ସାରାନେ ଗୁଏନେ
1 ସାରା ସଏ ସତେଇସ୍ ମୁଆଁ ମ୍ୱ୍ରଲେଃଗେ । 2 ସାରା କିଣାନ ଦେସ୍ନେ କିରୀୟଥ-ଅର୍ବଅରିଆ, ଡାଗ୍ଲା, ହିବ୍ରୋଣନ୍ୟା ଗୁଏକେ । ଏନ୍ସା ଅବ୍ରହାମ୍ ମନ୍ ଦୁକ୍ ଡିଙ୍ଗ୍ଚେ ଅଃକେ ।
3 ଅବ୍ରହାମ ଆତେନ୍ ଗୁଏକ୍ନେ ସେଲାମ୍ବୁଏଃକେ ଆନ୍ତାର୍ଚେ ହେତନେ ଗଡ଼େଇଂକେ ବାସଙ୍ଗ୍କେ, 4 "ନେଙ୍ଗ୍ ପେଇଂନେ ଡାଗ୍ରା ବିଦେସ୍ ଆରି ନିଜର୍ ଦେସ୍ ବାସାଲେଃକ୍ନେ ରେମୁଆଁ ଡିଂନ୍ଲାଏଃକେ । ପେନେ ବିତ୍ରେ ଆନିଂକେ ମଡ଼ା ଆତି ନ୍ସାଃ ଇଃତୁଡ଼ା ଜାଗା ସ । ନେଙ୍ଗ୍ନେ ସେଲାମ୍ବୁଏଃକେ ଆତି ମ୍ବିଃଏ ।"
5 ତେସା ହେତନେ ଗଡ଼େଇଂ ଅବ୍ରହାମକେ ବାଲିର୍ଆର୍କେ, 6 ଅ ମାପ୍ରୁ, ନେଇଂନେ ସାମୁଆଁ ଦ୍ରିଗ୍, ନାଁ ନେଇଂନେ ବିତ୍ରେ ଜାବର୍ ବପୁନେ ଇଃସାଙ୍ଗ୍ ନାଲେକେ । ଏବେ ନେଇଂନେ ନିମାଣ୍ଡା ରାଚ୍ୟା ଜାଗା ବିତ୍ରେ ନିଜର୍ ଗୁଏକ୍ନେ ସେଲାମ୍ବୁଏଃକେ ଆତି ବିଃ । ନେଇଂନେ ବିତ୍ରେ ଜାଣ୍ଡେ ନାଁନେ ଗୁଏକ୍ନେ ସେଲାମ୍ବୁଏଃକେ ଆତି ନ୍ସାଃ ମନା ଆଡିଂଆର୍ ଣ୍ଡୁ ।
7 ଅଃତେନ୍ବେଲା ଅବ୍ରହାମ ତଡ଼୍ୟାଚେ ଆତେନ୍ ଦେସ୍ନେ ରେମୁଆଁଇଂକେ, ଡାଗ୍ଲା, ହେତନେ ଉଙ୍ଗ୍ଡେଇଂକେ ସାର୍ଲକେ । 8 ଅବ୍ରହାମ ଆମେଇଂକେ ବାଲିର୍କେ, "ଜଦି ପେଇଂ ନେଙ୍ଗ୍ନେ ସେଲାମ୍ବୁଏଃକେ ରାଚ୍ୟାନ୍ୟା ଆତି ନ୍ସା ଚାଏଁ ପେଡିଙ୍ଗ୍କେ । ତେଲା ପେଇଂ ସୋହରନେ ଉଂଡେ ଇଫ୍ରୋଣନେ ଡାଗ୍ରା ଗୁଆରି ଡିଙ୍ଗ୍ପା । 9 ମେଁ ପେଇଂନେ ବିତ୍ରେ ନେଙ୍ଗ୍ନେ ରାଚ୍ୟା ଜାଗା ଅଦିକାର୍ ନ୍ସା ମକ୍ପେଲାନ୍ୟା ମେଁନେ ଲିଜ ଆଡ଼ା ଲେଃକ୍ନେ ଗୁମ୍ପା ନେଙ୍ଗ୍ ଡାଗ୍ରା ସ ବିଲେ । ଆତେନ୍ ଉଡ଼ି ଡାବୁ ଡିଙ୍ଗ୍ଏ, ଅଃତେନ୍ ଡାବୁ ରାଙ୍ଗ୍ଡଲା ।"
10 ଆତେନ୍ ବେଲା ଇଫ୍ରୋଣ ହେତନେ ଗଡ଼େଇଂ ବିତ୍ରେ କଲେଃଗେ । ତେସାଃ ହିତ୍ତୀୟ ଇଫ୍ରୋଣ ନିଜର୍ ଇନି ଗାଲିନ୍ୟା ଗିଗାଣ୍ଡ୍ରେ ହେତନେ ଉଂଡେ ସାପାରେନେ ସାମ୍ନାନ୍ୟା ଅବ୍ରହାମକେ ବାସଙ୍ଗ୍କେ, 11 "ମାପ୍ରୁ, ଦେତ୍ରକମ୍ ଆଡିଙ୍ଗ୍ ଣ୍ଡୁ, ନେଙ୍ଗ୍ ସାମୁଆଁ ଦ୍ରିଗ୍ । ନେଙ୍ଗ୍ ଆନାକେ ଆତେନ୍ ଜାଗା ବାରି ନେଙ୍ଗ୍ ଲିଜ ଆଡ଼ାନେ ଗୁମ୍ପା ମ୍ୱିକେ । ନେଙ୍ଗ୍ ସାପା ଜାତିନେ ଗଡ଼େଇଂନେ ସାମ୍ନାନ୍ୟା ଆତେନ୍ ଆନାକେ ମ୍ୱିକେ । ନାଁ ନିଜର୍ ସେଲାମ୍ବୁଏଃନେ ଗୁଏକ୍ନେ ଗାଗ୍ଡ଼େକେ ଆତିବି ।"
