙ୍ଗ୍‌କ୍ନେ ମାପ୍‌ରୁ ପର୍‌ମେସର୍‌ନେ ମ୍ନିରେ ପାର୍‌ମାନ୍‌ ଣ୍ଡ୍ରାଃଡିଂଏ ଜେ, ନେଙ୍ଗ୍‌ କିଣାନୀୟ ରେମୁଆଁଇଂନେ ବିତ୍ରେ ବାସା ନ୍‌ଲେଃଗେ, ନାଁ ନେଙ୍ଗ୍‌ ଉଂଣ୍ଡେନେ ବିବା କିଣାନୀୟଇଂନେ ସେଲାଇଂ ଏତେ ପେଡିଙ୍ଗ୍‌ ଣ୍ଡୁ । 4 ମାତର୍‌ ପେ ନେଙ୍ଗ୍‌ନେ କୁଟୁମ୍‌ଇଂ ଜନମ୍‌ ଜାଗାନ୍ୟା ୱେଚେ ଇସ୍‌ହାକ୍‌ ନ୍‌ସା ମୁଇଂ ସେଲା ଡୁଙ୍ଗ୍‌ପାଙ୍ଗ୍‌ଲା ।"

5 ଅଃତେନ୍‌ବେଲା ଆତେନ୍‌ ଚାକର୍‌ ଆମେକେ ବାସଙ୍ଗ୍‌କେ, "ଅଃନା ମୁଃଡ଼ିନେ ସେଲା ନେଙ୍ଗ୍‌ ଏଃତେ ଏନ୍‌ ଦେସ୍‌ଅରିଆ ପାଙ୍ଗ୍‌ ନ୍‌ସା ଇକ୍‌ଚା ଆଡିଙ୍ଗ୍‌ ଣ୍ଡୁ, ତେଲା ଆଣ୍ଡିନେ ଦେସ୍‌ବାନ୍‌ ପେ ପାଙ୍ଗ୍‌ପେଲେଃକେ, ଆତେନ୍‌ ଦେସ୍‌ଅରିଆ କି ନାଉଂକେ ଡୁଙ୍ଗ୍‌ଉଁୱିଗ୍‌ଏ ?"

6 ଅବ୍ରହାମ ଆମେକେ ବାଲିର୍‌କେ, "ଣ୍ଡୁ, ନେଙ୍ଗ୍‌ ନେଉଂକେ ଆତ୍‌ଅରିଆ ଡୁଙ୍ଗ୍‌ ନ୍ନାୱେ ଣ୍ଡୁ । 7 ମେଃଡାଗ୍‌ଲା କିତଂନେ ମୁଃଡ଼ି ମାପ୍‌ରୁ ପର୍‌ମେସର୍‌ ଆନେଙ୍ଗ୍‌ ଜନମ୍‌ ଜାଗାବାନ୍‌ ନେଙ୍ଗ୍‌ ଆବାନେ ପରିବାର୍‌ ଆକ୍‌ଡାଗ୍ରା ଡୁଙ୍ଗ୍‌ପାଙ୍ଗ୍‌ବକେ । ଆତେନ୍‌ ଜାଗା ନେଙ୍ଗ୍‌ନେ ପରିବାର୍‌ ନ୍‌ସା ନେଙ୍ଗ୍‌ନେ ଆବା । ମାତର୍‌ ମାପ୍‌ରୁ ପାର୍‌ମାନ୍‌ ଡିଙ୍ଗ୍‌ବକେ, ଏନ୍‌ ତୁବଃ ନେଙ୍ଗ୍‌ନେ ପରିବାର୍‌ ନ୍‌ସା ବିଏ । ମାପ୍‌ରୁ ମୁଇଂ ମେଁନେ ଦୁତ୍‌କେ ବେଏ । ତେଲା ନେଙ୍ଗ୍‌ନେ ଉଂ ନ୍‌ସା ସେଲା ତୁର୍‌ଚେ ଡୁଙ୍ଗ୍‌ପାଙ୍ଗ୍‌ଏ । 8 ଜଦି ଆତେନ୍‌ ସେଲା ନାଁ ଏତେ ପାଙ୍ଗ୍‌ ନ୍‌ସା ମନା ଡିଙ୍ଗ୍‌ଏ, ତେଲା ନାଁ ନାଁନେ ପାର୍‌ମାନ୍‌ ବାନ୍‌ ମୁକ୍ତି ନାଡିଙ୍ଗ୍‌ଏ । ମାତର୍‌ ନାଁ ନେଙ୍ଗ୍‌ନେ ଉଂକେ ଆତେନ୍‌ ଜାଗାନ୍ୟା ଡୁଙ୍ଗ୍‌ଆୱେଗେ ।" 9 ଆତ୍‌ବାନ୍‌ ଆତେନ୍‌ ଚାକର୍‌ ନିଜର୍ ମାପ୍‌ରୁ ଅବ୍ରହାମନେ ବୁଲୁନ୍ୟା ନ୍ତି ବଚେଃ ପାର୍‌ମାନ୍‌ ଡିଙ୍ଗ୍‌କେ ।

