ଆଦି 27

ଯାକୁବକେ ବାରି ଇସାକ୍‌କେ ଆସିର୍‌ବାଦ୍‌

1 ଇସ୍‌ହାକ୍‌ ଡକ୍ରା ଡିଙ୍ଗ୍‌କ୍ନେ ଇଡ଼ିଙ୍ଗ୍‌ ମେଁନେ ମ୍ମୁଆଃ ବଲ୍‌ ଆତ୍ନାକେ ଣ୍ଡୁ । ଇସ୍‌ହାକ୍‌ ମେଁନେ ମ୍ନା ଉଂଡେ ଏଷୌକେ ୱାଚେ ବାସଙ୍ଗ୍‌କେ, "ଅ ଉଂ ଏଷୌ" ମେଁ ଉତର୍‌ ବିକେ, "ନେଙ୍ଗ୍‌ ଆକ୍‌ଡାଗ୍ରା ।"

2 ଇସ୍‌ହାକ୍‌ ବାସଙ୍ଗ୍‌କେ, "ନେଙ୍ଗ୍‌ ଡକ୍ରା । ନେଙ୍ଗ୍‌ ନ୍ନାମ୍ୟାକେ, ଅଃନା ନେଙ୍ଗ୍‌ ଙ୍ଗୁଏଃଏ । 3 ତେସା ନାଁ ନାଁନେ ଆଁୟାଃ ଙାଁ ସାଚେ କଣ୍ଡା ୱେଚେ ନେଙ୍ଗ୍‌ ନ୍‌ସା ସ୍ଲଃ ଟୁଇଂ ରାଙ୍ଗ୍‌ୱିଗ୍‌ଲା । 4 ନେଙ୍ଗ୍‌ ଡିରକମ୍‌ ଚଙ୍ଗ୍‌ନେକେ ବଲ୍‌ ମ୍ୱାଏ, ଦେତ୍‌ରକମ୍‌ କାଦି ତିଆର୍‌ ଡିଙ୍ଗ୍‌ଚେ ଚୁଚଙ୍ଗ୍‌ନ୍‌ସା ନେଙ୍ଗ୍‌ ଆତ୍ଲା ରାଙ୍ଗ୍‌ପାଙ୍ଗ୍‌ଲାପା; ଆତ୍‌ବା ନେଙ୍ଗ୍‌ ଗୁଏନେ ସେନୁଗ୍‌ ଆପେକେ ଆସିର୍ବାଦ୍‌ ଣ୍ଡିଙ୍ଗ୍‌ଏ ।"