12 ମାତର୍ ଅବ୍ରହାମ ଆତେନ୍ ଦେସ୍ନେ ରେମୁଆଁଇଂକେ ସାର୍ଲକେ । 13 ଆରି ଇଫ୍ରୋଣକେ ସାପାରେନେ ସାମ୍ନେ ବାଲିର୍କେ, "ମାତର୍ ନେଙ୍ଗ୍ ଆନାକେ ଆତେନ୍ ଜାଗାନେ ସାପା ଡାବୁ ବିନ୍ସା ଚାଏଁଣ୍ଡିନେଡିଂକେ । ନେନେ ଡାବୁକେ ସାଃ । ତେଲା ନେଙ୍ଗ୍ ନେଙ୍ଗ୍ନେ ଗୁଏକ୍ନେ ସେଲାମ୍ବୁଏଃକେ ଆତି ମ୍ୱିଏ ।"
14 ଇଫ୍ରୋଣ ଅବ୍ରହାମକେ ଉତର୍ ବିଚେ ବାସଙ୍ଗ୍କେ, 15 "ମାପ୍ରୁ, ନେଙ୍ଗ୍ ସାମୁଆଁ ଅଁ । ଇକୁଡ଼ା ତୁବଃନେ ମୁଲ୍ୟ ତ ଅଁଶହ ଶେକଲ୍ ରୁପା ଡାବୁ ଡିଂଏ, ନାଁ ନେ ନ୍ସା ମେଃଡିଗ୍ ଣ୍ଡୁ । ତୁବଃ ବିନ୍ସା ରାଜି ଡିଙ୍ଗ୍ଚେ ନାଁନେ ଗୁଏକ୍ନେ ସେଲାମ୍ବୁଏଃକେ ଆତିବି ।" 16 ଇଫ୍ରୋଣନେ ଏନ୍ ସାମୁଆଁ ଅଁଚେ ଅବ୍ରହାମ ହେତୀୟ ଗଡ଼େଇଂ ସାମ୍ନେ ଇଫ୍ରୋଣ ବାସଙ୍ଗ୍କ୍ନେ ସଂକ୍ୟା ଅନୁସାରେ ତେନ୍ କାଲାନେ ବେପାରିଇଂନେ ବିତ୍ରେ ଚଲେ ଲେଃକ୍ନେ ଅଁସହ ଶେକଲ୍ ରୁପା ଡାବୁ ଇଫ୍ରୋଣକେ ବିକେ ।
17 ଏନ୍ସା ମମ୍ରିନେ ପୁର୍ବ ପାକା ମକ୍ପେଲାନ୍ୟା ଇଫ୍ରୋଣନେ ଆଣ୍ଡିନେ ଲିଜ ଲେଃଗେ । ଆତେନ୍ ଲିଜ ବାରି ଲିଜ ବିତ୍ରେ ଲେଃକ୍ନେ ଗୁମ୍ପା ବାରି ଆତ୍ଡାଗ୍ରାନେ ପିତୁର୍ ପାକାନେ ସ୍ଲାଃଇଂ ଅବ୍ରହାମ୍ନେ ଡିଂକେ । 18 ଏନ୍ ସାପା ହେତନେ ଗଡ଼େଅଇଂନେ ସାମ୍ନାନ୍ୟା ଅବାଚେ ଆତେନ୍ ଇନିନେ ଗାଲି ୱେଣ୍ଡ୍ରେ ସାପାରେନେ ସାମ୍ନାନ୍ୟା ଅବ୍ରହାମନେ ଡାଗ୍ଚେ ରାଜି ଡିଂଆର୍କେ ।
19 ଆରି ଅବ୍ରହାମ ମକ୍ପେଲା ଲିଜ ଆଡ଼ା ଗୁମ୍ପାନ୍ୟା ମମ୍ରିନେ ପାକା ହିବ୍ରୋଣ ବିତ୍ରେ କିଣାନ ଦେସ୍ନ୍ୟା ନିଜର୍ ସେଲାମ୍ବୁଏଃ ସାରାକେ ଆତି ଆର୍କେ । 20 ଦେକ୍ରକମ୍ ଅବ୍ରହାମ ହେତଇଂନେବାନ୍ ଲିଜ ଆରି ଆତ୍ଅରିଆ ଲେଃକ୍ନେ ଗୁମ୍ପା ବିଆର୍କେ । ମେଁ ଏନ୍କେ ରାଚ୍ୟା ଜାଗା ଡାଗ୍ଚେ ବେବଆର୍ ଡିଙ୍ଗ୍କେ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)