1 ଏନ୍‌ ଇଡ଼ିଙ୍ଗ୍‌ ଅବ୍ରହାମ୍‌ ଆତ୍‌ବାନ୍‌ ଦକିନ୍‌ ଦେସ୍‌ ପାକା ୱେଚେ କାଦେସ ବାରି ଶୂରନେ ମଜେ ଲେଃଚେ ଗରାରନ୍ୟା ବାସାକେ । 2 ବାରି ଅବ୍ରହାମ୍‌ ନିଜର୍‌ ସେଲାମ୍ବୁଏଃ ସାରା ବିସଏରେ ବାସଙ୍ଗ୍‌କେ, ମେଁ ନେଙ୍ଗ୍‌ନେ ତନା, ଏନ୍‌ସା ଗରାରନେ ଇଃସାଙ୍ଗ୍‌ ଅବିମେଲକ ସାରାକେ ଡୁଙ୍ଗ୍‌ପାଙ୍ଗ୍‌ ନ୍‌ସା ରେମୁଆଁ ବେକେ । 3 ଆତେନ୍‌ ମିଡିଗ୍‌ ପର୍‌ମେସର୍‌ ମୁସୁଡ଼ିଙ୍ଗ୍‌ନ୍ୟା ଅବିମେଲକ ଡାଗ୍ରା ପାଙ୍ଗ୍‌ଚେ ବାସଙ୍ଗ୍‌କେ, ନାଁ ନାଗୁଏଃଏ, ନାଁ ଆଣ୍ଡିନେ ସେଲାମ୍ବୁଏଃକେ ଡୁଙ୍ଗ୍‌ପାଙ୍ଗ୍‌ ନାବକେ, ମେଁନେ ଆଣ୍ଡା ଲେଃକେ ।

4 ମାତର୍‌ ଅବିମେଲକ ସାରା ଏତେ କୁଡ଼େଃମାଡ଼େଃ ଡିଙ୍ଗ୍‌ ଆଲେଃଗେ । ତେସା ଅବିମେଲକ ବାସଙ୍ଗ୍‌କେ, ଅ ମାପ୍‌ରୁ, "ନାଁ ମେଃନି ମୁଇଂ ଦସ୍‌ ଣ୍ଡୁନେ ରେମୁଆଁକେ ନାବାଗୁଏଃଏ ? 5 ଅବ୍ରହାମ ନିଜେ ଆନେଙ୍ଗ୍‌ ବାସଙ୍ଗ୍‌କେ, ଏନ୍‌ ସେଲାମ୍ବୁଏଃ ନେଙ୍ଗ୍‍ନେ ତନା ବାରି ଆତେନ୍‌ ସେଲାମ୍ବୁଏଃ ଡିଗ୍‌ ବାସଙ୍ଗ୍‌କେ, ଅବ୍ରହାମ ନେଙ୍ଗ୍‌ନେ ବୟାଁ, ନେଙ୍ଗ୍‌ନେ ଦସ୍‌ ଣ୍ଡୁ, ନେଙ୍ଗ୍‌ ମ୍ୟା ନ୍ନାଲେଗେ । ତେସାଃ ମନ୍‌ନେ ଦରମ୍‌ ଆରି ନ୍ତିନେ ଦସ୍‌ ଆଲେଃକ୍ନେ ନ୍‌ସାଃ ନିଂ ଆକେନ୍‌ କାମ୍‌ ଡିଙ୍ଗ୍‌ମ୍ବକେ ।"