5 ତେସା ଏଷୌ ଗୁଗ ଡିଙ୍ଗ୍‌ନେ ତାର୍‌କ୍ନେ ଇଡ଼ିଂ, ଉଡ଼ିବେଲା ଇସ୍‌ହାକ୍‌ ମେଁନେ ମ୍ନା ଉଂଡେ ଏଷୌକେ ବାଲିର୍‌ଡିଙ୍ଗ୍‌ଗେ । ଅଃତେନ୍‌ବେଲା ରିବିକା ଏନ୍‌ ସାମୁଆଁ ଅଁଡିଙ୍ଗ୍‌ଗେ । 6 ରିବିକା ମେଁନେ ଉଂଡେ ଯାକୁବକେ ବାଲିର୍‌କେ, "ଅଁ, ନାନେ ଆବା ଏଷୌକେ ବାସଙ୍ଗ୍‌ଡିଙ୍ଗ୍‌କ୍ନେ ସାମୁଆଁ ନେଙ୍ଗ୍‌ ଙଁକେ; 7 ମେଁ ଆମେକେ ବାଲିର୍‌କେ ନାଁ ସ୍ଲଃ ଚିଲି ରାଙ୍ଗ୍‌ପାଙ୍ଗ୍‌ଲା, ନେଙ୍ଗ୍‌ ନ୍‌ସା ମ୍ୱ୍ରେ ବଲେ ତିଆର୍‌ ଡିଙ୍ଗ୍‌ । ଆତେନ୍‌ ନେଙ୍ଗ୍‌ ଚଙ୍ଗ୍‌ଚେ ଗୁଏନେ ସେନୁଗ୍‌ ମାପ୍‌ରୁନେ ଡାଗ୍ରା ଆନାକେ ଆସିର୍ବାଦ୍‌ ଣ୍ଡିଙ୍ଗ୍‌ଏ । 8 ତେସା ଉଂ ନେଙ୍ଗ୍‌ ସାମୁଆଁ ଦ୍ରିଗ୍‌ । ନେଙ୍ଗ୍‌ ଡିରକମ୍‌ ବାଲିର୍‌ଣ୍ଡିଙ୍ଗ୍‌, ଦେତ୍‌ରକମ୍‌ ଡିଙ୍ଗ୍‌ । 9 ନାଁ ଏବେ ସାଲାମିଃନ୍ୟା ୱେଚେ ଆତ୍‌ବା ମ୍ୱାକ୍ଲିଗ୍‌ ନିମାଣ୍ଡା ଉଂମିଃ ରାଙ୍ଗ୍‌ପାଙ୍ଗ୍‌ଲା; ଆତ୍‌ବା ନାଁ ଆବା ଡିରକମ୍‌ ବଲ୍‌ ବାଏ, ଦେତ୍‌ରକମ୍‌ ମ୍ୱ୍ରେ ବଲେ ନେଙ୍ଗ୍‌ ଡୁଏ ମ୍ୱିଏ । 10 ଏନ୍‌ ଇଡ଼ିଙ୍ଗ୍‌ ନାଁ ନାଁନେ ଆବା ଡାଗ୍ରା ବଲେ ସାଚେ ୱେଲା । ଆତ୍‌ବା ମେଁ ଆତେନ୍‌ ଚଙ୍ଗ୍‌ଚେ ଗୁଏନେ ସେନୁଗ୍‌ ଆନାକେ ଆସିର୍ବାଦ୍‌ ଡିଙ୍ଗ୍‌ଏ ।"

11 ମାତର୍‌ ଯାକୁବ ମେଁନେ ଇୟାଙ୍ଗ୍‌ ରିବିକାକେ ବାସଙ୍ଗ୍‌କେ, "ନେଙ୍ଗ୍‌ ବୟାଁ ଏଷୌ ଗାଗ୍‌ଡ଼େଅରିଆ ଉଗ୍‌ବ ଲେଃକେ । ମାତର୍‌ ଆନେଙ୍ଗ୍‌ ତ ମେଁ ରକମ୍‌ ଉଗ୍‌ବ ଣ୍ଡୁ । 12 ଜଦି ନେଙ୍ଗ୍ ଆବା ଆନେଙ୍ଗ୍‌ ଲିଗ୍‌ କେଏ । ମେଁ ମ୍ୟାଏ ଜେ ନେଙ୍ଗ୍‌ ଏଷୌ ଣ୍ଡୁ । ଏନ୍ ଇଡ଼ିଙ୍ଗ୍‌ ମେଁ ଆସିର୍ବାଦ୍‌ ବିନେ ବାଦୁଲ୍‌ରେ ଅବିସାପ୍‌ ବିଏ । ଡାଗ୍ଲା ନେଙ୍ଗ୍‌ ଆମେକେ ନାଲେ ନ୍‌ସା ଚେସ୍‌ଟା ଡିଙ୍ଗ୍‌ଣ୍ଡିଂକେ ।"