10 ଏନ୍‌ଇଡ଼ିଂ ଆତେନ୍‌ ଚାକର୍‌ ଅବ୍ରହାମନେ ଉଁଟ୍‌ଇଂନେ ବିତ୍ରେବାନ୍‌ ଗୁଆକ୍ଲିଗ୍‌ ଅଟ ଆରି ଆପ୍‌ନା ମାପ୍‌ରୁନେ ସାପା ରକମ୍‌ ନିମାଣ୍ଡାଃ ଜିନିସ୍‌ ନ୍ତିନ୍ନିଆ ସାଃ ତାର୍‌ଚେଃ ଅରାମନହରୟିମ୍‌ ଦେସ୍‌ନେ ନାହୋର ଇନିଅରିଆ ୱିଗ୍‌କେ । 11 ଆରି ଲମ୍‌ଡିଗ୍‌ ବେଲା, ଆଣ୍ଡିନେ ବେଲା ସେଲାଇଂ ଣ୍ଡିଆ ନ୍‌ସା ପାଙ୍ଗ୍‌ଆର୍‌ଏ, ଆତେନ୍‌ ବେଲା ଆତେନ୍‌ ଇନି ବାଏରେ କୁଇଁସାଲ୍‌ ଡାଗ୍ରା ଉଁଟ୍‌ଇଂକେ ଡେଙ୍ଗାଚେ ଆକବିକେ । 12 ବାରି ଚାକର୍‌ ପାର୍‌ତନା ଡିଙ୍ଗ୍‌ଚେ ବାଲିର୍‌କେ, "ଅ ମାପ୍‌ରୁ, ନାଁ ନେଙ୍ଗ୍‌ନେ ସାକାର୍‌ ପର୍‌ମେସର୍‌ । ନେଙ୍ଗ୍‌ ଜିବନ୍‌ନେ ଇକ୍‌ଚା ସମାନ୍‌ ଆଡିଙ୍ଗ୍‌ଚେ, ନେଙ୍ଗ୍‌ନେ ସାକାର୍‌ ଅବ୍ରହାମନେ ଆଡ଼ାତ୍ରା ଦୟା ଡିଙ୍ଗ୍‌ । 13 ନେଙ୍ଗ୍‌ ଏନ୍‌ କୁଇଁସାଲ୍‌ ଡାଗ୍ରା ତୁଆଁ ନ୍‌ଲେକେ । ବାରି ଏନ୍‌ ଇନିନ୍ୟା ଲେଃକ୍ନେ ରେମୁଆଁଇଂନେ ସେଲାଇଂ ଣ୍ଡିଆ ଡୁଙ୍ଗ୍‌ୱେ ନ୍‌ସା ପାଙ୍ଗ୍‌ଡିଙ୍ଗ୍‌ଆର୍କେ । 14 ମେଇଂନେ ବିତ୍ରେ ଆଣ୍ଡିନେ ସେଲାକେ, ନାଁ ନାଁନେ ଗାରିଆକେ ଆବ୍ରିଙ୍ଗ୍‌ଚେ ଆନିଂ ଣ୍ଡିଆ ଆଉଗ୍‌, ଏନ୍‌ ସାମୁଆଁ ବାସଙ୍ଗ୍‌କେ, ମେଁ ଉଡ଼ିବେଲା ବାସଙ୍ଗ୍‌ଏ, ଣ୍ଡିଆ ଉଗ୍‌, ଆତେନ୍‌ ବେଲା ନେଙ୍ଗ୍‌ ନାଁନେ ଉଁଟ୍‌ଇଂକେ ଆଃ ଣ୍ଡିଆ ନ୍ନାଉଗ୍‌ଏ, ତେଲା ମେଁ ନାଁନେ ଚାକର୍‌ ଇସ୍‌ହାକ୍‌ ନ୍‌ସା ନାଁସ୍ରିକ୍ନେ ସେଲା ଡିଙ୍ଗ୍‌ଏ । ଆତ୍‌ବାନ୍‌ ନାଁ ନେଙ୍ଗ୍‌ନେ ସାକାର୍‌ ଆଡ଼ାତ୍ରା ଦୟା ଡିଙ୍ଗ୍‌ନାବକେ, ଏନ୍‌ ନେଙ୍ଗ୍‌ ମ୍‌ମ୍ୟାଃଏ ।"

15 ଏନ୍‌ ସାମୁଆଁ ବାସଙ୍ଗ୍‌ ବାସଙ୍ଗ୍‌ ଅବ୍ରହାମନେ ନାହୋର ମ୍ନିକ୍ନେ ବୟାଁନେ ସେଲାମ୍ବୁଏଃ ମିଲ୍‌କାନେ ଉଂଡେ ବଥୂୟେଲ, ମେଁନେ ସେଲା ରିବିକା ଜେବାନ୍ୟା ଙ୍କୁଇ ସାଚେ ପାଙ୍ଗ୍‌କେ । 16 ମେଁ ଜାବର୍‌ ସୁନ୍ଦର୍‌ ଲେଃଗେ । ମେଁ ବିବା ଡିଙ୍ଗ୍‌ ଆଲେଃଗେ ଆରି ମେଃଡିଗ୍‌ ଙ୍ଗିର୍‌ବୁଏଃ ଏଃତେ ଡୁଲେଗ୍‌ ଆଲେଃଗେ । ମେଁ କୁଇଁସାଲ୍‌ ଡାଗ୍ରା ୱେକେ ବାରି ମେଁନେ ଙ୍କୁଇନ୍ୟା ଣ୍ଡିଆ ବର୍ତି ଆଡିଙ୍ଗ୍‌ଚେ ତାର୍‌ଡିଂକେ । 17 ଏନ୍‌ ଇଡ଼ିଙ୍ଗ୍‌ ଆତେନ୍‌ ଚାକର୍‌ ମେଁନେ ଡାଗ୍ରା ୱିର୍‌ ୱେଚେ ଆମେକେ ବାଲିର୍‌କେ, "ଦୟା ଡିଙ୍ଗ୍‌ଚେ ନାଁନେ ଙ୍କୁଇବାନ୍‌ ଆନେଙ୍ଗ୍‌ ଣ୍ଡିଆ ଉଗ୍‌ନ୍‌ସା ବିଲା ।"

