ଆଦି 6

ରେମୁଆଁଇଂନେ କରାପ୍‌ କାମ୍‌

1 ଦେକ୍‌ରକମ୍‌ ଉଃଡ଼ିବେଲା ମଚ୍‌ପୁର୍‌ନ୍ୟା ରେମୁଆଁଇଂନେ ସଂକ୍ୟା ଜାବର୍‌ ଡିଂନେ ଲାଗେକେ ଆରି ମେଇଂନେ ଗୁଲୁଏ ସେଲାମ୍ବଃଅ ଜନମ୍‌ ଡିଙ୍ଗ୍‌ଆର୍‌କେ; 2 ଅଃତେନ୍‌ବେଲା ପର୍‌ମେସର୍‌ନେ ଉଂଡେଇଙ୍ଗ୍‌ ରେମୁଆଁଇଂନେ ସେଲାମ୍ବଃଅଇଂକେ ସୁନ୍ଦର୍‌ କେଚେ, ମେଇଂ ଆଜାକେ ଇକ୍‌ଚା ଡିଂଆର୍‌କେ, ତେନ୍‌ ସାପାରେନେ ବିତ୍ରେବାନ୍‌ ବିବା ଡିଂଆର୍‌କେ । 3 ତେଲା ମାପ୍‌ରୁ ବାସଙ୍ଗ୍‌କେ, ନେନେ ଆତ୍ମା ରେମୁଆଁ ବିତ୍ରେ କାଲାଆଃ ଆଜାର୍‌ ଣ୍ଡୁ, ମେଃଡାଗ୍‌ଲା ମେଇଂନେ ବିପଦ୍‌ ଗାଲି ଅଲେଙ୍ଗ୍‌ନେନ୍ନିଆ ମେଇଂ ଚିଲି ମାତର୍‌; ଏନ୍‌ସାଃ ମେଇଂନେ ବେଲା ଶହେ କୁଡ଼ିଏ ମୁଆଁ‌ ଡିଂଏ । 4 ଆତେନ୍‌ ବେଲା ମଚ୍‌ପୁର୍‌ନ୍ୟା ମ୍ନା ମ୍ନା ରେମୁଆଁଇଂ ଲେଃଆର୍‌ଗେ; ବାରି ତେନ୍‌ ଇଡ଼ିଂ ପର୍‌ମେସର୍‌ନେ ଉଂଡେଇଂ ରେମୁଆଁଇଂନେ ସେଲାଇଂ ଏଃତେ କୁଡ଼େଃମାଡ଼େଃ ଆର୍‌କେ, ମେଇଂନେବାନ୍‌ ଗଡ଼େଇଂ ଜନମ୍‌ ଡିଂଆର୍‌କେ; ମେଇଂ ଡିଗ୍‌ ଅଃସେ କାଲ୍‌ନେ ଜନାସୁନା ବୀର ଲେଃଗେ ।

5 ଆରି ମାପ୍‌ରୁ କେକେ ଜେ, ମଚ୍‌ପୁର୍‌ନ୍ୟା ରେମୁଆଁଇଂନେ ପାପ୍‌ ଜାବର୍‌ ଡିଂୱେଗେ, ଆରି ମେଁନେ ମନ୍‌ନେ ବାବ୍‌ନାନେ ସାପା ଚିନ୍ତା କାଲାଆଃ କାରାପ୍‌ ମାତର୍‌ । 6 ଏନ୍‌ସାଃ ମାପ୍‌ରୁ ମଚ୍‌ପୁର୍‌ନ୍ୟା ରେମୁଆଁକେ ଆଃରେକ୍ନେ ନ୍‌ସାଃ ଅନୁତାପ୍‌ ଡିଂଚେ ମନ୍‌ ବିତ୍‌ରେ ଦୁକ୍‌ ଡିଂକେ । 7 ତେସା ମାପ୍‌ରୁ ବାସଙ୍ଗ୍‌କେ, ନେଙ୍ଗ୍‌ ସାପା ରେମୁଆଁଇଂକେ ଦଂସ ଡିଙ୍ଗ୍‌ମ୍ୱିଏ; ଆଣ୍ଡିନେ ନେଙ୍ଗ୍‌ ତିଆର୍‌ ଡିଙ୍ଗ୍‌ମ୍ୱକେ, ନେଙ୍ଗ୍‌ ସାପା ରେମୁଆଁ, ପସୁ ବାରି ସାପା ତୁବନ୍ୟା ଅଲେଙ୍ଗ୍‌ନେ ପ୍ରାନିଇଂକେ ଦଂସ ଡିଙ୍ଗ୍‌ମ୍ୱିଏ । ବାରି ତ୍ରିଗ୍‌ଡ୍ୟାନେ ସାପା ପ୍ଲିଗ୍‌ ବଂସକେ ଡିଗ୍‌ ଦଂସ ଡିଙ୍ଗ୍‌ମ୍ୱିଏ । ମେଃନ୍‌ସାଡାଗ୍ଲା କ୍ମେଇଂକେ ତିଆର୍‌ ଡିଙ୍ଗ୍‌ଚେ ନେଙ୍ଗ୍‌ ଦୁକ୍‌ ଡିଂଣ୍ଡିଂକେ ।" 8 ମାତର୍ ନୋହ ମାପ୍‌ରୁନେ ମ୍ମୁଆଃନ୍ୟା ଅନୁଗ୍ରହ ବାଆର୍‌କେ ।