13 ମାତର୍‌ ମେଁନେ ଇୟାଙ୍ଗ୍‌ ବାଲିର୍‌କେ, "ଉଂରେ, ଆତେନ୍‌ ଅବିସାପ୍‌ ଆନେଙ୍ଗ୍‌ ଗଟେଲେ । ମାତର୍‌ ନାଁ ନେଙ୍ଗ୍‌ ସାମୁଆଁ ମାନେଃ ବାରି ୱେଚେ ମ୍ବାକ୍ଲିଗ୍‌ ଉଂମିଃ ରାଙ୍ଗ୍‌ପାଙ୍ଗ୍‌ଲା ।" 14 ତେସା ଯାକୁବ ୱେଚେ ମ୍ୱାକ୍ଲିଗ୍‌ ଗ୍ମି ରାଙ୍ଗ୍‌ପାଙ୍ଗ୍‌ଚେ ମେଁନେ ଇୟାଙ୍ଗ୍‌କେ ବିକେ । ଏନ୍‌ ଇଡ଼ିଙ୍ଗ୍‌ ମେଁନେ ଇୟାଙ୍ଗ୍‌ ମେଁ ଆବାଡ଼େ ଚଙ୍ଗ୍‌କେ ରକମ୍‌ କାଦି ତିଆର୍‌ ଡିଙ୍ଗ୍‌ବିକେ । 15 ଆତ୍‌ବା ରିବିକା ଡୁଆ ନିଜେ ଡାଗ୍ରାନେ ମ୍ନା ଉଂଡେ ଏଷୌନେ ଲେଃକ୍ନେ ନିମାଣ୍ଡାଃ ସକା ରାଙ୍ଗ୍‌ପାଙ୍ଗ୍‌ଚେ ଡାଆଁ ଉଂଡେ ଯାକୁବକେ ଆୱାଡ଼େଗ୍‌ ବିକେ । 16 ରିବିକା ଉଂମିଃନେ ଉକ୍‌ସା ରାଙ୍ଗ୍‌ପାଙ୍ଗ୍‌ଚେ ଯାକୁବନେ ନ୍ତିନ୍ୟା ବାରି ମେଁନେ ଲୁଗଃନେ ଉଗ୍‌ବଃ ଣ୍ଡୁନେ ଜାଗାନ୍ୟା ଗୁଡ଼େ ବିକେ । 17 ଏନ୍‌ଇଡ଼ିଙ୍ଗ୍‌ ରିବିକା ଡୁଏକ୍ନେ କାଦିକେ ରାଙ୍ଗ୍‌ପାଙ୍ଗ୍‌ଚେ ଯାକୁବକେ ବିକେ ।

18 ଯାକୁବ ମେଁନେ ଆବାନେ ଡାଗ୍ରା ୱେଚେ ବାଲିର୍‌କେ, "ଆବା ।" ମେଁନେ ଆବା ବାସଙ୍ଗ୍‌କେ, "ଅ ଉଂ, ନାଁ ଜାଣ୍ଡେ ?"

19 ଯାକୁବ ମେଁନେ ଆବାକେ ବାଲିର୍‌କେ, "ନେଙ୍ଗ୍ ଏଷୌ ନାଁନେ ମ୍ନା ଉଂଡେ । ନାଁ ସାମୁଆଁ ଅନୁସାରେ ନେଙ୍ଗ୍‌ ଡିଙ୍ଗ୍‌ମ୍ୱକେ । ବାରି ଏବେ କଚେ ସ୍ଲଃ ଚିଲି ଚଙ୍ଗ୍‌ଚେ ଆନେଙ୍ଗ୍‌ ଆସିର୍ବାଦ୍‌ ଡିଙ୍ଗ୍‌ ।"

20 ମାତର୍ ଇସ୍‌ହାକ୍‌ ମେଁନେ ଉଂଣ୍ଡେକେ ବାସଙ୍ଗ୍‌କେ, "ନାଁ ଅକେନ୍‌ ଦାପ୍ରେ ଆତେନ୍‌ ଡିରକମ୍‌ ନାଁଅବାକେ ?" ଯାକୁବ ଉତର୍‌ ବିକେ, "ଡାଗ୍ଲା ମାପ୍‌ରୁ ନାଁନେ ପର୍‌ମେସର୍‌ ଆନେଙ୍ଗ୍‌ ଆତେନ୍‌ ଦାପେ ଆତ୍ନା ବିକେ ।"