18 ଆତ୍‌ବାନ୍‌ ରିବିକା ବାଲିର୍‌କେ, ମାପ୍‌ରୁ ଣ୍ଡିଆ ଉଗ୍‌ । ଏନ୍‌ ବାଲିର୍‌ଚେ ମେଁ ଦାପ୍ରେ ବାଆଃବାନ୍‌ ଙ୍କୁଇ ବୁନ୍ଦେ ଆଜାର୍‌ଚେ ଆମେକେ ଉଗ୍‌ ନ୍‌ସା ବିକେ । 19 ବାରି ଆମେକେ ଣ୍ଡିଆ ଉଗ୍‌ ଆଡାଚେ ଇଡ଼ିଙ୍ଗ୍‌ ବାଲିର୍‌କେ, ନାଁନେ ଉଁଟ୍‌ ସାପା ଣ୍ଡିଆଃ ଉଗ୍‌ ଆଃଡା ଜାକ ନେଙ୍ଗ୍‌ ଣ୍ଡିଆଃ ବାଗ୍‌ ମ୍ୱିଃଏ । 20 ଆତ୍‌ବାନ୍‌ ରିବିକା ଦାପେ କୁଣ୍ଡ୍‌ନ୍ୟା ଙ୍କୁଇନେ ଣ୍ଡିଆ କିଗ୍‌ବିଚେ ବାର୍‌ମୁଇଂତର୍‌ ଣ୍ଡିଆ ବାଗ୍‌ ନ୍‌ସା କୁଇଁସାଲ୍‌ ଡାଗ୍ରା ୱିର୍‌ରାଙ୍ଗ୍‌ୱେଚେ ସାପା ଉଁଟ୍‌ ନ୍‌ସା ଣ୍ଡିଆ ବାଗ୍‌କେ । 21 ଆତ୍‌ବାନ୍‌ ଆତାନ୍ ଚାକର୍ ରିବିକା ଆଡ଼ାତ୍ରା ନିମାଣ୍ଡାଃ ବାବ୍‌ରେ କେଲେଃଗେ । ବାରି ମାପ୍‌ରୁ ମେଁନେ ୱେନେ ଟିକ୍‌ ଆଡିଙ୍ଗ୍‌ଏ ଲେଃ ଣ୍ଡୁ, ଆତେନ୍‌ ମ୍ୟା ନ୍‌ସା ବୁଙ୍ଗ୍‌ ଲେଃଗେ ।

22 ଉଁଟ୍‌ଇଂ ଣ୍ଡିଆ ଉଗ୍ ଆଡାକ୍ନେ ଇଡ଼ିଙ୍ଗ୍‌ । ଆତେନ୍‌ ଚାକର୍‌ ରିବିକାକେ ମୁଇଂ ସୁନାନେ କୁଟି ବିକେ, ମେଁନେ ଅଜନ୍‌ ଅଦା ତୁଲା ଲେଃଗେ । ବାରି ମେଁନେ ନ୍ତି ନ୍‌ସା ମ୍ୱାକ୍ଲିଗ୍‌ ଗାଜୁଲ୍‌ ବିଃକେ, ମେଁନେ ଅଜନ୍‌ ଗୁଆ ତୁଲା ଲେଃଗେ । 23 ଆତେନ୍‌ ଚାକର୍‌ ସାଲିଆକୁକେ, "ନାଁ ଆବାନେ ମ୍ନି ମେଃନି ? ନାଁ ଆବାନେ ଡୁଆ ଲେଃନ୍‌ସା ଜାଗା ଲେଃକେ ଲେଃ ?"

24 ରିବିକା ଉତର୍‌ ବିକେ, "ନେଙ୍ଗ୍‌ ଆବା ବଥୂୟେଲ, ନାହୋର ବାରି ମିଲ୍‌କା ଜନମ୍ ଆଃଡିଂକ୍ନେ ସେଲାମ୍ବଃଅ ।" 25 ଏନ୍‌ ଇଡ଼ିଙ୍ଗ୍‌ ମେଁ ବାରି ବାଲିର୍‌କେ, "ଆଜ୍ଞା ଅଁ, ନାଁ ଅଟଇଂ ଚଙ୍ଗ୍‌ନ୍‌ସା ନେଡାଗ୍ରା ପିଆଲ୍‌ ଲେଃଗେ ବାରି ଲେଃନ୍‌ସା ଜାଗା ଲେଃକେ ।"

26 ଆତେନ୍‌ ଚାକର୍‌ ବାଆଃ ଆଃବ୍ରିଙ୍ଗ୍‌ଚେ ମାପ୍‌ରୁକେ ସାର୍‌ଲଚେ ଆମେକେ ପାର୍‌ତନା ଡିଙ୍ଗ୍‌କେ । 27 ଆତେନ୍‌ ଚାକର୍‌ ବାସଙ୍ଗ୍‌କେ, "ନେଙ୍ଗ୍‌ ସାକାର୍‌ ଅବ୍ରହାମନେ ମାପ୍‌ରୁ ପର୍‌ମେସର୍‌ନେ ଦନ୍ୟ ଡିଙ୍ଗ୍‌କେ । ମାପ୍‌ରୁ ନେଙ୍ଗ୍‌ ସାକାର୍‌ନେ ଆଡ଼ାତ୍ରା ଦୟା ବାରି ସତ୍‌ ଆଡିଙ୍ଗ୍‌ନେ ମନା ଆଡିଙ୍ଗ୍‌କେ ଣ୍ଡୁ । ମାପ୍‌ରୁ ନେଙ୍ଗ୍ ସାକାର୍‌ ଚିନେ ଲାଏକ୍ନେନିଆ ୱାରାଂୱେକେ ।"