ନୋହନେ ଉଃସ୍ରା

9 ଏନ୍‌ ନୋହନେ ବଂସକୁଲ୍‌ ଲେଃଗେ । ନୋହ ମୁଇଂ ଦରମ୍‌ ରେମୁଆଁ ଲେଃଗେ ବାରି କାଲାଆଃ ପର୍‌ମେସର୍‌ନେ ଗାଲି ଅଲେଙ୍ଗ୍‌କେ । 10 ନୋହନେ ଞ୍ଜିକ୍ଲିଗ୍‌ ଉଙ୍ଗ୍‌ଡେ ଲେଃଗେ । ମେଇଂ ଡିଙ୍ଗ୍ଆର୍‌କେ ଶେମ, ହାମ ଆରି ଯେଫତ୍‌ । 11 ଆତେନ୍‌ ବେଲା ମଚ୍‌ପୁର୍‌ ପର୍‌ମେସର୍‌ନେ ସାମ୍ନାନ୍ୟା କାରାପ୍‌ ଲେଃଗେ ଆରି ମଚ୍‌ପୁର୍‌ କରାପ୍‌ ଗାଲି ପାକା ୱେଲେଃଗେ । 12 ବାରି ପର୍‌ମେସର୍‌ ମଚ୍‌ପୁର୍‌ଅରିଆ କେକେ ଜେ, ଆତେନ୍‌ କାରାପ୍‌ ଡିଙ୍ଗ୍‌ୱେଲେଗେ, ଡିରକମ୍‌ କି ମଚ୍‌ପୁର୍‌ନେ ସାପା ପ୍ରାନି କାରାପ୍‌ ଡିଙ୍ଗ୍‌ୱେ ଲେଃଆର୍‌କେ ।