21 ଇସ୍‌ହାକ୍‌ ଯାକୁବକେ ବାସଙ୍ଗ୍‌କେ, "ଉଂରେ ନେଙ୍ଗ୍‌ ଡାଗ୍ରା ପାଙ୍ଗ୍‌ଲା । ନାଁ ସତ୍‌ରେ ନେଙ୍ଗ୍‌ ଉଂଡେ ଏଷୌ ଲେଃ ଣ୍ଡୁ । ଆନା ଲିଗ୍‌ଚେ ମ୍‌ମ୍ୟାଃଏ ।" 22 ତେସା ଯାକୁବ ମେଁ ଆବାଡ଼େ ଡାଗ୍ରା ୱେକେ । ଇସ୍‌ହାକ୍‌ ଲିଗ୍‌ଚେ ବାସଙ୍ଗ୍‌କେ, "ନାଁ ସାମୁଆଁ ଯାକୁବନେ ସାମୁଆଁ ରକମ୍‌, ମାତର୍‌ ନାଁ ନ୍ତିନେ ଉଗ୍‌ବ ଦେଃତୁଆ ଏଷୌନେ ନ୍ତି ରକମ୍‌ ।" 23 ଇସ୍‌ହାକ୍‌ ଆମେକେ ସାମୁଆଁ ଆୟାକେ ଣ୍ଡୁ । ଡାଗ୍ଲା ମେଁନେ ନ୍ତି ଏଷୌନେ ଉଗ୍‌ବ ନ୍ତି ରକମ୍‌ । ତେସା ମେଁ ଆମେକେ ଆସିର୍ବାଦ୍‌ ଡିଙ୍ଗ୍‌କେ । 24 ଏନ୍‌ଇଡ଼ିଂ ଇସ୍‌ହାକ୍‌ ବାସଙ୍ଗ୍‌କେ, "ନାଁ ମେଃନି ନେଙ୍ଗ୍‌ନେ ଉଂ ଏଷୌ ?" ଯାକୁବ ଉତର୍‌ ବିକେ, "ଅଃଅଁ, ନେଙ୍ଗ୍‌ ଏଷୌ ।"