28 ବାରି ଆତେନ୍‌ ସେଲା ୱିର୍‌ ରାଙ୍ଗ୍‌ୱେଚେ ଇୟାଙ୍ଗ୍‌ନେ ଡୁଆନେ ରେମୁଆଁଇଂକେ ଏନ୍‌ ସାମୁଆଁ ବାଲିର୍‌କେ । 29 ବାରି ରିବିକାନେ ମୁଇଂ ବୟାଁ ଲେଃଗେ, ମେଁନେ ମ୍ନି ଲାବନ, ଆତେନ୍‌ ଲାବନ ଆତାନ୍ ରେମୁଆଁ ନ୍‌ସା କୁଇଁସାଲ୍‌ ଡାଗ୍ରା ୱିର୍‌ ରାଙ୍ଗ୍‌ୱେକେ । 30 ବାରି ଆତେନ୍‌ ରେମୁଆଁ ଆନେଙ୍ଗ୍‌ ଏନ୍‌ ସାମୁଆଁ ବାସଙ୍ଗ୍‌କେ, ନିଜେନେ ତନା ରିବିକା ତୁମୁଆଃବାନ୍ ଏନ୍‌ ସାମୁଆଁ ଅଁଚେ ଆରି ତନାନେ ମ୍‌ମୁଁନ୍ନିଆ କୁଟି ବାରି ନ୍ତିନ୍ୟା ଗାଜୁଲ୍‌ କେଚେ ଆତେନ୍‌ ଙ୍ଗିର୍‌ବୁଏଃ ଡାଗ୍ରା ୱେକେ, ବାରି ଆମେକେ କୁଇଁସାଲ୍‌ ଡାଗ୍ରା ଉଁଟ୍‌ଇଂ ଏତେ ତୁଆଁ ଲେଃକ୍ନେ କେକେ । 31 ଲାବନ ବାଲିର୍‌କେ, "ଅ ମାପ୍‌ରୁ ଆସିର୍ବାଦ୍‌ ଡିଂକ୍ନେ ରେମୁଆଁ, ବିତ୍ରେ ଗାଲା, ନାଁ ମେଃନ୍‌ସାଃ ବାଏରେ ତୁଆଁ ନାଡିଂକେ ? ନିଂ ତ ଡୁଆ ଆରି ଉଁଟ୍‌ଇଂନେ ନ୍‌ସାଃ ଜାଗା ଆର୍‌ମେ ମ୍ବକେ ।"

32 ତେସା ଅବ୍ରହାମନେ ଚାକର୍‌ ଡୁଆ ୱିଗ୍‌କେ । ଲାବନ ଉଁଟ୍‌ଇଂକେ ସାଜ ତଃନ୍‌ସା ସାଇଜ ଡିଙ୍ଗ୍‌କେ ବାରି ଆମେଇଂକେ ଚଙ୍ଗ୍‌ନ୍‌ସା ପିଆଲ୍‌ ବିକେ । ଆମେକେ ବାରି ମେଁନେ ଏତେ ପାଙ୍ଗ୍‌ଲେଃକ୍ନେ ସାଙ୍ଗଡ଼େଇଂକେ ଞ୍ଚ ଗୁଏଚ ନ୍‌ସା ଣ୍ଡିଆ ବିକେ । 33 ଆରି ଲାବନ ଆମେକେ ଚଙ୍ଗ୍‌ନ୍‌ସା ବିକେ, ମାତର୍‌ ଆତେନ୍‌ ଚାକର୍‌ ଚଙ୍ଗ୍‌ନ୍‌ସା ମନା ଡିଙ୍ଗ୍‌କେ । ମେଁ ବାସଙ୍ଗ୍‌କେ, "ନେଙ୍ଗ୍‌ ପାଙ୍ଗ୍‌ନେ ବିସଏ ମାବାଲିର୍‌ ଜାକ ନାଁ ଡୁଆ ନ୍ନାଚଙ୍ଗ୍‌ ଣ୍ଡୁ ।" ତେସା ଲାବନ ବାଲିର୍‌କେ, "ତେଲା ବାସଙ୍ଗ୍‌ ।"

