ଯଷେପ୍ନେ ବୟାଁଇଂ ବିନ୍ୟାମୀନ୍ ଏତେ ମିସର୍ ଦେସ୍ ଆଣ୍ଡେଆର୍କେ
1 ଏନ୍ ବେଲା କିଣାନ୍ ଦେସ୍ନ୍ୟା ମୁର୍ଡି ବୟାଙ୍କାର୍ ଡିଙ୍ଗ୍ଲେଃଗେ । 2 ଯାକୁବନେ ପରିବାର୍ ମିସର୍ବାନ୍ ରାଙ୍ଗ୍ପାଙ୍ଗ୍କ୍ନେ ସାପା କାଦି ଚଙ୍ଗ୍ ଆଃଡା ବିଃଆର୍କେ । ଉଡ଼ିବେଲା ଆତେନ୍ କିଆଉଁଆଃ ଡାୱେଗେ । ଯାକୁବ ମେଁନେ ଉଂଣ୍ଡେଇଂକେ ବାସଙ୍ଗ୍କେ, "ମିସର୍ନ୍ୟା ୱେଚେ ନେନ୍ସା ବାରି ଉଡ଼ି କିଆଉଁଆଃ ଚଙ୍ଗ୍ନ୍ସା ବିଆର୍ ରାଙ୍ଗ୍ପାଙ୍ଗ୍ଲା ।" 3 ମାତର୍ ଯିହୁଦା ଯାକୁବକେ ବାସଙ୍ଗ୍କେ, "ଆତେନ୍ ଦେସ୍ନେ ସାକାର୍ ଆନେକେ ତରକ୍ ଆଡିଙ୍ଗ୍ଚେ ବାସଙ୍ଗ୍ବକେ, ଜଦି ପେ ପେନେ ବୟାଁକେ ନେଙ୍ଗ୍ ଡାଗ୍ରା ରାଙ୍ଗ୍ପେପାଙ୍ଗ୍, ତେଲା ପେ ଏତେ ବାଲିର୍ବାତା ନାଡିଙ୍ଗ୍ ଣ୍ଡୁ । 4 ଜଦି ନାଁ ବିନ୍ୟାମୀନକେ ନେ ଏତେ ନାବେଏ । ତେଲା ନେ ୱେଚେ ପେ ଆତ୍ଲା କିଆଉଁଆଃ ବିଆର୍ ରାଙ୍ଗ୍ନେପାଙ୍ଗ୍ଏ । 5 ଜଦି ନାଁ ବିନ୍ୟାମୀନକେ ନେ ଏତେ ନାବେ ଣ୍ଡୁ । ତେଲା ନେ ବାରି ଆତ୍ଡାଗ୍ରା ନେୱେ ଣ୍ଡୁ । ମେଃଡାଗ୍ଲା ଆତେନ୍ ରେମୁଆଁ ଆନେକେ ତରକ୍ ଆଡିଙ୍ଗ୍ ବିବକେ ଜେ, ପେନେ ଡାଆଁ ବୟାଁକେ ୱା ଡୁଂପେପାଙ୍ଗ୍ଲା, ଆକ୍ଅରିଆ ଆପାଙ୍ଗ୍ଗେପା ।"
6 ଇସ୍ରାଏଲ୍ ବାସଙ୍ଗ୍କେ, "ପେଇଂ ମେଁ ନ୍ସା ପେବାସଙ୍ଗ୍କେ ଜେ, ନେନେ ବାର୍ମୁଇଂ ବୟାଁ ଲେଃକେ ଡାଗ୍ଚେ ? ପେଇଂ ନେଙ୍ଗ୍ ନ୍ସା ମୁଇଂ କରାପ୍ କାମ୍ ମେଃନ୍ସା ପେଡିଙ୍ଗ୍କେ ?" 7 ମେଇଂ ବାଲିର୍ଆର୍କେ, "ଆତେନ୍ ରେମୁଆଁ ଆନେକେ ଜାବର୍ ପ୍ରସ୍ନ ସାଲ୍ୟାଃକୁକେ । ମେଁ ନେ ବିସଏରେ ବାରି ନେନେ କୁଟୁମ୍ ବିସଏରେ ମ୍ୟାଃ ନ୍ସା ଚାଏଁକେ । ମେଁ ଆନେକେ ସାଲ୍ୟାଃକୁକେ, ପେନେ ଆବା ମେଃନି ଏବେ ଡିଗ୍ ମ୍ୱ୍ର ଲେଃକେ ? ପେନେ କି ବାରି ବୟାଁ ଡୁଆ ଲେଃକେ ? ନେ ମାତର୍ ଏନ୍ ସାପା ପ୍ରସ୍ନନେ ଉତର୍ ନେବିକେ । ମେଁ ଜେ ପେନେ ବୟାଁକେ ଆକ୍ଅରିଆ ଡୁଙ୍ଗ୍ପାଙ୍ଗ୍ଲା ଡାଗ୍ଚେ ବାସଙ୍ଗ୍ଏ, ଆକେନ୍ ନେ ଡିରକମ୍ ମ୍ୟାଃ ନେୟାଏ ?"