25 ଏନ୍‌ ଇଡ଼ିଙ୍ଗ୍‌ ଇସ୍‌ହାକ୍‌ ବାସଙ୍ଗ୍‌କେ, "ଆତେନ୍‌ କାଦି ନେଙ୍ଗ୍‌ ଡାଗ୍ରା ରାଙ୍ଗ୍‌ପାଙ୍ଗ୍‌ଲା । ନେଙ୍ଗ୍‌ନେ ଉଂ ରାଙ୍ଗ୍‌ପାଙ୍ଗ୍‌କ୍ନେ ସ୍ଲଃ ଚିଲି ନେଙ୍ଗ୍‌ ଆତେନ୍‌ ଚଙ୍ଗ୍‌ଚେ ଆନାକେ ଆସିର୍ବାଦ୍‌ ମ୍ୱିଏ ।" ତେସା ଯାକୁବ ଆମେକେ କାଦି ବିଃଲା, ମେଁ ଆତେନ୍‌ ଚଙ୍ଗ୍‌କେ । ବାରି ଯାକୁବ ଆମେକେ ଦ୍ରାକ୍ୟା ରସ୍‌ ବିଃଲା, ମେଁ ଆତେନ୍‌ ଉଗ୍‌କେ । 26 ଏନ୍‌ ଇଡ଼ିଙ୍ଗ୍‌ ଇସ୍‌ହାକ୍‌ ଆମେକେ ବାସଙ୍ଗ୍‌କେ, "ନେଙ୍ଗ୍‌ନେ ଉଂଡେ ନେଙ୍ଗ୍‌ ଡାଗ୍ରା ପାଙ୍ଗ୍‌ଲା ଆନେଙ୍ଗ୍‌ ବଏନ୍ତା ।" 27 ଯାକୁବ ମେଁନେ ଆବାନେ ଡାଗ୍ରା ୱେକେ ବାରି ଆମେକେ ବଏନ୍ତା ବିକେ । ଇସ୍‌ହାକ୍‌ ମେଁନେ ବାସ୍ନା ମ୍ୟାକେ, ଆତେନ୍‌ ଏଷୌନେ ସକା ବାସ୍ନା ଲେଃଗେ । ବାରି ଇସ୍‌ହାକ୍‌ ଆମେକେ ଆସିର୍ବାଦ୍‌ ଡିଙ୍ଗ୍‌ଚେ ଇସ୍‌ହାକ୍‌ ଆମେକେ ବାସଙ୍ଗ୍‌କେ, "ମାପ୍‌ରୁନେ ଆସିର୍ବାଦ୍‌ ବାଲେଃକ୍ନେ ବାସ୍ନା ରକମ୍‌ ନେଙ୍ଗ୍‌ ଉଂନେ ବାସ୍ନା ବିଃଡିଂକେ । 28 ପର୍‌ମେସର୍‌ ଆନାକେ କିତଂନେ ଅଁସ୍‌ଡ଼ିଆଃବାନ୍‌ ଆରି ଦର୍‌ତନିନେ ତୁବଃବାନ୍‌ ଜାବର୍‌ କିଆଉଁଆଃ ଆରି ଅଙ୍ଗୁର୍‌ଡ଼ିଆଃ ଆନାକେ ବିଃଲେ; 29 ସାପା ରେମୁଆଁ ଆନାକେ ସେବା ଡିଙ୍ଗ୍‌ଲେ । ସାପା ଜାତି ଆନାକେ ନମସ୍କାର୍‌ ଡିଙ୍ଗ୍‌ଲେ । ନାଁ ବୟାଁ ଆଡ଼ାତ୍ରା ନାଁ ସାସନ୍‌ ଡିଙ୍ଗ୍‌ । ନାଁ ଇୟାଙ୍ଗ୍‌ନେ ଉଂ ଆନାକେ ମାନେଆର୍‌ଲେ । ଜା ଆନାକେ ଅବିସାପ୍‌ ବିଏ, ମେଁ ଅବିସାପ୍‌ ଡିଙ୍ଗ୍‌ଲେ, ଜା ଆନାକେ ଆସିର୍ବାଦ୍ ବିଏ, ମେଁ ଆସିର୍ବାଦ୍‌ ବାଲେଃ ।"

ଏଷୌନେ ଆସିର୍ବାଦ୍‌ ବିକ୍‌

30 ଇସ୍‌ହାକ୍‌ ଯାକୁବକେ ଆସିର୍ବାଦ୍‌ ବିଃ ଆଡାକ୍ନେ ଇଡ଼ିଙ୍ଗ୍‌ ମେଁ ଆତେନ୍‌ ଜାଗା ଆନ୍ତାର୍‌ଚେ ୱେକେ । ଏନ୍‌ ବେଲା ଏଷୌ ସିକାର୍‌ବାନ୍‌ ଆଣ୍ଡେକେ । 31 ମେଁନେ ଆବା ମନ୍‌ ଡିଙ୍ଗ୍‌କ୍ନେ ରକମ୍‌ କାଦି ତିଆର୍ ଡିଙ୍ଗ୍‌କେ । ବାରି ଆତେନ୍‌ ମେଁନେ ଆବା ଡାଗ୍ରା ରାଙ୍ଗ୍‌ପାଙ୍ଗ୍‌କେ । ମେଁ ମେଁନେ ଆବାକେ ବାଲିର୍‌କେ, "ଆବା, ନେଙ୍ଗ୍‌ ନାଁ ଉଂ; ତଡ଼୍ୟା ଆରି ଚିଲି ଚଙ୍ଗ୍‌, ନେଙ୍ଗ୍‌ ଆକାନ୍‌ ନାଁ ନ୍‌ସା ଡୁଏଚେ ରାଙ୍ଗ୍‌ପାଙ୍ଗ୍‌ମ୍ୱକେ । ଏନ୍‌ଇଡ଼ିଙ୍ଗ୍‌ ନାଁ ଆନେଙ୍ଗ୍‌ ଆସିର୍ବାଦ୍‌ ନାଡିଙ୍ଗ୍‌ଏ ।"