34 ଆତେନ୍‌ ଚାକର୍‌ ବାସଙ୍ଗ୍‌କେ, ନେଙ୍ଗ୍‌ ଅବ୍ରହାମନେ ଚାକର୍‌ । 35 ମାପ୍‌ରୁ ନେଙ୍ଗ୍‌ ସାକାର୍‌କେ ଜାବର୍‌ ଆସିର୍ବାଦ୍‌ ଡିଙ୍ଗ୍‌ବକେ । ତେସା ମେଁ ମ୍ନା ରେମୁଆଁ ଡିଙ୍ଗ୍‌ଲେଃଗେ । ବାରି ମାପ୍‌ରୁ ଆମେକେ ମାନ୍ଦା ମାନ୍ଦା ଅରେଃ, ମେଣ୍ଡା, ସୁନା, ରୁପା ଆରି ଚାକର୍‌ ଚାକ୍‌ରାନି ଉଁଟ୍‌ ବାରି ଗଦ ବିବକେ । 36 ସାରା ନେଙ୍ଗ୍‌ ସାକାର୍‌ନେ ସେଲାମ୍ବୁଏଃ, ମେଁ ଡୁକ୍ରି ବ‍ଏସ୍‌ରେ ମୁଇଂ ଗଡ଼େଅ ଜନମ୍‌ ଡିଙ୍ଗ୍‌ବକେ । ମେଁ ସାପା ସମ୍ପତି ନେଙ୍ଗ୍‌ ସାକାର୍‌କେ ବିବକେ । 37 ନେଙ୍ଗ୍‌ନେ ସାକାର୍‌ ଆନେଙ୍ଗ୍‌ ପାର୍‌ମାନ୍‌ ଆଡିଙ୍ଗ୍‌ଚେ ବାସଙ୍ଗ୍‌କେ, ନେଙ୍ଗ୍‌ନେ ଉଂକେ କିଣାନୀୟଇଂନେ ସେଲା ଏତେ ବିବା ଆଡିଙ୍ଗ୍‌ଗେ, ମେଃନ୍‌ସାଡାଗ୍ଲା ନେ ମେଇଂନେ ଦେସ୍‌ଅରିଆ ବାସା ନେଲେଃଗେ । 38 ମାତର୍‌ ମେଁ ଆନେଙ୍ଗ୍‌ ପାର୍‌ମାନ୍‌ ଡିଙ୍ଗ୍‌ଚେ ମେଁନେ ବଂସନେ ରେମୁଆଁଇଂ ଡାଗ୍ରା ବେକେ ବାରି ବାସଙ୍ଗ୍‌କେ, ୱେଲା ବାରି ନେଙ୍ଗ୍‌ ଉଂ ନ୍‌ସା ସେଲା ତୁର୍‌ ନାର୍ଲା । 39 ଅଃତେନ୍‌ବେଲା ନେଙ୍ଗ୍‌ ନେଙ୍ଗ୍‌ନେ ସାକାର୍‌କେ ମ୍ୱାସଙ୍ଗ୍‌କେ, ଦେକ୍‌ରକମ୍‌ କି ଆତେନ୍‌ ସେଲା ନେଙ୍ଗ୍‌ ଏତେ ଆପାଙ୍ଗ୍‌ ଣ୍ଡୁ । ତେଲା ନିଂ ମେଃ ଣ୍ଡିଂଏ ? 40 ଡାଗ୍ଲା ନେଙ୍ଗ୍‌ ସାକାର୍‌ ଆନେଙ୍ଗ୍‌ ବାସଙ୍ଗ୍‌କେ, ନେଙ୍ଗ୍‌ ମାପ୍‌ରୁନେ ସେବା ଡିଂଣ୍ଡ୍ରେ ବାରି ମାପ୍‌ରୁ ମେଁନେ ଦୁତ୍‌କେ ବେଏ, ଆନାକେ ସାଇଜ ଡିଙ୍ଗ୍‌ନ୍‌ସା ନାଁନେ ୱେନେ ପୁରନ୍‌ ଡିଙ୍ଗ୍‌ଏ; ନାଁ ୱେଲା । ନିଂନେ ରେମୁଆଁଇଂବାନ୍‌, ନେଙ୍ଗ୍‌ ଆବାନେ ବଂସବାନ୍‌ ନେଉଂ ନ୍‌ସା ସେଲା ଡୁଙ୍ଗ୍‌ନାପାଙ୍ଗ୍‌ଏ । 41 ମାତର୍‌ ନା ଜଦି ନେଙ୍ଗ୍‌ ବଂସନେ ରେମୁଆଁଇଂ ଡାଗ୍ରା ନାୱେଏ, ବାରି ମେଇଂ ଜଦି ମନା ଡିଙ୍ଗ୍‌ଆର୍‍ଏ; ନେଉଂ ନ୍‌ସା ସେଲା ବିନ୍‌ସା, ତେଲା ନାଁ ପାର୍‌ମାନ୍‌ ନାଡିଙ୍ଗ୍‌କ୍ନେ ବାନ୍‌ ମୁକ୍ତି ନାବାଏ ।