8 ଏନ୍ ଇଡ଼ିଙ୍ଗ୍ ଯିହୁଦା ମେଁନେ ଆବା ଇସ୍ରାଏଲ୍କେ ବାଃଲିର୍କେ, "ବିନ୍ୟାମୀନକେ ନେଙ୍ଗ୍ ଏତେ ୱେନ୍ସା ବିଃଲା । ନେ ନେୱେଏ । ଆନେକେ ମିସର୍ ୱେଚେ କାଦି ରାଙ୍ଗ୍ପାଙ୍ଗ୍ ପଡ଼େଏ । ଜଦି ନେ ନେୱେ ଣ୍ଡୁ, ତେଲା ନେଃ ସାପାରେ ଗୁଏଃଡିଙ୍ଗ୍ଏ, ଦେକ୍ରକମ୍ କି ନେଃନେ ଗଡ଼େଇଂ ଡିଗ୍ ଗୁଏଆର୍ଏ । 9 ନେଙ୍ଗ୍ ଆନାକେ ପାର୍ମାନ୍ ଡିଂଚେ ବାଲିର୍ ଣ୍ଡିଙ୍ଗ୍ ଜେ, ମେଁ ନିମାଣ୍ଡା ଲେଃଏ । ନେଙ୍ଗ୍ ମେଁ ନ୍ସା ଦାଇ ନ୍ଲେଃଏ । ଜଦି ନେଙ୍ଗ୍ ଆମେକେ ନାଁ ଡାଗ୍ରା ୱାରାଙ୍ଗ୍ନାପାଙ୍ଗ୍କେ, ତେଲା ନାଁ ଆନେଙ୍ଗ୍ ଜିବନ୍ ସାରା ଦସ୍ ନାଡିଙ୍ଗ୍ଏ । 10 ଜଦି ନେନେ ଅଃକେନ୍ ଆତଙ୍ଗାର୍ ପାଡିଂ, ତେଲା ନେ ମ୍ୱାର୍ତର୍ ୱେଚେ ନେପାଆଣ୍ଡେ ।"
11 ଏନ୍ଇଡ଼ିଙ୍ଗ୍ ମେଇଂନେ ଆବା ଇସ୍ରାଏଲ ବାସଙ୍ଗ୍କେ, "ଜଦି ଏନ୍ ସତ୍ ତେଲା ବିନ୍ୟାମୀନକେ ପେ ଏତେ ୱା ରାଙ୍ଗ୍ୱେଲାପା । ମାତର୍ ମେଇଂନେ ସାକାର୍ ନ୍ସା ଉଡ଼ି ପୁରୁସ୍କାର୍ ରାଙ୍ଗ୍ୱେଲାପା । ମେଁନେ ଡାଗ୍ରା ଉଡ଼ି ଜିନିସ୍, ଡାଗ୍ଲା, ଞ୍ଜୁଙ୍ଗ୍, ବାସ୍ନା ଜିନିସ୍, ପେସ୍ତା ଆରି ବାଦାମ୍, ଦୁପ୍ ବାରି ବାସ୍ନା ରସ୍ ରାଙ୍ଗ୍ୱେଲାପା । 12 ପେଇଂ ସେନୁଗ୍ ଉଡ଼ି ଡାବୁ ରାଙ୍ଗ୍ୱେ ପେବଗେ, ଆତେନ୍ବାନ୍ ମ୍ୱାର୍ ଗୁନ୍ ରାଙ୍ଗ୍ୱେଲାପା । ସିସେ ଆପେକେ ଆଣ୍ଡିନେ ଡାବୁ ଆଃଆଣ୍ଡେ ବିବଗେ, ଆତେନ୍ ଡିଗ୍ ରାଙ୍ଗ୍ୱେଲାପା । ଡାଗ୍ଲା ମେଁ ଆତେନ୍ ଆବଚେ ଆଃଆଣ୍ଡେ ବିଃବଏ । 13 ବାରି ପେନେ ବୟାଁ ବିନ୍ୟାମୀନକେ ରାଙ୍ଗ୍ୱେଚେ ମେଁନେ ଡାଗ୍ରା ୱେଲାପା । 