32 ମାତର୍‌ ଇସ୍‌ହାକ୍‌ ଆମେକେ ବାସଙ୍ଗ୍‌କେ, "ନାଁ ଜାଣ୍ଡେ ?" ମେଁ ଉତର୍‌ ବିକେ, "ନେଙ୍ଗ୍‌ ନାଁନେ ମ୍ନା ଉଂଡେ ଏଷୌ ।"

33 ଆତେନ୍‌ ବେଲା ଇସ୍‌ହାକ୍‌ ଜାବର୍‌ ରିସା ଡିଙ୍ଗ୍‌ଚେ ବାସଙ୍ଗ୍‌କେ, "ତେଲା ଜା ନେଙ୍ଗ୍‌ ଡାଗ୍ରା ସ୍ଲଃ ଚିଲି ରାଙ୍ଗ୍‌ପାଙ୍ଗ୍‌ବଗେ, ମେଁ ଜାଣ୍ଡେ ? ନାଁ ପାଙ୍ଗ୍‌ନେ ସେନୁଗ୍‌ ନେଙ୍ଗ୍‌ ଆତାନ୍ ଚଙ୍ଗ୍‌ଚେ ଆମେକେ ଆସିର୍ବାଦ୍‌ ଣ୍ଡିଂକେ, ବାରି ମେଁ ଆସିର୍ବାଦ୍‌ ବାକେ ।"

34 ଏଷୌ ଆବାନେ ଏନ୍‌ ସାମୁଆଁ ଅଁକ୍ନେ ଦାପେ ଜାବର୍‌ ଦୁକ୍‌ ଡିଙ୍ଗ୍‌ଚେ ୱାସାର୍‌କେ, ବାରି ନିଜର୍‌ ଆବାକେ ବାଲିର୍‌କେ, "ଆବା, ଆନେଙ୍ଗ୍‌ ଡିଗ୍‌ ଆସିର୍ବାଦ୍‌ ଡିଙ୍ଗ୍‌ ।"

35 ଆତ୍‌ବା ଇସ୍‌ହାକ୍‌ ବାସଙ୍ଗ୍‌କେ, "ନାଁ ବୟାଁ ପାଙ୍ଗ୍‌ଚେ ଚାଲାକି ଡିଙ୍ଗ୍‌ଚେ ନାଁନେ ଆସିର୍ବାଦ୍‌ ରାଙ୍ଗ୍‌ଡକେ ।"

36 ଏଷୌ ବାଲିର୍‌କେ, "ମେଁନେ ମ୍ନି ଡିଙ୍ଗ୍‌ଡିଂକେ ଯାକୁବ, ଆତେନ୍‌ ମେଃନି ଟିକ୍‌ ଣ୍ଡୁ । ମେଁ ଆନେଙ୍ଗ୍‌ ମ୍ୱାର୍‌ତର୍‌ ଚାଲାକି ଡିଙ୍ଗ୍‌କେ । ମେଁ ନେଙ୍ଗ୍‌ନେ ମ୍ନା ଅଦିକାର୍‌ ରାରାଙ୍ଗ୍‌ଡଗେ । ବାରି ନେଙ୍ଗ୍‌ନେ ଆସିର୍ବାଦ୍‌ ରାଙ୍ଗ୍‌ଡଗେ ।" ଏନ୍‌ଇଡ଼ିଙ୍ଗ୍‌ ଏଷୌ ବାସଙ୍ଗ୍‌କେ, "ନେଙ୍ଗ୍‌ ନ୍‌ସା ମୁଇଂ ଡିଗ୍‌ ଆସିର୍ବାଦ୍‌ ନାବକେ ?"