42 "ତେସାଃ ଏଃକେ ଏନ୍‌ କୁଇଁସାଲ୍‌ ଡାଗ୍ରା ପାଙ୍ଗ୍‌ଚେ ଆକେନ୍‌ ପାର୍‌ତନା ଣ୍ଡିଂକେ, ମାପ୍‌ରୁ ପର୍‌ମେସର୍‌ ନେଙ୍ଗ୍‌ନେ ସାକାର୍‌ ଅବ୍ରହାମନେ ପର୍‌ମେସର୍‌, ଦୟା ଡିଙ୍ଗ୍‌ଚେ ନେଙ୍ଗ୍‌ ୱେନେ ଟିକ୍‌ ଆଡିଙ୍ଗ୍‌ । 43 ନେଙ୍ଗ୍‌ ଆତେନ୍‌ କୁଇଁସାଲ୍‌ ଡାଗ୍ରା ତୁଆଁ ନ୍‌ଲେଃଗେ ବାରି ପାଙ୍ଗ୍‌ନେ ମୁଇଂ ସେଲାକେ ଉର୍‌ ନ୍‌ଲେଃଗେ, ଜାଣ୍ଡେ ଆକ୍‌ଡାଗ୍ରା ଣ୍ଡିଆ ନ୍‌ସା ପାଙ୍ଗ୍‌ଏ, ଏନ୍‌ ଇଡ଼ିଙ୍ଗ୍‌ ନେଙ୍ଗ୍‌ ମ୍ୱାସଙ୍ଗ୍‌କେ, ଦୟା ଡିଙ୍ଗ୍‌ଚେ ଆନେଙ୍ଗ୍‌ ନାଁ ଙ୍କୁଇବାନ୍‌ ଣ୍ଡିଆ ଉଗ୍‌ନ୍‌ସା ବିଲା । 44 ବାରି ଆତେନ୍‌ ସେଲା ଉଡ଼ିବେଲା ବାସଙ୍ଗ୍‌ଏ, ନାଁ ଣ୍ଡିଆ ଉଗ୍‌ ବାରି ନାଁ ଉଁଟ୍‌ଇଂ ନ୍‌ସା ଣ୍ଡିଆ ବାଗ୍‌ ମ୍ୱିଏ । ତେଲା ନେଙ୍ଗ୍‌ ସାକାର୍‌ ଉଂଡେ ନ୍‌ସା ମାପ୍‌ରୁନେବାନ୍‌ ସ୍ରି ବକ୍ନେ ସେଲା ଡିଂଲେଃ । 45 ନେଙ୍ଗ୍‌ ମନେ ମନେ ପାର୍‌ତନା ଣ୍ଡିଂକ୍ନେ ଇଡ଼ିଙ୍ଗ୍‌ ରିବିକା ଜେବାନ୍ୟା ଙ୍କୁଇ ସାଚେ କୁଇଁସାଲ୍‌ ଡାଗ୍ରା ପାଙ୍ଗ୍‌କେ । ମେଁ ଣ୍ଡିଆ ଙ୍କୁଇ କୁଇଁସାଲ୍‌ ବିତ୍ରେ ତ୍ଲାଗ୍‌କେ ବାରି ଉଡ଼ି ଣ୍ଡିଆ ବାଗ୍‌କ୍ନେ ଦାପ୍ରେ ନେଙ୍ଗ୍‌ ମ୍ୱାସଙ୍ଗ୍‌କେ, କୁସାମୁତି ଡିଙ୍ଗ୍‌ଣ୍ଡିଂକେ ଆନେଙ୍ଗ୍‌ ଣ୍ଡିଆ ଇକୁଡ଼ା ଉଗ୍‌ନ୍‌ସା ବିଲା । 46 ମେଁ ଦାପେ ଦାପେ ମେଁନେ ଜେବାବାନ୍‌ ଙ୍କୁଇ ନ୍ତିଅରିଆ ସାଚେ ନେଙ୍ଗ୍‌ ନ୍ତିନ୍ୟା ଣ୍ଡିଆ କିଗ୍‌କେ । ଏନ୍‌ ଇଡ଼ିଙ୍ଗ୍‌ ମେଁ ବାସଙ୍ଗ୍‌କେ, ନାଁ ଏନ୍‌ ଣ୍ଡିଆ ଉଗ୍‌ । ନେଙ୍ଗ୍‌ ଉଁଟ୍‌ଇଂକେ ଣ୍ଡିଆ ଆଉଗ୍‌ ଣ୍ଡିଙ୍ଗ୍‌ । ତେଲା ନେଙ୍ଗ୍‌ ଣ୍ଡିଆ ଉଁଗ୍‌କେ ବାରି ମେଁ ଡିଗ୍ ନେଙ୍ଗ୍‌ ଉଁଟ୍‌ଇଂକେ ଣ୍ଡିଆ ଆଃଉଗ୍‌କେ । 47 ଏନ୍‌ଇଡ଼ିଙ୍ଗ୍‌ ନେଙ୍ଗ୍‌ ଆମେକେ ନ୍‌ସାଲିଆକୁକେ, ନା ଜାନେ ସେଲାମ୍ବଃଅ ? ତେଲା ମେଁ ବାଲିର୍‌କେ, ନାହୋରନେ ଗାଗ୍‌ଡ଼େଅରିଆ ମିଲ୍‌କାନେ ଉଙ୍ଗ୍‌ଡେ ଜେ ବଥୂୟେଲ, ନେଙ୍ଗ୍ ମେଁନେ ସେଲାମ୍ବଃଅ । ଏନ୍‌ଇଡ଼ିଙ୍ଗ୍‌ ନେଙ୍ଗ୍‌ ମେଁନେ ମ୍‌ମୁଁଅରିଆ ଚ୍ନଗ୍‌ମୁ ଆରି ନ୍ତିଅରିଆ ଗାଜୁଲ୍‌ ଣ୍ଡ୍ରାଃତାଙ୍ଗ୍‌କେ । 48 ନେଙ୍ଗ୍‌ ବାଃଆ ଆବ୍ରିଙ୍ଗ୍‌ଚେ ମାପ୍‌ରୁକେ ଦନ୍ୟବାଦ୍‌ ଣ୍ଡିଙ୍ଗ୍‌କେ । ମେଁ ନେଙ୍ଗ୍‌ନେ ସାକାର୍‌ନେ ଉଂଡେ ନ୍‌ସା ମେଁନେ ବୟାଁନେ ଉଂଣ୍ଡେନେ ସେଲା ଟିକ୍‌ ଆଡିଙ୍ଗ୍‌ନ୍‌ସା ଆନେଙ୍ଗ୍‌ ସତ୍‌ ଗାଲି ପାକା ୱାରାଙ୍ଗ୍‌ପାଙ୍ଗ୍‌କେ । ନେଙ୍ଗ୍‌ନେ ସାକାର୍‌ ଅବ୍ରହାମ୍‌ନେ ଆତେନ୍‌ ମାପ୍‌ରୁ ପର୍‌ମେସର୍‌କେ ଦନ୍ୟବାଦ୍‌ ଣ୍ଡିଙ୍ଗ୍‌କେ । 49 ଏବେ ଆନେଙ୍ଗ୍‌ ବାସଙ୍ଗ୍‌ପା, ପେ ନେଙ୍ଗ୍‌ନେ ସାକାର୍‌ ଆଡ଼ାତ୍ରା ଦୟା ଡିଙ୍ଗ୍‌ଚେ ପେନେ ସେଲାକେ ପେବିଏ ? ପେ ମେଃନି ଆଃଆଣ୍ଡେ ପେବିଏ ? ଆନେଙ୍ଗ୍‌ ବାଲିର୍‌ପା, ତେଲା ନେଙ୍ଗ୍‌ ମ୍‌ମ୍ୟାଃଏ ଜେ ମେଃନି ଡିଙ୍ଗ୍‌ନେ ଟିକ୍‌ ।"