13 ତେସା ପର୍‌ମେସର୍‌ ନୋହକେ ବାସଙ୍ଗ୍‌କେ, "ନିଂ ଡାଗ୍ରା କ୍ଲିଗ୍‌ ପ୍ରାନିନେ ସାରାସାରି ବେଲା ପିଙ୍ଗ୍‌ଚାଃଗେ; ମେଃଡାଗ୍‌ଲା ମେଇଂନେ ବାନ୍‌ ମଞ୍ଚ୍‌ପୁର୍‌ କାରାପ୍‌ଅରିଆ ବର୍ତି ଡିଂଲେଃକେ; ବାରି କେଲା, ନିଂ ଦର୍‌ତନି ଏଃତେ ଆମେଇଂକେ ବିନାସ୍‌ ଣ୍ଡ୍ରାଃଡିଂଏ । 14 ନାଁ ଦେବଦାରୁ ସୁଆ ଏତେ ମୁଇଂ ଜାହାଜ୍‌ ତିଆର୍‌ ଡିଙ୍ଗ୍‌ । ଆତ୍‌ଅରିଆ ବିନ୍‌ବିନ୍‌ ବାକ୍ରା ଆରେଚେ ଆତେନ୍‌ ବିତ୍ରେ ଆରି ବାଏରେ ଦୁପ୍‌ ଏତେ ଲିଗ୍‌ବୁର୍‌ବି । 15 ଆତେନ୍‌ ଜାହାଜ୍‌କେ ଦେକ୍‌ ରକମ୍‌ ତିଆର୍‌ ଡିଙ୍ଗ୍; ଚ୍ଲେ ଞ୍ଜିସ ନ୍ତି, ଅସାର୍‌ ପଚାସ୍‌ ନ୍ତି, ତିଆର୍‌ ତିରିସ୍‌ ନ୍ତି ଡିଙ୍ଗ୍‌ଏ । 16 ଆଡ଼ାତ୍ରା ମୁଇଂ ନ୍ତି ଆନ୍ତାର୍‌ଚେ ଜର୍‌କା ତିଆର୍‌ ନାଡିଙ୍ଗ୍‌ଏ, ଆତେନ୍‌ ଜାହାଜ୍‌ନେ ଗାଲି ଲେଃଏ । ଆରି ଆତ୍‌ଅରିଆ ମୁଇଂ, ମ୍ୱାର୍‌ ଆରି ଞ୍ଜିକ୍ଲିଗ୍‌ ମହଲା ତିଆର୍‌ ନାଡିଙ୍ଗ୍‌ଏ । 17 ତ୍ରିଗ୍‌ଡ଼୍ୟା ବୁନ୍ଦେ ଉଡ଼ି ଜିବ୍‌ ଜନ୍ତୁ ଲେଃଆର୍କେ, ଆତେନ୍‌ ସାପା ନସ୍ଟ ଡିଙ୍ଗ୍‌ ନ୍‌ସା ନେ ମଚ୍‌ପୁର୍‌ ଆଡ଼ାତ୍ରା ବନ୍ୟା ନେଡିଙ୍ଗ୍‌ପା, ତେଲା ମଚ୍‌ପୁର୍‌ନେ ସାପା ପ୍ରାନି ଗୁଏଃଆର୍‌ଏ । 18 ନେଙ୍ଗ୍‌ ପେ ଏତେ ମୁଇଂ ନିଅମ୍‌ ଣ୍ଡିଙ୍ଗ୍‌ଏ । ବାରି ନାଁ ନାନେ ସେଲାମ୍ବୁଏଃ, ନାନେ ଗଡ଼େଇଂକେ ବାରି ନାନେ ଗଡ଼େଇଂନେ ସେଲାମ୍ବୁଏଃଇଂ ସାପାରେ ଜାହାଜ୍‌ନ୍ୟା ୱେଆର୍‌ଏ । 19 ପାରାନ୍‌ ରକ୍ୟା ନ୍‌ସା ସାପା ରକମ୍‌ନେ ଜିବ୍‌ଜନ୍ତୁ ମୁଇଂ ମୁଇଂ ସେଲାମ୍ବୁଏଃ ଙ୍ଗିର୍‌ବୁଏଃ ନିଜେନେ ଏତେ ସାଚେ ଜାହାଜ୍‌ନ୍ୟା ଗାଆର୍‌ଏ । 20 ସାପା ରକମ୍‌ ପ୍ଲିଗ୍‌, ସାପା ରକମ୍‌ ପସୁ ବାରି ସାପା ରକମ୍‌ ତୁବନ୍ୟା ଅଲେଙ୍ଗ୍‌ନେ ଜନ୍ତୁ ସାପା ଜାତିବାନ୍‌ ମୁଇଂ ମୁଇଂ ସେଲାମ୍ବୁଏଃ ଙ୍ଗିର୍‌ବୁଏଃ ପାରାନ୍‌ ରକ୍ୟା ନ୍‌ସା ନାଁ ଡାଗ୍ରା ପାଙ୍ଗ୍‌ଆର୍‌ଏ । 21 ଆରି ନାଁ ନିଜର୍‌ନେ ବାରି ମେଇଂନେ କା‌ଦି ନ୍‌ସା ସାପା ରକମ୍‌ନେ ଜିନିସ୍‌ଇଂ ଡୁଙ୍ଗ୍‌ ପାଙ୍ଗ୍‌ଚେ ନିଜେନେ ଡାଗ୍ରା ରାସିଙ୍ଗ୍‌ ନାବଏ । 22 ଆତ୍‌ବା ନୋହ ଦେତ୍‌ରକମ୍‌ ଡିଙ୍ଗ୍‌କେ; ନୋହ ପର୍‌ମେସର୍‌ନେ ସାମୁଆଁ ପାଲନ୍‌ ଡିଙ୍ଗ୍‌କେ ।"