37 ଇସ୍‌ହାକ୍‌ ଏଷୌକେ ଉତର୍‌ ବିକେ, "ଆନାକେ ସାସନ୍‌ ଡିଙ୍ଗ୍‌ ନ୍‌ସା ନେଙ୍ଗ୍‌ ଯାକୁବକେ ଅଦିକାର୍‌ ମ୍ୱିକେ । ଏବେ ନେଙ୍ଗ୍‌ ଆମେକେ ମ୍ୱାସଙ୍ଗ୍‌କେ, ନାଁନେ ସାପା ବୟାଁ ନାଁନେ ସେବା ଡିଙ୍ଗ୍‌ଆର୍‌ଏ । ବାରି ନେଙ୍ଗ୍‌ ଆମେକେ ଜାବର୍‌ କିଆଉଁଆଃ ବାରି ଜାବର୍‌ ଦ୍ରାକ୍ୟା ରସ୍‌ ଡିଙ୍ଗ୍‌ ନ୍‌ସା ଆସିର୍ବାଦ୍‌ ଡିଙ୍ଗ୍‌ମ୍ୱକେ । ଏବେ ନାଁ ନ୍‌ସା ମେଃନି ଡିଙ୍ଗ୍‌ ଇଁୟାଏ ?"

38 ମାତର୍‌ ଏଷୌ ବାଲିର୍‌କେ, "ନେଙ୍ଗ୍‌ ଆବା ନାଁନେ ମେଃନି ମୁଇଂ ଆଃ ଆସିର୍ବାଦ୍‌ ଲେଃଗେ ? ଆସିର୍ବାଦ୍‌ ଡିଙ୍ଗ୍‌ ଆନେଙ୍ଗ୍‌ ଡିଗ୍‌, ଆବା ।" ଏନ୍‌ ବାଲିର୍‌ଚେ ଏଷୌ ଜାବର୍‌ ଅଃକେ ।

39 ତେସାଃ ମେଁନେ ଆବା ଇସ୍‌ହାକ୍‌ ଉତର୍‌ ବିଃଚେ ବାସଙ୍ଗ୍‌କେ, "କେଲା, ନାଁନେ ବାସାନେ ଦର୍‌ତନିନେ ଉର୍ବରତା ଣ୍ଡୁନେ ଆରି ଆଡ଼ାତ୍ରା ଲେଃକ୍ନେ କିତଂନେ ଅଁସ୍‌ଡ଼ିଆଃ ଣ୍ଡୁନେ ରକମ୍‌ ନାଡିଂଏ । 40 ନାଁ କାଣ୍ଡାନ୍ୟା ମ୍ବ୍ରଣ୍ଡ୍ରେ ବାରି ନାଁ ବୟାଁନେ ଚାକର୍‌ ନାଡିଙ୍ଗ୍‌ଏ । ମାତର୍‌ ନାଁ ଆତେନ୍‌ ବେଲା ତିଆର୍‌ ଡିଙ୍ଗ୍‌ଲାଲା, ନାଁ ଜେବାବାନ୍‌ ରିଗ୍‌ନ ତଃ ନାବିଏ, ତେଲା ନାଁ ମୁକ୍ତି ନାବାଏ ।"