50 ଅଃତେନ୍‌ବେଲା ଲାବନ ବାରି ବଥୂୟେଲ ଉତର୍‌ ବିଃଆର୍କେ, "ମାପ୍‌ରୁନେ ବାନ୍‌ ଏନ୍‌ ଗଟ୍‌ନା ଡିଙ୍ଗ୍‌ଲେଃଗେ, ଆକ୍ଅରିଆ ନେ ଟିକ୍‌ ବୁଲ୍‌ ମେଃଡିଗ୍‌ ବାଲିର୍‌ ନେୟା । 51 କେଲା, ରିବିକା ନାଁନେ ସାମ୍ନାନ୍ୟା ଲେଃକେ, ଆମେକେ ସାଚେ ୱିଗ୍‌ଲା, ମାପ୍‌ରୁନେ ସାମୁଆଁ ଅନୁସାରେ ମେଁ ନାଁନେ ସାକାର୍‌ନେ ଉଂଣ୍ଡେନେ ସେଲାମ୍ବୁଏଃ ଡିଙ୍ଗ୍‌ଲେ ।" 52 ଅଃତେନ୍‌ବେଲା ଅବ୍ରହାମନେ ଚାକର୍‌ ମେଇଂନେ ବାନ୍‌ ଏନ୍‌ ସାମୁଆଁ ଅଁକ୍ନେ ଦାପେ ମାପ୍‌ରୁନେ ଡାଗ୍ରା ଡୁଲେଗ୍‌ଚେ ସାର୍ଲକେ । 53 ଅବ୍ରହାମନେ ଚାକର୍‌ ରୁପା, ସୁନା, ଅଲଙ୍କାର, ବାରି ପାଟାଇ ଆଃତାର୍‌ଚେ ରିବିକାକେ ବିକେ, ବାରି ମେଁନେ ବୟାଁ ବାରି ଇୟାଙ୍ଗ୍‌ଡେକେ ଜାବର୍‌ ଦାମ୍‌ନେ ଜିନିସ୍‌ ବିକେ ।

54 ଆତ୍‌ବାନ୍‌ ଅବ୍ରହାମ୍‌ନେ ଚାକର୍‌ ବାରି ମେଁନେ ସାଙ୍ଗଡ଼େଇଂ ଚଙ୍ଗ୍‌ଉଗ୍‌ଚେ ଆତ୍‌ଅରିଆ ଆତାନ୍ ମିଡିଗ୍‌ ଡୁଲେଗ୍ଆର୍କେ । ଏନ୍ ଇଡ଼ିଙ୍ଗ୍‌ ମେଇଂ ଞ୍ଜିର୍‌ନୁଗ୍‌ ତଡ଼୍ୟାଚେ ଆତେନ୍‌ ଚାକର୍‌ ବାଲିର୍‌କେ, ନେଙ୍ଗ୍‌ ସାକାର୍‌ ଡାଗ୍ରା ୱେନ୍‌ସା ଆନେଙ୍ଗ୍‌ ଆଦେସ୍‌ ବିଃଲା ।

55 ରିବିକାନେ ବୟାଁ ବାରି ଇୟାଙ୍ଗ୍‌ ବାଲିର୍‌କେ, "ରିବିକାକେ ନେ ଏତେ ଉଡ଼ିସି ଲେଃନ୍‌ସା ବିଲା । ଆମେକେ ନେ ଏତେ ବାରି ମୁଇଂ ସାନ୍ତା ଣ୍ଡୁଲା ଗୁଆ ଦିନ୍‌ ଲେଃନ୍‌ସା ବିଲା । ଏନ୍‌ଇଡ଼ିଙ୍ଗ୍‌ ମେଁ ୱିଗ୍‌ଏ ।"

56 ମାତର୍‌ ଚାକର୍‌ ଆମେଇଂକେ ବାସଙ୍ଗ୍‌କେ, ଆନେଙ୍ଗ୍‌ ନିଅଲ୍‌ ଆରାଡିଙ୍ଗ୍‌ପା । ମାପ୍‌ରୁ ନେଙ୍ଗ୍‌ ପାଙ୍ଗ୍‌ନେ ଟିକ୍‌ ଆଡିଙ୍ଗ୍‌କେ । ଏବେ ନେଙ୍ଗ୍‌ନେ ସାକାର୍‌ ଡାଗ୍ରା ୱେନ୍‌ସା ଆନେଙ୍ଗ୍‌ ବିଦାୟ୍‌ ବିଲାପା ।

57 ରିବିକାନେ ବୟାଁ ବାରି ଇୟାଙ୍ଗ୍‌ଡେ ବାଲିର୍‌କେ, ନେ ରିବିକାକେ ୱାଚେ ସାଲିଆକୁ ନେକେଏ । 58 ମେଇଂ ରିବିକାକେ ୱାଚେ ସାଲିଆକୁଆର୍କେ, "ନାଁ ଏନ୍‌ ରେମୁଆଁ ଏତେ ଏବେ ୱେନ୍‌ସା ଚାଏଁ ନାଡିଙ୍ଗ୍‌କେ ଲେଃ ଣ୍ଡୁ ?" ରିବିକା ବାଲିର୍‌କେ, "ଅଁ ନେଙ୍ଗ୍‌ ଉଁୱେଏ ।"