14 ସାପାଟୁ ବପୁନେ ପର୍ମେସର୍ ଆପେକେ ଆତେନ୍ ରେମୁଆଁ ଡାଗ୍ରା ଦେକ୍ରକମ୍ ଅନୁଗ୍ରହ ଡିଙ୍ଗ୍ଏ, ଡିରକମ୍ ମେଁ ଆପେକେ ବିନ୍ ବୟାଁକେ ବାରି ବିନ୍ୟାମୀନକେ ଆନ୍ତାର୍ ବିଃଏ । ଜଦି ଆନେଙ୍ଗ୍ ଉଂ ଆଡିଂଲା ଡିଗ୍ ଆଡିଂଲେ, ତେଲା ଉଂ ଣ୍ଡୁ ଡିଙ୍ଗ୍ଲେ । 15 ଆତ୍ବା ମେଇଂ ଆତେନ୍ ପୁରୁସ୍କାର୍ ଜିନିସ୍ ବାରି ମ୍ୱାର୍ ଗୁନ୍ ଡାବୁ ବାରି ବିନ୍ୟାମୀନକେ ସଙ୍ଗେ ସାଚେ ମିସର୍ ଦେସ୍ନ୍ୟା ୱେଚାଚେ ଯୋଷେଫନେ ସାମ୍ନେ ତୁଆଁ ଆର୍କେ ।"
16 ଯୋଷେଫ ମେଇଂନେ ଏତେ ବିନ୍ୟାମୀନକେ କେକେ, ଯୋଷେଫ ମେଁନେ ଚାକର୍ଇଂକେ ଆଦେସ୍ ବିକେ, "ଆତେନ୍ ରେମୁଆଁଇଂକେ ନେଙ୍ଗ୍ନେ ଡୁଆ ୱା ରାଙ୍ଗ୍ୱେଲାପା । ବାରି ମୁଇଂ ପଶୁ ବାଗୁଏଚେ ଆମେକେ ଡୁଏପା । ଆତେନ୍ ରେମୁଆଁଇଂ ଏଃକେ ନେଙ୍ଗ୍ ଏତେ ଚଙ୍ଗ୍ଆର୍ଏ ।" 17 ଚାକର୍କେ ଡିରକମ୍ ବାସଙ୍ଗ୍ବଗେ, ମେଁ ଟିକ୍ ଦେତ୍ରକମ୍ ଡିଙ୍ଗ୍କେ । ମେଁ ଆତେନ୍ ରେମୁଆଁଇଂକେ ଯୋଷେଫନେ ଡୁଆ ୱା ରାଙ୍ଗ୍ୱେକେ ।
18 ଉଡ଼ିବେଲା ମେଇଂ ଯୋଷେଫନେ ଡୁଆ ୱେଆର୍କେ, ଆତେନ୍ ବେଲା ବୁଟମେଗ୍ ଆର୍କେ । ମେଇଂ ବାସଙ୍ଗ୍ଆର୍କେ, "ଆନେକେ ଏତର୍ ଆକ୍ଡାଗ୍ରା ରାଙ୍ଗ୍ପାଙ୍ଗ୍ନେ କାରନ୍ ଡିଙ୍ଗ୍କେ, ସେନୁଗ୍ ନେ କିଆଉଁଆଃ ମୁନା ଏତେ ଆତେନ୍ ଡାବୁ ରାଙ୍ଗ୍ୱେ ନେବକେ । ନେନେ ବିରଦ୍ରେ ଏନ୍ ମେଁନେ ମୁଇଂ ପର୍ମାନ୍ । ତେସା ମେଁ ଆକାନ୍ପାରି ନେନେ ସାପା ଗଦକେ ରାଙ୍ଗ୍ଡଏ ବାରି ଆନେକେ ଚାକର୍ ଆଡିଙ୍ଗ୍ ବଏ ।" 19 ଉଡ଼ିବେଲା ଯୋଷେଫନେ ବୟାଁଇଂ ଯୋଷେଫନେ ଚାକର୍କେ ଅବାଆର୍କେ, "ମେଇଂ ମେଁ ଏତେ ଯୋଷେଫନେ ଡୁଆନେ ଗାଲି ସାମ୍ନେ ବାଲିର୍ବାତା ଡିଂଆର୍କେ । 20 ମାପ୍ରୁ, ନେ ସେନୁଗ୍ କିଆଉଁଆଃ ବିଆର୍ ନ୍ସା ପାଙ୍ଗ୍ନେଲେଃଗେ । 