41 ଦେକ୍‌ରକମ୍‌ ଯାକୁବ ନିଜର୍‌ ଆବାବାନ୍‌ ଆସିର୍ବାଦ୍‌ ବାକ୍ନେବାନ୍ ଏଷୌ ମେଁନେ ଆଡ଼ାତ୍ରା ରିସାଡିଙ୍ଗ୍‌ଚେ ମନେ ମନେ ବାବେକେ, "ନେଙ୍ଗ୍‌ନେ ଆବା ଗୁଏକ୍ନେ ଇଡ଼ିଙ୍ଗ୍‌ ନେଙ୍ଗ୍‌ ନିଜର୍‌ ବୟାଁ ଯାକୁବକେ ବାଗୁଏ ମ୍ୱିଏ ।"

42 ମାତର୍‌ ଆତାନ୍ ସାମୁଆଁ ରିବିକା ଅଁଲେଃଗେ । ଏଷୌ ଯାକୁବକେ ବାଗୁଏ ନ୍‌ସା ଚେସ୍ଟା ଡିଙ୍ଗ୍‌ଡିଂକେ । ମେଁ ଯାକୁବକେ ୱାଚେ ବାଲିର୍‌କେ, "ଦ୍ରିଗ୍‌, ନାଁବୟାଁ ଏଷୌ ଆନାକେ ବାଗୁଏ ନ୍‌ସା ଚେସ୍‌ଟା ଡିଙ୍ଗ୍‌ଡିଂକେ । 43 ଏନ୍‌ସା, ଉଂ, ନେଙ୍ଗ୍‌ ସାମୁଆଁ ଦ୍ରିଗ୍‌; ହାରୋଣ ସହର୍‌ନ୍ୟା ଲାଗ୍‌ଡଲା, ନେଙ୍ଗ୍‌ ବୟାଁ ଲାବନ ଡାଗ୍ରା ୱେଲା । 44 ବାରି ଅଃନା ଜାକ ନାଁ ବୟାଁନେ ରିସା ସାନ୍ତି ମାଡିଙ୍ଗ୍‌ ଜାକ ଉଡ଼ିସି ଆତ୍‌ ଡାଗ୍ରା ଲାଃଲା । 45 ନାଁ ଆଡ଼ାତ୍ରା ନାବୟାଁନେ ରିସା ସାନ୍ତି ଡିଙ୍ଗ୍‌ଲା ବାରି ନାଁ ମେଁନେ ଆଡ଼ାତ୍ରା ମେଃନି ଡିଙ୍ଗ୍‌ନାବକେ, ଆତେନ୍‌ ମେଁ ଆଃବ ବିଲା, ନେଙ୍ଗ୍‌ ରେମୁଆଁ ବେଚେ ଆନାକେ ରାଙ୍ଗ୍‌ମ୍ପାଙ୍ଗ୍‌ଏ । ନେଙ୍ଗ୍‌ ମୁଇଂଦିନା ମ୍ୱାୟାକେ ଆରେନ୍‌ସା ଚାଏଁ ନ୍ନାଡିଙ୍ଗ୍‌କେ ।"

46 ଏନ୍‌ଇଡ଼ିଙ୍ଗ୍‌ ରିବିକା ଇସ୍‌ହାକ୍‌କେ ବାସଙ୍ଗ୍‌କେ, "ନାଁଉଂ ଏଷୌ ହିତ୍ତୀୟ ସେଲାକେ ବିବା ଡିଙ୍ଗ୍‌କେ, ଏନ୍‌ ନେଙ୍ଗ୍‌ ଜିବନ୍‌କେ କସ୍‌ଟ ବିବକେ ମେଃନ୍‌ସା ? ଡାଗ୍ଲା ମେଇଂ ନେ ରେମୁଆଁ ଣ୍ଡୁ । ଜଦି ଯାକୁବ ଏନ୍‌ ଦେସ୍‌ନେ ସେଲାକେ ବିବା ଡିଙ୍ଗ୍ଏ, ତେଲା ନେଙ୍ଗ୍‌ ଗୁଏ ଉଁୱେଏ ।"