59 ଏନ୍‌ସା ମେଇଂ ଅବ୍ରହାମନେ ଚାକର୍‌ ବାରି ମେଁନେ ଏତେ ଲେଃକ୍ନେ ସାଙ୍ଗଡ଼େଇଂ ଏତେ ରିବିକାକେ ବେବିଆର୍‌କେ । ରିବିକାନେ ଚାକର୍‌ବୁଏଃ ଡିଗ୍‌ ମେଁନେ ଏତେ ୱେକେ । 60 ବାରି ରିବିକାକେ ଆସିର୍ବାଦ୍‌ ଡିଙ୍ଗ୍‌ଚେ ବାସଙ୍ଗ୍‌ଆର୍କେ, ନାଁ ନେଇଂନେ ତନା, ଅଜାର୍‌ ଅଜାର୍‌ ରେମୁଆଁନେ ଇୟାଙ୍ଗ୍‌ ଡିଙ୍ଗ୍‌ । ନାଁନେ ବଂସ ସତ୍ରୁଇଂନେ ଇନି ଅଦିକାର୍‌ ଡିଙ୍ଗ୍‌ଆର୍‌ଲେଃ । 61 ଏନ୍‌ଇଡ଼ିଙ୍ଗ୍‌ ରିବିକା ବାରି ମେଁନେ ଦାସିଇଂ ଉଁଟ୍‌ ଆଡ଼ାତ୍ରା ଡେଃଚେ ଆତେନ୍‌ ରେମୁଆଁନେ ପ୍ଲା ୱେଆର୍କେ । ଆତେନ୍‌ ଚାକର୍‌ ରିବିକାକେ ସାଚେ ଗାଲି ଅଲେଙ୍ଗ୍‌ଆର୍‌କେ ।

62 ଆତେନ୍‌ ବେଲା ଇସ୍‌ହାକ୍‌‍ ଦକିନ୍‌ ଦେସ୍‌ ପାକା ବାସା ଲେଃଲା ବେର-ଲହୟ-ରୋୟୀ ମ୍ନିକ୍ନେ ଜାଗା ୱେଚେ ଆଣ୍ଡେ ୱିଗ୍‌ଲେଃଗେ । 63 ବାରି ଲମ୍‌ଡିଗ୍‌ ବେଲା ଅଲେଙ୍ଗ୍‌ସାର୍‌ ନ୍‌ସା ଲିଜନ୍ୟା ୱେଲେଃଗେ । ଇସ୍‌ହାକ୍‌ ଆଡ଼ାତ୍ରା ତାଣ୍ଡେ କେକେ ସ୍ଲବାନ୍‌ ଉଁଟ୍‌ଇଂ ପାଙ୍ଗ୍‌ଆର୍‌ଡିଂକେ । 64 ରିବିକା ତାଣ୍ଡେଚେ ଇସ୍‌ହାକ୍‌କେ କେକେ, ଏନ୍‌ଇଡ଼ିଙ୍ଗ୍‌ ମେଁ ଉଁଟ୍‌ବାନ୍‌ ବୁନ୍ଦେ ଜାର୍‌କେ । 65 ବାରି ମେଁ ଅବ୍ରହାମ୍‌ନେ ଚାକର୍‌କେ ବାଲିର୍‌କେ, "ଆନେକେ କେଚେ କୁଡ଼େନ୍‌ସା ପାଙ୍ଗ୍‌ଡିଙ୍ଗ୍‌କ୍ନେ ଙ୍ଗିରେ ଜାଣ୍ଡେ ?" ଚାକର୍‌ ଉତର୍‌ ବିକେ, "ମେଁ ଡିଙ୍ଗ୍‌ଡିଂକେ ନେଙ୍ଗ୍‌ନେ ସାକାର୍‌ ।" ତେସା ରିବିକା ମେଁନେ ସାର୍‌ମୁଆଃକେ ଅଡ଼ନି ଏତେ ଡା ବିକେ ।

66 ଆରି ଆତେନ୍‌ ଚାକର୍‌ ମେଃନି ସାପା ଗଟେଲେଃଗେ; ଆତେନ୍‌ ଇସ୍‌ହାକ୍‌କେ ବାସଙ୍ଗ୍‌କେ, 67 ଏନ୍‌ଇଡ଼ିଙ୍ଗ୍‌ ଇସ୍‌ହାକ୍‌ ଆତେନ୍‌ ସେଲାକେ ମେଁନେ ଇୟାଙ୍ଗ୍‌ ସାରାନେ ତମ୍ୱୁନ୍ୟା ରାଙ୍ଗ୍‌ୱେକେ । ଆତେନ୍‌ ଦିନ୍‌ ଇସ୍‌ହାକ୍‌ ରିବିକା ଏତେ ବିବା ଆଃଡିଙ୍ଗ୍‌କେ । ଇସ୍‌ହାକ୍‌ ରିବିକାକେ ଜାବର୍‌ ଆଲାଦ୍‌ ଡିଂକେ । ତେସା ଇସ୍‌ହାକ୍‌ ମେଁନେ ଇୟାଙ୍ଗ୍‌ଡ଼େ ଗୁଏକ୍ନେ ଦୁକ୍‌ବାନ୍‌ ସାନ୍ତି ବାକେ ।