6 ଏନ୍‌ ଇଡ଼ିଙ୍ଗ୍‌ ପର୍‌ମେସର୍‌ ଅବିମେଲକକେ ମୁସୁଡ଼ିଙ୍ଗ୍‌ନ୍ୟା ବାସଙ୍ଗ୍‌କେ, "ନେଙ୍ଗ୍‌ ମ୍ୟାନ୍‌ଲେଃ, ନାଁନେ ଦସ୍‌ ଣ୍ଡୁ । ତେସା ନେଙ୍ଗ୍‌ ଆନାକେ ରକ୍ୟା ଣ୍ଡିଙ୍ଗ୍‌କେ । ନେଙ୍ଗ୍‌ ଆନାକେ ନେଙ୍ଗ୍‌ନେ ବିରଦ୍‌ରେ ପାପ୍‌ ଡିଙ୍ଗ୍‌ ନ୍‌ସା ନ୍ନାବି ଣ୍ଡୁ । ନେଙ୍ଗ୍‌ ଆନାକେ ମେଁନେ ଏତେ ପାପ୍‌ କାମ୍‌ ଡିଂନ୍‌ସା ନ୍ନାବିକେ ଣ୍ଡୁ । 7 ତେସା ଏବେ ଅବ୍ରହାମନେ ସେଲାମ୍ବୁଏଃକେ ଆଃଆଣ୍ଡେବି, ମେଁ ମୁଇଂ ବବିସତ୍‌ ବକ୍ତା । ମେଁ ପେ ନ୍‌ସା ପାର୍‌ତନା ଡିଙ୍ଗ୍‌ଏ । ପେ ମ୍ୱ୍ର ପେଲେଏ । ମାତର୍‌ ଅଃନା ସାରାକେ ଆଃଆଣ୍ଡେ ନାବି ଣ୍ଡୁ, ତେଲା ଡିଲାଡିଗ୍‌ ନାଁ ସାପା ପରିବାର୍ ଏତେ ନାଗୁଏଃଏ, ଏନ୍‌ ମ୍ୟା ଲାଃଲା ।"

8 ଅବିମେଲକ ଞ୍ଜିର୍‌ନୁଗ୍‌ ତଡ଼୍ୟାଚେ ଚାକର୍‌ଇଂକେ ୱାଚେ ମୁସୁଡ଼ିଙ୍ଗ୍‌ ବିସଏରେ ବାସଙ୍ଗ୍‌କେ, ମେଇଂ ବୁଟଚେ ଜୁର୍‌ ଆର୍କେ । 9 ଏନ୍‌ ଇଡ଼ିଙ୍ଗ୍‌ ଅବିମେଲକ ଅବ୍ରହାମ୍‌କେ ୱାଚେ ବାସଙ୍ଗ୍‌କେ, ନାଁ ମେସା ନେ ଆଡ଼ାତ୍ରା ଦେକ୍‌ରକମ୍‌ ନାଡିଙ୍ଗ୍‌କେ ? ନାଁ ଜେ ଆନେକେ ବାରି ନେଁନେ ରାଜ୍ୟକେ ମ୍ନା ପାପ୍‌ ନାରାଡିଙ୍ଗ୍‌କେ, ନେ ନାଁନେ ବିରଦ୍‌ରେ ଦେକ୍‌ରକମ୍‌ ମେଃନେ ଦସ୍‌ ଡିଙ୍ଗ୍‌ ନେବକେ ? ନାଁ ନେଁନେ ଆଡ଼ାତ୍ରା ମାଡିଂନେ କାମ୍‌ ନାଡିଙ୍ଗ୍‌କେ । 10 ଅବିମେଲକ ଅବ୍ରହାମ୍‌କେ ବାରି ବାସଙ୍ଗ୍‌କେ, ମେଃନ୍‌ସା ନାଁ ନେଙ୍ଗ୍‌ ଆଡ଼ାତ୍ରା ଦେକ୍‌ରକମ୍‌ କାମ୍‌ ନାଡିଙ୍ଗ୍‌କେ ?

11 ଅଃତେନ୍‌ବେଲା ଅବ୍ରହାମ୍‌ ବାସଙ୍ଗ୍‌କେ, ଏନ୍‌ ଦେସ୍‌ନ୍ୟା ପର୍‌ମେସର୍‌ନେ ଆଡ଼ାତ୍ରା ବୁଟଣ୍ଡ୍ରେ ଣ୍ଡୁ, ଏନ୍‌ ନେଙ୍ଗ୍‌ ମ୍ୱାବେକେ । କ୍ମେଇଂ ନେଙ୍ଗ୍‌ନେ ସେଲାମ୍ବୁଏଃକେ ଲବ୍‌ ଡିଙ୍ଗ୍‌ଚେ ଆନେଙ୍ଗ୍‌ ବାଗୁଏଃ ବିଆର୍‌ଏ । 12 ମେଁ ନେଙ୍ଗ୍‌ନେ ସେଲାମ୍ବୁଏଃ, ମାତର୍‌ ମେଁ ଡିଗ୍‌ ନେଙ୍ଗ୍‌ନେ ତନା । ମେଁ ଡିଙ୍ଗ୍‌ଡିଂକେ ନେଙ୍ଗ୍‌ ଆବାନେ ମୁଇଂ ଗଡ଼େଅ । ମାତର୍‌ ମେଁ ନେଙ୍ଗ୍‌ ଇୟାଙ୍ଗ୍‌ନେ ଗଡ଼େଅ ଣ୍ଡୁ । 13 ଉଡ଼ିବେଲା ପର୍‌ମେସର୍‌ ଆନେଙ୍ଗ୍‌ ଆବାନେ ଡୁଆବାନ୍‌ ସ୍ଲ ୱାଡୁଙ୍ଗ୍‌ୱେକେ, ଆତେନ୍‌ ବେଲା ନେଙ୍ଗ୍‌ ସାରାକେ ମ୍ୱାସଙ୍ଗ୍‌କେ, ନାଁ ନେଙ୍ଗ୍‌ ଆଡ଼ାତ୍ରା ଦୟା ଡିଙ୍ଗ୍‌, ନେ ଆଣ୍ଡି ଆଣ୍ଡିନେ ଜାଗା ନେୱେଏ, ଆତେନ୍‌ ଆତେନ୍‌ ଜାଗାନ୍ୟା ନାଁ ଆନେଙ୍ଗ୍‌ ବୟାଁ ଡାଗ୍‌ଚେ ନାବାସଙ୍ଗ୍‌ଏ ।