21 ୱେନେବେଲା ନେ ମୁନା ତଃଚେ ନେକେକେ ନେନେ ଡାବୁ ସାପା ମୁନା ବିତ୍ରେ ଲେଃଗେ । ମାତର୍ ନେ ଆତେନ୍ ଡାବୁ ଆପେକେ ବିନ୍ସା ରାଙ୍ଗ୍ପାଙ୍ଗ୍ ନେବକେ । 22 ନେ ନେମ୍ୟାକେ ଣ୍ଡୁ, ଆତେନ୍ ଡାବୁ ଡିରକମ୍ ପାଙ୍ଗ୍କେ । ଉଡ଼ି କିଆଉଁଆଃ ରାଙ୍ଗ୍ୱେ ନ୍ସା ଲେଃଗେ, ଅଃତେନ୍ ଡାବୁ ରାଙ୍ଗ୍ପାଙ୍ଗ୍ ନେବକେ ।"
23 ମାତର୍ ଚାକର୍ ଉତର୍ ବିକେ, "ଆବ୍ଟଗେପା । ଆନେଙ୍ଗ୍ ବିସ୍ବାସ୍ ଡିଙ୍ଗ୍ପା । ପେନେ ପର୍ମେସର୍ ପେ ଆବାନେ ପର୍ମେସର୍ ପୁରୁସ୍କାର୍ ରକମ୍ ପେନେ ମୁନାନ୍ୟା ଆଃଗା ବିବକେ । ନେଙ୍ଗ୍ନେ ମନେ ଲେଃକେ, ପେ ଆତେନ୍ ଡାବୁ ସିସେ ଆନେଙ୍ଗ୍ କିଆଉଁଆଃ ବିଆର୍ନେ ବେଲା ବିଃପେବଗେ ।" ଏନ୍ ଇଡ଼ିଙ୍ଗ୍ ଆତେନ୍ ଚାକର୍ ଶିମୀୟୋନକେ ବନ୍ଦି ଡୁଆବାନ୍ ଆଃତାର୍ଚେ ମେଇଂନେ ଡାଗ୍ରା ରାଙ୍ଗ୍ପାଙ୍ଗ୍କେ ।
24 ଆତେନ୍ ଚାକର୍ କ୍ମେଇଂକେ ଯୋଷେଫନେ ଡୁଆ ରାଙ୍ଗ୍ୱେକେ । ମେଁ ଆମେଇଂକେ ମେଇଂନେ ଞ୍ଚ ଗୁଏଃଚ ନ୍ସା ଣ୍ଡିଆ ବିକେ । ଏନ୍ଇଡ଼ିଙ୍ଗ୍ ଗଦଇଂକେ ଚଙ୍ଗ୍ ନ୍ସା କାଦି ବିକେ । 25 ବୟାଁଇଂ ଅଁଆର୍କେ ଜେ, ମେଇଂ ଯୋଷେଫନେ ଏତେ ଚଙ୍ଗ୍ ନ୍ସା ୱେଆର୍ଏ । ତେସା ମେଇଂ ମେଁ ନ୍ସା ପୁରୁସ୍କାର୍ଇଂ ତିଆର୍ ଡିଙ୍ଗ୍ନେ ମୁଲେ ଆର୍କେ । 26 ଯୋଷେଫ ଡୁଆ ୱିଗ୍କେ, ବୟାଁଇଂ ରାଙ୍ଗ୍ପାଙ୍ଗ୍ବକ୍ନେ ପୁରୁସ୍କାର୍ ଆମେକେ ବିଃଆର୍କେ । ଏନ୍ ଇଡ଼ିଙ୍ଗ୍ ମେଇଂ ଯୋଷେଫକେ ଡେଙ୍ଗଚେ ସାର୍ଲ ଆର୍କେ । 27 ଯୋଷେଫ ଆମେଇଂକେ ମେଇଂନେ ମଙ୍ଗଲ୍ ବିସଏରେ ସାଲ୍ୟାଃକୁକେ । ଏନ୍ ଇଡ଼ିଙ୍ଗ୍ ବାସଙ୍ଗ୍କେ, "ପେନେ ଡକ୍ରା ଆବା ଡିରକମ୍ ଲେଃକେ । ମେଁ ଏବେ ଜାକ ମ୍ବ୍ର ଲେଃକେ ?"