14 ଆତେନ୍‌ ବେଲା ଅବିମେଲକ ସାରାକେ ଆଃଆଣ୍ଡେ ବିଃକେ ଡିଗ୍‌, ମେଣ୍ଡା, ଅରେଃ ବାରି ଚାକର୍‌ଇଂକେ ଡୁଙ୍ଗ୍‌ପାଙ୍ଗ୍‌ଚେ ଅବ୍ରହାମ୍‌କେ ବିକେ । 15 ଇଡ଼ିଂ ଅବିମେଲକ ବାସଙ୍ଗ୍‌କେ, କେଲା, ନେଁନେ ସାପା ଦେସ୍‌ ନାଁନେ ସାମ୍ନାନ୍ୟା ଲେଃକେ, ନାଁନେ ଆଣ୍ଡିଡାଗ୍ରା ଇକ୍‌ଚା, ଆତ୍‌ଡାଗ୍ରା ବାସା । 16 ଅବିମେଲକ ସାରାକେ ବାସଙ୍ଗ୍‌କେ, "ନେଙ୍ଗ୍‌ ନାଁନେ ବୟାଁକେ ଅଜାର୍‌ ଗନ୍ଦା ରୁପା ମ୍ବିଃଗେ । ନେଙ୍ଗ୍‌ ଦେକ୍‌ରକମ୍‌ ଡିଙ୍ଗ୍‌ଣ୍ଡିଂକେ, ଡାଗ୍ଲା ନେଙ୍ଗ୍‌ ବାବେଣ୍ଡିଙ୍ଗ୍‌ ଜେ ମେଃନେ ଡିଙ୍ଗ୍‌ ମ୍ୱକେ; ବୁଲ୍‌ ଡିଙ୍ଗ୍‌ମ୍ୱକେ । ନେଙ୍ଗ୍‌ ଚାଏଁଣ୍ଡିଂକେ, ସାପାରେ କେଆର୍‌ଲେ ବାରି ମନେ ତ୍ଲାଗ୍‌ଆର୍‌ଲେ ଜେ, ନେଙ୍ଗ୍‌ ଟିକ୍‌ ଡିଙ୍ଗ୍‌ମ୍ୱକେ ଡାଗ୍‌ଚେ ।"

17 ଅବ୍ରହାମ୍‌ ପର୍‌ମେସର୍‌ନେ ଡାଗ୍ରା ପାର୍‌ତନା ଡିଙ୍ଗ୍‌କେ । ପର୍‌ମେସର୍‌ ଅବିମେଲକକେ, ମେଁନେ ସେଲାମ୍ବୁଏଃକେ ବାରି ଚାକର୍‌ବୁଏଃଇଂକେ ନିମାଣ୍ଡା ଆଡିଙ୍ଗ୍‌କେ । ଆତ୍‌ବାନ୍‌ ମେଇଂନେ ଗଗିସିଆ ଜନମ୍‌ ଡିଙ୍ଗ୍‌କେ । 18 ଅବ୍ରହାମ୍‌ନେ ସେଲାମ୍ବୁଏଃ ସାରା ନ୍‌ସା ମାପ୍‌ରୁ ଅବିମେଲକନେ ସାପା ସେଲାମ୍ବୁଏଃଇଂନେ ଗର୍ବ ବନ୍ଦ୍‌ ଆଡିଙ୍ଗ୍‌ବଗେ ।