28 ମେଇଂ ଉତର୍ ବିଃଆର୍କେ, "ଅ ମାପ୍ରୁ, ନେ ଆବା ଏବେ ଡିଗ୍ ନିମାଣ୍ଡାଃ ଲାଏଃକେ ।" ମେଇଂ ବାର୍ମୁଇଂତର୍ ସାର୍ଲ ଆର୍କେ ।
29 ଉଡ଼ିବେଲା ଯୋଷେଫ ମେଁନେ ବୟାଁ ବିନ୍ୟାମୀନକେ କେକେ । ବିନ୍ୟାମୀନ୍ ବାରି ଯୋଷେଫ ମୁଇଂ ଇୟାଙ୍ଗ୍ନେ ଗଡ଼େଅ । ଯୋଷେଫ ବାସଙ୍ଗ୍କେ, "ଏନ୍ ମେଃନି ପେନେ ଡାଆଁ ବୟାଁ, ଜାନେ ବିସଏରେ ପେ ଆନେଙ୍ଗ୍ ବାଲିର୍ ପେଡିଂଗେ ?" ଏନ୍ଇଡ଼ିଙ୍ଗ୍ ଯୋଷେଫ ବିନ୍ୟାମୀନକେ ବାସଙ୍ଗ୍କେ, "ଅ ନେଙ୍ଗ୍ନେ ଉଂ, ପର୍ମେସର୍ ଆନାକେ ଆସିର୍ବାଦ୍ ଡିଙ୍ଗ୍ଲେଃ ।" 30 ଏନ୍ଇଡ଼ିଙ୍ଗ୍ ଯୋଷେଫ ବାରି ନିଜର୍ ଲିବିସ ମେଁନେ ବୟାଁଇଂନେ ଆଡ଼ାତ୍ରା ସାମ୍ବାଲେ ଆୟାକେ ଣ୍ଡୁ । ମେଁ ଦାପେ ମେଇଂନେ ସେନୁଗ୍ ବାରି ମୁଇଂ ବାକ୍ରାନ୍ୟା ୱେଚେ ଅଃକେ । 31 ଏନ୍ଇଡ଼ିଙ୍ଗ୍ ମେଁ ନିଜେକେ ସାମ୍ୱାଲେଚେ ସାର୍ମୁଁଆଃ ଗେମୁଆଁଚେ ବାଏରେ ପାଙ୍ଗ୍କେ ବାରି ବାସଙ୍ଗ୍କେ, "ଏବେ ଚଙ୍ଗ୍ନେ ବେଲା ।" 32 ଆତ୍ବା ଚାକର୍ଇଂ ଯୋଷେଫ ନ୍ସା ବାରି ମେଁନେ ବୟାଁଇଂ ନ୍ସା, ବାରି ମେଇଂ ଏତେ ଚଙ୍ଗ୍ଣ୍ଡ୍ରେ ମିସର୍ ଦେସ୍ନେ ରେମୁଆଁଇଂ ନ୍ସା ବିନେ ବିନେ ବାଟା ଆର୍କେ, ଡାଗ୍ଲା ଏବ୍ରୀୟଇଂନେ ଏତେ ଚଙ୍ଗ୍ ଉଗ୍ନେ, ମିସର୍ ଦେସ୍ନେ ରେମୁଆଁଇଂନେ ବେବଆର୍ ଆଲେଃଗେ । ଆତେନ୍ ମିସ୍ରିୟଇଂନେ ଗ୍ରୁନା ଲେଃଗେ । 33 ଯୋଷେଫନେ ବୟାଁଇଂ ମେଁନେ ସେନୁଗ୍ ଚଙ୍ଗ୍ ନ୍ସା କଆର୍କେ । ମେଁନେ ବୟାଁଇଂ ମ୍ନାବାନ୍ ଡାଆଁ ଡିଙ୍ଗ୍ଚେ କଆର୍କେ । ସାପାରେ ସାପାରେକେ କେଆର୍କେ । ମେଃନେ ସାପା ଗଟେଡିଂକେ, ସାପାରେ କାବା ଡିଙ୍ଗ୍ଆର୍କେ । 34 ବାରି ନିଜର୍ ସାମ୍ନେ ଚଙ୍ଗ୍ନେ ଜିନିସ୍ ରାଙ୍ଗ୍ପାଙ୍ଗ୍ଚେ ଆମେଇଂକେ ବାଟା ବିକେ । ମାତର୍ ସାପାରେନେ ବାଗ୍ବାନ୍ ବିନ୍ୟାମୀନନେ ବାଗ୍ ମାଲ୍ଗୁନ୍ ଜାବର୍ ଲେଃଗେ । ଏନ୍ବାନ୍ ମେଇଂ ଚଙ୍ଗ୍ଉଗ୍ଚେ ମେଁନେ ଏତେ ସାର୍ଦା ଡିଙ୍ଗ୍ଆର୍କେ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)